الحلقه الثلاثون
روايه همس الذكريات
بقلم ✍ سحر فرج
فجاه وهى بتتكلم مع عمر شافت حشرة غريبه ماشيه على ايديها .. من خوفها الموبيل وقع تحت البلكونه واتكسر .. راحت على ريهام تصحيها علشان تساعدها ويجيبوا الموبيل .
بس للاسف ريهام راحت فى سابع نومه من التعب وما ردتش على سحر .
سحر قررت انها تنزل هى وتجيبه .. وفعلا فتحت باب الاوضه بشويش ومشيت براحه علشان محدش يحس بيها .. ونزلت السلم وراحت على الباب الرئيسى للسرايه .. وفتحت الباب وراحت مكان البلكونه علشان تشوف الموبيل .. اللى لقيته تلت حتت على الأرض .
نزلت على الأرض علشان تجيبه .. وفجاه حست بحد حط أيده جامد على كتفها .
سحر ... عاااااااااااااا
ولفت وشها وهى مرعوبه واتفاجأت أنه عمر هو اللى عمل كده .
ومن كتر خوفها اللى حست بيه اترمت فى حضنه دفست رأسها فى صدره .
عمر اتفاجأ بيها وبوجودها فى السرايه عنده وقال ... سحر
انتى ايه اللى جابك هنا .. وبتعملى ايه فى بيتنا .
سحر من كتر الخوف مش قادرة تتكلم خالص وده اللى حس بيه عمر وهى فى صدره وجسمها كله بيرجف .
عمر .. اهدى ارجوكى يا سحر ومتخافيش لو سمحتى .. انا عمر جنبك متخافيش .
سحر فاقت على كلمته ليها وهو بيقولها انا عمر وانكسفت لما اترمت فى حضنه جدا . وبعدت عنه .
سحر ..... انا اسفه جدا مكنش قصدى والله .. انا من كتر خوفى اللى حسيت بيه انا لقيت حد لمس جسمى فاترعبت .. وخوفت اوى .. علشان كده اترميت فى صدرك .. ارجوك ما تفهمنيش غلط .
عمر ... اهدى يا بنتى خلاص مفيش حاجه لده كله .
اللى انا مستغربله انك هنا وفى بلدنا وفى بيتنا .. وانتى لسه بتقوليلى على الموبيل انى فى نبطشيه فى المستشفى .
سحر بخجل ... حبيت اعملهالك مفاجأه . أنى هنا فى بلدكم . وجيت مع ريهام والاستاذ صلاح علشان سنويه اسلام الله يرحمه .
عمر ... اه صح انا نسيت والله من كتر الشغل أنهم جايين النهارده .. بس متوقعتش أن انتى هاتيجى مع ريهام .
سحر ... اصل ريهام كانت تعبانه جدا اليومين اللى فاتوا ومحبتش اسيبها فى يوم زى ده لوحدها .
عن اذنك بقى قبل ما حد يحس بينا ويشوفنا فى الوقت المتاخر ده واقفين هنا كده .
ولسه هاتمشى وتسيبه قرب عمر منها ومسك ايديها وقال .. استنى الاول هنا .. انت. ايه اللى وقع الموبيل هنا كده .
سحر .. مش وقته يا حضرة الضابط بعدين هابقى اقولك .. عن اذنك .
وفعلا مشيت سحر وسابته فى حيره من اللى حصل .
شويه طلع على فوق فى اوضته علشان ينام من كتر التعب اللى بيشوفه فى شغله .
طلع النهار والشمس نورت اوضه مكتب جاسر اللى فضل سهران طول الليل بيخلص كل الشغل اللى متعطل .. وبيحاول بالشغل ده أنه ينسى ريهام علشان ما يتعبهاش اكتر من كده معاه .. لأنه حس بالذنب من ناحيتها بكده وأنه السبب فى تدهور نفسيتها وصحتها الفترة الأخيرة دى .
