الحلقة الاولى
-------------------
شقه اربع غرف .. الصبح الساعه 6 ..
روحية : قوموا يا بنات هتتأخروا على المدرسه ..
تدخل روحيه اوضه فيها سرير صغير وسرير تانى بدورين
روحيه : قومى يا مهد .. يلا يا حبيبتى هتتأخرى على المدرسه
مهد : حاضر يا ماما صحى القردتين الاول انتى عارف انى مبتأخرش فى اللبس ولا بتلكع زيهم
تظهر وعد من الطابق العلوى للسرير الاخر
وعد : سمعتك على فكره !! بقا احنا لكاعيين ..
مهد : ايوا لكعيين
وعد : قومى يا عهد اسمعى اختك الكبيره !!
عهد : كبيره مين دا هو فرق سنه .. اسكتى اسكتى سييها بس السنه دى هى ثانويه عامه اما نشوف هتعمل ايه
روحيه : خلصتوا لماضه منك لها لها .. اهى كلها سنه وتبقوا انتو مان ثانويه عامه ونشوف هتعملوا ايه
يلا منك لها قومى وبطلوا لكاعه على ما اروح اصحى اخوكوا
مهد : ماما هو بابا نزل ولا لسه ؟!!
روحيه : نزل يا مهد ومتقلقيش ساب فلوس درس الكيميا ...
"مهد بتقوم من على السرير وبتبوس روحيه "
مهد : تسلميلى يا ماماتى
---------------------
شقه الاستاذ كامل
كامل : سلوى صحى الزفت اللى نايم دا مش وراه مدرسه ..
سلوى : طيب طيب الواد طول اليوم بيذاكر
هانى : انا صاحى يا بابا من غير ما تزعق والله صاحى يا حاج
كامل : مش تقعد تفطر زى البنى ادمين .. لما انت صاحى مجتش تفطر ليه
هانى : معلش يا حاج عديهالنا بقا .. المهم بس النهارده اول الشهر وجيبى الفاضى بيسلم عليك
كامل : قول كدا بقا عاوز مصروفك ..
سلوى : ربنا يخليك لينا يا ابو هانى !
كامل : طب خد يا مغلبنى اما نشوف اللى مصبرنى عليك انك مكسفتنيش السنه اللى فاتت
هانى : ومش هكسفك السنه دى يا حاج ان شاء الله
صيدلة زى ما كنت بحلم وانت بتحلم
سلوى : ربنا ينجحك يا ابنى وينولك اللى فى بالك
كامل : يارب
وتفتح سلوى علشان تخرج الزباله فى نفس الوقت تكون روحية فاتحه الباب بتودع بناتها اللى رايحين المدريه
روحيه : سلام يا مهد خدى بالك من اخواتك
وعد : تاخد بالها من مين دا احنا اللى ناخد بالنا منها
