#غربة_وطن_مجروح

السادس عشر والاخير

#غربة_وطن_مجروح
بقلمي :فردوس عبد اللطيف
البارت السادس عشر والاخير
الشمس اجمل في بلادي من سواها
والظلام حتى الظلام _هناك اجمل
فهو يحتضن العراق
واحسرتاه متى انام
(للسياب )
~~~~~~
نونه : بقينا بالمطعم اكلنا وغسلنا وارتحنا من تعب طريق يومين
اخذ الخريطة مقداد ومشينا بالصحراء نفس الطريق الراسمه النا ابو علي
مقداد : باعي نونه هذوله كدامنا كلهم عراقيين ومثل حالتا خلي نمشي وراهم وراهم
نونه : يعني ذولي مهزومين من جحيم الدواعش ورايحين عالعراق ؟
رعد : الله يامحلى ترابك ياعراق هذه الرحله خلتني اعرف معنى حب الوطن هسه فهمنا ليش الوطن يستحق نضحي بحياتنا من اجله
مقداد : فعلا كرامتنا وعزتنا ببلدنا لو شكد مانطلع وين ماتروح تبقى غريب
بس وطنك لا انت منتمي لهذه الارض
نونه : اكولك مقداد هذولي بالالاف معقوله كلهم مثلنا وراجعين للعراق
مقداد : شعبالج لعد ما النه غير بلادنا واهلنا
نونه : الله ذكرتني باهلي حالفة يمين اذا اشوف امي الا انزل ابوس رجليهه
معقوله راح التقي بأهلي واشوفهم
رعد : جهالي هسه يعرفوني لو لا شكد مشتاقلهم همزين ما تزوجت رزان من اليوم راح احاول اغير من زوجتي واخليها تكون زوجه صالحه
نونه : ربي يسعدكم
نمشي بالصحراء والمسافة طويله لكن الي صبرنا وجود الاهالي الكثيرة كلهم راجعين والفرحه على وجوهم
رعد : لك مقداد ذاك التبليط بين
مقداد : شكد بعد ؟
رعد : امشي امشي المهم هو بين ونخلص من الصحراء
مقداد : احنا ماشين على خريطه ابو علي والحمد لله ما تيهنا
رعد : مو كدامك هالسيارات تمشي مبينه
مقداد : اي والله هم رحمه من ربك
وصلنا للتبليط ومشينا بي
رعد : باوع اللافته مكتوب ( بداية الحدود العراقية )
وكف مقداد ونزل سجد وباس تراب الوطن وحتى رعد نزل والسيارات الي معانا كلهم نزلوا وقبلوا تراب الوطن الي ماعرفنا قيمتا الا من تركنا وهربنا للمجهول
نزلت دموعنا هي دموع الفرح مدري دموع الامل رجعنا نكمل طريقنا
شفنا سيطره جيش عراقي
الجيش العراقي : النساء ارفعوا البوشيات وذبوها
نونه : كولنا ذبينه البوشيات وبدوا بتفتيش السيارات والتفتيش كان دقيق بس ما عدنا شي
كملنا التفتيش دخلونا على منطقة اسمها النخيب
وكفنا يم مطعم اسمه مطعم النخيل بالنخيب
ارتحنا وغسلنا وصلينا واكلنا
مقداد : لازم اتصل بابو علي رايح هناك بالهدوء لان هنا هوسه
مقداد : الو وووو اشلونك ابو علي اني مقداد
     احنا وصلنا سلملي عالشيخ ابو محمد واحنا ابد مراح ننسى فضلكم للموت
ابو علي : للاسف البارحه ذبحوا الشيخ بالليل
مقداد : شنو شدتحجي ؟
ابو علي : محققين ويه الشيخ سألين عليكم وبالتعذيب اضطر يعترف ان هو الي هربكم
وراها داهمو المضيف الي كنتو بي مال ابو عماد عبالهم بعدكم موجودين وره المداهمه ذبحوا الشيخ ومخلين الجثة بالفلكه وممنوع احد يقترب منهه ولا يسمحون لاهله يشيلونهه ويدفنوا المهم انتو وصلتوا لبر الامان واني نفذت وصية الشيخ
مقداد : نزلت دموعي ولساني ثكل مواقف الشيخ ماتنسي وقتلوا بسببنا خسر حياته لاجل ناس غرباء اجوله دخلاء
ابو علي : الووو اخ مقداد اكسر الشريحه ورجعوا لبيوتكم بسلام وربي يحفظكم
مقداد : والله يعجز اللسان عن الكلام ومثل ما تريد اخ ابو علي راح اكسر شريحتي لان اذيناكم هواي وتسببنا بموت شيخكم الله يرحمه
وسلملي على جماعتك وعلى اهل الشيخ وعائلته
ابو علي : سلملي على جماعتك اخوانا العراقيين واني راح اكسر الشريحه وبعد لا اعرفكم ولا تعرفوني الله معاكم
>~~~~~
نونه : رجع مقداد وجهه ينطي الوان وشفايفة تلزك يابسه اشرلي انطيني ماي
نونه : اشبيك حبيبي ؟ عسى ماشر
مقداد : الكلاب ذابحين الشيخ وذابين الجثة بالفلكه وميقبلون احد ياخذ جثته
نونه من سمعت كلامه تبسمرت بمكاني رجعت اتذكر كل لحضة كان ويانا ابو محمد الله يرحمه واشلون ساعدنا واشلون خاطر بحياته لخاطرنا ولخاطر كل غريب اجه دخيل عنده
بجيت من كل كلبي مثل ما بجيت على ابوي لان فعلا هذا الانسان يستحق تنزل دموعي لاجله
خساره جبيره النه ولعشيرته ولكل انسان تعرف  عليه
شيخ بمعنى الكلمه
نونه : بكثر ماجنت فرحانه بنجاتنا من الدواعش حزنا حزن شديد على الشيخ لان انقتل بسببنا
~~~~~~~
بقينا بالنخيب
نونه : اريد تجيبلي رصيد اريد اخابر على امي
مقداد : جبتلج رصيد واني هم اخذت رصيد لشريحتي
نونه : اشتاكيت لاهلي الله احنا بنص بلادنا يعني ممكن نشوف اهلنا معقوله خلصنا من هالغمه
فدوه مقداد خايفة
اشو مقداد عافني وراح يخابر على اهله
فعلت الرصيد واني فاقده الامل احتمال بعدهم متحاصرين وماعدهم شبكه
اتصلت اشو رن بس يمكن الشركه مسقطه الرقم عن امي ومنطي لغير شخص
فتح الخط ...الووووو
من سمعت الصوت اختنكت مكدرت احجي
اسمع صوت امي الووو منو ؟
اني بس ابجي
ام نازك : الووو منو دجاوبو
نونه : يوم هذه اني نونه
ام احمد : شهكت وانقطع الصوت
سمعت عياط
انجنيت ليش هيج اليوم ثاني صدمه معقوله امي تموت قبل ما اشوفها ولج يوم جاوبيني الو الو الووووو
رد علي ولد انت منو ؟
اني نونه انت منو ؟
ولج اني اخوج صلاح
نونه : هسه عوفني اني امي اشبيها
صلاح : امي تخربطت من سمعت صوتج وهسه صحت غسلوا وجهه بالماي
ولج نونه امج جانت متنام بالليل تدعي رب العالمين ياربي بس اشوف بنتي وراها اخذ امانتك
نونه : ياعمري يا ماما تعذبت هواي
صلاح : احجي وياها ولو تعبانه
بس لاطولين معاها هلو يوم والله اني زينه وزوجي زين
لاتعبين نفسج كلها يومين ونصل بغداد كالت يوم احنه ماجرين بغداد كتله لعد يومين واني اجيج واني صحتي زينه وزوجي زين واخاف يطفى الجهاز تره شبكه ماكو لا يضل بالكم : مع السلامه مام وسلميلي عله اهلي : سديت الخط
ورحت ابشر زوجي لكيته يتصل باهله ويبجي : اسمعه يكللهم وهسه شلون صار : اوك لايضل بالكم يومين واحنه يمكم : مع السلامه : كتله خير حبيبي شبيك كلي ابويه مجلوط وهسه ايد ورجل مشلول صارله فتره : لان طولت غيبتنه ويحسبنه انقتلنه  ولازم نروح نطمنه باسرع وقت
: :مقداد : خلي نروح ننام نرتاح
نمنا ... صارت الدنيه صبح مشينه للمغرب وصلنه كربلاء ومخلونه نطلع لان الوضع جان موزين رحنه  للفندق  نمنا من كد التعب ماحسينه اله الدنيا صبح طلعنه ومشينه وصلنه بغداد وره الضهر لان السيطرات هواي يدققون وحقهم لان احنه عابرين من داعش ويسالنه عن وضع مناطقنه : وصلنه بيت اهلي وره الظهر : ماكدر احجيلكم عن الموقف عن بجي امي. راسن نزلت بست رجليها كتله يوم اني حالفه بس اصلج. ابوس رجليج :
. أتمنى أنّ أهديك كل لحظات سعادتي، فأنت عندما تبتسمين تتفتّح ورود عمري، وتُشرقُ الشّمسَ في روحي ويُزهر الرّبيع في قلبي، وتشدو دقّاتهِ بأعذب الألحانِ، وينتشي قلبي فرحاً وكأنِّي ملكتُ الكونَ أجمع وفي كلِّ ركنٍ من أركانه يفوح شذى عطائكِ، أُمّي، يا وهج روحي، أدعو لكِ بكلِّ صلواتي أنّ يَمدّكِ الله بأيّام عمري، أحبّك يا أُمّي.
ها مو بس اني وزوجي وحماي لا كل العراقيين الي مشو ويانا  ؛دخلوا ويانا  لبيت اهلي وارتاحو وتغدو : وكلمن مشه عله
كرايبه وتشكرو من زوجي : لان فعلا جان قائد الهم وجان هو الي يوجهم وينطيهم التعليمات : بقينه اني وزجي وحماي يم اهلي : اجه زوجي كال لامي خاله من رخصتج اريد نروح لكركوك لان والدي مريض وشلل نصفي  : امي كلتله لا والله اليوم تباتون يمي وباجر من الصبح تمشون الله وياكم : فعلآ بتنه يم اهلي وتعللنه وضحكنه  وحجينالهم عن قصتنه كلها : : صارت الساعه 1 كال زوجي يالله ننام  حته نطلع بوكت.  والله نمنه كعدنه الصبح تريكنه سلمنه عل اهلي ومشينه : واول مره نمشي بوحدنه دبالشارع بدون لايمشون ورانه جماعتنه ومقداد يلتفت عباله ورانا الجماعه
مقداد :  والله كلبي ممرتاح
نونه : توكل بلله ماكو شي : احنه كلوبنه صارت قاسيه عكب الي شفنا ومرينه بي : والله مشينه وصلنه بعقوبه وجان توكفنه سيطره كالعاده  نفس الاسئلة  : وجان يجيكون اسماء مقداد ورعد  حاسبه : وجان يكولون منو رعد ؟
رعد : اني
السيطره :  اسمك مشتبه بي.
رعد :  اني منتسب وهاذا الباج مالي
السيطره :  انزل بعدين تحجيلنه
نونه : زوجي صار عصبي كللهم ما اروح اليوم اذا ما اخذه ولكم ابويه مشلول  من ورانه وبس يريد شوفتنه : كلمه منا كلمه منا
السيطره :  والله اذا ما مشيت منا ناخذك انت  وياه :
رعد :  امشو منا بس لاتخبرون ابويه  اني كلها يومين وارجع ماعندي شي : جتفو ارعد واخذوه. بسياره ومشو مقداد تخبل والله منكد ماتعصب اني كلت هسه ينجلط ومشينه واحنه كاتلنه القهر عله رعد  الي مانعرف شنو مصيره : وصلنه كركوك. دخلنه عل البيت تلكتنه عمتي طايره من الفرح وسلمت علينه كالت لعد رعد  وين ؟
طبعآ عمتي جانت مره قويه : زوجي كللها رعد  هيج قصته بس لا ابويه يدري بي اذا سالنه حنكلنه رعد راح لدوامه حته يكمل الأجراآت : ويبدي يدام « المهم عمتي بجت ودخلتنه للبيت سلمنه عله عمي وحماي لاخ. وحماتي : راسن عمي سال وين رعد ؟
مقداد : رعد  بقى بغداد
علمود يباشر بدوامه عمي ما اقتنع  دخلتله عمتي كالتله بلي قبل شوي خابرني وكال راح اقفل موبايلي وسلميلي  عله ابويه : عمي من شاف هيج اقتنع صبو الغده : اني وزوجي وعمتي ماگدرنه ناكل ابد لان مانعرف اخبار رعد : طلع زوجي بره وبده يتصل عله معارفه منا ومنا علمود رعد : وكله تأمل بي اليوم وباجر لحد ما مضى عل غياب رعد ٣  اشهر بكل هل فتره عمي يسال بس عمتي طمنه وتكله اتصل قبل شويه وتقنعه  تخدر بي
مقداد ياخذ ابوه للاطباء يعالجه لحد ماعمي بده يتحسن وضعه وبده يمشي تدريجآ : وبقه اشهر واسترجع عافيته بلكامل : مقداد  من شاف ابو صار زين
مقداد : بابا اكو موضوع لازم نحجيلك عليه
ابو مقداد : بخصوص رعد ؟ احجي
مقداد : هذه قصته اخذوا ولحد الان مجاي نعرف منو اخذه  انهار بلبدايه « بس مهما يكون هو رجال ويبقى  قوي »
ابو مقداد : اني صرت زين انته روح دور على اخوك  : وبدت  رحلة مقداد الجديده ولي هي البحث عن رعد  ::
رعد الي نظلم هوايه ومسوه شي موزين بحياته
انحرم من زوجته واطفاله
زوجته ماقبلت تجي يمنه بس نجيب الاطفال خميس وجمعه وكولنا متعلقين بيهم لان نشوف رعد بعيونهم  : راح مقداد مخله مسؤل  ما التقه بي. ماخله حاسبه مادك اسمه بيها يكلوله : اخوك مموجود : ولحد هاي اللحظه رعد مختفي مانعرف هو وين وشنو  تهمته : الجنود الي جانو بلسيطره اتغيرو واجو غير قوه بمكانهم : سالهم مقداد ونطاهم التاريخ والاسم كلوله هاذا الاسم منو كلك مشتبه بي : كللهم الي جانو قبلكم كلوله ماكو اي اشتباه : وهسه صار 3سنوات ونص عله اختفائ رعد  : ماكو اي خبر عنه «« مقداد  قدم كليه عسكريه وان شاء الله ينقبل »» حته يصير ضابط. : اني بعدني مصار عندي طفل عمي وعمتي.ماعدهم غير الصلاه والدعاءلرعد المضلوم »» حماتي ازوجت بس كلنه ممرتاحين :« لان رعد  مو ويانه رعد انضلم بمافيه الكفايه انضلم بوقت داعش ونضلم هسه : كلنه انضلمنه لان فقدنه رعد  الله يعلم هسه هو وين : طيب ميت : ما نعرف : اريد اطلب من كل شخص يقرا قصتي يدعي لحماي يرجع النه : ويدعيلي بلذريه الصالحه :: اختكم نازك
~~~~~~~
اتمنى ان اكون نقلتلكم صوره واضحه من معاناة هذه العوائل الي تعرضت لظلم الاحتلال الداعشي لمدنهم اكيد اكو مثلهم الالا ف تعرضوا لمشاكل ونزوح وضيق العيش
اختصرت النهايه لان كلما اقراها تنزل دموعي واعرف القراء لديهم مايكفيهم من هموم ومعاناة لذلك ماردت ازيد عليكم همومكم واتمنى ان القصة عجبتكم
بالنسبه للاسماء غيرتهه بس الشيخ الشهيد ابو محمد بقيت اسمه اتمنى تترحموله لهكذا شخص شهم فدا حياته لاجل اخوانا العراقيين
اتمنى ان تدعون لنونه يعوضها ربي باطفال صالحين
وتدعون لرعد يرجع لاهله وتقر عينهم بشوفته
ترقبوني بقصة جديده
~~~~~الكاتبه فردوس عبد اللطيف~~~~~