جنة فؤادي

جنة فؤادي الجزء العاشر

جنة فؤادي
الجزء العاشر

#zainab_alnajar

-‏وهل يُعاقب الكاذب عند ربه حين يُخبر الناس انه
بخير وهو يتالم؟.💔

حارث
صارلي يومين ما احجي ويه امي الحمدلله سجى اختي موجودة ومن احتاج شئ اگولها
من شفت تصرفها مع زبيدة گايله لسجى اختي عندي شغلة وطالعة .. ورجعت للبيت تگولي شبسرعة گالتلك وحتى تعرف هي شگد خبيثة .. من گلتلها اني شفتج صارت تحجي كلام كأن اني مو ابنها .. حياتي كلها اني الابن البار المطيع الها برغم كرار هو الكبير بس عمري ماعارضتها ولا رفعت صوتي عليها حتى من زوجتني واختارت دينا گلت مايخالف لخاطرها حتى ترتاح هي وياها ودست على نفسي لأن اعرف دينا مغروره من زمان .. طول مده زواجي كنت اعاني دوم تحسسني هي افضل مني ولازم اكون ممنون لان قبلت بيه وطلباتها اوامر بكل الطرق لازم فلوس متوفرة حتى لو دين و تسافر وتطلع .. حتى اطفالها كانت عبارة عن كتله انانية نفسها وبس وهم ما تهتم بيهم والي شجعها امي كل شيء تسوي بمكانها بس حتى لا يطلع اختيارها خطأ  وحتى اخوها لايزعل
اخير كلام كان لأمي تگولي اذا تفكر تتزوجها لا تفكر عندك ام .. زين ليش .. ليش ماتكون مثل باقي الأمهات وتفكر بسعادتي .. وزبيدة شلون اريد احاجيها واقنعها وهي شافت وسمعت موقف امي ..
جنت بيت نزار گاعد بس بالي بعيد
_ شبيك حارث مو احاجيك
_ نزار گولي شنو اسوي والله تعبت من التفكير .. اذا داومت شنو أگولها خطية وامي شگد جرحتها ..
_ تصرف عادي هسه يا اخي ومن يصير لك مجال اعتذرلها .. زين اتصل بيها
_ اتصل لو مغلق لو ماتجاوب .. والله حقها لبنية هاي فوگ زينها لا وهاي ثاني مرة تأذيها
_ حارث تدري حبك مفضوح .. يعني بأيام الكلية گضيتها ونسه وماحبيت ولا ارتبطت جانوا البنات هم يجون عليك وماتدير بال الوحدة
جريت جگارة ورثتها
_ اااخ نزار .. تدري شنو هي مثل النسمة .. ولك رقيقة حيل وطيبة عندها حنية ماشايف مثلها حتى من امي شوف مو كنتو تگولون انت حلو والبنات تموت عليك .. بس ما حبيت ولا تعلقت ولا عجبتني وحده بيوم مثلها .. تدري نزار .. اكو غصه بگلبي هسه ومخنوگ لأن هي مقهورة لا وفوگ هذا اني السبب بيها .. هي لبنيه قليلة حظ هواية تأذت وتكابر وماتحجي تشوفها مستمره بحياتها وما مأذيه احد بس الاذية تجي ليمها
_ هسه مافهمت .. تحبها لو تشفق عليها
_  والله شأگولك نزار .. احبها اي  .. و أحبها هواية .. ياريتها هسه گبال  عيوني واراضيها واشيل همها ياريت
_ انت محتاجها اكثر من ما هي محتاجتك ياخوية الله يعينك .. گوم نطلع ولك شوف عيونك مدمعات .. اول تالي  علمود مره
_ اذا نزلت دموعي من وره امي .. يالله امشي نطلع
..
…
زبيدة
رجعنا  اني وبابا من بيت عمي وبداخلي هم جديد وكلام احمد وخوفي من زوجته لا تذكرني بسوء واني مالي ذنب .. وهم انقهرت على احمد بس الزمن كفيل ينسي والله يحبه لان لو صايرة قسمتنا جان ماگدر يتزوج عليه مثل طارق بأعتبار بت عمه ومايگدر يكسر گلبي .. اتصلت نيفين .. جان كل شيء جاهز لسفرنا بس بعد باجر اشوف اجازتي واحجز
بقيت احضر كل شيء نحتاجة واذا حاجة نقص سجلتها بورقة حتى اشتريها..  صار الليل تمددت والموبايل بأيدي ادخل للفيس لصفحة حارث وافتر بالصور .. اقربها وابعدها واقرا تعليقات اصدقائه هوايه اكثر من 300 تعليق
اكو فيديو اله بأربيل بالشلال وضحكته لابس تيشيرت كت اسود وبنطرون اسود وهو اشگر احلى كل جماعته وكلهم قريبين عليه
طلعت ودخلت انستا..  ورجعت فتحت واتس آب اخير ضهور قبل دقايق يعني گاعد
بس اني ليش هيج مهتمه يووو شدا اسوي اني طفيت الموبايل خلي انام احسن .. بس اول ماغمضت تذكرت من لمس خدي .. ايده جانت مو دافية لا حااارة كلش
اوووووه حارث اليوم ماتطلع من راسي .. گمت شربت مي وافتر بالبيت اريد اي شيء يشغلني ..
استسلمت ورجعت ماريد اعترف لنفسي .. طريقنا كله اشواك ويمكن اني مو باله اصلاً
رجعت اتذكر احمد .. اوووف يا احمد ما اريد اخلي مشاعر بداخلي اله حتى لايكون عنده امل بيوم اقبل ويدمر عائلته .. اتذكر خوفه من نفسة علية .. شگد كبر بعيوني من گلي ما اريد ادنس طهارتج بعيوني..
بالگوه نمت كم ساعة وگعدت رحت اخذت الموافقة على الاجازة اخذت شهر واذا احتاجيت اكثر اقدم بدون راتب  حجزت عد مكتب سفريات رحلتنا يوم الثلاثاء ..  ورحت للشركة ... كل ما يقترب الطريق تزيد دگات گلبي .. مشتاقة اشوفه .. وما اريد كلام امه هواية اذاني . لازم ابتعد عن طريقة .. يارب ساعدني
نزلت من السيارة رحت لغرفة المدير رأسا وقعلي وگال بنتي اذا تحتاجين اجازه اطول عود اتصلي بينا ونساعدج .. الله مايگطع حشا لله شگد فرق بين هذا وذلك القبله .. تشكرت منه وطلعت .. ضليت واگفه ادخل لو لا لغرفتنا .. سمعت صوته يحجي ويه ابو عباس جايبله جاي وصوت ضحكته رف گلبي كلش خليت ايدي افتح الباب بعدين ابتعدت
رحت على وفاء سلمت عليها عاتبتني لأن ماجاوبتها .. وگلتلها راح اسافر بس ماريد اي احد يعرف حالياً بعد ما اسافر خلي يعرفون وخصوصاً حارث
_ ليش ياعيني .. خطية والله ما مرتاح كل شوية يجي يسألني ماجاوبتج ماعرفتي شئ عن اخبارها
_ خليني ابتعد وفاء .. حجيتلج موقف امه وشنو رأيها بيه .. تتصورين ارتاح وياها
اكيد لا
المشاعر مو كل شيء بالدنيا ليش الله نطانه عقل .. شنو يضل الگلب يتحكم بينا وبأرادتنا .. هذه فرصتي .. والابتعاد افضل للطرفين اقلها نفكر اكثر
_ ولو كان .. انتِ جاي تگولين امه هو شنو دخله
_ أگولج هو ليش مهتم .. عادي يعني احنه زملاء وخلي تكون حدود بيناتنا احسن .. بعدين شلون ما اهتم بموقف امه ليش هاي بنظرج قليلة
_ والله ما اعرف شسالفتكم حيرتوني
_ هههه ولا تحتارين يمعوده من ارجع ان شاءالله اسمع اخبار زينة واسمع بخطوبتكم انتِ وعلي
_ يارب يسمع منج
_ ادعيله لبابا يگوم بالسلامة .. راح اطلع اشتري الشغلات النقص عندي واشتري شوية ملابس جديدة
_ انتظري هسه ب 11 ونص خلي اخذ زمنيه واجي وياج 😉
_ يالله ياريت
طلعنا اني وياها واشترينا وتغدينا سوه واخذت غده البابا ضحكتني دمها خفيف .. وعلي هم اجه خابرته واستغلت الفرصة بالشركة مايگدرون يحجون .. اباوع عليهم شگد حلوه لمعه الحب بعيونهم .. ردت اتركهم گالتلي اخاف احد يشوفني من اهلي تالي شغلت نفسي عنهم حتى ياخذون راحتهم خطية .. بعدها سلم علي وراح واني رجعت وفاء وهي تبوس بيه لأن اول مرة ينفردون وأول مرة يلمس ايديها .. ودعتها وهي توصيني لا تتاخرين وراح اشتاقلج وخابريني هههههه وحركاتها ومرحها هاي لبنيه تستاهل كل خير

حارث
بقيت انتظر اليوم لازم اداوم . . من الصبح واني واگف بالشباك وعيني على الگراج كل شوية اگول راح تجي .. صارت ب 11 وهي ماكو ابو عباس جابلي جاي وسولفلي عن ابنه وضلينه نضحك عيني على الباب بعدني اتأمل .. طلع ابو عباس اخذت الجاي ورجعت للشباك اباوع طلعت هي ووفاء وصعدت بالسيارة وراحت .. يمكن ساعتها ردت اشمر روحي من الشباك واخلص من هذا العذاب .. شنو ذنبي وتعاقبيني شنو جريمتي .. يكفي بعد مابيه صبر .. شوكت جتي وين جانت وين راحت .، المن اسأل .. هي لو بس تجاوبني .. ااااخ يا صبر گلبي .. بس كافي بعد ما اتصل شنو ذليت نفسي .. اني ماسويتلها شئ حتى .. .. لا شلون ماسويت .. يكفي سوايت امي
خلص الدوام طلعت تعمدت افوت من فرعهم منطقتنا مو بعيدة عنهم بس مو طريقي
عبالك رب العالمين يريد يجبر بخاطري شفت سيارتها بالباب وباب البيت مفتوحة .. وگفت سيارتي شوية ابعد من بابهم هي تنزل اغراض من السيارة مندمجه ماشافتني
شوية ورفعت راسها شافتني جمدت بمكانها .. نظراتها ذبحتني .. كلها قهر وعتب وحزن وألم وكأنما حياتها ناقصة اجيت اني زيدتها .. تقدمت شوية هي انتبهت من صفنتها .. سمعت صوت حسام اخوها اجه يحاجيها
رجعت كعدت بالسيارة وراقبتها من بعيد لحد اخير لحظه من سدت بابهم
ما اعرف ليش مامرتاح والشغلاتزالي نزلتها وياها جنط سفر .. هاي شنو ناوية
بس لا يجوز محتاجتهن
اتصل بيها بالليل بلكي تجاوبني

زبيدة
من شفت حارث گدامي جان شكله حيل مبين مهموم حتى شعره الي يهتم بي كلش مخربط نظراته من واحد حاير .. بس شبيدي اني .. مو انا الي افرض روحي بحياة احد .. ومادام هذا موقف امه مستحيل راج ترضا عني ابد
وصلت حد خايفة من كل تصرف ومن كل كلمة

الايام بسرعة مرت وهاي گاعدة بالمطار ساعة 7 الصبح اني وبابا وصلنا حسان وهو يتعذر لان مايگدر يترك شغلة وگال وصيت قصي زوج نيفين هو هم مو غريب ابن خالي وان شاءالله ما يقصر واي شيء تحتاجون اتصلي بيه
تلفون بابا يدك اتصلوا بيت عمي يودعونا .حاجوا بابا ورجع نطاني التلفون سلم علية عمي واخذه احمد منه
_ محروسين بت عمي ربي يشافي عمي وترجعون بالسلامة
_ الله يسلمك تسلم
_ احم .. زبيدة ،، بصوت ناصي
_ نعم احمد گول
جر حسرة جبيرة _ ماكو شي اخذي راحتج مع السلامة
_ سلملي على الكل الوالدة ومسرة وزوجتك ورائد وسلطان
_ يوصل
سد التلفون وهاي حسرته اعرف هواية كلام .. بس خليني رسمية احسن
طلعت تلفوني حتى اقفله بعد مايصير بالطيارة و لان هذا الخط بعد مايشتغل هناك
بس دورت رقم حارث وكتب له اخير رسالة
صديقي
لا أُجيد الوداع غالباً ..
ولأول مرة تخونني الكلمات ..
بعد لحضات سأفارق ارضك وسمائك وهواك
ربما يكون هذا كفيل بتريب مانريد
كن بخير فقط
قبلاتي لأطفالك فقد اشتقت لهم جداً
ارسلتها ودموعي تنزل .. هل هو حقاً صديق !!
اغلقت موبايلي نادوا على رحلتنا صعدنا الطيارة وانا اباوع على بغداد والطائرة ترتفع لحد ما اختفت ارضها عن انظاري

توقعاتكم ورأيكم مهم
لا تنسون التصويت والضغط على نجمة 🌟 التصويت