قتلت امي!!

البارت السابع

مرحبآ مثل مواعدتكم وهذه البارت بس لتقصرون ويايه بالتعليق والتصويت

قتلتُ أمي ....
.....7......

=صباح الخير ...
=صباح النور ..
=اليوم احسن ان شاء الله ..
=الحمد لله احسن ...
=.......تسمحيلي اكول كلمه ....
=تفضل ...
=ما اعرف من اشوفج احس بشي حلو واصبحتي مثل الادمان عندي ولهفه ما اعرف ليش
يمكن بسبب ثقافتج او انتي شي غريب بالنسبه الي ...

=بقيت سنه كامله اشتغل خدامه غسل ملابس طبخ تنظيف
ولا فد يوم قصرت بشي وكنت اشوف امور
فضيعه لايمكن للعقل يستوعبها ..
شيطلبون انفذ انام ساعتين لو تلاثه باليوم
وبالذات لازم من يجي كل طلباته سمعاً وطاعه مجابه
لان اخاف يضرب ..
كان يرجع سكران منتهي وكنت اني اساعده يدخل للغرفه
وينام ومرات يجي ياكل ...
كان يطلع الظهر ويجي الفجر ..
لكن بيوم من الايام طلع ورجع بعد ساعه ...
صاحني للغرفه ...
كلي حضري نفسج تروحين لاهلج ...
سألته ليش ..
كلي هناك تعرفين ....ما اعرف ليش كنت حاسه بقبضه بكلبي
خوف وقلق بيت لازم كان بعيد عن بيت اهلي
اول ما وصلت الشارع شفت ناس وصياح
وشفت تابوت على سياره لاندكروز تكسي
بدون وعي وبدون تفكير صارت الدنيا صمت بدون ضجيج كل الاصوات ما اسمعها
السياره تمشي فتحت الباب ما اعرف شلون وكعت بالكاع
وركضت ع التابوت ما اعرف والله ما اعرف شلون صرت فوك التابوت ...
الرجال يربط التابوت بالحبل قوة الغضب ولدت عندي قوه لا اراديه كطعت الحبل وصحت بالرجال ولك وخر هذا ابوي
فتحت التابوت وحضنته شعور داخلي كلي ابوج بالتابوت
اصيح اكعد يابه ....ليلان حكمت ..
فدوه لعينك يابه بس حاجيني اني زينب
اني عزيزتك بس ودعني كلشي ما اريد ...
لكن لاحياة لمن تنادي راح ...راح وتركني ..وترك اخواتي تحت رحمة سليمه ...
خلصت الفاتحه بس كنت تعبانه منهكه حزينه مفجوعه
كعدت بالغرفه يم اخواتي نسولف ...
نسولف اسالهن ويسالني ...عن حالي وعن أبويه
من خلال الحديث سوسن فلتت حجايه ..
=هو ابويه شنو كتله غير امي ...
=احجي سوسن ابويه شلون مات وشبي ..
=اي امي كتلته سمع بيها حامل كتلته الحركه ومات
=حامل ...ياااا سوده بكصتها ..شنو ولج حامل ..
=اي حامل مانعرف منين ..
=شطت نااار ..
=وانتن ليش ساكتات ...
=منريد نصير مثلج نخسر كلشي ...
=بس نخلص دراسه نعوفها ونشرد ...
=ولجن تخبلتن شتكول عليجن الناس
=شتكول خل ادكول الناس ماعاشت عيشتنه ..

كنت اداري غضبي وناااري بالسوالف ويه خواتي منتظره
رفيجاتها الكاعدات بالغرفه
يطلعن وساعتها اعرف شغلي
وياها ...
بعد ساعه او ساعه ونص ...طلعن النسوان
اخذت طابوكه وجفتت عليها جفت ردت اهشم راسها
صيحت كتلها اليوم محد يخلصج مني ..
اجن اخواني خلصنها مني
وكالن عوفيها لا تكتليها وتبتلين وهالنوب تكتليها هي وابنها
وتوكعين بمصيبه ....
ولج متستاهل تضيعين روحج عليها ...

انتبهت على كلامهن كان صحيح ...عفتها
اجه لازم سلم عليها ...انتبهت شو هذا حظنها وباسها عبالك مرته ...
كالتله اخذها بعد ما اريدها اطب بيتي ...
وهو يكللها صار بعد متشوفين وجهه

اتخبلت والشك كتلني وضعهم مو طبيعي رجعني
ع البيت وهو دخل للحمام يسبح نزلت
للمطبخ جبت سجين وبقيت كاعده
منتظرته يطلع ...
طلع ينشف بشعره اللي مثل جلافة المواعين
مشربك هديت عليه
ردت اضربه بكرشه المحشه عرك
بس هو تلاحكني ولزم ايدي
جان يصيح انتي شبيج لكفتي
كتله بس اريد اعرف شنو علاقتك بأمي ...
جان يكول علاقه شبيج زينب
كتله وضعكم موطبيعي حضن وبوس
وهي تأمرك وكأنه عشيقها
جان يضربني على وجهي
وكعت بالكاع ....ليلان حكمت
شالني من شعري حتى
حسيت بصوت الشعر من ينشلع
كال ...اني رذيل وساقط ونذل وبين قوسين لابس كرون وزايعتني الكاع بس مستحيل
اجمع بين البنت وامها ....
صحت بيه ليش لسه ممتقربلي ...
جان يكول متعجبيني وطلع ..
الشك اكل كلبي وصرت ناااار معقوله رجال يمه مره نايمه
ميتقربلها اكيد اكو شي اني ما اعرفه ....
هذا يكذب لعبت نفسي منه لمجرد فكرت علاقته بامي ...
لا يحلل ولا يحرم هذا فاجر ....

مرت ايام وشهور طويله ما اعرف اخبار اخواتي
ولا ادري بكلشي ......
نسيت الناس والتهيت بالخدمه استسلمت لامري
ومن اضوج اخذ وحده من القصص مالته واقراها
الغيره القاتله ...شيئ في صدري ولايهم شيئ وذهب ولم يعد
ذكريات وغيرها وغيرها التهي بيهن ...

وبيوم من الايام ....امه كعدت الظهريه وصاحتني بس اني
وياها بالبيت جابت طاوله وكرسي
وقواطي بيره وجكاير وكرزات وكالت تعالي اكعدي يمي
صفنت عليها بهذا العمر وتشرب شبقت لاخرتها عجوز
شافتني مستغربه وخايفه ....
ضحكت بصوت عالي وكالت لتخافين اني من زمان مشاربه
واليوم اريد اتسلطن ...تحبين الغناء ...
كتلها أي ...كالت راح اغني وكليلي صوتي حلو او لا ....
اووووف غنت وكالت ...
بسج يادنيا وياي هديتي حيلي
لا اهل لامحبوب آيس دليلي

الله اكبر صوت يخلي الحجر ينطق حنين مزجت بيه الخزن
والدمع والالم ...صوت مينشبع منه ...
شفتها بجت حاولت اواسيها ....
كالت وهي تمسح دموعها .....
راح اكلج كلام لاول مره تسمعينه ....انتي عجبتني
وجنت خايفه منج وانتي طاهره لاول مره تدخل التربه
والسجاده لبيتنا ...بيت نكس ميعرف الله ولا عبد الله
لذلك راح اكلج سر اول وحده راح تعرفه هي انتي ...

الى الجزء الثامن انتظرونا ...

تعليق +تصويت +متابعه