غازيه

1

#غازيه

#قصص واقعيه ل Nareman karm

_1_
بسنه 1973 جانت الناس تخاف من نومه السطوح لان بذاك الوكت ذاع صيت ابو طبر اليقتل ناس  ببيوتهم. إلا أني ماجنت اخاف وجنت اكول شعده ابو طبر يجيني لاعندي فلوس ولاذهب كلي خلك بياعه ورد...

انه غازيه مسعود ع 16 ، من منطقه الحريه عايشه وي امي وابوي واخويه الاصغر مني ب٥ سنين غازي. ابديلكم قصتي من وانه ع 16 سنه من وعيت ع دنيا اشتغل واساعد اهلي ع عيشه ابوي يشتغل حمال بشورجه وامي تخدم ببيوت الزناكين وانه يوميه من غبشه الله اشيل خوص التمر وتارسته ورد مزين وشكله حلو وروح ابيعه بسوك لو افتر يم الكليات وبيع ع الحبجيه لو يم اشارات المرور ع اهل تكسيات وسواق...

انه صح فقيره بس عزيزه نفس عمري مامديت اديه ع حرام  و شايله جمال رباني عيوني خضره وشعري جوزي بي شكار وبيضه. طالعه ع امي عيونهه خضر وشكره بس اخوي غازي طالع ع ابوي بس هم حلو.

مديحه: تعالي يمعزايه وين ماخذه جودليه وصاعده ع سطوح ولج مخافين يجيج ابو طبر وانتي وحدج يكطع راسج

غازيه: يمه هسا ابو طبر يعوف بيوت زناكين ولطاكين ويجي ع خرابتنه. لو تردين يكتلني البك والحرمس بنومه هنا. دشوفي الحر فوكاهه الغرفه مرطبه يمه ولله صرت جاي مدخن.

غازي: يمه انه هم كتلني الحر ماجاي اكدر انام راح اصعد انام بسطح ويا غازيه.

مسعود: جا ضلت علينه بويه نصعد كلنا جلدي طفح من الحر

مديحه: ولله شكلكم انه اذا اصعد مااكدر اغفه كل شوي افتح عيوني وتكلب اباوع وخلص الليله بخوف.

مسعود: كولي يالله يامره تعاي بويه غازيه صعدي وي امج جودليات وفرشلونه خل انام ع هوه الله

غازيه: صار بويه

نمنا ذيج الليله كلنا بسطح ع هوه البارد
...

الصبح كعدتني امي حتى اطلع للشغل وهيا لبست عباتهه وراحت ع بيت ام نعيم اليوم دور يمهم امي تشتغل. وطتني نص درهم اشتري بي جركايه اكلهه لان بيتنه خرابه وقديم لاعدنه طباخ ولا ثلاجه وتلفزيون. عايشين ع الاكل اليزود ويطو لامي بلبيوت التشتغل بيهن.

لبست دشداشتي الكصيره مثل فستان خياطهه وخليت ع راسي ربطه شديتهه من جوه وكصيبتي من ورا طالعه ونص شعري طالع خليت الوصله ع راسي وخليت خوص التمر وتارسته ورد.

طلعت الصبحيه اتمشى بدربونتنه. وحجي وي روحي..

غازيه: الله شكد حلو الهوه الصبح عليل وبارد بس كون يضل هيج الجو ربي لاتطلع الشمس وتسمط ابو الخلفنه..

هذا ابو الجرك. طلعت النص درهم وطيته وشتريتهه حاره وبيهه حلقوم تريكت بيهه .

كملت مشي من الحريه ورحت عبور جسر الكاضميه بعت نص الوردات نوب دخلت يم الكاضميه وبعت للزوار. صار العصريه ومتت من الجوع ماضلن جم وحده وانه راجعه شفت زفه عرس نزل العريس اخذ الوردات كلهن وحطهن بحضن العروس ونطاني 4 دراهم...نعمه هواي.