الحلقه الخامسه عشر
روايه همس الذكريات
بقلم ✍ سحر فرج
عدى كذا يوم وعمر بدأ حالته تتحسن مع الوقت ونقلوه لاوضه عاديه ..
طول الفترة دى وريهام ما رجعتش على الفيلا خالص .. وكانت منه اللى بتروح تجيب لها كل اللى تحتاجه من هناك .
حاله ريهام كانت سيئه ونفسيتها وحشه جدا جدا .
كانت مانعه الاكل خالص ويادوبك عايشه على القهوة واكل بسيط جدا بعد محايله من سحر ومنه ومامتها معاها.
صلاح وهند كانوا رجعوا بعد تلت ايام من القريه علشان يكونوا مع ريهام وعمر وعلشان يطمنوا على صحته وحالته بعد العمليه .
صلاح .. عمر عامل ايه دلوقتى يا ريهام؟
ريهام .. الحمد لله احسن من الاول وحالته بدأت تستقر وربنا يعديها على خير .. انا معدش حد ليا خلاص الا هو بعد موت اسلام وفريده .
هند بدموع ماليه عينيها .. احنا جنبك يا حبيبتى ماتقوليش كده تانى .. ربنا يرحمهم ويصبرنا على فراقهم .
الفراق وحش اوى يا ريهام وانا خسرت امى واخويا وبنت اخويا فى لحظه ... ربنا يشفى عمر أن شاء الله .
ريهام .. يارب يا هند .
هند .. حبيبتى انا عوزاكى ترجعى على الفيلا وتغيرى هدومك وتريحى اعصابك شويه علشان تقدرى تكملى وتقفى على رجليكى تانى علشان خاطر ابنك .
ومتخافيش عليه انا هافضل معاه لحد ما ترجعى .
ريهام .. لا يا هند انا مش هامشى من هنا إلا وعمر معايا .. ومش هاقدر ارجع على الفيلا خالص خالص يا هند فهمانى .. مش هاقدر ادخلها وهما مش موجودين فيها .
وبدأت تعيط ريهام هى وهند وحاول صلاح ومنه أنه يهديهم .
عند جاسر فى الشركه كان قاعد مع عميل جديد وبيتكلم معاه عن اخر التطورات اللى هاينفذوها والتصميمات الأخيرة للفندق اللى هايتنفذ فى الساحل .
شادى دخل عليهم ورحب بالعميل وبدأ يشرح مع جاسر اخر التعديلات والتصميمات النهائيه للفندق .
وبعد شويه كانوا خلصه كلامهم والعميل مشى . وفضل شادى مع جاسر فى المكتب بيتكلموا مع بعض .
موبيل شادى رن وكانت مراته بتبلغه أنهم هاينزلوا على تمرين السباحه بتاع حسام .
حسام .. عاوز اكلم جاسر يا مامى بليز .
امل .. عيب يا حسام اسمه عمو جاسر . وبعدين استنى اقول لبابى يدهولك .
امل .. يا شادى خد كلم حسام عاوزك .
شادى .. طيب هاتيهوله الولد ده .
حسام ... ايوا يا بابى مش عاوزك انت انا عاوز جاسر .. قوله حسام عاوزك .
شادى .. بقى كده مش عاوزنى انا وعاوز جاسر .. كده يا حسام . وبعدين اسمه اونكل جاسر .
حسام .. خلص بقى يا بابى ... ملكش دعوة احنا صحاب انا وهو .
