زي كل يوم ببتدي يومي بمكان جديد.... مش انا الي بختاره... بقف بعيد استني علشان اقابل زمايلي المستجدين .. فالاول بيبقو مرعوبين ومش فاهمين حاجه و مبرقين و فاتحين بؤهم كدا ..لكن علي اخر اليوم بيكونو خلاص اتعودو و طبعا دا راجع لكل شخصيه يعني فيه شخصيات مرنة وعندها تقبل سريع للواقع وفي شخصيات عكس كدا.. الحق يتقال... اغلب الي قابلتهم الفترة اللي فاتت تقبلو الواقع وتاقلمو بنسبه كبيرة بسبب مجهودي الشخصي في مساعدتهم واقناعهم. انهارده كنت واقف ف مكان زحمة جدا... البلد مصر.. المكان ف محطة القطار...تحديدا محطة قطار رمسيس.. برنامجي محدد كالعادة رغم ان عندي متسع كبيير جدا من الوقت لكن المهام محدده، فالبداية خدتلي جولة كدا فالمكان ..اتمشيت رايح جاي علي كل رصيف... من ال ٦... علي الرصيف ٥ كان في شاب حوالي 21 سنه بيتكلم فالتليفون ومنفعل اوي وقفت وراه اسمع شويه.. لازم الواحد برده يتابع الناس ومشاكلهم .. دا بيخليك تفصل عن الواقع بتاعك وزي ما بيقولو الي يشوف بلاوي الناس تهون عليه بلوته... الشاب كان منفعل جدا والدمعة هتفر من عينه وبيقول:
- يا ابراهيم انا محتاج 2000 جنيه ضروري بكرة اخر معاد للدفع... ان مدفعتش مش هينفع امتحن.... كل مجهودي هيضيع ودا اخر قسط ..
- حاضر والله ياعماد انا مكلم زميلي فالشغل و قالي هيسلفني ال2000 جنيه وهو مجاش انهارده واتصلت مرتين بيه محرج اتصل تاني مش عايز ابقي زنان..
- . انا عارف ياخويا انا متقل عليك و زانقك فالمصاريف لكن مضطر والله ماباقي مليم من المرتب دانا هركب القطر باخر فلوس فجيبي ..
- . يبني مانا عارف انا لو معايا المبلغ هديهولك لكن انت عارف العين بصيرة والايد قصيرة عشان كدا قلتلك ادخل جامعة حكومية هتبقي اوفر..
- معاك حق بس خلاص انا فاضلي سنه وهتخرج وهتثبت فشغلي ومرتبي هيعلي.........
يااه حاله ابراهيم وعماد صعبه اوي موجودة في بيوت كتير حطيت ايدي ف جيبي اهولو لقيت اي مبلغ ممكن اساعدهم بيه ،طبعا مفيش ولا مليم ،منيين يا حسرة!! اتمشيت قدام شويه... لقيت بنت وولد ماسكين ايد بعض و الولد بيقولها...
-انا مبسوط اوي يا امل انهارده انتي عارفه رغم ان اني اسافر معاكي دي حاجه عادية لكن هتكون احسن رحله مرت عليا ف حياتي..
-رحلة ايه يا محمد ههههه احنا رايحين نزور هيام و ماذن بسرعه كدا صد رد وراجعين..
- مش مهم رايحين وجايين امتي المهم معاكي...
- اعمل حسابك هعد جمب الشباك! ...
جري ايه يا امل الولد هيمان فيكي وانتي كل مشكلتك الشباك. ياااه ليت الشباب يعود يوما... راحت فين ايام الحب و اللهفة و السعادة دي... يلا ماعالينا نركز ف شغلنا.. الساعه دلوقتي 10 ونص اظن دا المعاد الي انا مستنيه... تسالني اشمعني دلوقتي اقولك معرفش مش كل حاجه مفهومة ولا ليها قواعد ثابته لكن اديني مستني..مستني ايه!! مستنيهم يا اخي... هم مين!! هيكونو مين يعني خليك نبيه.. المستجدين !!!
تن تن
.قطار 915 القادم من الاسكندريه علي رصيف نمرة 4
زي الفل.. تعالو!!
الحمد لله القطر وصل بسلامة ونزل منه كل الركاب
اهم الاربعة دول ماشيين فالاتجاه الصحيح... يلا ياجماعة........ صوت انفجاار عالي جدا.. صريخ عالي جدا... عياط و صويت... وناار في كل مكان... جثث متفحمة ناس اتجمعت وبتصور وناس بتساعد وناس بتجري وناس النار ماسكة فيها و.... امل ومحمد عالارض بلا حركة... خلاص قابلو وجه كريم.. و عماد... راح في مكان غير الي احنا فيه.... للاسف انا معادي مكنش مع امل ومحمد ولا عماد... دول من اختصاص فريد و كارم.. انما انا كنت مستني مدام وفاء..دي اول واحده نزلت من القطر وكنت مستنيها واول واحده ماتت فالحادثه قبل كل الي حواليها.. للاسف مش هتقدر تشوف اولادها حاليا الي كانت راجعه بتجري وكلها لاهفه تلمسهم ب اديها.. لكن متزعليش يا وفاء انا هساعدك حاليا... ابتسمتلها ابتسامتي المعهودة ف انا شخص ودود متفائل بقابل زمايلي بابتسامة تنسيهم الكارثة الي هم فيها.. كارثة ايه!! انهم ماتو من نص ساعه طبعا.. انت مفكرني ايه... اه انا معرفتكش بنفسي من الاول.. اسف جدا الكلام خدني ونسيت.. السن بقي!! ..انا اسمي.. هممم مش مهم اسمي.. مكن يكون زينهم.. عبد العال.. ادوارد.. حسن.. مايكل مش مشكله اصلا انا مش فاكر... لكن اهم حاجه عايزك تعرفها.. ان انا شبح...هرجعلك تاني... ورايا شغل دلوقتي... شكرا... يتبع
