Ang Istorya sang Kabuhi ni Padre Pedro Chirino

Padre Pedro de Chirino

Si Padre Chirino nabun-ag sa banwa sang Osuna sang Andalusia sa Espanya.

Naggraduar sa sibil kag pagka cura parroco sa Sevilla. Pagkatapos sini, nagsulod siya sa Society of Jesus sang mga Heswita sang naga sang 23. Mga pila ka tuig ang nagligad, gindesignar siya nga ma misyon sa pungsod Pilipinas. Sang tuig 1590, naka lab-ot siya diri kaupod si Gomez Perez Dasmariñaz, ang bag-o nga nangin Gobernador-Heneral sa Pilipinas.

Una na designar si Padre Chirino sa convento sang Balayan sa Batangas. Kasunod sa Taytay sang tuig 1591. Sang nadestino siya sa Taytay, ginsaylo niya ang pundasyon sini marapit sa Laguna de Bay. Hasta subong ara man gyapon sa ginatindugan ang simbahan nga ginpundar sang mga Pranses sang tuig 1579 nga ginatawag sang una Sta. Ana de Sapa. Gin-islan ini ni Padre Chirino nga San Juan del Monte sang Agosto 15, 1591.

Sang ara si Don Esteban Rodriguez de Figueroa sa Manila, ginhingyuan niya si Bise-Probinsyal Procurador Antonio Sedeno nga mangita sang pari nga magtudlo kag magbunyag sang mga tawo sa iya lugar nga Tigbauan sa Isla sang Panay nga ginhatag bilang Titulo Real sang Hari. Sadto nga tinion, napilian sanday Padre Chirino kag Hermano Francisco Martin kag nagpadulong sila sa Tigbauan sang Pebrero 15, 1593.

Sang na destino si Padre Chirino diri sa Tigbauan, iya gintun-an ang lenguahe sang mga tumandok amo ang Haraya. Sa pila ka bulan, gin establisar niya kag ginpatindog ang eskwelahan nga gintawag niya Colegio de Tigbauan sang Hunyo 2, 1593. Ini nga eskwelahan ang nangin una nga eskwelahan sang mga lalaki sa pungsod Pilipinas. Sang nabatian ini sang mga taga Villa nga may eskwelahan si Padre Chirino, nagpadala dayun sila sang hingyu nga matudluan man ang ila mga sumulunod.

Nangin bisita ni Padre Chirino sa Tigbauan amo sanday Antonio Pereira, isa ka Portugalo nga pari; Padre Antonio Marta, superior nga pari sa isla sang Maluco kag si Gobernador Heneral Gomez Perez de Dasmariñas. Sang nagtaliwan si Martin Hernandez, kabulig ni Padre Chirino ginhingyuan siya ni Padre Antonio Sedeño nga magbalik sa Manila. Nagpabilin si Padre Antonio Periera sa Tigbauan kabaylo si Padre Chirino sa mando ni Padre Sedeño.

Sang pila ka adlaw, sa mando ni Padre Sedeño, nagtipon siya sang mga pari sa isa ka misyon. Diri napilian niya pagid si Padre Chirino, Padre Juan del Campo, Padre Cosme de Flores kag si Hermano Gaspar Garay. Ang iya mando nga ma misyon sila sa pamaagi nga hapiton nila si Padre Periera sa Tigbauan kag magpadulong sa Leyte. Naka lab-ot sila sa Leyte sang Hunyo 13, 1595.

Sang nagdugay sila sa Leyte, ginhatan naman sang misyon pagid si Padre Chirino sa rekomendasyon ni Don Diego de Arellaneda.

Nagbalik siya sa Mexico sang tuig 1602. Sang tuig 1604, ginpublisar niya ang una nga edisyon sang iya libro amo ang Relacion de las Islas Filipinas.

Nagbalik si Padre Chirino sa Pilipinas sang Oktubre 17, 1606. Diri ginpadayun niya ang gin-umpisahan nga pagtuon kag pagsulat sang kasaysayon sang Pilipinas.

Ang iban niya nga mga ginsulat nga libro wala ma publisar. Sang tuig 1890 lang napublisar ang iya ikaduwa nga edisyon sang Relacion.

Sang Setyembre 16, 1635, ang kabuhi ni Padre Pedro Chirino natapos. Ginpasidunggan ang iya kontribusyon sa pungsod Pilipinas bilang Sumakwelan kag Procurador sa idalom sang Society of Jesus.