في موضوع حابه اشارك فيه اصحاب الصيدليات
وهو حق الموظف في العطله الرسميه
وانه اذا بده يداومها بده ياخذ اضافي عليها
في اصحاب صيدليات ما بيعطوا موظفينهم بدل اضافي عالساعه بساعه ونص في ايام العطل والاعياد الرسميه
علما بإنه هذا حق الموظف ضمن له اياه قانون العمل والعمال اللي كل الصيادله تابعين له ..
مزبوط احنا الصيدليات ما منعطل بالعيد معظمنا.. كل صيدليه ولها قانونها بالعيد .. ماشي بس هذا لا يمنع انه الموظف ياخذ حقه ..ولو صاحب الصيدليه ما بيقدر لأسباب ماديه واضحه للموظف ورضي الموظف بذلك فهذا شأن داخلي بالصيدليه بيصير بالتراضي بين الاطراف .. لانه فعلا في موظفين حاسين وشايفين قدرة كل صيدليه مختلفه عن الاخرى..
زمان انا كنت أعيد الموظف بالعيد واعتبره بدل دوام العيد .وكنت اتهاون بأي تأخير بالدوام أو أي مغادره ما احسبها (من باب انه ما في حساب للاضافي).. بس آخر كم سنه بصراحه بطّلت اعيد وصرت احسب اضافي للموظف حسب عدد ساعاته بالزبط اللي داومها وهذا أكيد بيضمن حقه أكتر .. وكل ايام العطل الرسميه صرت احسبها اضافي ونقلل دوام الموظف فيها على اعتبار نتقسم الدوام بين بعض كل واحد حسب ظروف حياته.. (وصرت على نفس البورد اللي اسجل الاضافي أسجل المغادره ..مثل ما هو بده يأخذ حقه انا كمان بدي اخذ حقي ).. الفكره مش بس اني اعطي الموظف حقه اللي ضمن له اياه القانون .. الفكره انه هو يحس حاله مرتاح وما يصير يدور على شغل تاني .. انه ما يحس حاله مضطهد
الراحه النفسيه للموظف كتير مهمه.. مزبوط هو شرعا لازم يحلل معاشه ويشتغل بما يرضي الله في عمله.. انما الانسان السعيد عطاؤه أكبر وانتاجه أشمل .. كل هذا رح يرجع بالنفع على صاحب الصيدليه سواء من ناحيه نفسيه بإستقرار الوضع بالصيدليه أو بزياده الدخل ان شاء الله ..
انا دقيقه جدا في حساباتي وهذه اصلا حقوق عباد سوف نُسأل عنها يوم القيامه ..
وهذا البوست مش عشان الموظفين اللي بيضلوا يشكوا من هذا الموضوع.. وانما عشان اصحاب الصيدليات ينتبهوا على اهميه هذه النقطه اللي لها أثر كبير على الشغل بالصيدليه
تحياتي زملائي ..
عيد سعيد 💐
ملاحظه: هذا البوست ليس لغايات انتخابيه😂😂😂😂
