#غربة_وطن_مجروح

البارت ٣

#غربة_وطن_مجروح
بقلم فردوس عبد اللطيف
البارت (٣)
دائماً اللقاء محكوم بأوقات وظروف فإنني أشتقاك فكيف ألقاك.
سأظل أحبّك ولو طال انتظاري، فإن لم تكن قدري فأنت اختياري.
~~~~~~~
نازك : كلام والدي اثر بي ومن سمعته اقتنعت اني لازم اترك مقداد
حبي وتعلقي بوالدي واحترامي لرأيه اكبر من اي حب اخر
عشت بصراع داخلي
اغلقت تلفوني والصبح اسمع الهورن من يطلع مقداد لكن اوكف خلف الستائر ما اخلي يشوفني ولكن امتع نظري بطلته لان احبه مو بسهوله اكدر انسى ولا سهله اكدر ابقى بعلاقتي
معاه
بقيت اسبوع غالقة تلفوني
بالليل فتحته اريد اشوف منو متصل بي
ويه مقداد شكد داز رسايل كل يوم خمس رسايل كلهه عتاب وشوق وحب
اوووف اريدك تنساني واريد انساك ما اريد اضعف
رن التلفون ...مقداد
نازك : الووووو
مقداد : اكو احد مسوي سوايتج اني شنو ذنبي ليش تعاقبيني ع ذنب ما ارتكبته ليش نونه ؟
نازك : احنا لا زم نترك بعض دا تشوف اهلي واهلك صارت بينهم مشاكل .. هاي غير كلما واحد يلتقي بالثاني عبالك تزيد العداوه والاستفزاز بينهم
مقداد : الموضوع مايستوجب هالهوسه مجرد اختلاف بوجهات النظر واني راح اشوف طريقة اصالحهم ع بعض
نونه لاتفكرين نفترق انت الي واني الج ومستحيل اكو شي يفرقنا افتهمتي انت متصيرين لغيري
نازك : مقداد ترى مابيدنا شي احنا شنكدر نغير بالنسبه الي راي ابوي هو الماشي بالبيت ومحد يكدر يخالفة
يمكن انت وظعك مختلف لكن اني هذا وظعي
مقداد : اعرف حبيبتي ...زين انت ما اشتاقيتيلي ولج خليتيني مثل المخبل بلياج باليوم اشرب ٣ باكيتات جكاير من القهر
نازك : سلامتك حبيبي اكيد اشتاقيتلك واباوعلك من وره البرده وامتع نظري بشوفتك بس كلبي يتعذب
مقداد : اخخخخخ منج نونه بعد لا تعيديها افتهمتي
نازك : شكولك مقداد انت تعرف شكد اني متعلقه بابوي واذا نبقى مع بعض معناها راح يجي اليوم الي اضطر اوكف بوجهه واختارك واهذا الشي ما اكدر اسوي
نونه : حبنا اكبر من هالخلافات كتلج انت الي وماتصيرين لغيري لو اعرف انكتل ولا اعوفج عالاقل اموت لاجل حبيبتي
نازك : اسم الله عليك مقداد لاتجيب سيرة الموت اخاف
مقداد : لعد اريد اشوفج
نازك : وين تشوفني باجر الصبح انتظرك بالشباك
مقداد : (شيجيب باجر واصبر اشلون ) ولج مشتاقلج موت
نازك : لازم نتحمل
~~~~~~~~~
نازك : سديت التلفون وضميري مأنبني مابين ارضي ابوي ومابين حبي لمقداد وتواصلي وياه
استمر وظعنا اشوف مقداد ويشوفني كل يوم الصبح من يطلع لشغله بس رجعته مومعلوم وكتها
مرات اكون بالغرفة واسمع هورن سيارته اوكف بالشباك واشوفة ويشوفني
لحظات سعاده نسرقهه ونرضي رغباتنا مثل اي اثنين احبو بعض
خلصت العطله وامتحنت ونجحت وبدأ الدوام
زكي : نونه باجر دوام المدرسه ترحين وترجعين ويه اختج واخوج احمد يوديكم ولاتحجين ويه بنت ابو مقداد ولا جنج تعرفيها
نازك : حاضر بابا ميحتاج توصيني والمدرسه قريبه
زكي : بنتي احسن اخوج يوديكم عود بالرجعه رجعوا مشي
نازك : اشرتله نعم ورحت لغرفتي
اشلون بمقداد عود ينتظر يجي الدوام ويكدر يشوفني بعد اذا احمد يوصلنا هاي هي لازم مانضحك ولا نحجي
اخوي احمد من النوع الي شخصيته قويه وميحجي هواي ودائما منعزل بغرفته يدرس هو طالب كليه قانون
~~~~~~~~~~~
مقداد : حبي وينج باجر دوام اكدر اشوفج
نازك : ابوي قرر احمد يوصلنا بعد مانكدر نتشاوف
مقداد : اشلون اشوفج حياتي ؟
نازك : خليها للصدف
مقداد : ولج يا صدف اريد اشوفج المس ايدج مشتاق لعيونج الحلوه النعسانه
نازك : هههه ليش نعسانه حتى امي دكول اشبيج دومج منعسه يمكن شكل عيوني نعسانه شنو ذنبي الله خالقني هيج
مقداد : فديتج عيونج احلى عيون واحلى مابيج عيونج
نازك : مو تالي دكولي ام عيون النعسانه
مقداد : هههههه لا تخافين ادلعج دلع ...هو وينه خلي يجي اليوم الي نجتمع بي وتصيرين مرتي
~~~~~~~~~
نازك بقت علاقتي وية مقداد سريه مكتفين بالمكالمات التلفونيه والنظره من الشباك الصبح
مقداد : نونه علاقة اهلنا كل يوم جاي تتعقد والناس تودي وتجيب بينهم حجي واخاف يجي يوم ماينطوج
قررت اخطبج راح ادز امي وخالتي لاهلج يخطبوج
نازك : صارلنه سنتين نحب بعض والاهل بوادي واحنا بوادي اخر .... اخاف يعاندون بعدين انت قنعت اهلك ؟
مقداد : بعدني ما فاتحتهم ولا فتحت الموضوع اكيد اتوقع ردة فعلهم قويه وراح يرفضون
~~~~~~~~~
ام مقداد : يمه اخوك رعد يريد يخطب وانت الجبير اريد افرح بيك
مقداد : يمه الي اخترتها انتو شادين ويه اهلها
ام مقداد : عزا لعزاني بس لا دكول بت ابو زكي ؟ يمه راسي ضغطي ارتفع ولك لا يسمع ابوك من تجي سيرتهم يتنرفز
مقداد : والحل اريد نازك خطبولياها واني اصالحهم ابوي وعمو زكي يمه احبها
ام مقداد : انعل ابو الحب ولك لا احد يسمعك من شوكت شفتها وحبيتها الديره متروسه بنات اخطبلك احلى منها
مقداد : يمه لو نازك لو لا تفتحين هالموضوع وياي ابقى طول حياتي ما اتزوج ولا اخسر نزوكه
ام مقداد : ولك صدك تحجي اريد اشوف جهالك ..ابوك كليوم يكولي حاجي ابنج اريد اشوف جهاله
وانت تتشرط علينا اشلون مصيبه ياربي
مقداد : اني طالع عندي شغل
ام مقداد : تريد تنهزم ادري بيك بس نزوكه مانخطبها واذا اني وافقت ابوك راح يرفض خليها ببالك وراح نزوج اخوك الاصغر منك والناس شراح دكول
مقداد : معلي بالناس مع السلامه
~~~~~~~~~~~
نازك : هذا اشبي طلع بهالليل وشخط السياره يمه بس لا تعارك ويه اهله
خلي اتصل بي
يرن تلفونه ومايرد لحد ما غلقة
اوووف اشبيك مقداد ليش تسوي بي هيج هي مبينه اكيد اهله رفضوا يخطبوني وهو زعل
مو كتله طريقنا بي حواجز حبنا فاشل من بدايته وهاي النتيجه  
متعلقين ببعض ولا اهلي ولا اهله حايوافقون على هالزواجه
~~~~~~~~~~
نازك : مر اسبوع ومقداد غالق تلفونه ولا يجي لبيتهم لحد ما سمعنا هلاهل بيتهم ..
يمه كلبي وكع اخاف خطبوا لمقداد
سهير : هاي صوت هلاهل بيت ابو مقداد يمكن خطبوا لمقداد
نازك : يمه كلبي اشتعل نار معقوله مقداد يتزوج وحده غيري
اروح وارجع بلكي اسمع خبر واتصل على مقداد مغلق دزيتله مسج ....(وينك )
لحد ما صارت الساعه ١١ بالليل صعدت انام واجتني رساله من مقداد
اكدر اتصل حبي
نازك : يمه فديتك وفديت حبنا
اي اتصل اني بغرفتي
مقداد : هلو نونه اشلونج ياعمري مشتاقلج
نازك : ليش تسوي بي هيج موتعرف راح اقلق عليك ليش غالق تلفونك ؟ وبيتكم بي هلاهل شنو خطبولك ؟
مقداد : هههههه ولج اخوي رعد خطبوله اني الج وما اتزوج غيرج جم مره اكولها شنو تردين احلفلج بيش
نازك : لا عفيه لا تحلف منعرف الظروف وشحايصير
مقداد : انطيج عهد على نفسي ما اتزوج الا نونه ام عيون نعسانه عهد امام رب العالمين
نازك : كمت اطفر من الفرح حبيبي اني ما اكدر اوعدك لان تعرف بابا هو الكل بالكل بس اطلب من رب العالمين نكون لبعض
مقداد : نونه لو اعرف اخطفج ونهرب لغير ولايه ولا تصيرين لغيري
نازك : لا لا مقداد ما اكدر اجيب العار لاهلي
مقداد : معلي اخطفج واصير مجرم
نازك : انت وين اشو مو بالبيت ؟
مقداد : بعدين احجيلج حجي هواي واهلنا يتحكمون بمصيرنا
احنا نختار شي وهما في بالهم شي اخر
دنيا عجيبه اني اخترتج وانت ترديني ليش هالموانع
نازك : حبيبي شوكت ترجع لبيتكم ؟
مقداد : باجر وره المغرب ارجع مشتاقلج مشتاق لعيونج
نازك : ترجع بالسلامه وين جنت مكظيها ؟
مقداد : رحت يم صديقي باربيل غيرت جو
~~~~~~~~~~~
نازك : رجع مقداد واخوه تزوج واهله دزولنا بطاقة دعوه بس ابوي ماراح ولا احنا رحنا ولا تباركلهم بس حسيت شويه برد كلبه من ناحيتهم لان قدروا وعزمونا
مرت السنه الثالثة واحنا نفس الوضع شكد يحاول مقداد ويه اهله يرفضون
مقداد : بابا مهما صار الخلاف بينك وبين عمو زكي اني ونازك ما النه ذنب شنو ذنبنا نريد نتزوج
ابو مقداد : الدنيا مابيها بنات الا نازك دشوف اخوك رعد تزوج وبعد كم شهر حايصير اب ولك انت كبرت
مقداد : يابه ما اريد اتزوج لو نازك لو ما اتزوج
ابو مقداد : لو تبقى اخر وحده بالدنيا بنت زكي ما اروح اخطبها افتهمت هذا ردت منه معامله يمشيها طردني من دائره الدوله بعد اخطب بنته واروحله لبيته
مقداد : بعد اذنك بابا راح اخطبها اخذ عمو فاخر هو يعرف ابو احمد وعلاقتهم طيبه واتقدملها واذا متردوني اني جاي ابني بيتي واتزوج بي وابقى ابنكم وما اطلع من شوركم
بس هذا مستقبلي وهذه حياتي
ابو مقداد : انت تريد تعاندني وبس روح وين ماتروح روح فعلا هذا اختيارك ومن الان اكولك اكيد راح يطردك
~~~~~~~~~~
احمد : بابا اجوي عليك عمو فاخر وياه مقداد جيرانه ودخلتهم بغرفة الخطار
زكي : سوي جاي وكهوه اني رايح يمهم
فاخر : الله بالخير اشلونك ابو احمد ؟
زكي : بخير اسال عنكم عمو مقداد اشلونك ؟ وشجابك ويه فاخر ؟
فاخر : لاتستعجل ابو احمد جاييك بالحجي
ابو احمد اني جاييك اخطب ايد كريمتك نازك الى مقداد
زكي : طفر من مكانه وكف على حيله
عمي جيتك على راسي بس هذا الموضوع لاتحجي بي
ماعندي بنات للزواج بنتي بعدهه زغيره ومحجوزه لابن عمها
مقداد : عمو اني شعلي بخلافكم انت وابوي اني شنو ذنبي
جايلكم  من الباب اطلب ايدهه
زكي : وانت وين شايف بنتي واخاف حاجي وياها وشعندك وياها ..ماكو بنات الا بنتي ؟
فاخر : هسه انت ليش عصبت ابو احمد اني صديقك قدر جيتي لبيتك
زكي : كتلكم ماعندي بنات للزواج وانتهى الموضوع تفضلوا شربوا كهوتكم
فاخر : وتنطينا وعد تفكر بالموضوع
زكي : ما اكدر اوعدك لازم افكر ما اكدر اأمن ع بنتي يم ابو مقداد
مقداد : عمي اني حاضر جاي ابني بيتي وراح اكعد بي
ابو احمد : ابني انت جاي لوحدك وبدون اهلك معناها اهلك ماموافقين وهيج زواج ميوالمني تالي اهلك يكولون انطى بنته  لشخص اهله رافضين زواجه
فاخر : امشي مقداد ابو احمد ماخلالي تقدير واني طالع
~~~~~~~~~
نازك طلعوا مقداد وعمو فاخر زعلانين من كلام ابوي وتعقدت علاقتنا بالزايد
زكي : سهير بلغي بنتج من باجر بعد ماكو مدرسه تكعد بالبيت
سهير : شصاير ابو احمد ؟
زكي : دازيها للمدرسه تدرس لو شنو هذا مقداد ليش مجلب يريدهه اخاف بنتج عدهه علاقة وياه
بعد ماتروح مدرسه وممنوع تطلع من البيت الا ويه واحد من عدنه افتهمتي ؟
سهير : افتهمت
نازك : ركضت مسحت رقم مقداد من تلفوني ومسحت كل المسجات
والي فكرت بي صار
صلاح : نازك وين تلفونج ؟
نازك : موجود بغرفتي فوك
صلاح : هسه اطلعلكم اذا عدهه شي وياه لو لا
روحي نريمان جيبي تلفون نازك
نازك : كلبي يدك سريع وجهي صار اصفر وخفت لا انكشف
نريمان : هذا التلفون
صلاح : راح اتصل بهذه الاسماء الي مخليتهه رموز واذا رد ولد معناها مثل ماكتلكم
اريد اوكف احس رجلي ماشالتني
التفتت اريد اروح لغرفتي
صلاح : وين  رايحه ابقي ماراح نذبحج
ياريت تكونين شجاعه وتحجيلنا الحقيقة لان اذا نسمعها منج افضل
نازك : ماعندي شي وياه هو شايفني من اروح للمدرسه
زكي : خلاص نونه بعد كعدي بالبيت وعوفي المدارس ماوراها غير المشاكل
ساعدي امج لحد ما يجي نصيبج وازوجج زواجه بيها خير
نازك : يمه سجينه ودخلت بكلبي يازواجه ابوي وين يفكر
اخوي بعد ما دور بتلفوني ومالكى رقم مقداد ولا مكالمات
واتصل ع صديقاتي بس ميحجي بس يسمع صوت بنيه ويسده
بعدهه اخذ مني التلفون وغلقة وانطا لامي
زكي : مادام كعدتي بالبيت بعد متحتاجين تلفون واذا تردين تتصلين بأحد اتصلي من تلفون امج
نازك : حسيت ماي بارد ونزل ع كلبي من غلقوا التلفون لا تالي يتصل مقداد وتصير مشكله ومال تبطيلتي من المدرسه خلي يبطلوني اني اصلا ما احب المدرسه بس اشلون اتواصل ويه مقداد
~~~~~~~~~~
نازك : كعدت بالبيت وصارت حياتي ممله لا مدرسه ولا تلفون ضجت بس اكعد الصبح اشوف حبيبي يطلع لشغله
ويأشرلي خابريني
اشرتله اهلي اخذوا التلفون
افتهم هاي عقوبة اهلي
اليوم الثاني
واكفه بالشباك واشرلي مقداد مشتريلي تلفون جديد وخلا ه بكيس اسود واشرلي حايشمره من وره السياج
واني اباوع شمره بس اشلون انزل اخذه لا يحسون اهلي
بقيت لحد ما طلعوا كلهم للدوام وبقيت اني وامي
اول مانزلت رحت للحديقة
سهير : نونه اشبيج وين رايحه
نازك : ماكو شي ماما شفت بزونه حلوه اروح اشوفهه
اخذت التلفون وركض لغرفتي
فتحته مخلي بي رقمه وكاتب حبيبي م م
دزلي مسج ( صباح الخير حبي  ؟ )
نازك : يمه فديته جاوبته ( صباح النور )
غلقت التلفون وضميته بكنتوري ونزلت يم امي اكمل شغلي
سهير : اليوم اشبيج تضحكين وفرحانه مو مثل كل يوم احجيلي نونه شصاير ؟
نازك :حلمت حلم حلووووو
سهير : شحلمتي ولج
نازك : بالمدرسه وصديقاتي ونضحك ونسولف بس
كملت شغلي ورجعت صعدت لغرفتي اخذت التلفون
فتحته لكيت مسج ( حبيبي من تفتحين رني علي واني اتصل )
مقداد : الو نونه حياتي مشتاقلج
نازك : شفت مقداد وين وصلنا اني سجينه ومتراقبه ويتمنون يحرموني حتى من الهوى الي اتنفسه
مقداد : صبري نونه اكول صدك ابن عمج خاطبج ؟
نازك : ابوي وامي يتمنون يزوجوني لكرايبهم امي تريد تزوجني لابن اختهه يشتغل محلل مختبر وخابصتني بي
اما بابا عنده ولد عمي ماكو مثلهم وهما بعدهم طلاب بالكليه وهاي اذا تخرجوا يمكن يعتبرهم عباقره القرن
مقداد : يعني محد متقدملج منهم ؟
نازك : الحقيقة عمي ملمح لابوي بس الي اعرفة ابنه يحب زميلته بالكليه
سهير : نونه وينج ليش قافله الباب
نازك : باي جتي ماما
للحكايه بقية
~~~~~~بقلم فردوس عبد اللطيف~~~~~~