جنة فؤادي

جنة فؤادي الجزء 14

جنة فؤادي
الجزء الرابع عشر
#zainab_alnajar

أنثري حروف اسمي على شفتيكِ
فأني تهت في عينيكِ
ولا أحتاج لشوقٍ
بين
فاصلةَُ ،
ونقطةَُ .
وأستفهام ؟
أودُ عناقكِ وسط كل الزحام
ولا تغلقي الرمشين
فلا تستهويني الأحلام
كوني
واقعيةَُ
متيمةَُ
حنونةَُ
متمردةَُ
لنبدأ بقصيدةٍ عمرها سبعون عام
مشاعرها
أحساسها
أنتِ
وكاتبها رجل جَنَّ بكِ حد الهيام ،،

سألوني بابا واخواني بالليل عن رأيي
اخذت نفس طويل _ موافقة
_ على بركة الله.. راح نبلغهم يتفضلون نقرأ الفاتحة يوم الجمعة يوالمج المواعد بنتي
_ هايهيه بابا بكيفكم

صار الجمعة اجوي كل گرايبة لحارث واكيد بيت خاله ماكو
اخواته ثلاثتهم اجوي سجى ومها وضحى .. الوحيدة المريحة بيهن سجى .. الباقيات جانوا يباوعولي بنضرات ممكن افسرها حقد .. يمكن لان اخذت مكان بت خالهم وهاي نظرات امهم ما احجيها تگدرون تتخيلوها انتو گاعده متوترة وتهز برجلها ونظرات التعالي كأن اني وعائلتي اقل منها ..
حاولت اشغل نفسي ويه اقاربي .. خالتي وبناتها وعمتي وبناتها وزوجة عمي وياها مسرة وزوجة احمد الي احسها اكثر وحدة فرحانة بزواجي ههههه
مسرة واكفة يمي استمد قوة منها ومن ضحكتها ..
_ يوم ألج ويه الي تتمني حبيبتي
_ تسلميلي وبوجودج ان شاءالله
جنت لابسه قفطان مغربي ابيض اوف وايت وبي شغل ذهبي شعري بس فتحته لونه اسود ماصابغته واصل لنهاية ضهري .. مسره خلتلي مكياج خفيف ما احب المبالغة بس لون حمره احمر توتي جان بارز

اتفقوا على المهر وصاحني حسان حتى يعقد لنا الشيخ وياخذون موافقتي خليت شال على راسي ورحت
يردد الشيخ الكلام واني صافنه
حسان واكف يمي خله ايده على متني باوعت عليه
_ نعم وانت وكيلي... .
اجوي باركولي اخواني وبابا وعمي وولد عمي .. احمد جان حيل متأثر ومقهور
قروا الفاتحة واباوع على امه بالكذب مبروك ماگالتلي ولا هلهلت بس سجى خطية تهلهل ومخبوصة .. بس موقف لا أُحسد علية گدام گرايبي .. الكل انتبه عليها وعرف جايه مجبوره
تدرون ساعتها تندمت حسيت استعجلت جان المفروض ارفض لحد ما هي تقتنع او يمكن ابقى بدون زواج ولا هاي الذله .. ارجع اتذكر حارث شنو ذنبه .. بس لا ذنبه امه .. ونوب اتذكر طارق وتهديده واتذكر من اجه على ابويه واخواني وحاول بكل طريقة يخربها ولحد الآن ماعرفت منين عرف بخطبتي
خلاص هاي قسمتي .. مسحت دمعه بطارق رمشي ..
مسرة تحاجيني لا تهتمين هي تريد تغثج .. اجتي سجى گالت حارث راح يدخل يشوفج
ارتبكت كلش ايدي ترجف واي من ملامح الفرح ماكو بوجهي .. بالعكس جانت اكو خيبة ودموعي تهدد بأي لحظة تنزل
دخل حارث رفعت راسي اشوفه .. لابس سترة جوزي وبنطرون بيجي جينز والقميص جان لونه بيجي وبي خط رفيع من گدام مشمشي وفاتح الدگم الفوگ من قميصة مبين بداية صدره شعر خفيف وبشرته حمره مزين جديد وشعره مرتب مثل كل مره يخبل وابتسامة ماليه وجهه عكسي تماماً.. وصل يمي باسني من راسي وطول بيها
_ مبروك حبيبتي .. ولو المفروض ابارك لنفسي لأن فزت بيج
گعد بصفي واخذ ايدي بأيده خجلت جان الكل يباوعلنا .. هو هم جان مرتبك يمكن لأن ايده ترجف
_ هسه وين انهزم بيج حبيبي .. فديت هالجمال كله الي
ابتسمت وياه وعلى واهسه .. شفته اشر لسجى جتي حاجاها راحت وجتي بعد شوية شايله علبه مبينه علبه مجوهرات
اول ماباوع على امه وخواته عيونهن يريدن يطلعن الضاهر محد يعرف بالي جايبه بس هو وسجى
فتحت العلبة جان تخم كلش حلو وثگيل مبين .. بدأ يلبسني قطعه قطعة.. كل ما يتقرب مني احس بانفاسه سريعة
_ شوكت احضنج.. شوكت اضوگ شفايفج
_ حارث منا الناس عيب
لبسني لگلاده همس يم اذني _ مرتي انتي مرتي خلاص
_ لبسني التخم كله واكو علبه ثانية صغيرة .. فتحها طلع منها حجل .. تفاجأة بحركته دنگ على رجلي سحبها ولبسني .. خليت ايدي على عيوني .. ما اعرف خجل لو احراج لو ما اعرف اتصرف .. فتحت بعده گاعده گانما ناسي الناس اليمي لزم ايدي وباسها ورجع گعد يمي
بهاي الحركة امه فقدت كل قابليتها .. اجتي علينا .. حاجته بصوت ناصي بس اسمعها
_ ولك ما استحيت على هالحركة هاي سودت وجهنا .. شماخذ قابل وهيج تنزل نفسك .. شوكت سويت واشتريت واخططت .. حارث ماجاوبها بس مبتسم .. رجعت باوعت السجى حسابج ويايه بعدين ..
حارث اندار عليه والضحكة تارسه واجهه والفرحة مطبوعه بعيونه الخضر. ..
_ زبيدة لا تخلين احد يأخذ فرحتج.. افرحي وياية لاتهتمين .. اجوي الجهال يمه داليا وحسوني اخذنا صور وصدگ تناسيت امه وكل حقود
بعد شوية طلع وهمسلي گلي اجيج بالليل .. ضلوا گرايبه وگرايبي وكل ما اباوع على امه الگاها صافنه علية وعلى الذهب
ونسوان اخوتي ماخذات ركن ويتهامسن .. اووف شنو هالحفله ردت بس يطلعون دا اتحرر
بعد تقريب ساعة راحوا اهله بس گرايبي يباتون عدنا لأن بعيدين
سبحت وغيرت ملابسي لبست دشداشة بيت لونها سماگي ناعمه وصايرة على جسمي وبيها فتحات على جوانب رجلي كلش حلوه شعري رفعته بكماشة عالي
بيتنا كلنا مجموعين شگد حلوه اللمه وخصوصاً اذا فرحة التهيت وياهم ونسيت ام حارث وهم محد ذكرني ونسيت حتى حارث الي گالي اجي بالليل تذكرت من اندگ الجرس عمتي سميرة گالتي هاي خطيبج اجه روحي بسرعة فتحي باب الاستقبال ردت اغير ملابسي دفعتني مسره گالت تخبلين خليج بسيطة لا تبدلين ولا مكياج .. فتحت له الباب ضل صافن بوجهي وباهت خجلت بس دخلته كعد على التخم وطلعت بسرعة اخذت شال خليته على اكتافي ورقبتي وهم زين خليته لگيت بابا گاعد يمه وعمتي شوية واجتي گالت العشه جاهز گعدنا كلنا نتعشه
وره العشا گعدنا لوحدنا ردت احجي عن موقف امه اليوم بس ..
_ اترجاج زبيدة لا تضيعين فرحتنا مو گلتلج لا تهتمين هاي اني شفتيني تأثرت بكلامها
_ حقي اخاف من الجاي راح اعيش وياها لو لا
_ زين واني وين حقي .. اريد عشا
_ توه تعشيت هههه
_ لا لا منا .. يأشر على شفايفي .. وهذا الشال شيلي ترى رجلج عادي اذا هسه اخذج واروح للبيت .. خليني اشوف شخالق الله
نصيت راسي رفعه من حنكي بأيده ومشاها على خدي وعلى شفايفي بأيده الثانيه نزل الشال من اكتافي يباوع نوبه الشفتي ونوبه بعيوني.. _ ليش ماتخلين الحمره نفسها مال اليوم... اويلي تخبل .. تخيلت طعم شفتج بيها .. يحجي همس ويقرب راسه مني .. قربني لحضنه حضني واخذ شفايفي بوسته هادئه خدرني صرت ما احس برجلي يمكن ساندني بجسمه شويه شوية صارت تقوه لحد ما صارت قاسية .. ابتعد شوية بالگوه يجر النفس واني مثله . شفايفي خدرانه ما احس بيها .. خله راسه على راسي ويهمس .. _ شوكت نتزوج بعد ما اتحمل ..
رفع راسه گلي نهاية هذا الشهر نكمل كل شيء ونتزوج
_ شلون الحگ
_ العقد مال المحكمة هالاسبوع نكمله.. والجهاز كل شيء بالسوگ بيوم واحد نكمل .. هايهية زبيدة
_ خلاص بكيفك .
_ هههه فديت مرتي التسمع كلام .. خله راسه يم رقبتي .. زبيده احتويني ترى تعبت بحياتي
_ حبيبي انسى الفات انت نولدت اليوم .. وعد مني ما راح تشوف مني الا الي يريحك .. بس حياتنا بالتفاهم تكون حلوة .. دائمًا خلي نكون صريحين واذا شفنا لو سمعنا نسأل بعضنا ونتأكد
_ اي اي ماشي بس تعالي خلي اشبع منج
_ ههههه كافي حارث هاي صوت حسان بره خلي نطلع
_ امري ل الله اصبررر ان الله مع الصابرين
...
بعد يومين داومنه اجه عليه بسيارته ورحنه دخلنا للشركة ايدينا متشابكة اخذنه ويانه جكليت وزعنه وعلنا خطوبتنا الكل اجه باركلنا .. بين عيون حاقده وعيونه فرحانه لفرحتنا
اكثر الي فرحولي وفاء حاضنتني گالت صدگتي هسه المن يحب حارث وعلي هم جان متقدملها وينتظرون اهلها يوافقون
عمتي گالتلي اطلبي منه بيت وحد واخذي الجهال وياج .. بس خفت اكون سبب يغضب الله بي من يترك امه لوحدها
كل شيء صار بسرعة من جهازنا وهاي يوم عرسنا

******
گاعده ببيتنا .. ببدله العرس الي رفضت البسها بس حارث جان مصر كل شيء يسويلي بدله وعرس بقاعة وزفه جبيرة .. كل ما اكوله شي ما اريد يگولي ازعل منج اريد يكون كل شئ بداية لثنينه .. اتذكر هالايام المرت .. والدته وكلامها السم من اشترينا الجهاز وهي تسمعني تگول هم مصدگه نفسها العجوزة. .. الى حسام اخوية الي راد بس اتزوج عبالك حمل على گلبه .. مره يگولي اقبلي بحارث نوبه يگولي ارجعي الطارق وصلت لنظرات احمد بيوم قراية الفاتحة مالتي من طلع من الاستقبال و گالي مبروك يا بت عمي .. وصوته وعيونه مليانه الم
انتبهت على صوت عمتي
_ ابوج يريدج تعالي شوفي قبل لا توصل الزفه
رحت على بابا حضنته نزلت دموعه وانا ابجي وياه .. يوصيني على نفسي ..
_حبيبي بابا يومية اجيك والله...
_ الله يبارك بيج بابا ويسعدج لا تخافين بيت ابوج يبقى مفتوح وهاي حصتج تبقى يبني اخوج براحته ..
_بابا كافي حبيبي الله يطول عمرك ويخليك الي

*****
حارث
ما اعرف اوصف فرحتي اريد بس الوقت يمر واخذها لبيتي ردت افرحها وافرح سويتلها كل الي تتمنى اي بنية كأنما اول زواج وما ريد اتذكر الماضي .. وصلنا بالزفة اني واقاربي واصدقائي لبيت حبيبه گلبي من جينه نطلع انقهرت حيل على ابوها وهو حاضنها ويبجي
اخذتها ورحنه للقاعة نكمل الزفة ... برغم امي شگد حاولت تغثني بس جنت فرحان ما اهتميت بس لا تغث زبيدة من نروح للبيت .. همسات اقاربي خصوصاً مرت خالي الي حاضرة لحفلة ما اعرف ليش بس اكيد سوالف امي .. اباوع عليها جامعه مجموعة وگاعده تحجي الله اعلم شتگوللهم .. بس ماسمحت الها تقهرني وتقهر حبيبتي بهاليوم .. اشرت للديجي شغل اغنية هادئة واخذت زبيدة ورگصنه حبيبتي بحضني وخجلانه متوترة.. رفعت راسها بأيدي خليت عيوني بعيونها اريدها تنسى هي بنص كل هالناس .. دوم نظرة حزن بلمعه عيونها .. احس حتى اليوم مافرحانه او يمكن خوفها وتوترها السبب
ربي اسعدها واسعدني وعوضنا اثنينا عن كل شيء شفناه ‏-

أقٌتِرب ، وقٌولّ بَـ انك لنٌ تخٌتِفَي مَنٌ عالّمَي أِبدَاً......
‏لاأرغب بالحَديث معهم فقط إقترب انت وعانقنِي....!!

تصويتكم يدعمني ورأيكم مهم .. اذا شفتوها تستحق

اشعر بالاحباط لقله التصويت والتعليقات ☹
معقوله مو حلوة 😭