السمنة لا تليق بي (مكتملة)

السمنة لا تليق بي (كاملة)

🍏🍏🍏🍎🍎🍎🍏🍏🍏🍎🍎🍎
قصة ليبية #واقعية مؤثرة
#السمنة_لا_تليق_بي
كتابة ندى احمد
🍎🍎🍎🍏🍏🍏🍎🍎🍎🍏🍏🍏
الجزء الاول
في اول يوم من شهر 12 سنة 2016
📲رن نقالي مع الساعة 11:00
رديت : أيوه
-ابلة وعد ؟
-تفضل
-احنى محل ... (للورد الطبيعي والشكولاته ) عندك هدية من زبون رفض يقول اسمه
طلب نوصلوهالك ... فياريت تعطينا عنوانك بش يجيك المندوب ويوصلهالك

لان مفيش مرة و حد بعتلي هدية فكنت مصدومة رديت :
- اها .. اي  تمام بس .... قعدت ندوي بالشوية 《انا في الشغل توا  صعب شوي في مكان شغلي ..وتو بيقعدوا يقصقصوا  》
- عفوا اختي شن قلتي ؟
-اه نعم ... لا شي شي
-خلاص نستلمها قدام مطعم ال... اللي في شارع ....
-تمام اختي ربع ساعة والمندوب يكون غاذي ان شاء الله ..
صكرت الخط 📱
ومن  طاولتي لميت حاجاتي تليفوني مفاتيحي في الشنطة وكيف بنطلع  خشت زميلتي وصحبتي سالمة
سالمة : وين على خير الدوام قاعد ما كملش (كانت تشبحلي مستغربة كيف طالعة مستعجلة)
أنا: ماشية لأختي دنيا عازمتني على فطور ... (رديت عليها  وماكنتش خاطري نكذب .. بس انا من نوعي في حاجات تخصني وحساسة مانحكيهاش حتى لصديقة مقربة ليا ونعزها )
سالمة :سلميلي عليها ... ردي بعدين ف الليل  على الفيس نبيك في موضوع .. ( تلفتتلي كيف فتحت باب المكتب مستعجلة )
أنا: يوصل هي ماشي احييبة ماتبي شي ؟ (رديت باستعجال مبتسمة  .. مستعجلة على الهدية شني ومن مني وفي نفس الوقت خايفة كيف بنستلمها من المندوب قدام الناس ... لان نتعقد منحبش نوقف على شاب في شارع )
سالمة : سلامتك

.....
انا : خيره هذا عطل .. شكلها جرية   حيي يا وعد تخايلي جرية  .. تي من هو المعجب المجهول  اللي بيبعتلك هدية .. كان يشوفني المعجب هذا يهرب ... (وانا واقفة جنب المطعم  في سيارتي امتى يجي المندوب  حاسة بالعبط  الناس كلها تفوت وتتلفت ... تعقدت )

رن نقالي 📲

-اهوا شكله المندوب يتصل
رديت :ايوه
-السلام عليكم.. ابلة وعد  انا المندوب وصلت قدام المطعم  ...
تلفتت وانا حاطة النقال في ودني ...
-شفتك ... اكسينت بيضاء ؟  (وفتحت الروشن )
-اي .. ( و نزل  من السيارة وقف يدور )
-انا فيستو حمراء  قدامك .. ممكن تجيبهالي عندي  ( واشرتله بايدي ونزلتها بسرعة .. )
-مش مشكلة ... تمام ( وقص الشارع  وجابها ... وكان شخص في قمة الادب ..... )
كانت الهدية كبيرة  صعب نستلمها من جيهتي ..
اشرتله  بابتسامة انه يلف جهة روشن التاني ع يميني
كان الروشن مفتوح وحطها من الروشن وكانوا عيونه لوطا وكله احترام .. عطيته فلوس التوصيل
انا :تفضل .. سامحني تعبتك
رد هو : شكرا .. ولا يهمك اختي ( يمكن كان فاهم علاش مانزلتش وليش قتله لف لروشن الجهة التانية ... اتحشمت من روحي ومن وضعي ..وتعقدت هلبا 

روحت للحوش جعااانة بنموت من جوعي بدلت حوايجي وصليت الضحى

فتحت الثلاجة ندور شن ناكل امي مهناش بايته في العرس  عرس كبير  ولاد خالتي الزوز ..
(مافي شي .. خوت كان ما تزوجوش خير داروا مفرخ وخلوا الثلاجة ¡¡¡¡)