قتلت امي!!

البارت الخامس

قتلتٌ أمي ......5... ......

صرت اعاند امي بكلشي ...
واحاسبها ع الطلعه والاكله واراقب كلامها
واذا كالت كلمه ماعجبتني ذاك اليوم يتحول جحيم عليها
الشك مدمر قاتل ابويه انتبه على تصرفاتي
وكان دائما يهون عليه ...
هملت دراستي وصار عقلي وفكري كله يم مراقبة امي ...
يمكن بسبب خوفي لا تجيب فضيحه
خصوصا بعد عجز ابويه لان امي شابه وحلوه
ومغروره بنفسها وتريد رجال ...
ازدادت المشاكل وصار البيت مكروه ..

لكن بيوم صار شي حول حياتي جحيم عشر سنوات ما حسبت حسابها صح ...
اجت ام سماء للبيت وجنت راجعه للمدرسه
والمدرسه مرزلتني لان ممجاوبه بالامتحان
ضجت من طلعت من المدرسه رحت ركض للبيت
حتى ازهار ما انتظرتها ...
دفعت الباب وطبيت ...شفت امي وام سماء حلك بحلك
ويتبسبسن ....ليلان حكمت ..
دفعت عليهن الباب وطردت أم سماء ...
بس كانت صلفه وقويه بقت على كعدتها ورجل على رجل
وامي كامت دفعتني وسدت الباب ....
شطت نااااار وعيوني صارت بكصتي وبقيت افتر
بالبيت مثل المخبله ....
لحد ما طلعت وهي تعلج وتباوعلي وتضحك ....
امي سدت الباب وكانت ما منتبهه عليه اني وراها ...
=يمه بسم الله الرحمن الرحيم ...
=شبيج فزيتي ...
=وانتي شكو وراي واكفه ..
=واني مو كتلج هاي ما اريدها ...
=وانتي شنو تحاسبيني ....
=جاوبي مو كتلج هاي متدخل بيتنا بعد ...
=اسمعي ولج اني محد يحاسبني اطبب منو واطلع منو
مو بزر بطني يحاسبني ...امس طلعتي من بطني اليوم تحاسبيني ...
=احاسبج ونص ...
=بالله شلون ...راويني ...

جريتها من شعرها وخنكتها حيل لحد ما طلع مي من حلكها
ولو ما سوسن وسناء وتحرير يخلصوها مني
جان ماتت ....
هي عافتني ولبست عباتها وطلعت ...
والله صحت وراها درب الصد مارد ...
رحت على ابويه وكتله طلكها وخليها تروح لاهلها
لا تطلع ريحتها وننفضح ...ابويه
صار يكلي لايابويه ...اسكتي امج ما تغلط واخواتج وين يروحن منو الهن ...
صيحت عليه وكتله انت جبان وفاهي عشت عمرك ذليل
الها ولابوها لحد ما راح تطلع من الطريق ...
شفت ابويه انهضم وبجى ...ونزلت دموعه على لحيته البيضه
ركضت على ايده بوستها وتعذرت منه كتله ماعاش الي يبجيك من امداني الشك عماني وخلاني طلعت من طوري
بس والله يابويه مو بيدي تعبت وخايفه على اخواتي ...

بقت امي تلث تيام مو بالبيت يوم الرابع اجت
صحتلها شرفت المسعده ...
هي حتى ما باوعت وكان شكلها مو طبيعي ...
راحت على غرفتها نامت للعصر طلعت
كانت لابسه دشداشه دلعه وركبتها طالعه وبيها زراك
انجنيت بس ما حجيت ...

ثاني رحت للدوام ورجعت شفت سيارتين واكفات ببانه كراون تكسي وسوبر بيضه دخلت شفت نسوان ....ووياهن ولد من سالت شنو ذوله الناس
كالت ميامين ذوله خطابه الج ....
استغربت وكتلها هاي بطرانه سليمه اني ما ازوج
والاكثر غرابه القضيه محسومه والنيشان بديهم ...
طلعوا حتى من غير ما يشوفوني بس شفت الولد استغفر الله
اسود مفحم وشكله مخربط ...
من طلعوا سليمه صاحتني ....
=سليمه ...ليش مو امي ..
=لان اذتني ..
=وبعد ...
=باعتني ...ليلان حكمت ....
=باعتج ¡¡¡¡¡¡
=يجيك الحجي لتستعجل ...
صاحتني وكالت تعاي اني وانتي بعد منعيش بيت واحد
واني ما اريد اطردج ازوجي احسن ...
اني عاندت ورفضت وكتلها اذبح روحي ولا ازوج ...
كالت نشوف يا بت الفكر يا كلبه ....

ثاني يوم رحت للمدرسه اجت الشرطه ووياهم نفس الولد
وبيده عقد ما زواج ويكللهم هاي مرتي ....
المديره صاحت شنو عقد زواج شنو هالخرابيط هاي
الابنيه طفله وطالبه عندي شوكت تزوجت ...
بس هو خلي الشرطي يجرني وياخذني بره ...
سألني ...
=تعرفين هذا ...
=لا ما اعرفه بس شفته امس اجه على بيتنا ...
=زين هذا عقد زواج بينج وبينه ...
=كذب ماكو هجي شي ..
=بابا انتي هسه عمرج سبعطعش سنه يعني فاهمه انتي متزوجه وهذا عقد زواج سليم ليش تنكرين ...
=كتله اني ما متزوجه وهذا ما اعرفه ...
حجايه مني وحجايه منه صاح ذاك الصخل الاسود خل نروح واني اروح اشوف اهلها يصرفون وياها ....

رجعت ع البيت شفت امي بالغرفه وتصيح على ابويه
ادكله ابتليت بيك شوكت تموت وارتاح ...
صيحت عليها شبيج سليمه ابوي وتردين تموتي واني تردين تزوجيني ....
شوفي بت فلاح هاي قسمتج ولازم توافقين واذا ما توافقين
لاعلاج لابوج ولا مسواك افتهمتي
والله ما اسمه سليمه اذا ما ازوجج واخلص منج ...

لحكايتنا بقيه ..
اذا اشوف تـﮩ๋͜͡‏ـ✮๋͜͡‏ـفاعلۦ✞ هوايه الكم بارت هديه مني الكم 😍

تعليق + تصويت +متابعه