#غربة_وطن_مجروح

البارت الاول

#غربة_وطن _مجروح
بقلمي فردوس عبد اللطيف
البارت الاول
بسم الله الرحمن الرحيم
حينّ نعشق لا نختار من نعشقُهم، ولكنّ القدر يقودنا لأ‌شخاص قد نُجَنّ بعشقهم.
~~~~~
زكي : اشتريت بيت بمنطقة حلوه باجر جمعه اخذكم للبيت تنظفوه ونشوف النواقص قبل ما نسكن بي
سهير : مبارك ابو احمد ربي يجعله بيت السعد والهنا علينا
نازك : بابا جم غرفة بالبيت ؟
زكي : اربع غرف نوم فوك وجوه غرفتين غرفة للوالده والثانيه اني وامكم وغرفة الخطار والهول والمطبخ والحديقة
بالواجهه ... بس راح اسوي بعض التعديلات بالبيت واصبغة
وانتو هم انطوني رايكم شتردون تغيرات
نريمان : اهم شي الغرف واسعه مو مثل هذا بيتنا الغرف صغار ومنكدر نتحرك بالغرف والحديقة اهم شي بابا
زكي : الحديقة تقريبا ٢٠٠ متر مزروعه اشجار بس يرادلهه فلاح يرتبها
البيت اهله عايفي وعايشين ببغداد وهاملي وتعرفون البيت من ينهمل حتى الكهربائيات يرادلهه شغل
صلاح : بابا كولهه سهله من باجر نروح ونشوف النواقص
~~~~~~~
السنة ٢٠٠٩
اني نازك مواليد /١٩٩٥ اعيش مع عائلتي بمحافظة تكريت
بيضا طولي ١٧٠ شعري اسود عيوني واسعه
بابا موظف بدائرة مرور تكريت وملتزم ويكره الواسطات وميقبل يمشي اي معامله لو مهما كان الشخص الي يجيله مرات يتعرض لمشاكل من وره التزامه
بعد ما عمامي باعوا بيت جدي ووزعوا الفلوس بيناتهم طلعلنه مبلغ كدر بابا يضيفة على فلوس بيتنا الي ساكنين بي
بعد ما باعه وحصة بيبي اشترينا بيت اكبر لان كبرنا واخوتي كبرو واحتجنا لبيت اوسع من بيتنا
البيت الجديد متروك ويحتاج بعض الترميمات
~~~~~~~
زكي : كملتوا تبديل ترى رايحين نظف مرايحين نتكشخ بنات وينكم ؟
نازك : اني جاهزه بابا
نريمان : دقيقة بس اجيب السطل والصونده
سهير: اني كملت احمد صلاح وينكم
احمد : جاهزين
~~~~~~~
نازك : دخلنا للبيت الحديقة حلوه ونفهه ودخلنا للمطبخ جبير
سهير : اهم شي عندي المطبخ
زكي : خلي اروح على جوارينه يكولون ابنهم مقاول بلكي يستلم ترميم البيت
~~~~~~~~~
زكي : السلام عليكم اذا ممكن مقداد موجود
مقداد : تفضل عمو اني مقداد
زكي : اعذرني ابني اني مشايفك بس سامع بيك اني جاركم الجديد اشتريت هذا البيت وعندي بي بعض الترميمات اريدك تستلمه
مقداد : صار حجي تأمرني بس بصراحه اني ماخذ مقاوله حاليا راح اجيبلك صديقي وهو يرتبلك البيت
زكي : زين تعال شوف البيت حتى تعرف تفاصيل
مقداد : تفضل عمو اشرب جاي
زكي : غير مره هسه تعال وياي علمود اراويك شأريد
~~~~~~~
اني مقداد مواليد ١٩٨٦ طويل جسمي معضل مجنت احب الدراسه اشتغلت عماله ويه خالي من زغري لحد ما تطورت وصرت خلفة بناء وره فتره استلمت مقاولات وبناء بيوت ومشاريع ضخمه والحمد لله مع زغر عمري بس نجحت بعملي وطورت نفسي وصرت مقاول معروف وحالتي المادية جيدة جدا اعيش مع عائلتي المتكونه من والدي حسين ووالدتي اميرةاخوتي رعد وسعد منتسبين بالجيش تطوعوا وعندي اخت وحده وفاء
اهلي دائما يلحون علي اتزوج بنت الحلال وامي كل يوم شايفتلي عروس بس ولا وحده دخلت بمزاجي بقيت معاند
لحد ما اجه جيرانه عمو زكي وطلب مني اروح لبيتهم واشوف شيردون حتى اكلف صديقي يكمل البيت
من دخلت صارت بوجهي العائلة الحقيقة ماردت اباوع عليهم بس جان اكو كمر يضوي من بين هالنجوم سمعت ابوهم صاح بنتي نازك اسم ع مسمى راد منهه ورقة وقلم راحت جابتها من شنطتها
صحيح عمرهه صغير بس اخذت شي مني سلبت ارادتي
هل هو الحب من اول نظره طيب مو هي بنص اهلهه
سامعين بالحب من النضره الاولى ؟
هو هذا احساسي وشعوري الي شعرت بي
جان اكو جاذبيه بيها وبشكلها لفتت نظري من اول لحظه
عمو زكي يتكلم واني كل حواسي ومشاعري خلفي بلكي اسمع صوتها يمكن تجي كبالي امتع نظري بطلتها
سجلت كل طلباتهم
زكي : اعذرني منكدر نكول تفضل
مقداد : عمو احنا لازم نقوملكم بالواجب تفضلوا يمنه
زكي : تسلم ابني انت اتفق ويه صاحبك وهذا المفتاح واني من باجر اجي واتابع الشغل ويه العمال واذا مو اني اخلي الولد يجون
مقداد : اترخص وهذا رقم تلفوني واي شي تحتاج اني بالخدمه
~~~~~~~
نازك : كنت مراهقة احلامي على كد عمري بالمدرسه البنات صديقاتي كل وحده تحبلها واحد والثاني مخليته احتياط وماخذات الحياة حب وغرام مجنت افكر اني راح احب شخص واتعلق بي كنت اكول الحب يجي بعد الزواج لهذا مجنت مفكره احب واكون علاقه
~~~~~~~
نازك : يمه اهم شي نقلونه لمدرسه قريبه عالبيت الجديد ترى مابينه نروح هالمسافة
سهير : اكيد مادام الدوام بعده خلي ابوج يروح يراجع على نقلكم هو ماضل شي ابوج كال اسبوع ويكمل لان مكابلهم اخذ اجازه ويشتغل وياهم
بنات من باجر نبدي نعزل بالاغراض الي مانستعملها حتى نشددهه ونحضرهه مانريد ننخبص بالتحويله واهم شي الفرفوري ابوكم جاب جرايد وكراتين كعدوا غلفوا كل الفرفوري مانريده يتكسر
نازك : يمه مراح تشترون اثاث جديد ؟
سهير : بلي نشتري بس مو كولشي الاثاث الي مابي شي ناخذه هم حرام نستغني عنه هو هسه الناس كولهه صار عدهه فلوس والاثاث اشكال والوان مو مثل زمانه جنا نشتري من الاسواق المركزيه شتجيب نشتري والا استيراد خاص وشركات ماكو انتو زمانكم زمن الانفتاح التجاري كثرت السلع والمنشائ عالميه وكثرت المنافسه
نازك : زمانه تطور انترنت وانفتاح وسفر
سهير : والله بنتي زمانه زمان الكلوب الطيبه والنيه الصافيه
وحق الجار عالجار وحق الكرايب
نريمان : بيبي اشلونه زمانكم
ام زكي : زمانه احلى زمان الناس جانت عايشه بأمان وع حب الله
نازك : بيبي اشلون تزوجتي جدو حبيتي وجانت بينكم علاقة
بيبي : ولج هه هه هه دكول علاقة غير يذبحوني اخوتي وين شايفته بيوم العرس زفونه وشفته وحبيته هه هه هه
نريمان : بيبي ليش قبلتي بي ؟
بيبي : هو وين اكو مثل جدو حبيته وبعدني احبه
نازك : الله الله عالحب الا اكول لبابا من يجي
سهير : بنات لاتضيعون الوكت كوموا اشتغلوا
نازك
الايام تركض ركض نلملم اغراضنا ونروح للبيت نظفه بعد العمال ونرجع بالبيت نساعد ماما واخوتي بدوا ينقلون الاغراض الخفيفة بالسيارة الصغيره
لحد ما كمل البيت وتحولنا
اليوم اول يوم النه بهالمنطقة جديده ومنعرف احد بيها
والاغراض مكركبه امي توجهنا واحنا ننقل كل حاجه لمكانها
وكل شخص يعرف اغراضة يوديها لغرفتها
الولد استلمو الستائر وترتيب الاخشاب واحنا ترتيب الفرش والملابس الظهر اجانه الغدا من الجوارين رحبوا بينا صحيح كلمن ساد بابه ومحد يختلط صارت الناس تخاف من بعض
كلشي تغير واحد يخاف من الثاني وعلى كلام ماما وبيبي
جانوا الجوارين اكثر من الاهل وبزمانه حتى الاهل تغيرت وصارت علاقة مصالح فيدني وافيدك
من التعب ذبينا ارواحنا بالصاله كولنه عالدواشك وعلمبرده
~~~~~~~~
اليوم الثاني
نازك : كعدت الصبح صعدت لغرفتي اريد ارتبها سمعت صوت سياره باوعت من الشباك
شفته نزل من سيارته شكد انيق ومرتب هذا شكله مال رايح للشغل اشو مرتب وانيق ومنسق الالوان وجاي يغلق بابهم
اي هذا نفسه المقاول نسيت اسمه ابوي جابه يرمم البيت
رفع عينه عالشباك وابتسم
معقوله هذا دايباوع علي ؟
اي هو منو غيري اشو نريمان بعدهه زغيره
بس ششاف مني هي مره وحده ويه بابا
وبعدين .. انت نزوكه كعدي راحه وينج وين الحب والغزل اليوم اول يوم النه بالبيت ...بعدج صغيره نزوكه خليج بشغل البيت وبدروسج اخاف هذا يلعب عالبنات
رتبت غرفتنا اني ونريمان ورحت ع غرف اخوتي
صح البيت هوسه بس بالتعاون يترتب واخوتي مرات يتنحسون لكن من امي تصيح يجرون عدل ويشتغلون
كضيت اليوم كوله شغل والكل ملتهي مابين ابو الستلايت وابو النت صار وكت الليل وسمعت نفس الهورن باوعت من
السياج صحيح سياج البيت جان عالي بس اكو فتحه صغيره نكدر نباوع منهه
نفسه الشخص نزل وباوع على شباك غرفتي .. كنت مطفية الضوه هالمره ما ابتسم دخل سيارته وغلق بابهم
~~~~~~
مرت الايام ومقداد كل يوم من يطلع يباوع على شباك غرفتي
من يشوفني يبتسم ولما اكون مخفيه ميبتسم
من خلال مراقبتي اله فهمت انه مهتم بي بس شبيدي
يجوز من اداوم بالمدرسه افتهم شيريد
~~~~~~~~
بده دوام المدرسه وداومت وتعرفت على وفاء اخت مقداد
المدرسة قريبه ومتحتاج نسجل خط نروح ونرجع مشي
اتصل بيها من اكمل واوكف بالباب انتظرهه
ومن تطلع اغلق بابنا ونتمشى للمدرسه
مقداد يطلع لشغله ب ٧ونص واحنا نطلع ثمانيه الا ربع
بيناتنا ربع ساعه
بس هو عبالك توقيت يوميه نفس الوقت
تعودت كل يوم ب ٧ ونص انتظره بالشباك
واتعمد اخلي يشوفني حتى يبتسملي
~~~~~~~~
اليوم جمعه وماكو دوام سمعت صوت مسج بتلفوني
منو يدزلي مسج من الصبح
المسج (جمعه مباركه على قمر زماني )
نازك : منو دازلي هالمسج من الصبح وبعدين منو قمر زمانك
رديت : العفو اخي اكيد غلطان بالعنوان
الرد : لا مو غلطان انت نازك وقمر زماني اني لان مشفت بزماني هيج قمر مثل نورج
نازك : كعدت على حيلي خلي اشوف هذا شيريد من الصبح يتغزل
نازك :اخي منو انت وشتريد ؟
الرد : اني معجب بيج نازك وقصدي شريف مجاي العب عليج ارجوج اسمعي مني وافهميني
نازك : منو حضرتك ؟
الرد : اني مقداد جيرانكم اكدر اتصل
نازك : خفت شنو يتصل ... لا لا اخاف اهلي يسمعون احجي وياك انت شتريد مني ومنو نطاك رقمي ؟ اكيد وفاء
مقداد : لا ديري بالج وفاء متعرف اخذت رقمج من تلفونها
كتلها اريد رقم اخوي احمد ضاع مني واخذت رقمج
نازك : وشتريد ترى اني ما اعرف احجي ويه ولد ولا اصادق وماعندي تجربه ولا اريد احرب
مقداد : مجاي اطلب صداقة نيتي صادقة معاج ولازم تعرفين نيتي الزواج بس من حقنه نتعرف ع بعض ولو فترة قصيره
بصراحه اني من اول لحضة  شفتج بيها لفتي نظري وعجبتيني بس اريدج تحبيني نزوكه مو بس علاقة عابره وزواج تقليدي مثل بيبيتي وبيبيتج
نازك : انت تعرف كلش زين اني لا اطلع ولا اطب 
مقداد : مطالب منج طلعه وطبه بعدين اني حريص عليج وعلى سمعتج اكثر منج
كل الي اريده نفهم بعض قبل مانرتبط
لان مشروع الزواج عشرة عمر مو سنه وسنتين ونكول تخلص ونرجع لوظعنا
لا ارتباط الزواج ارتباط مقدس ويحتاج تقارب بين الطرفين
اشو ساكته ما تجاوبيني ؟
نازك : شكول خليني افكر
مقداد : شوكت تردين علي
نازك : محتاجه كم يوم اتاكد من مشاعري
مقداد : اخذي وقتج مامستعجل
~~~~~~
نازك كلام مقداد شغل تفكيري كل شويه اصفن وافكر بكلامه
وما احس الا امي تصيح علي اشبيج صافنه
كنت متردده شجاوبه صحيح هو شاب وسيم ووظعه جيد لكن اني ممفكره بالوقت الحاضر بمغامرات حب واخاف من ابوي واخوتي ..
بقيت محتاره 🤔
ترقبوا البارت القادم ونشوف نزوكه شتقرر
~~~~~~فردوس عبد اللطيف ~~~~~