(Please click on the video, to those who have not listened to the song yet. Enjoy, mga bisdak! :) )
"Taho... Taho.. Taho mo diha, Manoy!" "Pandesal init pa!"
Haaaaay! Puryagaba. Adlawan na pud. Mao gyud ni permi mabatian nako na singgit sa gawas sa among balay nga makamata na hinoon ko. Sayo pa gad sa kabuntagon. Ako dayong gisugat ang banwag sa mga adlaw sa may bintana nga nag mug-ot ang dagway. Pasensya na gyud intawon, adlaw. Hayag na apan makaluya gihapon ang mag pinuyo diri dapit lugara. Ambot ba pero basig pila ko katuig diria, diri pa gani ko nagdako ngano man gyud na makabatyag man kog kalaay diria.
Akong gihinay hinay ug kuso kuso akong mata. Mikanaog sa higdaanan ug hinay hinay apil sa pagbira sa habol ug gipilo kini. Dayon, gipatung-patong ang mga unlan. Wala ko'y labot ug nasunod-sunod ba ni gikan dagko padung gagmay basta mao nani. Laay man paminawon na kada adlaw, sukad na muili ko diria sa San Isidro, balik balik ra ang akong gibuhat. Ig mata, maligo human kaon tas mutambay. Mura ba'g wa may thrill oy. Ganahan unta ko makig laag sa akong mga classmates pag high school kaso asa naman intawon to sila mapalgan karon? Naa nasad to silay tagsa tagsa nga gikabusyhan unya usa pa pud, basain kachawan nasad ko nila bahin sa mga kabuang ra gud namo sa unta sa kadtong mga bata pa mi. Bagritis man gud ko. Dali ra kayo ko mapikon. Maayo lang ug ako ang manungog.
Kay wala mna lagi ko'y lain mahimo, gibuhat nalang nako akong mga buhatonon kada adlaw. Gitawag kog pamahaw ni Nanay. Dali-dali kong minaog sa among hagdanan na perti na kalisud again karon. Lahi ra atong bata pa ko na hala basin pag magpadidit pako diria, kaya ra kayo nako. Lahi na gyud ug matiguwang nata. Pagabot ko pa sa lamisa, kalami naman lang gyud sa akong naabtan. Di gyud ko kahimo ani ug sayon sayon lamang sa siyudad kay maconvenient eater naman ka labaw na ug nag boarding house raka tas strikto imong landlady, dili ka luto, basig pag magrice cooker lang ka kay mahal lagi daw ang kuryente. Nagluto si Nanay ug sinangag nga naay gihiwa-hiwa na hotdog ug naay sagol itlog pud. Among sud-an kay pinirito na Tuloy, paksiw na Tuloy, tas buwad pud na tuloy. Bahala na ug puro Tuloy basta lami pagkaluto. Taga Barangay Banat-I ko pero nahigugma gyud ko sa Tuloy na gipalit pa namo adto sa Motor.
"Ting, suroy gad pud panagsa sa lungsod. Dad-a lang gud nang motor. Lantaw- lantaw sad sa SI ba." Ingon akong Nanay samtang nagsagol sa patis ug suka nga sawsawan namo. "Na ayaw lang usa ma oy, basin naay makakita nako ba. Kagwapo baya kayo nako basain dagsaon ko's mga fans nako" Nakatawa akong Nanay sa akong joke basig waley kayo. Wa lang, mao man gyud na siya labaw nag makabatyag siya na wala pa gyud ko ulii sa akong kasakit.
Samtang nag kaon ming Nanay sige siya ug hisgot ug mga butang. "Ting, kahinumdom paka kadtong nanuroy mo sa balay sa imong classmate sa may tumoy sa Cabungaan? Nagdala man gani ka adtog tuba diris balay na puti, lami gani kayo to." "Kinsang classmate nako nay ba?" Maayo pa si Nanay kay wa kalimot sa akong mga aligre na panahon. "Nakalimot nasad ko nak. Dugaya na baya adto. Nakahinumdom ka ani, kadtong gisugilon nimo sa ako tungod atong perti ninyong dagana kay gigukod mos kabaw na gitugway sa may ubos sa inyong skwelahan? Kadtong nanlakaw mo sa imong mga classmate sa Baras kay mang Kodak mo ug starfish? Naa pa gani moy bidyu bidyu adto nak..."
Daghan pa kaayong gisugilon ug pangutana si Nanay nako. Na, wa nalang nako panumbalingi kay mao lagi, ug ibalik pa nato ang kagahapon, ug kutkuton pa gyud nato ang mga katawa ug istorya sa kadtong panahon na wala pa ta sukda ug asa gyud ta kutob niining kinabuhi, masakitan rata ug balik. Mag maoy lamg gihapon ta.
Nahilom ko, mao usab si Nanay. Iya lang kong gitutukan kahuman niya ug butang sa iyang kutsara ug tinidor. "Ting, sakit gihapon?" Narurat ko gamay sa pangutana ni Nanay apan ako rang gihinayhinay ug sandig akong likod sa lingkuranan. "Nay, dugay naman ta nagstorya ana na wala na. Humana man to Nay." "Pero ngano mang makakita man ko nimo, nak na maglantaw sa iyahang Kodak?" "Basig sa Facebook ra gad to Nay. Nalabay ra sa news feed ba. Dili na big deal sa akoa"
