السلام عليكم. طبعا اول قصه راح انزلها كلش حلوه وحزينه وهي.
السلام عليكم اسمي سجاد اسمي مستعار. عمري ٢٢ سنه واعمل عسكري. وبعد ما عرفتكم بنفسي راح ابدي بقصتي.
لمن جان عمري ١٣ سنه. اجوي علينه بيت عمي. وهم عمي. وزوجته. وبنته.. .وجنت اول مره التقي بيهم وجنت ما اعرفهم لان جانو ساكنين بغير محافظه وماكو زيارات بيناتنه. تعرفت عليهم وتعرفت على بت عمي واختاريت لها اسم مستعار لي هو عبير تعرفت عليها وطلعنه نلعب بلحديقه واخذتها ونتمشه على الشط الى ان صار وقت الغروب رجعنه للبيت ومن رجعنه للبيت. كعدت بصف والدي. والدي وسألني وين رحتو انته وعبير اليوم. كتله لعبنه شويه بلحديقه وتمشينه على الشط. فا والدي ضحك وكالي حبيتها لعبير.
كتله. اي كلش حبيتها وثاني يوم نفس الشي وبقينه اسبوع على هذا الوضع لكن وره الاسبوع قررو يرجعون لبيتهم واخذهم عمي وراحو.
يكول. مرت عليه سنتين وانه ما شايف عبير. وبهاي السنتين ما يمر عليه اسبوع ما افكر بيها او بسوالفها وضحكتها.
يكول. وره السنتين اجو علينه وبوقتها صار عمري ١٥ سنه وكلعاده اخذتها وطلعنه للحديقه كعدنه حجينه شويه.
يكول كالتلي عطشانه اريد ماي.
يكول كتلها اي هسه يجيبلج الماي ومن جبت الماي باوعت بعيونها.
وكتلها. عبير انه (احبج) يكول هيه ما حجت شي اخذت الماي وشربته وبقت شويه ساكته وكالتلي انه هم (احبك). يكول بذاك اليوم طرت من الفرح والسعادة الشفتها شي ما ينوصف وحسيت بحساس كلش حلو. ورحت كلت الوالدي لان جنت انه والدي اصدقاء وما اضم عليه اي شي بهذاك الوقت .
. يكول والدي كال ابني انته بعدك صغير لاتحب بعمرك هذا لان تتعذب.
يكول. انه ما سمعت حجايت والدي. وثاني يوم سافرو بيت عمي البيتهم. وبقيت اربع سنوات ما شايف عبير وهيه ما عدها تلفون حته اتواصل وياها او اتصل بيها.
يكول. ما راح احجي المعانات العشتها بغيابها بهاي الاربع سنوات. حته ما اطول بلقصه اكثر. بعد اربع سنوات اندك الباب طلعت لكيت عمي وعبير بلباب دخلو للبيت وعيوني يجدحن شوك وحسره على كلمت (احبك).
يكول.. كعدنه وكعدت يمهم شويه وطلعنه انه وعبير بلحديقه. وكتلها انه شكد مشتاقلها وشكد عانيت وشكد فكرت بيها بهاي السنوات لي مرت. وسألتها اذا جانت تحبني لو لا.
كول. كالتلي.. اي بعدني (احبك) وبهاي الاثناء صاحلي عمي ورحنه للسواق انه وعمي واشترينه غراض وبطريقي واشتريت لها حلقه فضه. حته اطيها لها هديه لبين ما يجي اليوم الخطبها بيها رسمي.
يكول.. رجعت للبيت ادور عليها ماكو. سألت اختي الصغيره وين عبير.
كالت. راحت وي عماد. عماد اخوي الاكبر مني ب اربع سنوات.
كتلها وين راحو.
كالت بلحديقه الوره البيت.
يكول.. رحت عليهم حته اصيحها. لكيتهم واحد لازم يد الثاني. واحد يكل للثاني احبك. واشتاقيتلك.
يكول.. انه بهاي اللحظه كلبي صار رماد وما تقربت عليهم. واثناء حجيهم عماد سألها كالها انتي صدق تحبين سجاد فا كامت تضحك. وكلتله هاي شبيك عماد هذا طفل شنو احبه.
يكول. من سمعتها هيج تكول. والله متت انسحبت من مكاني بدون ما يحسون وصعدت الغرفتي كسرت ما خليت العطر ولساعات. وشكو صوره الها يمي شگگتها.
يكول.. وره كم يوم اهلي قررو يرحون وي بيت عمي لمحافظتهم يبقون يمهم فتره ويرجعون المهم صعدو بلسياره. اهلي وعمي وزوجته. وعماد وعبير كاعدين سوه بغير بسياره اجيت عليهم كتلها ليش هيج سويتي بيه سكتت ما ردت اخوي عماد كالي روحي اصعد وي ابوي لا تضل تسولف.
يكول.. كتله لا ما اروح. وكتله بعدين انته مو اخوي انته مو احزام ضهري انته مو جنت تكلي انه اخطبلك عبير من عمي ليش هيج اسوي بيه وبقين اصيح عليهم. وتفلت عليهم ثنينهم ومشيت. (طبعأ عذرا بلمفرده بس هوه هيج كاتب).
يكول نزل عليه اخوي عماد ضربني راشدي كدامها. دخلت للبيت غسلت وجهي واجه والدي عليه كالي ي له امشي حته نروح.
يكول. كتله لا انه ما اروح كالي ليش كتله عندي متحانات. فا والدي ما حجه شي كالي ماشي ابقه.
يكول.. انه طبعا جنت كلش مجتهد بدراستي وجنت مفكر اصير مهندس. حته اكدر اخطبها لعبير من عمي. لكن بعد هذا الي صار وياي هملت دراستي وصرت ادخن. وبعد فتره عماد وعبير تزوجو.
يكول.. وانه تركت الدراسه ورح عسكري لان صارت وياي بنفس البيت. وهاي صارلي ٣ سنوات بلعسكريه. وما اروح للبيت بس من اريد اشوف امي وابوي وحته ما ابات بلبيت اسلم على امي وابوي واكعد يمهم ساعه واطلع..
يكول وهاي كل قصتي.. ونصيحتي لكل شخص بعمر المراهقه لا تحب بهذا العمر لان راح تتعلق وتتأذى وبلاخير تنصدم وممكن تخسر مستقبلك مثل ما صار وياي..
هنا ولصنه لنهايه القصه واتمنه اخذتو عبره وفائده من هاي القصه. اشوفكم بقصص جديده انشاء الله
