البنت تطلع بس متحجبة ؟
قليلة أدب مب متربية ..
الولد يطلع متى ما يبا ويرد متأخر ؟
عادي هذا ولد ما يضره ..
البنت تدرس بره الدولة بروحها ؟
صايعة ما تستحي ..
الولد يدرس بره الدولة بروحه ؟
عادي ولد مسؤول عن نفسه ..
البنت تشتغل دكتوره ؟
اوه كيف تخالط الرجال ..
الولد يشتغل دكتور نساء وولاده ؟
مب عيب الولد فاهم وعاقل ..
البنت تطلع المول بروحها ؟
هاي وين أهلها عنها ..
الولد يغازل بنات الناس ؟
عادي ولد مراهق ..
البنت متسترة وطالعة في برنامج ؟
أهلها ما عرفوا يربونها ..
الولد يغتصب بنت ؟
البنت يت عنده هو ما راح لها ..
يخافون على البنت من الدنيا و ما يخافون على الولد من الآخره !
البنت: أبا أسير بيت ربيعتيه؛ لا عيب البنت ما تسير بيوت الناس..
الولد: بسير ويه الربع دبي؛ سير الله يحفظك..
البنت: ريلي سكير ويدخن؛ اصبري عليه واحتسبي الأجر..
الولد: حرمتيه ما تعرف تشتغل ولا تطبخ؛ تزوج عليها بنات الحلال وايد..
البنت: أبا أطلق من ريلي؛ ما عدنا بنات مطلقات, البنت مالها غير بيت ريلها..
الولد: ابوي قررت أتزوج الثالثة؛ على راحتك الشرع حللك أربع..
مع اننا في دولة الحمدلله رفع قدر المرأه ولكن مازال مجتمعنا يظن ان كل شي حلال للولد لكن حرام للبنت !
صار للبنت سمعة ولازم تحافظ عليها,
والولد لو شو يسوي محد يقدر يتكلم عن سمعته !
على كثر الي تسوي البنت بيتم مجتمعنا يظن إن الولد صح والبنت غلط !
