ظلموني ولكن

الجزء السابع

#ظلموني_ولكن......
الجزء السابع.....
ليث:مرت الايام طبيعية ماكو شي جديد،وانتبهت امي شكد ما بيهة تذب شغل ع شفق وخواتي مالهم دخل بشي ردت احجي بس شفق منعتني كالت تشد وياية اكثر وظلينة فترة طويلة اني وامي منتحاجة بسبب المشكلة الاخيرة،اما بالنسبة لنور عيوني شفق جنت اتابعهة دائما واراقبهة بدون متدري مو بيدي اخاف عليهة اخاف تتخربط او احد يأذيهة....
شفق:كعدت كالعادة من وكت بدة يبرد الجو بداية الشتة،لبست دشداشة طويلة واردان طويلة هذا لبسي بالبيت ولبست الحجاب طلعت من الغرفة توجهت للحمام عندة حمام بالطابق الفوك،اني من يبدة الجو يبرد اشغل السخان لان ما اتحمل المي البارد،المهم دخلت للحمام فتحت المي بارد اووووف عرفت مرت عمي طفتهة تعرف بيه استخدم الحمام الفوك وطفت السخان غسلت بسرعة وفرشت اسناني والمي بارد،طلعت من الحمام وجنت ذابة الشال ع جتفي وفاتحة شعري اعدله وصار بوجهي ليث:جفلت،،يمة،،،جفلتني غير طلع صوت شي،،
ليث:كعدت اليوم وية اذان الفجر صليت وكملت عندي شغل،بس جنت كلش جوعان لبست ع السريع وكلت اي شي الكي بالثلاجة اكله،طلعت من الغرفة وياريت مطلعت شفت شفق واكفة يم الحمام وفاتحة شعرهة وبدون حجاب يبوووووو شنو من جمال لخاطر الله هي الظاهر جفلت من شافتني ومنتبهت ع الحجاب وطبعا هاي اول مرة اشوفهة بدون حجاب شحجي ع الشعر لو الركبة المرمر والنوب الدشداشة مالتهة دلع وانتبهت عدهة شامة بصدرهة حركتني حرك من الصبح،استغفر الله،ظليت فاتح حلكي و واكف،وانتبهت ع صوتهة تكول جفلتني ومدري شنو:احم...
العالم تكول صباح الخير بالاول،
شفق:ضحكت وكتله صباح النور شعجب كاعد من وكت اليوم???
ليث:انتجيت ع الباب واحجي وياها واريد اشبع شوف منهة اي والله عندي شغل ضروري...
شفق:يلة تعال اذا كملت تبديل خل احضرلك ريوك...
ليث:اي والله ياريت لان من شفت هاي الخلقة من الصبح فتحت نفسي ع الاكل واني البارحة ممتعشي...
شفق:يلة لعد راح احضرلك احلى ريوك،مشيت وانتبهت الشال الطرف ماله واكع بالكاع،عزة بعيني اي والله هاي اني بلا حجاب انداريت ليث وراية ويضحك واني ع السريع خليت الشال ودالفهة سمعته يكول:والي نازل ع جسمج ومغطيه شلون????
شفق:بأرتباك كتله هاااااااا???
ليث:نزل يمي وكف وهو اطول مني جر شعري النازل من الحجاب وشمه وكلي وهذا ممنوع تعوفيه هيج هذا بس الي...
شفق:اني انتهيت منا هو قريب علية حيل وهاي اول مرة هيج يتقرب والنوب يحجي همس جريت نفسي بالكوة احجي وابلع بريكي:لا هسة راح المة بالقراصة،صعدت ركض للغرفة وقفلت الباب لزمت وجهي صاير نار باوعت ع روحي بالمراية صايرة حمرة طماطة،ظليت اضحك ولميت شعري زين ولفيت الحجاب عدل ونزلت لكيته كاعد ويدندن وية روحه:اسفة اذا تأخرت عليك...
ليث:لاعادي عمري كله انتظار الج....هاي ليش هيج من احجي وياج تصيرين حمرة????
شفق:رحت معت بهدومي من الخجل وضحكت كافي الله يخليك خل اكمل ...
ليث:هو سؤال يلة عمي بطلنة...ظليت صافن عليهة شلون تتحرك تروح منا وتجي منا كلت بكلبي الله يسامحج يمة انتي وبناتج نايمات وهاي المسكينة تعجن وتخبز عهد علية والله بس اصير يمي كل هذا يتغير واشيلهة ع كفوف الراحة،،
اكلج شفق.....
شفق:كول...
ليث:امي والبنات شوكت يكعدون????
شفق:احجي واني اعجن مو سوة مرات عمة تكعد ب9مراتب8والبنات يتأخرون لل11هيج...
ليث:هي حجت هيج واني كمت افور بداخلي،زين احجيلي عن يومج من اول متكعدين لحد ميخلص اليوم...وتعالي يلة نتريك
شفق:لا انت تريك اني مو هسة بس اكمل كم شغلة...
ليث:كمت جريتهة من ايدهة خلصتي العجن،تعالي تريكي وبعدين كملي كوزين عليج سكرج ينزل كعدتهة وصبيتلهة جاي وخليتهة كدامهة وكعدت يلة سولفيلي،،،
شفق:شوف اني اكعد يومية مثل هيج وقت اصلي واطلع اعجن حتى يختمر واحضر التنور واحضر الجاي واخليهة واحضر الاجبان واسوي الكاهي،،،،،
ليث:لحظة...لحظة...شنو تحضرين الكاهي يعني هذا الي ناكله يومية من ايدج مو رشا ادزه????
شفق:ضحكت بس ضحكتي كلهة دموع،،ليش هو شنو الي سويته بالبيت ومو رشا مسويته،،اي المهم بعد ما اخلص الكاهي واشيرهة اطلع ع التنور واخبز واكمل اطفي التنور وادخل ع البيت الملم ع الخفيف ومن يبدون يكعدون اني ارجع لغرفتي...
ليث:ليش متكعدين وياهم???
شفق:عمة سهام متقبل كالتلي حسبي حسابج تخلصين كلشي قبل لا احد يكعد وتاخذين ريوكج لغرفتج، واني تجنب للمشاكل كمت اسوي هيج...
ليث:وليش تسكتين من تكول هذا شغل رشا?????
شفق:منو راح يصدكني او هي اصلا مراح تنطيني مجال احجي شي...
ليث:زين وبعدين لهنا وخلص شغلج????
شفق:ضحكت لا وين ورة ما الكل يخلص اني هم اطلع للمطبخ احضر الغدة واكمل شغل البيت واطلع ع الحديقة والطرمة وراها اطب ع المطبخ احضر السفرة ولوازمهة واصب الغدة نتغدة واكمل انظف المطبخ واكمل اصعد للغرفتي انظفهة وبعدين اشوف اذا اكو هدوم اغسلهن واشرهن واذا اكو ملابس محتاجة كوي اكويهن واذا صتر عندي فراغ اتمدد شوية والعصرية احضر الجاي والحبشكلات مالته اسوي معجنات واعجن والمغرب ابدي احضر للعشة واخبز وجبة العشة نتعشى نكمل الملم البيت وانظف المطبخ وراها اصعد انام،،وهذا هو خلص يومي....
ليث:ظليت صافن مستحيل هاي امي وشكد استحيت منهة ع تصرفات اهلي وياها زين خواتي ابوية جدي بيبيتي ذولة كلهم وينهم عنهة??يصير خير ان شاءالله اليوم ارجع من وكت واعرف شلون اتصرف....
شفق:هاي وين صفنت كمل ريوكك لتتإخر...
ليث:هاااا اي ان شاءالله يلة اني طالع ممحتاجة شي????
شفق:لا شكرا سلامتك....
ليث:ماشي ديري بالج ع نفسج،،،
شفق:طلع ليث وكملت كلشي ع السريع وكعدوا سمعت صوت سهام:شفق مشفتي ليث طلع لو لا????
شفق:بلي عمة طلع من الفجر....
سهام:شنووووو???شوكت يعني????
شفق:وية كعدتي حضرتله الريوك وتريك وطلع كال عنده شغل هواية...
سهام:بس لا حس وعرف لو هاي الجلبة حجتله شي ع كعدتهة والشغل النوب كل خططي تفشل...تعالي لج بت الفكر...
شفق:استغفر الله...عمة الله يخليج ليش هيج تحجين ع اهلي??
سهام:اش...اش...انجبي..جريتهة حيل من هدومهة خما كعدتي تتبجبجين لليث ع الشغل وهاي سوالفج التعبانة ???
شفق:لا...ل...بس...هو سأ...قاطعني ليث:السلام عليكم.
امه رأسا هدتني:ها يمة اشو من وكت اليوم???خما بيك شي????
ليث:لا الحمدلله بس جان عندي شغلة كملتهة وجيت،فوفة ولو زحمة عليج فدوة لگلبج صبيلي غدة اذا خلصان لان ميت جوع.
شفق:ظليت صافنة اول مرة ليث يحجي هيج وياية وجمالة كدام الكل،اي صار تدلل...
ليث:الغدة كملانة مو يمة?????
سهام:هاااا اي...اي..وليدي جاهز الغدة،رشاوي...رش...
ليث:ماكو داعي تصيحين رشا هاي شفق هنا هي تصبلي،مو وانداريت ع شفق شفتهة صافنة ومبين عليهة الخوف...
شفق:اي تدلل بين متسبح وتكمل الغدة يكون جاهز.
سهام:شوفي لج اذا سمعت حاجية حرف لليث موتج تكون ع ايدي فهمتي????
شفق:هزيت راسي،،،وبداخلي كلش خفت شلون ياربي شراح يخلصهة وية سهام وعصابتهة.
نزل ليث وتغدة وكمل وكعد بالصالة يم جدي يشرب جاي ورة تقريبا اكثر من ساعة سمعت جدي يصيحني.. دخلت لكيت الكل موجود يعني بيت عمي مصعب كلهم والوجوه مكلوبة متتفسر،نعم جدو صحت علية???
جدي:تعالي بنتي كعدي يمي...
شفق:كعدت يم جدي وكبالي سهام وبناتهة ومن الصفحة كبالي صار ليث وعمي...
جدي:شوفي بنيتي احنة بهذا البيت عائلة وحدة وميهم منو شال هاي الصينية ومنو الي نظف الي بداخلهة انتي بعدج جديدة والظاهر ممتعلمة بهذاك البيت ان تشاركين وية الكل،
شفق:ظليت صافنة كلشي ممفتهمة شنو الي ديصير وشيقصد جدي،جدو كلشي مدافتهم شتقصد انت احجي بكل صراحة...
صفية(ام ابوية):باعي من الاخير هاي السوالف الي علموهة الج هناك تنسيهة احنا هنا ماعدنة ناس تنغز بناس وماعدنة حقد وانتي الظاهر جيتي ومناوية ع خير طول عمرنة كعدتنة واكلنة وشربنة سوة ومحد شكة من الثاني بس جيتي انتي خربتي الاول والتالي حالج حال العكربة امج جنة لمة وشمحلانة لفت ابوج جوة عباتهة واخذته...
شفق:اولا،ميصير تحجين عن امي بهالطريقة لان هي توفت وهذا ماضي،وثانيا،ياريت احد يفهمني شنو الي ديصير وشمسوية اني???اباوع ع ليث واستنجد بيه بعيوني بس استغربت طول الحجي ولا علق ع كلمة لاهو ولا حتى عمي وكلما اباوع عليه يدير وجهة ويتهزم مني،شنو القصة???
جدي:عيب هاي التصرفات انتي مو جاهلة،يلة راح افرض انتي متعرفين،شلون تلزمين ليث وتشكيله من امه وخواته وكل هذا مكفاج جبتي طاري بت خالته النوب،عيب هاي التصرفات محد معلمج،ولو ماكو عتب الي لفوج محتاجين تربية...
شفق:شنووووو???انداريت ع ليث مدنك راسه ومباوع بوجهي ابد،،فهموني بشنو شكيت??احجي ليث اشكيتلك اني??اباوع مرت عمي تشهك وتبجي وبنات عمي هم،
بيبي:باعي لج وتعس رحلي بالعوجية مالتهة اذا سمعت جايبة طاري رشا نوبة اللخ اطيح حظج البنية من وراج تشهك وتبجي ولخاطرنة سكتت وموصلتهة لاهلهة،ادبسز بعدج بكد الفص وكل هالبلاوي تطلع منج...
شفق:تخبلت اريد احجي اريد احد يفهمني ماكو كلهة تهاجم بالاخير جدي حجة،
تذكرون الحجي الي صار بيني وبين ليث الفجر ع الشغل و وضعية البيت كل الكلام واصل لجدي طبعا زيادة حجي هواية وعود اني محرضته ع امه وخواته وجنت واكفة وياه بدون حجاب وملابسي ممسترة وكتلهة رشا تغار مني لان اني مقربة منك واحبك واحترمك وبنت عمك وما اريدخة تأثر ع علاقتنة وعود كايلتله هي تذبلي حجي يربطنة اني وانت...
ظليت صافنة معقولة مكر بني ادام يوصل لهالدرجة وعرفت شكد ما احجي وابرر همة مرتبيهة ومجهزيهة بس كلهة بجفة وموقف ليث بجفة جان طعنة بضهري شكد امنت بيه وصدكت بيه وتأملت بيه هواية شغلات تخيلته الحلم والحب،الامان ،الحنية،بس طلعت كلهة اوهام وهسة ايقنت ان اني صدك بغابة واتوقع بأي لحظة عدو يفترسني،وينج يا امي وانت يابوية شوفوا حالي من بعدكم،تعالي خالتي شوفي الي امنتي واطمنتي علية يمة هو اول الناس غدر بيه.
بيبي:هااا وين صفنتي ادوريلج ع حجة وجذبة جديدة....
شفق:انتفضت بعصبية اولا اني مو جذابة واني فعلا كعدت وحجيت وية ليث اليوم بس الله شاهد ع كلامي مشكيت اله هو سألني شلون تخلصين يومج وسولفتله وسألني ع الكل بالبيت واني جنت اجاوب بكل صدق وعفوية ومالي اي نية سوء اتجاه احد،وبالنسبة لرشا وروح الغوالي مجبت طاريهة...
سهام:هاي هي يمة اني شعندي وياج قابل اني حاسبتج بنية من بناتي فلهذا جنت امون عليج واطلب منج شغل لان البنات صادفت فترة امتحانات وهنة من يكملن غصبا عليهن يشتغل،بس مجنت ادري هيج راح تفسرين تصرفي وياج اني حتى وية البنات من وحدة منهن تصدف عدهة امتحان لو هواية دروس البقية تقوم بالبيت ومن تبدي الامتحانات ادز ع رشا...
شفق:معقولة هاي سهام هيج عدهة حيلة الي يسمعهة يصدكهة هو حتى اني احتمال اجذب نفسي واصدكهة،النوب عمي...
مصعب:مع الاسف يابنت اخوية مجنت ادري لهالدرجة كلبج يشيل حقد...وعافنة وكام.
جدي:الي صار ياشفق غير كل موازينة اتجاهج وجنت ناوي اخليج تكملين دراستج بس طلعتي متستاهلين...
بيبي:يمعود شمدرينة من اطب وتطلع شتحجي ع البيت يم الغربة،عوفهة خل تولي هاي حية سودة حالهة حال الي خلفتهة...
شفق:كمت لحيلي اكو شي ثاني لو اكدر اطلع???
سهام:من رخصتك عمي اكدر احجي وياها كدامكم???
جدي:كولي سهامة نسمعج..
سهام:اني بالنسبة الي ما اريد شفق تلزم شي بالبيت البنات هنة يتعاونن عليهة بغرفتهة والماعون التاكل والتشرب بيه..
شفق:ضحكت بداخلي عرفت لعبتهة حتى همة احترام الهة ويرجعون اعتبارهة يسون عكس الشي انداريت جتي عيني بعين ليث،نضرتله نضرة احتقار واستصغار عمره مراح ينساها جدي:كيفج بوية الي ترديه سويه..
بيبي:لا والله اشو عقوبة الهة الشغل كله عليهة خل تتعلم تحترم البيت والي بيهة...
جدي:خل اكوم هاي بينكم فضوهة بس ها باعي اكلج ياشفق اخر حجاية والتزمي بيهة الي يأمروج بيه كبار البيت تنفذيه بدون نقاش...
شفق:هزيت راسي وطلعت اجر اذيال الخيبة وراية طبيت للغرفة حاولت اظل صامدة ولازمة نفسي بس دموعي خانتني وظليت ابجي لحد ما غفيت واني ما احس بروحي...

---