#ظلموني_ولكن......
الجزء الرابع.....
شفق:كعدت ثاني يوم مالي واهس لشي بالكوة رحت للدوام طلعت بلا ريوك، دخلت للصف حطيت جنطتي وكعدت استغربوا سازان وسوزان من شافوني هيج:فوفة شبيج?????
بس كالولي هيج كمت اشهك وابجي،البنات الي بالصف ظلوا يباعون علية،
سوزان:كومي...امشي نطلع للساحة واحجيلنة شصاير???
استأذنة من المدرسة وكلنالهة متخربطة كعدنة بالساحة وهسة احجيلنة شبيج???
شفق:سازان جابتلي مي وكيكة وعصير،هاج اخذي شربي مي واكلي ذني ليهبط سكرج وصدك تتخربطين.
شربت مي وشوية من الشربت،البارحة من جنت بالمدرسة جايين اهل ابوية ع جدي...
سوزان:يا ستار شذكرهم بيكم????بس لا...
شفق:كمت ابجي اي جوي يريدون ياخذوني،وخالتي تخبلت كالتلهم لو اعرف اموت وما انطيهة...
سازان:اي وجدج وخوالج شنو رأيهم???
شفق:بس جدي وخالتي واكفين بوجهم تعرفون بيبيتي مريضة لاتحل ولا تربط وخوالي يخافون يكولون اهل ابوية اكبر عشرية بالبصرة والهم سمعتهم ومكانتهم ويخافون يوكفون بوجهم،تصوري خالي الجبير يكلهة هي مو بتج بتهم شايلة اسمهم من حقهم ياخذوهة وعود اني كبرت وكبرت مسؤوليتي وصارت عركة شكبرهة باليل خالتي تخبلت كالتله اموتهة وما انطيهة جدو خاف علية وعليهة وانهارت خطية وظلت تصيح وتبجي وتكول ما انطيهة....
سوزان:سودة علية،وهسة شنو شراح تسوين?????
شفق:والله ما ادري،ما ادري حايرة من البارحة منايمة نار وشبت بيه شلون اذا صدك اخذوني،راح اموت من التفكير والله...
سازان&سوزان:اسم الله عليج حبيبتي،الله كريم ان شاءالله تنحل...
خلص الدوام واني ما ادري شصار وشحجت المدرسة خطية البنات هم ظل بالهم وياية،انتهى الدوام وطلعنة اني والبنات كل وحدة راحت لبيتهم،وصلت للبيت لكيت سيارات كومة بالباب خفت كلت اكيد ذولة علية ترددت ادخل ردت انهزم درت وجهي وغيرت طريقي، بس بعدين كلت لا هاي عيبة بحق امي وابوية وبحق بيت جدي راح تكون عيبة بحق تربيتهم ولخاطرهم راح اواجه القرار مهما كان....
دخلت للبيت وشفت باب الاستقبال مفتوح وكومة رياجيل كاعدين،دنكت راسي وفتت من الطبخ شفت خالتي منتهية من البجي ونسوان خوالي كاعدات يمهة وحدة منهم كالت:يمعودة هي بتهم اذا مو اليوم باجر لو بعد سنة ياخذوهة موزين سكتوا كل هالمدة ويمعودة اقلها تزوجين تشوفين حياتج خما تظلين ساجنة نفسج بيهة...
عاطت بيهة خالتي:انجبي لج وسدي حلكج جيت شكيتلج شفتني ميتة ع الرجال لكم هاي بتي روحي من الدنيا بس شحجي و ويامن احجي كلكم لا ذمة ولاضمير كل همكم اطلع منا اني وياها بس ليش ما ادري وهاجت عليهة تريد تضربهة جلبت بيهة:ماما حبيبتي كافي لاتسوين هيج ومرت خالي تسب وتغلط عليهة لان حجت هيج وياها...
شفق:ليش هيج ماما تفقدين هذا مو طبعج ولا اسلوبج ليش تخليهة تستفزج???
لج بنتي مدتفتهمين ذولة ناوين ياخذوج من صدك وعبالي خوالج كد حجايتهم يحموج بس هددوهم عشاير ومدري شنو كله جرت ايديهة،وجدج وبيبيتج راح يموتون من قهرهم شلون شسوي قافلين كلش وجدج خابر عمامه وكرايبه كلهم كللوله انطيهة همة عمامهة وجده واذا تصير عشاير الحق وياهم،من جوي لحد هسة بس اني وابوية نحجي خوالج شالوا ايدهم يكولون احنة ماعدنة حجي ثاني وهمة عود صايرين خيرين ديطولون بالهم....
شفق...شفق...تعاي يابعد جدج...
نزلت ع جدي لكيت وجه كله دموع:شبيك جدو حبيبي ليش هيج تبجي????
يابعد جدج يابعد روحه وعمره يريدون يحجون وياج ويشوفون رأيج بروحتج وياهم،واني ما انطيج ولا اخليج تروحين لو ع جثتي لاتخافين يانظر عيني ومسح دموعي كافي تبجين كطعتي كلبي ومسح ع ظهري ودخلنة اني وياه:السلام عليكم جاوبوا وعليكم السلام...سمعت رجال جبير تعالي يابت الغالي...
بس سمعت هاي الحجاية انفضت وبدون وعي حجيت:اي غالي هذا الي تحجي عنه???هاااا..جاوبني الغالي الي مات بحسرته عليكم...الغالي الي حتى بجنازته محضرتوا انتو تسمون نفسكم اهل???هسة اذكرتوني وين جنتو لمن ماتوا اهلي???مفكرتوا يجوز متأذاية...جوعانة....بردانة...هسة صرت بنت الغالي...
قاطعني خالي:عيب احنة هيج ربيناج شلون تحجين هيج بوجه عمج الجبير هذا بمقام ابوج...
اني ماعندي اب،ابوية مات وشبع موت....
جدي:اعتقد الي حجته بنتي وضح الصورة عدكم واعتقد عرفتوا جوابهة????
ماشي حجي احنة سكتنة ونطيناكم مجال هواية ومع كامل احترامي عمامكم كاعدة،اسمعوني من الاخيرة تنطوني البنية خير متنطي حضروا نفسكم باجر تجوني للبصرة...هااا شكلتوا????
اني ظليت لازمة ايد جدي عصرتهة حيل من الخوف وادعي من الله يوكفون وياية،بس تفاجأت ان خوالي اول الناس شالت ايدهة من الموضوع،حتى جدي من سمع خالي اندار علية وصفن،حتى كرايب جدي الي جانوا حاضرين كالوا هي بتكم ومالنة دخل ونصحوا جدي ان يسلمني لاهل ابوية لان هذا هو نظام العشائر وان عيبة عليهم بتهم تربى بيت خوالهة ظليت صافنة اي قانون واي نظام الي يحكم بالظلم، وانتبهت ع صوت رجال جبير جان من كرايب جدي كلي:سمعي بنيتي ومعليج بجدج،ترضين جدج يتأذه لو يشحطط تالي عمرة???
اني صفنت كتله:اكيد ما اقبل...
هاي هي بوية روحي وية اهل ابوج همة هم اهلج ويحبوج وخلي جدج يرتاح باقي عمره واكيد تزوريهم بين فترة وفترة
اني انداريت ع جدي وابجي خطية جدي يهز براسه بمعنى لا لاتوافقين...
اني غمضت والدموع مطر:هاي هي موافقة ارجع وية اهل ابوية...
هنا جدي عاط ليش يابوية انتي???لاتكسرين ظهري بعد امج مالي حمل بعد...
رحتله وكعدت ع اركبي يم رجله:سامحني جدو بس ما اكدر اشوفك تتأذه بسببي وشكول اذا خوالي باعوني...
كومني جدي وهو يبجي:امج راح تموت اذا سمعت الخبر،
رجع هذا الرجال الجبير الي هو عمي:يلة بوية لمي غراضج ورانة طريق.....
بودي اكوم اقتله خلاص،طلعت لكيت خالتي تملخ بنفسهة:لج شلون انطاج كلبج تعوفيني هاااااا احجي ولج احجي???
شفق:مو بيدي يا امي يا نور عيوني انتي سامحيني خوالي مخلو بيدي شي همة متفقين ومنتهي كلشي وما اريد جدو يجرر وراية،سامخيني...
تحاضنة وظلينة نبجي،واحد من خوالي صاح ع مرته لمي غراضهة العالم دتنتظر،باعت علية صفح وكالت:صار تدلل
ورة شوية طلعت شايلة علاكة مال دعاية جبيرة وملامة كل غراضي،صاحت بيهة خالتي:تعالي لج ام الوصخ المن تريدين تلمين ذني ذبيهن و ولي منا وصار صياح بيناتهن واجة خالي ومرته كامت تتبجبج واجة خالي راد يضرب خالتي اني وكفت بوجهة وتوسلت بيه عافهة وطلع وهي طبت لغرفتي وطلعت جنط مال سفر ولمت كل غراضي حتى مال مدرسة صفتهة للغرفة مبقت شي....
شفق:شراح اسوي بيهن كلهن????
خالتي:اخذيهن يانور عيوني ما اريد احد يمن عليج بشي ولا اريدج تعتازين حاجة،تعالي وياية لغرفتي..
رحت وية خالتي لغرفتهة فتحت الكنتور طلعت صندوك صغير لونة ذهبي،،،هاج حبيبتي اخذي هذا الصندوك بيه الذهب الي جنت اشتري الج وبيه كم حاجة مني وبيه فلوس هم،،
شفق:بس شسوي بي.....
قاطعتني خالتي:اخذيهن واسكتي وهسة راح انطيهم علم حتى اذا شافوا عندج ميصير اشكال،هااا ونسيت اكلج شغلة اني شبه اطمئن كلبي عليج....
شفق:شعجب?????
خالتي:انتبهتي ع ولد شاب جان كاعد من جهة خوالج لابس دشداشة بيجي ويشماخ كريمي????
شفق:ابجي وكتلهة لا منتبهت هو اني هم الي نفس اباوع بوجهم....
خالتي:لا ياروحي تعالي كعدي خل افهمج عندج ثنين من اهل ابوج راح يساعدوج واكون شوية مطمئنة عليج منهم...
شفق:ماما لاتحجين بالالغاز منو ذولة????
خالتي:باعي تذكرين عمج مصعب وعمتج سوسن???
شفق:اي اذكرهم وعمو مصعب نطاني هاي كلادته لليوم منازعتهة...
خالتي:اي،وهذا الولد الشاب الي جان كاعد ابنه لعمج مصعب وذولة كلش حبابين ويخافون الله ويحبوج بس مرت مصعب ديري بالج منه ماشي لان جانت تكره امج لان المفروض ابوج ياخذ اختهة وصار الي صار...
شفق:اوووووف....اووووف...يلة الله كريم بس انتي لايظل بالج ولاتبجين هواية خطية جدو وبيبي ديري بالج عليهم ولاتخليهم يشلون همج،وشغلة اخيرة اطلبهة منج لاتنقهرين ولا اديرين بال لاحد ماشي....
حظنتهة وبجينة وطلعت حضنت جدو وبيبي وظليت نايمة بحضنهم وابجي ومن طلعت خوالي جانوا واكفين حتى مسلمت عليهم لان جنت كلش مقهورة منهم..
صعدت بالسيارة واني دموعي مطر كمت ما اسيطر ع روحي وتحركت السيارة وكمت اشهك ونظرت نظرة لبيت جدي والهم وبداخلي احس هاي النضرة الاخيرة،حطيت ايدي ع وجهي احاول اكتم الشهكة بس ما اكدر مو بيدي،تذكرت من توفوا اهلي وهم عفت البيت الي ربيت بيه وكل ذكرياتي وية اهلي وجنت مجبورة اتركه و اودعه وهسة نفس الحالة هم مجبورة اودع اهلي و اودع البيت الي كبرت بيه وذكرياتي وصديقاتي ،اووووف سازان وسوزان خطية ملحكت حتى اسلم عليهم واودعهم هسة اكيد همة يروحون لخالتي وتحجيلهم الي صار مرت ساعة ع الطريق واني بغير عالم افكر شلون راح اعيش واتصرف،زين شلون راح يتعاملون وياية??وليش هسة اذكروني????حاولت اهدأ نفسي واسكت شوية واذكر اهلي وارجع ابجي.....
طبعا غسق جانت بغير عالم متدري اكو عيون جانت تراقبهة اول مدخلت وحجت وية عمهة وظلت عيونه تراقبهة وتترصد كل حركة من حركاتهة وهو ابن عمهة ليث يصير ابن مصعب..
---
