جنة فؤادي

الجزء 21

جنة فؤادي
الجزء 21

#zainab_alnajar
قراءة ممتعة ☺
اضغطوا للتصويت
واتركوا لي رأيكم فهو ما يدفعني للكتابة

افعالك تثبت اني لم اكن لك شيء من البداية
لا بأس بخذلانك .. فسابقاً خذلت نفسي
على ماذا الومك اذاً ..
شئ من الخذلان قد لامس قلبي
وربما
ليس شئ واحد .. بل حياة كاملة خذلته

كل شيء تغير حمودي صار تبقي بيبيته يمها ومتأكدة امه تجي دلو وحسوني جانوا يبقون بيت سجى من يطلعون من مدرستهم لما نرجع اني وابوهم هسه الخط يرجعهم للبيت .. دلو تقريباً فقدتها .. شگد احاول وياها بس زارعين خوف بداخلها بحيث حتى صارت ماتقبل اسبحها .. بس حسوني احس ترباتي ماراحت بي بس ارجع يبوسني وبعده يصيحني ماما مو مثل دلو صارت تصيح بأسمي .. اتعجب شلون بشر يگدر يبث سمومة لهالحد بطفل .. وحمودي عادي طفل بعده يتعود بس بعدني انومة بحضني ومرات اگعد من النوم حسوني هم جاي يمي
ايام تمشي واشوف وين راح اوصل بيها .. دينا بعد ما اجتي بس حسوني جان يحجيلي تجي للبيت ..
المشكلة عايشة حياتي لوحدي
مخنوگة العصرية اخذت الولد ورحت على سجى دلو ما قبلت تجي
_ زبيدة كفاً للمشاكل وحتى لاتجي للبيت خلي تشوفهم كل يوم جمعة .. لان متأكدة الجهال مو هدفها ..
_ لعد شنو هدفها سجى عفية گوليلي  بت خالج وتعرفيها احجيلي
_ ما اعرف والله بس ديري بالج على رجلج
_ اني وحدي وعلى نيتي
_ والله زبيدة اني كلش احبج .. انتي انسانة حرامات يخسرج اخوية .. لو بس يقاوم امي ومايضعف
_ شو حجيج يخوف احجيلي بصراحة فدوه
_ والله من اعرف شي راح اكولج وعد مني هسه مايحجون گدامي شي يدرون ما اقبل سوالفهم ..
اريد اگولج شي هم .. ذهبج وفلوسج ضميهن بغير مكان .. وحتى سيارتج خليها بيت اخوج
_ ليش
_ احسن .. اسمعي كلامي

** رجعت من سجى زادت حيرتي وخوفي اكثر .. شتقصد بحجيها .. بس گالت ما اعرف يجوز صدگ مجرد تخمين
زين اني عندي ذهب هواية
وفلوس رواتبي ما اصرف هواية ودائما اسوي سلف بالشركة عندي تقريب دفترين وين اخليهن .. فكرت اخليهن وديعة بالمصرف بس هم لازم اطلع لوحدي وهو لازم اكوله وين رايحة .. فكرت بحسان هسه يكولي ليش تضميهن يمي ويريد يعرف السبب .. تالي صفت بالي اخليهن يم وفاء مده وشوكت ما اروح على بابا اخذهن يمه..  سجى خلتني اخاف من امها
ثاني يوم اخذتهن وياية نطيتهن السجى وگلتلها گولي لعلي لايگول گدام حارث
والسيارة گلتله لحسان اجيبها يمكم الگراج مايكفي متضايق البيت
حارث استغرب من كلتله نوديها هناك گال شعجب هسه كلتله حسان سيارته عاطلة ومحتاجها
المهم مشت واشوف وين راح اوصل وياهم
…
حجيت ويه حارث وصاروا الجهال توديهم بيبيتهم يوم الجمعه تشوفهم .. هم فكرت كلت حرام علية احرمها منهم يجوز غلطت وندمت
دلو خلاص .. صارت تشوفني شي مرعب .. ومرة گالتلي اني اريد ماما ترجع هنا ويانه
_ حبيبتي دلو مو تعرفين اني هم احبكم واني هم ماما
_ لا انتي اخذتي بابا وخليتي يعوف ماما
_ منو گلج هيج
_ بيبي وماما گالو واني صرت ما احبج…  دفعتني وراحت
بس حسوني يطيب خاطري .. اجه باسني گال ماما معليج بيها اني احبج
عمتي كل ماتروح توديهم تخابر حارث تعال رجعنه
مرة گاعد يمي وخابرته.. گلها هسه جاي
_ حارث ليش هم مو قريبين ليش كل مرة تخابرك
_ عادي مابيها تشيل حمودي
_ اهااا .. اكولك من تروح هم تدخل جوه لو من الباب
_ اهوووو اشتغلت رحمة الله و سوالف الغيرة خلي اروح احسن
طلع وسد الباب حيل .. ضليت مصدومة .. هذا شبي وشنو هالاسلوب الجديد
حسوني بالليل اجه يمي صار عندي فضول اسأله
_ حسوني من اجاكم بابا هم دخل جوه
_ اي دخل وماما دينا سوتله عصير بس بابا صار عصبي على بيبي كلها ليش تخليني اطبلهم وتحرجيني
عرفت اكو شي راح تسوي الوالدة المصون
بس تطمنت شوية مادام هو رافض بعده
***
حارث
اعرف امي دتحاول بكل طريقة تقرب دينا نوب .. وحجتها بصريح العبارة رجعها جهالك يريدوها .. ودزت دلو گالتلي بابا اريد ماما ترجع تعيش ويانه وشفتها شلون ابتعدت عن زبيدة
رجوع دينا سبب هوسة بحياتي من جديد .. قبل فترة من رجعنا من الدوام وهي كاعده تلعب الجهال بالصالة بذلك شكلها رجلها طالعة بيضة وشعرها الذهبي مفتوح وجمالها الساحر للحضة نسيت الي صار .. بس صحيت على صوت زبيدة من حاجتها
وهاي صار كم مره من تروح امها تتصل تعال رجعني وكل مرة تريد افوت لبيت خالي
هالمرة طلع خالي احرجني اضطريت ادخل
تلگتني دينا عبالك مو ذيج ام خشم العالي تضحك وفتحتلي الاستقبال لابسة تراكسود ليموني ضيق كلش .. وشعرها جايبته بجهه وحده .. احجيها بصراحة اربكتنا وتوترت كلش .. جابت عصير من نصت تنطيني بين مقدمة صدرها .. حرت وين ادير وجهي
گعدت شوية وترخصت..  گلتلها لأمي بعد ما اجي عليج مادام هيج تحرجيني وخليتيني ادخللهم
بس صورة دينا ضلت بالي
اجيت بلليل جنت يم نزار .. زبيدة مبدله ومتحضرتلي مثل كل يوم تعرف بيه ما افوت ليلة .. بس هاليوم جان ابد مو بواهسي درت وجهي ونمت حتى ماحاجيتها
****
احمد
من جتي زبيدة هي وزوجها ابد ما ارتاحيت عرفتها مهمومة .. وعرفت من اسلوب زوجها عارف تقدمتلها .. جان يباوع علية وعليها كل شوية مثل واحد يريد يتصيد غلطة على احد
من توفت ام وسام الله يرحمها مافكرت بموضوع اتزوج مرة ثانية .. جهال عندي وحبيبة عمري مو الي وملك غيري  الزواج تحصيل حاصل صار بعيد عن بالي .. المهم جهالي گدام عيني وامي ومسرة مامقصرين وياهم واني هم اكلي وشربي وملابسي نظيفة خلاص
امي كل كم يوم جايبتلي اسم بنية وبت فلان وبت فلانة
بست راسها _ يمه والله مرتاح هيج ما اريد اتزوج .. لو اخاف تعبانه مني ومن الجهال
_  لا يمة ليش تگول هيج بس اضوج من اشوفك وحيد هم مرة تسايرك تحاجيك
_ مو بنفسي مرأه يا امي ومن اريد اگولج واخطبيلي
.. 
زبيدة
بيوم رجعنا من الدوام اخت دينا الصغير تقريب عمرها 16 سنة اسمها تمارا موجودة بالبيت سلمت علية عادي _ شلونج خالة
_ هلو بيج حبيبتي
_ اشتاقيت الحمودي وجيت اشوفه
_ اي عيوني هلا بيج
صعدت بدلت ونزلنه تغدينا .. حارث گال عندي شغلة طلع .. واني بقيت اغسل المواعين ونظفت المطبخ
ما اعرف تمارا وين راحت .. جيت اصعد الدرج نزلت من فوگ بأيدها حمودي جانت مو على بعضها .. گالت ملابس حمودي وسخة ورحت اغيرله  .. ماباوعت علية نزلت ودخلت غرفة عمتي .. كملت الدرج اني .. دخلت غرفتي لان ملابس حمودي بيها شلون ما استأذنت .. المهم ما اهتميت .. تمددت نمت ماحسيت غير على حارث من اجه المغرب يبوس بخدي
_ حبيبي كسلان صاير هالايام
_ اي والله صايرة احب النوم .. شلت الغطاء .. تعال حبيبي مشتاقة لحضنك
_ بالليل بالليل هسه سويلي عشا ولد صاحبي ديخطب ونروح وياه
_ شنو هاي حارث صايرة ولا اشوفك
_ لو نا سوه حتى بالدوام
_ اي غير نشتغل
_ يالله حبيبي اروح ووارجع من وكت
نزلت سويت عشه تعشينه هو طلع واني قريت حسوني داليا ماتقبل اقريها .. نومتهم من وكت ورجعت لغرفتي سديت الباب
اخذت التلفون اتصلت ب بابا
_ هلو حبيبي شلونك .. مشتاقتلك كووومة
.. لا لا مو بگدي والله
اي ان شاءالله اجي واشوفك ذيج المرة ماشبعت منك
صدگ افتح لي كاميرا خلي اشوفك يا الله شگد مشتاقتلك
ماحسيت غير الباب نفتحت حيل .. شلون وشوكت وصل يمي حارث ما اعرف
لزمني من شعري وبدأ يضرب بيه راشديات .. بس اريد افتهم شبي ليش يضربني هو بس يغلط علية .. ساقطة تسوين نفسج شريفة .. وانتي ك…  امي گالتلي بس اني مخدوع بيج جنت كلكم نفس الشئ
تصدگون ماحسيت بوجع جسمي من ينضرب بگد وجع روحي .. اريد احجي مايسمعني
_ حارث بس اريد افتهم شمسوية اني
_ سمعتج تحجين وتفتحين كاميرا كلجن ساقطات
_ لك ابوية هذا ابوية روح شوف
وگف شوية صفن جر التلفون من الگع طلع بابا بعده متصل وسمع كل شيء..  قطع الاتصال ماجاوب بابا راح يدور بالتلفون اني مقرفصة بالگع جا مثل الثور الهايج
_ هاي شنو ساقطة
_ شنو هاي .. والله مو اني راسلتهن
_ شوفي الوقت هاي من طلعت الظهر يا خسيسة
_ لك والله ما اعرف شنو انت ماتصدگني
دك الرقم بتلفونه بالكاشف طلع اسم طارق .. والرسائل حجي ماينحجي مكتوب زبيدة اشتاقيتلج شوكت تعوفي للزعطوط وترجعيلي .. ااخ مشتاق الجسمج والريحتج
وعلى اساس اني مجاوبته..  اني هم مشتاقتلك هواية حبيبي .. بس اگدر نتواعد واجيك .. هاي زواجي ورطة
اتصل على الرقم .. جاوبه هو صوت طارق
هلوو حبيبتي زين خابرتي كلش محتاجج هسه
قطع الاتصال
اباوع علية .. نزع حزام بنطرونه وبدأ يضربني .. صدگوني احساس ماينوصف .. طعم الظلم يوجع اكثر من الضرب
حياتي تمر گدام عيوني ما اتذكر بيوم اهلي مدوا ايدهم علية .. اتذكر منظر الدم من ينزل من خشمي بالگع وطعمه القبيح ملئ حلگي .. من تعب رفعني من الگع وطلعني برة الغرفة ويسحب بيه على الدرج رجلي اصلاً ما احس بيها فتح باب البيت وطلعني بره .. كم واحد من الجيران جانوا واگفين برة يباوعون علية جنت لابسة دشداشة نص ردان ومن فوك انشگت من الضرب .. اريد اگوم مابيه .. رجع فتح الباب حارث تأملت يجي يعتذر ويگولي نعرف اني وياج منو وراها السالفة
شمر علية عباية
_ زبيدة انتي طالگ
*****

مثل الحلم..  زبيدة يصير بيها كل هذا .. اني !!
جتي مرأة من الجيران گومتني
_ شبيج يا يمة .. گومي وياية للبيت
_ خالة اريد تلفون اخابر
_ اي يمة .. صاحت على ابنها .. نطاني تلفونه
حافظة رقم حسان
_ حسان اني زبيدة .. من سمعت صوته بجيت بحرگة
_ شبيج زبيدة وشنو هذا الرقم
_ حسان اني باب بيت حارث تعال علية بسرعة
_ يا الله دقايق وجايج
جيرانه ضلت گاعدة يمي تحاجيني واني بغير عالم .. عزت علية نفسي اني ما استاهل هيج .. تمنيت ساعتها لو ميته وهو يضربني .. ولا هالذلة والمهانه
شوية واجاني حسان
_ شبيج هذا ليش هيج الكلب مسوي بيج وينه هو خاتل مثل النسوان .. حسان گام يصيح بعد ما حسيت على نفسي غير بالسيارة ويمشي سريع
_ حسان
_ الحمدلله خوفتيني طالع للمستشفى
_ لا وديني لبيتك ما اريد الناس تتفرج علية اكثر
اخذني لبيته .. خطية مرته انصدمت من شافتني ما سألتني شي گعدت على التخم وكل شي بيه يوجعني
گعد حسان يمي وحضني .. خليت راسي على كتفه وضليت ابجي
دگ تلفونه باوع گال هاي ابوية ياساتر شبي بهالليل
_ الوو ها يابه شلونك
_ يابه انا زين بس شوف اختك جنت احاجيها وهذا الكلب رجلها گام يضرب بيها واسمع بجيها وهسه اخابرها مقفول
_ هياتها يمي يابه لاتخاف رحت جبتها
سده بابا وحجيت لحسان كل شيء اني ماخايفة من شئ
_ هين عيني هين يصير خير بسيطة حارث افندي .. لاتهتمين وداعتج اخذ حگج من كل الي اذاج وحتى طارق حسابي وياه عسير بس اصبري
گلها لمرته اخذيها تسبح وتبدل ملابسها وداوي جروحها باجر الصبح اوديها للمستشفى

اصعب ليلة بحياتي مرت علية .. ذيج الليلة
خذلان .. وظلم .. ووجع روح .. ووجع جسد .. شلون انام جسمي يوجعني ما اگدر .. من باوعت شكلي بالمراية انصدمت منو هاي ما اعرفها ..
صار الفجر صليت ودموعي نزلت على السجادة بين ايدين رحمن رحيم .. قادر ينصفني ويضهر حقي .. دعيت من گلبي
غفيت شوية وسمعت صوت بابا باوعت الساعة 7 الصبح
جيت اگوم مابيه .. فتح الباب هو علية واجه حضني ودموعه تنزل
_ لا تبجي بابا حبيبي .. دموعك تكسر گلبي .. والله مامسوية شي مكيدة علية وهو صدگها
_ ادري بتربات ايدي يابه..  اني الاميرة مالتي هيج يصير بيها لا والله ما اعوفة بس خلي نعرف منو وراها .. اخذلج حگج من عيونه .. ناخذج للمستشفى بابا يالله گومي
_ بابا والله استحي اروح .. خليت ايدي على وجهي وبجيت .. من صدگ عزت علية نفسي
_ ولد عمج بالگوه عمج ماخلاهم يجون .. البارحة تخبلت .. ومن خابرتيني احمد جان يمي گاعد بالليل راد يصعد السيارة ويجيج بس عمج خاف عليهم يابه حگه..  گال اليوم اخذ اجازة واجي وراك اشوف هذا الكلب
گاعدين نسولف بابا خله راسي على صدره  .. دگ تلفون حسان
_ الووو اي اني .. نعم  .. منو حضرتك .. اهاا .. وهسه وين وشلونه .. اممم ماشي مع السلامة
كلنا نباوع علية ..
_ منو اتصل
_ نزار صديق حارث
_ شيريد
_ حارث مدعومة سيارته  وهسه بالمستشفى بغرفة العمليات
*********
نهايات وبدايات .. هكذا هي حياتنا
بألمها..   بخذلانها .. بوجعها ستستمر
رغماً عنا سنسير فيها ومعها وخلفها

*****
رأيكم مهم .. بس لاتگولون البارت قصير
اذا تحبون امليلكم صفحات باصناف اكلهم واوصفلكم شلابسين .. وتفاصيل ممله
العبرة مو بطول البارت .. العبرة بكمية الاحداث بداخلة
اتمنى ان اكون ماقصرت وياكم
لا تنسى الضغط على نجمة 🌟 التصويت رجاءاً
لا احلل ان تقرأ وتمضي
تحياتي للجميع