كم بي من الشوق يحدوني لرؤيتكم.. لمبسم صادق بالحب قد نطقا.. لأخوة لم يزل قلبي يحن لهم.. لهم فؤادي بنبض الحب قد خفقاً.. كنا جميعاً وحب الله يجمعنا.. والصدق رمز لنا كالنجم إذ برقا.
مساء محمل بالياسمين احبتي...
مدخل ..
رواية.. يا قاتلي هل لي بكلمة
بقلمي.. سمو العراق
مشهد
دارت بينه دائرة الحياة واستقرينا بمستنقع من الظلم واليأس نتعب نحزن وممكن نلكه الحل ونلگة من يقتطفنه من هذا المصاب
لكن للاسف ماكو ودخلنا بمتاهات مالهن حدود
هذا الألم الموجع الحد النخاع كل شي انتهى واتلاشى وغاب ما ظل بس العذاب والظلم
حياة سودة
واقع مر
روح مسلوبه
طليت من شباك الاستقبال وكل اعضائي ترتجف شفت الوجوه سوده وتعبر عن القساوه والجلافه يترأسها العن خلق الله شيطان بهيئة انسان وهو ينطي الأوامر
شيبات كثيفه ملامح جلفيه حاده لابس العكال ومعين روحه شيخ ويحكم بالحق والباطل وهو ما يعرف عنها شي
نزع عكاله وهو يكول .. هذا العكال للفه للحظ ولفه للبخت وانا اطلع لا عندي حظ ولا بخت اذا خليتها دقيقه بهذا البيت صار لازم نقتص منها ونغسل عارنا ونرفع راسه بين العشاير
ردت عليه الحجيه وهي تكول.. عوفوا هاي السالفه سامحوها صغيره ما تفهم وغلطت
انتفض من مكانه وهو يكول ... لاااا من أمن العقاب سئ الادب
من الضروره العقاب القاسي.شنهيي كلمه صغيره.اكو اخطاء تسامح واكو اخطاء لاتغفر.اذا واجهت رد قوي وتحاسبت ع خطأ مستحيل يتكرر بعد وهاي عبره مو بس الها لان هي باعتبار جثه هامده هي عبره لغيره لكل وحده بالعشيره
وكف واشر باصبعه بجبروت وغضب على الشباب الكاعده ...تردون تمشون وانتم منكسين لروس لو تردون تخلون الشرف وسام ومعلگ بصدركم ؟
ردوا بتهويس وضجه ... نريد الشرف وكلنه كتالين احنه نتسابق على كتلها
ضحك بسخريه وهو يكول ... محد يكتلها غير راعيها
رفع عيونه بذهول اله وفاق من شروده وصدمته وهو ياشر على نفسه ... اني !!
ابتسم بخبث وهو يكول ... اي انت ملك يمينك هي وايدك هي لتأخذ الحق وتلم شمل العشيره بعد ما تشتت ولا تنسى ضحايا راحت من وراها وبشر القاتل بالقتل قتلها مذكور بالقران ولازم نطبقه
وكف بانتفاضه عارمه وهو يسحب سلاحه ... انااا كتااالها
ابتسم بحقاره بعد ما حصل على غايته لك
لكن عمتي الها راي اخر لزمته بغضب وهي تكول ...القاتل ماله ضمير لتصير قاتل يمه هاي محكمه مو عادله والقاتل ما اله راحه لا دنيا ولا اخره
باوع لعمته وصك على اسنانه وهو يكول ...الي يستحق الموت لازم يموت يمه
شهكت بصدمه من قساوته .. راااح ترجع عليك اعمالك بيوم من الايام تدور الراحه ومتلكاها تقتل بريئة حتى تنجي من العار ليهوى للجحيم ما ينجى من العار لا تبيع ضميرك لتتجاهل مشاعرك لا تستسلم
سحب نفسه من عمته بقسوه وتوجهه الغرفتها والشيطان يتبعه بكل فخر ونشوه وانتقام
دخلوا عليها وجان هو اول الواصلين
واكفه بانكسار بوسط الظلام
وجهه شاحب روح مسلوبه
قلب معصور عيون تذرف بدل الدموع دم
هذا حالها !!
اهتز المسدس بيده بس واجهه وشاف منظرها المريع
غرفه ظلمه والقمر شاهد على جريمه من بين الغيوم
همس اله عمه وهو يكول .. شنو حكم الي لوث ماضينا ومستقبلنا وشرفنا بالعار ؟
رمقه بطرف عينه والمسدس موجهه عليها وملامح جافه وجامده وعيون سوده فارغه مثل الهاويه
كمل كلامه باستفزاز وهو يكول ..الذكريات ما تنسى بس احنه لازم نطم هالذكرى وما نعتبرها موجوده راح ننساها ونتحداها ونرتاح من كلام العالم ومن بصمة العار انت راح تكون كدها وكدود انت الي نفتخر بيه بين العشيره ونكول رفع راسنه وطم عارنا
رجع باوعلها رمشت بعيونها المبلوله جانت تترجاه بنظراتها يخلصها من عذابها وحزنها والموت بالنسبه الها رصاصه رحمه رجعت تشجعه بنظراتها وتطمنه ان هي راضيه بقتلها وما راضيه بعذابها
همس من اسنانه وايده ثابته عليها والمسدس ما اهتز غير مره وحده ...انتِ الجاني والمجني عليه والقاضي دمرتي نفسج بنفسج الموت قليل بحقج
ضغط ع الزناد وعمته فزعت بغضب ... لا يمه لااا لتتلطخ ايده بالدم ما ينتظره غير الجنون والله تجن وتتخبل والله هاي بريئة مظلومه لا تصير انت والزمن عليها
ما همته توسلات امه هو والعشيره انطو قرارهم وكل مؤيد لموتها ولكل يوسوس ويصيح ويشجعه على قتلها
اما هي رفعت اصبعها وفتحت شفايفها تطلب منه تحجي كلمه الكلمة الي ما نطقتها وما لحكت تحجيها وما عرفنه شتريد
ما سمع منها واطلق رصاصته وتناثر دمها العزيز على جدران الغرفه
والمسدس وكع عند رجليه بعد ما اعلن عن جريمته
ظلت تشهك وترافس وهي تنازع الموت
والبيت ضج بالصراخ والنحيب
تقرب منه الشيطان وهو يطبطب ع كتفه ... بعد ما فطست مالها دفن اشمروها بأي حاويه
نهاية المشهد
اعلن عن بداية روايتي الجديده واسال من الله التوفيق حتى نبدي بيها
روايه لايوجد للفرح الكثير بين حناياها تعبر عن واقع مر ومجتمع ذكوري بحت
انتظروني الخميس باول بارت ان شاءالله ♥️
ما إذا سألتوني عن بديلة الدم للامانه حاولت اكتبها واتصافه ويه ابطالها لكن ما تفقنه وظلت الى شعار اخر
لا تنسوا التصويت والمشاركه ولا تحرموني من تعليقاتكم على اول مشهد للروايه
كونوا انتم كونوا بخير .. احبكم 💔🫂
اختكم .. نور
