🐸🐸🐸
بعد اخدت قراري واخدت العفو من الحاجة قمت اتصلت علي بت ميكي وقلت ليها : اسمعي يا بت الناس انا ح اغيب فترة بسيطة وان شاء الله ارجع واتقدم ليك بس انتظريني يا بت .
بت ميكي : بنتظرك لكن انت ح تغيب تمشي وين يعني .
انا : بمشي بتصرف بشوف لي قروش باي طريقة عشان نعرس بيها.
بت ميكي : طيب ابوي عندو قروش نخليهو يعمل لينا العرس وبعدين ربنا كريم.
انا : لا لا اصلو ما تقولي الكلام دا تاني وانا طالما اديت ابوك كلمة اني اجهز نفسي ، خلاص بجهز نفسي وبجي وشينة مني اني اعتمد علي ابوك ولا اي زول في عرسي واول فرحة بالنسبة لي،
بت ميكي: خلاص خير انا منتظراك وبالبسيط بقبل بس اهم حاجة تكون معاي .
انا: خير يا بت يلا سلام ودعواتك لي .
بت ميكي: ربنا يسهل امورك ويجمعنا في الحلال يا رب ،
انا: ااامين ،
قفلت التلفون . ولملمت حاجاتي في شنطة حديد وعندي بطانية ومشمع حق جيش شلتهم من خالي شغال مخزنجي
وقلت يا الدهب جااااك زوووول .
اصلا من زماان ما عندي فكرة اني امشي الدهب نهائي لو اموت من الجوع ، لان الدهب كلو مخاطر وعوارض وانتحار عديل وبنسمع حكاوي كتيرة عن المنقبين ، لكن الشي الكان مشجعني ومديني دافع بت ميكي وقلت مافي طريقة الم لي قروش سريع غير امشي الدهب ، لانو اغلبية الشباب بشوفو انو التنقيب هو الوسيلة المثلى لتحقيق الاحلام والوصول للهدف بأسهل الطرق الممكنة.
طبعا عندي واحد دفعتنا زمااان في الابتدائي خلى الدراسة ودقش السوق لحدي ما سمعت انو موجود في مناطق الدهب وكان شغال مع خالو في التنقيب وعمل طواحين (رطب منها بنى بيت سطوح واتزوج وسايق بوكس دبل كبينة موديل السنة وهسي امورو وااااضحة) قلت انا زاااتي داير ارطب زيو .
اها اتصلت عليهو وحكيت ليهو الحاصل اني جاي الدهب ، قال لي يا زول تعال ولا يهمك انا بلمك مع اي مجموعة وتتوكل تشوف رزقك وربنا يسهل ، ووصف لي مكانو وكيف اوصل ليهو .
من دربي داك دخلت علي الحاجة واخدت عفوها وقلت ليها سلمي علي الحاج اصلا هو ما داير معاي كلام وبشوفني عشرة عشرة لانو كان اداني محاضرة وقال انا زول اناني وما قدر المسؤولية والمفروض اشيل منو الحمل شوية بعد رباني و قراني وانا طلعت زول رمتالي ساي وجاري وراء الفارغة ، المهم كلامو اكل معاي جنبة.
قمت لبست لي بوت وطبقت شنطتي وتلفوني الربيكة مكسر لافيهو بي لستك ويا الدهب جاك بلا.
وصلت المكان القالو لي واتصلت عليهو بعد شوية جاني سلم علي وركبت معاهو ومشينا مساااافة ، لمن وصلنا مكان كدا موحش وحته كدا كلها رواكيب وصحراء ،
طبعا انا مفتكر انو تنقيب الدهب ساااهل كدا تحفر يوم يومين او اسبوع او شهر وتلم ليك كم كيلو دهب وتبيعو وخلاص ترطب ولمن اتخيلت نفسي جلابي وعندي حديدة ..
لكن كان العكس تمااااما وحصل ما لم يكن في الحسبان .
…..
وابتدت رحلة الموت والذهاب الى المجهول……...
.
.
.
#يتبـــــــع….
