حــادث سيــارة غــير قــدري ❤

❣اﻟﺤﻠﻘﻪ السادسة ﻋﺸﺮ❣

#ﺣﺎﺩﺙ_ﺳﻴﺎﺭﺓ_ﻏﻴﺮ_ﻗﺪﺭﻱ

#اﻟﺤﻠﻘﻪ_اﻟﺴﺎﺩﺳﻪ_ﻋﺸﺮ ‏( 16 ‏)

.
.
.
.
.
.
.

ﻟﻠﻜﺎﺗﺒﺔ " ﺃﻣﻴﺮﺓ ﺍﺑﻲ "
.
.
.
.
ﻫﻴﺎ ﻧﺒﺪﻭ ﺣﻠﻘﺘﻨﺎ
.
.
.
.
.
ﻳﺎﺳﻤﻴﻦ : ﺍﻥ ﺷﺎﺀﺍﻟﻠﻪ ﺧﻴﺮ
ﻋﻤﺮ : ﺍﻟﻮﻟﺪ ﻳﻠﻲ ﺩﺍﺭ ﻣﻌﺎﻙ ﺍﻟﺤﺎﺩﺙ
ﻳﺎﺳﻤﻴﻦ : ﺧﻴﺮﻩ
ﻋﻤﺮ : ﺟﻲ ﻃﻠﺒﻚ ﻟﻠﺰﻭﺍﺝ
ﻳﺎﺳﻤﻴﻦ : ﻣﻮﺍﻓﻘﻪ
ﻋﺰﻳﺰﻩ :
ﻋﻤﺮ : ﻫﻜﻲ ﺑﺪﻭﻥ ﻻ ﺗﻔﻜﺮﻱ ﻭﻻ ﺗﻌﺮﻓﻲ ﻋﻠﻴﻪ ﺷﻲ
ﻳﺎﺳﻤﻴﻦ : ﺍﻱ
ﻋﺰﻳﺰﻩ : ﻣﺘﺄﻛﺪﺓ ﻣﻦ ﻗﺮﺍﺭﻙ !
ﻋﻤﺮ : ﻳﺎﺑﻨﺘﻲ ﻫﺬﺍ ﺯﻭﺍﺝ ﻭﻋﺸﺮﺓ ﻋﻤﺮ ﻣﺶ ﻟﻌﺐ ﻭﻓﻲ ﻟﺤﻈﻪ ﺿﻌﻒ ﺍﺿﻴﻌﻲ ﺣﻴﺎﺗﻚ
ﻳﺎﺳﻤﻴﻦ : ﻣﺎﺯﺍﻝ ﺣﻴﺎﺗﻲ ﺑﻀﻴﻊ ﺍﻛﺜﺮ ﻣﻦ ﻫﻜﻲ
ﻋﺰﻳﺰﻩ : ﺍﺗﻘﻲ ﺍﻟﻠﻪ ﻳﺎﺑﻨﺘﻲ ﺍﻟﻌﻤﺮ ﻗﺪﺍﻣﻚ ﻭﻣﻌﺶ ﺗﺤﻜﻲ ﻫﻜﻲ ﺍﻧﺘﻲ ﺍﻟﻒ ﻭﺍﺣﺪ ﻳﺘﻤﻨﺎﻙ
ﻳﺎﺳﻤﻴﻦ : ﺍﻟﻒ ﻭﺍﺣﺪ ﻫﻬﻪ ﻫﺬﺍﻛﺎ ﻗﺒﻞ
ﻋﻤﺮ : ﺍﺳﺘﺨﻴﺮﻱ ﻗﺒﻞ ﻳﺎﺑﻨﺘﻲ
ﻳﺎﺳﻤﻴﻦ : ﺣﺎﺿﺮ ﺑﺎﺑﺎ
ﻭﺧﺸﺖ ﻳﺎﺳﻤﻴﻦ ﻟﺪﺍﺭﻫﺎ ﻣﻊ ﺧﻮﺍﺗﻬﺎ
ﻓﺮﺡ : ﺧﻴﺮﺓ ﻭﺟﻬﻚ ﻣﻘﻠﻮﺏ ﺑﺎﺑﺎ ﺷﻨﻮ ﻳﺒﻴﻚ
ﻳﺎﺳﻤﻴﻦ : ﺟﺎﻳﻨﻲ ﻋﺮﻳﺲ
ﻣﺮﺡ : ﺍﻥ ﺷﺎﺀﺍﻟﻠﻪ ﺧﻴﺮ ﻭﺍﻧﺘﻲ ﺷﻨﻮ ﻗﻠﺘﻴﻠﻪ
ﻓﺮﺡ : ﺑﺠﺪ ﺗﺤﻜﻲ ﻣﻨﻮ
ﻳﺎﺳﻤﻴﻦ : ﻭﺍﻧﺎ ﻋﻨﺪﻱ ﺧﻴﺎﺭ ﻏﻴﺮ ﺍﻧﻲ ﻧﻮﺍﻓﻖ
ﻓﺮﺡ : ﺑﺎﻫﻲ ﻋﺮﻓﺘﻲ ﻣﻨﻮ
ﻳﺎﺳﻤﻴﻦ : ﻳﻠﻲ ﺩﺭﺕ ﻣﻌﺎﻩ ﺣﺎﺩﺙ
ﻣﺮﺡ : ﺟﺪ
ﻓﺮﺡ : ﺍﻛﻴﺪ ﺍﺧﺘﻪ ﺳﻤﺮ ﺣﻜﺘﻠﻪ ﻋﻠﻴﻚ ﻻﻧﻬﺎ ﻣﻴﺘﻪ ﻓﻴﻚ ﻛﻞ ﻣﺎﺗﺘﺼﻞ ﺑﻴﺎ ﺗﺠﻴﺐ ﺳﻴﺮﺗﻚ
ﻳﺎﺳﻤﻴﻦ : ﺍﻛﻴﺪ ﺷﻔﻘﺎﻥ ﻋﻠﻴﺎ ﻭﺣﺎﺱ ﺑﺎﻟﺬﻧﺐ
ﻣﺮﺡ : ﻻ ﻻ ﻳﺎﺧﺘﻲ ﺧﻠﻴﻚ ﺍﻳﺠﺎﺑﻴﻪ ﺷﻮﻱ ﻭﺍﻟﻠﻪ ﺍﻧﺘﻲ ﺗﺠﻨﻨﻲ ﻭﺩﻛﺘﻮﺭﻩ
ﻳﺎﺳﻤﻴﻦ : ﺷﻨﻮ ﺍﻟﻔﺎﻳﺪﺓ ﻭﺍﻧﺎ ﻣﺶ ﺡ ﻧﻘﺪﺭ ﻧﻜﻮﻥ ﺍﻡ
ﻓﺮﺡ : ﻳﺎﺣﺒﻴﺒﺘﻲ ﻣﺎﺗﺤﻜﻴﺶ ﻫﻜﻲ ﺻﺪﻗﻴﻨﻲ ﺭﺣﻤﺔ ﺭﺑﻲ ﻭﺍﺳﻌﻪ ﻭﻣﺮﺍﺕ ﻫﺬﻱ ﻓﺮﺻﻪ ﺟﺪﻳﺪﻩ ﻟﻴﻚ ﻭﻻﺯﻡ ﺗﺘﻌﺮﻓﻲ ﻋﻠﻲ ﺍﻟﺸﺨﺺ ﻗﺒﻞ
ﻳﺎﺳﻤﻴﻦ : ﻓﺮﺻﻪ .. ﺍﻱ ﻓﺮﺻﺔ ﺑﺎﻟﻠﻪ ﻭﻣﺰﺍﻝ ﺑﻌﺪ ﻳﻌﺮﻑ ﺑﻤﻮﺿﻮﻉ ﺍﻟﺼﻮﺭ
ﻣﺮﺡ؛ : ﻳﺎﺧﻮﻳﺘﻲ ﻓﻮﺗﻴﻨﺎ ﻣﻦ ﺍﻟﻨﻜﺪ ﻭﺷﻮﻓﻲ ﺣﻴﺎﺗﻚ ... ﺍﻧﺘﻲ ﺗﺴﺘﺎﻫﻠﻲ ﻛﻞ ﺧﻴﺮ ﻻﻧﻚ ﺑﻨﺖ ﻃﻴﺒﻪ ﻭﻧﻴﺘﻚ ﺻﺎﻓﻴﺔ ﻭﺭﺑﻲ ﺡ ﻳﻌﻮﺿﻚ ﺧﻴﺮ ﺑﺈﺫﻥ ﺍﻟﻠﻪ
ﻳﺎﺳﻤﻴﻦ : ﺧﻼﺹ ﺳﻜﺮﻭ ﺍﻟﻤﻮﺿﻮﻉ
............
ﺳﺎﻣﺮ ﻣﺸﻲ ﻟﻠﺸﺮﻛﺔ ﺳﻠﻴﻤﺎﻥ ﺍﻟﻄﺎﻫﺮ ﻭﻛﺎﻥ ﺧﺎﺵ ﻣﻐﻮﻝ
ﺳﺎﻣﺮ : ﻭﻳﻦ ﺳﻠﻴﻤﺎﻥ
ﺍﻟﺴﻜﺮﺗﻴﺮﺓ : ﻟﻮ ﺳﻤﺤﺖ ﻟﺤﻈﻪ ﻗﻌﻤﺰ ﻓﻲ ﺍﻻﻧﺘﻈﺎﺭ ﻟﻴﻦ ﻧﺸﻮﻑ ﺍﺳﺘﺎﺫ ﺳﻠﻴﻤﺎﻥ
ﺳﺎﻣﺮ : ﻫﻮ ﺩﺍﺧﻞ
ﺍﻟﺴﻜﺮﺗﻴﺮﺓ : ﺍﻱ
ﺧﺶ ﺳﺎﻣﺮ ﻟﻠﻤﻜﺘﺐ
ﺍﻟﺴﻜﺮﺗﻴﺮﺓ : ﻋﻔﻮﺍ ﻳﺎﺍﺳﺘﺎﺫ ﺍﺳﺘﻨﻰ ﻟﺤﻈﻪ
ﻓﺘﺢ ﺳﺎﻣﺮ ﺍﻟﺒﺎﺏ ﻭﺧﺶ ﻃﻮﻭﻝ ﻟﺴﻠﻴﻤﺎﻥ ﺍﻟﻄﺎﻫﺮ ﻭﺧﺒﻂ ﻋﻠﻲ ﻣﻜﺘﺒﺔ ﻭﺳﻠﻴﻤﺎﻥ ﻣﻘﻌﻤﺰ ﻋﻠﻲ ﻛﺮﺳﻴﻪ
ﺳﻠﻴﻤﺎﻥ : ﺍﻭﻭﻭﻭﻭ ﺍﻭﻭﻭﻭ ﻣﺘﺮ ﺳﺎﻣﺮ ﻛﻠﻪ ﻓﻲ ﻣﻜﺘﺒﻲ
ﺷﻨﻮ ﺣﺎﺏ ﺗﺸﺮﺏ
ﺳﺎﻣﺮ : ﻟﻮ ﻛﻨﺖ ﺭﺍﺟﻞ ﻭﺍﺟﻬﻨﻲ ﻣﺶ ﺑﺎﻋﺖ ﻋﺼﺎﺑﺘﻚ ﻟﻤﻜﺘﺒﻲ ﻭﺍﻧﺎ ﻣﺶ ﻣﻮﺟﻮﺩ
ﺳﻠﻴﻤﺎﻥ : ﺍﻋﺼﺎﺑﻚ ﺍﻋﺼﺎﺑﻚ .... ﻳﻠﻲ ﺑﻴﺮﺍﻗﺺ ﺍﻟﻌﻤﺎﻟﻘﺔ ﻳﺘﺤﻤﻞ ﺍﻟﺪﻭﺱ ﻋﻠﻲ ﺭﺟﻠﻴﻪ
ﺳﻠﻴﻤﺎﻥ ﻛﺎﻥ ﺍﺳﻠﻮﺑﻪ ﺍﺳﺘﻔﺰﺍﺯﻱ ﺟﺪﺍ ﻣﻊ ﺳﺎﻣﺮ ﻭﺳﺎﻣﺮ ﻋﺼﺒﻲ .... ﺷﺪ ﺳﻠﻴﻤﺎﻥ ﻣﻦ ﻣﻼﺑﺴﻪ
ﺳﻠﻴﻤﺎﻥ :
ﺳﺎﻣﺮ : ﻭﺭﺑﻲ ﻳﺎ ﺳﻠﻴﻤﺎﻥ ﺍﻟﻜﻠﺐ ﻣﻮﺗﻚ ﻉ ﺍﻳﺪﻱ ﻟﻮ ﻣﺎﺗﺒﺎﻋﺪ ﻋﻠﻲ ﻫﺎﻟﻨﺎﺱ ﺍﻟﻤﺴﻜﻴﻨﻪ ﺍﻧﺎ ﻗﺘﺎﻟﻚ
ﺳﻠﻴﻤﺎﻥ : ﺗﻮﺍ ﻧﺸﻮﻓﻮﺍ ﻣﺘﺮ ﺳﺎﻣﺮ ﻣﻦ ﻗﺘﺎﻝ ﻣﻦ
ﺳﺎﻣﺮ ﻛﻴﻒ ﺑﻴﻄﻠﻊ ﻭﺗﻠﻔﺖ ﻟﺴﻠﻴﻤﺎﻥ ﻭﻗﺎﻡ ﺻﺒﻌﻪ ﺻﺪﻗﻨﻲ ﺡ ﺗﺘﻤﻨﻰ ﺍﻟﻤﻮﺕ ﻭﻣﺶ ﺡ ﺗﻠﻘﺎﻫﺎ
ﻃﻠﻊ ﺳﺎﻣﺮ ﻭﺭﻛﺐ ﺍﻟﻔﻮﺭﺩ ﺍﻟﻜﺤﻠﻪ ......
............. ....
ﻣﺮﺍﺩ ﻣﻊ ﺳﺎﻟﻲ ﻳﺮﺗﺒﻮ ﻓﻲ ﺍﻟﻤﻜﺘﺐ ﻭﻳﻬﺪﻱ ﻣﺮﺍﺩ ﻓﻲ ﺳﺎﻟﻲ ﻻﻧﻬﺎ ﻛﺎﻧﺖ ﻣﻴﺘﻪ ﻣﻦ ﺍﻟﺨﻮﻑ
.................
ﻋﺒﺪﻭ : ﺍﺭﻭﻯ ﺑﺎﻋﺪﻱ ﻏﻠﻂ ﻳﻠﻲ ﺩﻳﺮﻱ ﻓﻴﻪ
ﻛﻴﻒ ﻗﺮﺑﺖ ﻣﻦ ﻋﺒﺪﻭ ﺑﺘﺒﻮﺳﻪ ....
ﻋﺒﺪﻭ ﺩﻓﻬﺎ ﻭﺑﺎﻋﺪﻫﺎ : ﺧﻴﺮﻙ ﺍﻧﺘﻲ ﻫﺒﻠﺘﻲ
ﺍﺭﻭﻯ : ﺍﻧﺎ ﺣﻼﻟﻚ ﻭﻫﺬﺍ ﺍﻟﺸﻲ ﻣﺶ ﻏﻠﻂ
ﻋﺒﺪﻭ : ﻻ ﻏﻠﻂ ﻟﻮ ﺳﻤﺤﺘﻲ ﺍﻟﺒﺴﻲ ﻭﺭﻭﺣﻲ ﻻﻧﻪ ﺑﻮﻱ ﻋﻠﻲ ﺟﻴﻪ
ﺍﺭﻭﻯ : ﺍﻫﻲ ﺍﻫﻲ ﻟﻴﺶ ﺗﻌﺎﻣﻞ ﻓﻴﺎ ﻫﻜﻲ ﺭﺍﻧﻲ ﻣﺮﺗﻚ ﻭﻧﻤﻮﻭﺕ ﻓﻴﻚ ﻃﻮﻭﻝ ﻋﻤﺮﻱ ﻧﺤﻠﻢ ﺑﺎﻟﻠﺤﻈﻪ ﻫﺬﻱ ﻭﺍﻣﺘﻰ ﻧﻜﻮﻥ ﺣﻼﻟﻚ ﺣﺘﻰ ﻳﻮﻡ ﺧﻄﻮﺑﺘﻚ ﻣﻦ ﻫﺬﻳﻚ ﺍﻟﺤﻘﻴﺮﻩ ﻛﺎﻥ ﻳﻮﻡ ﺟﺤﻴﻢ ﺗﻤﻨﻴﺖ ﺍﻟﻤﻮﺕ ﺣﺮﺍﻡ ﻋﻠﻴﻚ ﺍﺩﻳﺮ ﻓﻴﺎ ﻫﻜﻲ
ﻋﺒﺪﻭ : ﺍﺳﻤﻌﻲ ﺍﻧﺎ ﻣﺶ ﻗﺼﺪﻱ ﻧﺠﺮﺣﻚ ﺑﺲ ﻳﺎﺑﻨﺖ ﻋﻤﻲ ﺍﻟﺸﻲ ﻫﺬﺍ ﻏﻠﻂ ﻣﻌﺶ ﻣﺎﺯﺍﻝ ﻫﻠﺒﻪ ﻋﻠﻲ ﻋﺮﺳﻨﺎ ﻭﺡ ﻧﻘﻌﺪ ﻟﻴﻚ ﻃﻮﻝ ﺍﻟﻌﻤﺮ
ﺍﺭﻭﻯ ﻣﺴﺤﺖ ﺩﻣﻮﻋﻬﺎ ﻭﺣﺴﺖ ﺑﻔﺮﺣﻪ ﻻﻧﻪ ﻋﺒﺪﻭ ﺑﺪﻱ ﻟﻴﻦ ﻓﻲ ﻛﻼﻣﻪ
ﺍﺭﻭﻯ : ﺡ ﻳﻤﺮﻭ ﻫﺎﻻﻳﺎﻡ ﻋﻠﻴﺎ ﻛﺎﻧﻬﻢ ﺳﻨﻴﻦ ﺑﺲ ﺷﻨﻮ ﺡ ﺍﻧﺪﻳﺮ ﻻﺯﻡ ﻧﺼﺒﺮ
ﻋﺒﺪﻭ : ﺧﻼﺹ ﺗﻮﺍ ﺍﻟﺒﺴﻲ ﻭﺭﻭﺣﻲ ﻻﻧﻪ ﺑﻮﻱ ﻋﻠﻲ ﺟﻴﻪ ﻭﺍﻧﺎ ﺑﻌﺪﻳﻦ ﻧﺘﺼﻞ ﺑﻴﻚ
ﺍﺭﻭﻯ : ﺣﺎﺿﺮ ﺣﺒﻴﺒﻲ
ﻭﻃﻠﻌﺖ ﺍﺭﻭﻯ ﺭﻭﺣﺖ ﻋﺒﺪﻭ ﻗﻌﺪ ﻣﻘﻌﻤﺰ ﻳﻔﻜﺮ ﺑﻴﻨﻪ ﻭﺑﻴﻦ ﻧﻔﺴﻪ
ﻋﺒﺪﻭ : ﻟﻴﺶ ﻣﺎﺿﻌﻔﺘﺶ ﻗﺪﺍﻣﻬﺎ ﻭﻫﻲ ﻋﻨﺪﻫﺎ ﻛﻞ ﻣﻘﺎﻭﻣﺎﺕ ﺍﻻﻧﻮﺛﻪ ﻟﻴﺶ ﻫﻜﻲ ﺗﻌﺎﻣﻞ
ﻟﻴﺶ ﻫﺪﻳﻜﺎ ﺍﻟﺨﺎﻳﻨﻪ ﻛﻨﺖ ﺗﺘﻤﻨﻰ ﺗﻠﻤﺲ ﺣﺘﻰ ﻳﺪﻫﺎ ﻭﺍﺭﻭﻯ ﺟﺎﺗﻚ ﻛﻠﻬﺎﺍ ﻟﺤﺪ ﻋﻨﺪﻙ ﻭﻫﻲ ﺣﻼﻟﻚ ﺭﻏﻢ ﻫﺬﺍ ﺻﺪﻳﺘﻬﺎ .... ﻣﻌﻘﻮﻟﻪ ﻗﺎﻋﺪ ﺗﺤﺐ ﻫﺬﻳﻜﺎ
ﻻﻻ ﺍﻧﺖ ﺗﻜﺮﻫﺎ ﺍﺻﻼ ﻫﻲ ﻣﺎﺗﺴﺘﺎﻫﻠﺶ ﺣﺘﻰ ﺗﻔﻜﺮ ﻓﻴﻬﺎ ﻻﻧﻪ ﺭﺧﻴﺼﻪ ﻭﺑﺎﻋﺖ ﺣﺒﻲ ﻟﻴﺎ ﻏﺬﺭﺗﺘﻲ ﻓﻲ ﻇﻬﺮﻱ
ﺗﺒﻜﻲ ﻳﺎﻋﺒﺪﻭ ﻣﺎﺻﺢ ﻭﺟﻬﻚ ﻟﻴﺶ ﺗﺒﻜﻲ ﺍﻧﺖ ﺍﻛﺒﺮ ﻣﻦ ﺍﻧﻚ ﺗﻨﺰﻝ ﺩﻣﻌﻪ ﻋﻠﻲ ﻭﺣﺪﻩ ﺯﻱ ﻫﺪﻳﻚ
......... ........
ﻣﺮﺍﺩ : ﺍﻫﻠﻴﻦ ﻟﻴﺶ ﻣﺎﺗﺮﺩﺵ ﻋﻠﻴﺎ ﺷﻐﻠﺘﻨﻲ ﻋﻠﻴﻚ
ﺳﺎﻣﺮ : ﻫﺎﻧﻲ ﺟﻴﺘﻚ ﺗﻌﺮﻓﻲ ﺍﻟﻔﺎﺳﺪ ﻫﻮ ﻳﻠﻲ ﺩﺍﺭ ﻫﻜﻲ
ﻣﺮﺍﺩ : ﻧﻔﺴﻪ ﺗﺒﻊ ﻗﻀﻴﺔ ﺍﻻﺭﺽ ﺻﺢ
ﺳﺎﻣﺮ : ﺍﻱ
ﻣﺮﺍﺩ : ﻓﻮﺗﻚ ﻣﻨﻪ ﻳﺎﺭﺍﺟﻞ ﻫﺬﺍ ﻭﺍﺣﺪ ﻣﺠﺮﻡ
ﺳﺎﻣﺮ : ﻭﺍﻧﺖ ﻗﻠﺘﻬﺎ ﻳﺎﺭﺍﺟﻞ ﻳﻌﻨﻲ ﻣﺶ ﺡ ﻧﺮﺟﻊ ﻻﻧﻲ ﺭﺍﺟﻞ ﻭﻟﻮ ﻋﻠﻲ ﺟﺜﺘﻲ ﻣﺶ ﺡ ﻳﺎﺧﺪ ﺍﻻﺭﺽ ﻣﻦ ﻫﺎﻟﻌﻴﻠﺔ ﻳﻠﻲ ﺍﺳﺘﻨﺠﺪﺕ ﺑﻴﺎ
ﻣﺮﺍﺩ : ﺍﻧﺖ ﺭﺍﺟﻞ ﻭﺳﺒﻊ ﺑﺲ ﺍﻟﺨﻮﻑ ﺍﻧﻚ ﻳﻠﻲ ﺗﺘﻌﺎﻣﻞ ﻣﻌﺎﻩ ﻣﺶ ﺭﺍﺟﻞ
ﺳﺎﻣﺮ : ﺳﻜﺮ ﺍﻟﻤﻮﺿﻮﻉ ﻭﻫﻴﺎ ﺑﻨﻄﻠﻊ ﻋﻨﺪﻱ ﻣﺸﻮﺍﺭ ﻟﻠﺤﻮﺵ
ﻣﺮﺍﺩ : ﻟﻴﺶ
ﺳﺎﻣﺮ : ﺑﻨﻌﻄﻲ ﻋﻠﻢ ﻝ ﺃﺳﺎﻣﻪ ﻉ ﻣﻮﺿﻮﻉ ﺍﻟﺒﻨﺖ
ﻣﺮﺍﺩ : ﺍﻱ ﺑﻨﺖ
ﺳﺎﻣﺮ : ﻫﻴﺎ ﻗﺒﻞ ﺑﺎﻋﺪﻳﻦ ﺗﻮﺍ ﺗﻔﻬﻢ ﻛﻞ ﺷﻲ
ﻣﺮﺍﺩ : ﺗﻤﺎﻡ
ﻭﻃﻠﻊ ﻣﺮﺍﺩ ﻭﺳﺎﻣﺮ ﻟﻠﺤﻮﺵ ﺍﻫﻞ ﺳﺎﻣﺮ
....... ......
ﻋﻤﺮ : ﺷﻨﻮ ﻳﺎ ﻋﺰﻳﺰﻩ ﺭﺍﻳﻚ ﻓﻲ ﺍﻟﻤﻮﺿﻮﻉ
ﻋﺰﻳﺰﻩ : ﺭﺍﻱ ﺷﻨﻮ ﺡ ﻳﻔﺮﻕ ﺑﻌﺪ ﻭﺍﻓﻘﺖ ﺍﻟﺒﻨﺖ ... ﺳﺎﺩ ﺍﺩﺧﻠﺖ ﻓﻴﻬﺎ ﺍﻟﻤﺮﺓ ﺍﻷﻭﻟﻰ ﻭﺷﻮﻑ ﺷﻨﻮ ﺍﻟﻨﺘﻴﺠﻪ ﺧﻠﻴﻬﺎ ﻋﻠﻲ ﺭﺍﺣﺘﻬﺎ ...
ﻋﻤﺮ : ﺯﻋﻤﺎ ﻧﺮﺩ ﻋﻠﻲ ﺍﻟﻮﻟﺪ
ﻋﺰﻳﺰﺓ؛ : ﺯﻳﺪ ﺍﺳﺎﻟﻬﺎ ﻭﺗﺄﻛﺪ ﻣﻨﻬﺎ ﻗﺒﻞ ﻭﺍﻟﻠﻪ ﺧﻴﺮ ﻗﺮﺍﺭ ﺧﺪﺍﺗﻪ .. ﻣﻨﻮ ﺑﻴﺮﺿﻰ ﻳﺎﺧﺪ ﺑﻨﺖ ﻣﺎﺗﻘﺪﺭ ﺗﺠﻴﺐ ﺻﻐﺎﺭ ﻭﻟﻮ ﺍﻧﺘﺸﺮ ﻣﻮﺿﻮﻉ ﺍﻟﺼﻮﺭ ﻣﻦ ﺡ ﻳﺼﺪﻕ ﺍﻧﻬﺎ ﺑﺮﻳﺌﻪ
ﻋﻤﺮ : ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ﻓﻲ ﻣﻦ ﻛﺎﻥ ﺍﻟﺴﺒﺐ
ﻭﻧﺎﺽ ﻃﻖ ﻋﻤﺮ ﻋﻠﻲ ﺑﺎﺏ ﺩﺍﺭ ﺑﻨﺎﺗﻪ
ﻋﻤﺮ : ﻳﺎﺳﻤﻴﻦ
ﻓﺮﺡ : ﺧﺶ ﻳﺎﺑﺎﺑﺎ ﺗﻔﻀﻞ
ﻳﺎﺳﻤﻴﻦ : ﺗﻔﻀﻞ ﺑﺎﺑﺎ
ﻋﻤﺮ : ﺧﻠﻮﻧﻲ ﺷﻮﻱ ﻣﻊ ﻳﺎﺳﻤﻴﻦ
ﻓﺮﺡ ﻭﻣﺮﺡ : ﺣﺎﺿﺮ ﺑﺎﺑﺎ
ﻋﻤﺮ : ﻳﺎﺑﻨﺘﻲ ﻗﺒﻞ ﻣﺎﻧﺮﺩ ﻋﻠﻲ ﺍﻟﺮﺍﺟﻞ ﻣﺘﺄﻛﺪﻩ ﻣﻦ ﻗﺮﺍﺭﻙ
ﻳﺎﺳﻤﻴﻦ : ﺍﻱ ﻳﺎﺑﺎﺑﺎ ﻣﺘﺎﻛﺪﻩ ﺭﺩ ﻋﻠﻴﻪ
ﻋﻤﺮ : ﻣﺎﺗﺒﻴﺶ ﺗﻌﺮﻓﻲ ﺣﺘﻰ ﻛﻢ ﻋﻤﺮﻩ ﻭﻓﻲ ﺷﻨﻮ ﻳﺸﺘﻐﻞ
ﻳﺎﺳﻤﻴﻦ : ﻭﺍﻟﻠﻪ ﻣﻌﺶ ﻫﺎﻣﺘﻨﻲ ﺣﺎﺟﻪ
ﻋﻤﺮ : ﻣﺎﺗﺤﻜﻴﺶ ﻫﻜﻲ ﺑﺎﺑﺎ ﺍﺳﺘﻐﻔﺮﻱ ﺍﻟﻠﻪ ﻭﻭﻛﻠﻲ ﺍﻣﺮﻙ ﻟﻴﻪ ﻛﻠﻪ ﺍﺧﺘﺒﺎﺭ ﻣﻦ ﻋﻨﺪﻩ
ﻳﺎﺳﻤﻴﻦ : ﺍﺳﺘﻐﻔﺮ ﺍﻟﻠﻪ
ﻭﻃﻠﻊ ﻋﻤﺮ ﻳﺘﺼﻞ ﺑﺴﺎﻣﺮ ﺑﺎﺵ ﻳﻘﻮﻟﻪ
...........
ﺍﺳﺎﻣﻪ : ﻭﺍﺧﻴﺮ ﺑﺘﺘﺰﻭﺝ
ﻣﺮﺍﺩ : ﻳﺎﻧﻌﻦ ﺟﺪﻙ ﻳﺎﺑﻮ ﺭﻓﻴﻖ ﻫﺬﺍ ﻏﻴﺮ ﻣﺶ ﺡ ﻧﺘﺰﻭﺝ ﻭﻧﻜﺮﻫﻪ ﺟﻨﺲ ﺣﻮﺍﺀ ﻭﺗﻮﺍ ﻃﺤﺖ ﻭﻣﺎﺣﺪ ﺳﻤﻰ ﻋﻠﻴﻚ
ﺳﺎﻣﺮ : ﺯﻭﺍﺟﻲ ﻣﻨﻬﺎ ﻫﺬﺍ ﻟﻮ ﻭﺍﻓﻘﺖ ﻣﺶ ﺡ ﻳﻜﻮﻥ ﻻﻧﻲ ﻧﺒﻲ ﻧﺘﺰﻭﺝ ﺑﺲ ﻻﻧﻲ ﻭﺭﺍ ﺩﻣﺎﺭ ﺣﻴﺎﺗﻬﺎ
ﻓﻮﻥ ﺳﺎﻣﺮ ﻳﺮﻥ
ﺳﺎﻣﺮ : ﻟﺤﻈﻪ ﻧﻘﺼﻮ ﺍﻟﺼﻮﺕ ﻫﺬﺍ ﺭﻗﻢ
ﺍﻟﻮﻭﻭ
ﻋﻤﺮ : ﺍﻟﺴﻼﻡ ﻋﻠﻴﻜﻢ ﻣﻌﺎﻱ ﺳﺎﻣﺮ
ﺳﺎﻣﺮ : ﻭﻋﻠﻴﻜﻢ ﺍﻟﺴﻼﻡ ﺍﻱ ﺍﻥ ﺷﺎﺀﺍﻟﻠﻪ
ﻋﻤﺮ : ﺍﻧﺎ ﻋﻤﺮ ﻭﺍﻟﺪ ﻳﺎﺳﻤﻴﻦ
ﺳﺎﻣﺮ : ﻳﺎﺳﻤﻴﻦ !
ﻋﻤﺮ : ﻳﻠﻲ ﺟﻴﺘﻨﻲ ﺍﻟﺼﺒﺢ ﺗﺨﻄﺐ ﻓﻴﻬﺎ
ﺳﺎﻣﺮ : ﺍﻱ ﺍﻱ ﻋﺮﻓﺘﻚ ﺍﺳﺘﺎﺫ ﻋﻤﺮ ﺳﺎﻣﺤﻨﻲ ﻏﻴﺮ ﻣﺘﺨﺮﺑﻂ ﺷﻮﻱ
ﻋﻤﺮ : ﻭﻻ ﻳﻬﻤﻚ
ﺳﺎﻣﺮ : ﺍﻱ ﻳﺎﺍﺳﺘﺎﺫ ﺷﻨﻮ ﻛﻠﻤﺘﻬﺎ !! ﺍﻧﺎ ﺭﺍﺿﻲ ﺭﺍﻩ ﺑﺎﻱ ﻗﺮﺍﺭ
ﻋﻤﺮ : ﺍﻱ ﻓﺎﺗﺤﺘﻬﺎ ﻭﻭﺍﻓﻘﺖ
ﺳﺎﻣﺮ : ﺍﻭﻛﻲ ﻋﻠﻲ ﺑﺮﻛﺔ ﺍﻟﻠﻪ ﻭﻏﺪﻭﺍ ﺑﻌﻮﻥ ﺍﻟﻠﻪ ﻧﺠﻴﺐ ﺍﺧﺘﻲ ﻭﻧﺨﻠﻮﺍ ﺍﻟﻤﻮﺿﻮﻉ ﺭﺳﻤﻲ
ﻋﻤﺮ : ﺍﻫﻼ ﻭﺳﻬﻼ ﺑﻴﻜﻢ ﻓﻲ ﺍﻱ ﻭﻗﺖ
ﺳﺎﻣﺮ : ﺑﺎﺭﻙ ﺍﻟﻠﻪ ﻓﻴﻚ
ﻋﻤﺮ : ﻓﻴﻚ ﺑﺎﺭﺩ ﺍﻟﻠﻪ ﺭﺑﻲ ﻳﺒﺎﺭﻛﻠﻜﻢ ﻳﺎﺭﺏ ... ﻫﻴﺎ ﻣﺎﻧﻄﻮﻟﺶ ﻋﻠﻴﻚ
ﺳﺎﻣﺮ : ﺳﻼﻡ
ﺍﺳﺎﻣﻪ : ﻗﺼﺪﻙ ﻭﺍﻓﻘﺖ !
ﺳﺎﻣﺮ : ﺍﻱ
ﻣﺮﺍﺩ : ﺍﻭﻭﻭﻭﻭ ﻋﻠﻴﻨﺎ ﺑﺘﺘﺰﻭﺝ ﻭﺑﺘﺨﻠﻴﻨﻲ ﻋﺰﺍﺑﻲ ﻳﺎﺧﺎﻳﻦ
ﺳﺎﻣﺮ : ﻭﺍﻟﻠﻪ ﻣﺎﺣﺎﺱ ﻻ ﺑﺰﻭﺍﺝ ﻭﻻ ﻏﻴﺮﺓ ﺑﺲ ﻧﺒﻲ ﻧﺮﺗﺎﺡ ﻣﻦ ﺗﺄﻧﻴﺐ ﺍﻟﻀﻤﻴﺮ
ﺍﺳﺎﻣﻪ : ﺧﻼﺹ ﻗﻮﻝ ﻟﺴﻤﺮ ﻭﺍﻣﻬﺎ ﻳﺤﻄﻮﺍ ﻓﻲ ﺑﺎﻟﻬﻢ ﻏﺪﻭﺍ ﺍﻧﺎ ﻧﺮﻓﻌﻬﻢ ﻭﻧﻄﻠﺒﻮﻫﺎﻟﻚ
ﺳﺎﻣﺮ : ﺍﻣﻬﺎﺍﺍ ﻻ
ﺍﺳﺎﻣﻪ : ﻣﺎﺗﺠﻴﺶ ﻳﺎﺭﺍﺟﻞ ﺷﻨﻮ ﺳﻤﺮ ﺑﺘﺨﻄﺒﻠﻚ ﺑﺘﻌﺮﻑ ﺗﺎﺧﺪ ﻭﺗﻌﻄﻲ ﻣﻊ ﺍﻟﻨﺎﺱ
ﻣﺮﺍﺩ : ﻛﻼﻡ ﺧﻮﻙ ﺻﺢ
ﺳﺎﻣﺮ : ﻫﺬﺍ ﺍﺧﺮ ﻛﻼﻡ ﻋﻨﺪﻱ
.............
ﻋﻤﺮ : ﻳﺎﺍﺍﻋﺰﻳﺰﻩ
ﻋﺰﻳﺰﻩ : ﻧﻌﻢ
ﻋﻤﺮ : ﺍﻟﻨﺎﺱ ﻏﺪﻭﺍ ﺟﺎﻳﻪ ﺍﻋﻄﻲ ﻋﻠﻢ ﻟﻠﺒﻨﺎﺗﻚ ﻭﺍﻧﺎ ﺗﻮﺍ ﻧﺤﻜﻲ ﻣﻊ ﺍﻳﻤﻦ ﻭﺍﺣﻤﺪ
ﻋﺰﻳﺰﻩ : ﺣﺎﺿﺮ ﻫﻲ
ﺣﺴﻦ : ﺷﻨﻮ ﻓﻲ ﺑﻮﻱ ﻧﺎﺱ ﺷﻨﻮ ﺟﺎﻳﻴﻦ
ﻋﻤﺮ : ﻧﺎﺱ ﺟﺎﻳﺔ ﺗﺨﻄﺐ ﺍﺧﺘﻚ
ﺣﺴﻦ : ﺑﺎﻟﻠﻪ ﻳﺎﺑﻮﻱ ﺧﻄﻮﺑﺔ ﺷﻨﻮ ﻭﺍﻟﻠﻪ ﺍﺧﺘﻲ ﻣﺎﻳﺴﺘﺎﻫﻠﻬﺎ ﺍﻱ ﻭﺍﺣﺪ ﻻﻧﻬﻢ ﻣﺶ ﺡ ﻳﻘﺪﺭﻭﺍ ﻗﻴﻤﺘﻬﺎ
ﻋﻤﺮ : ﺷﻨﻮ ﺗﺒﻴﻬﺎ ﺗﻘﻌﺪ ﺗﺨﺪﻣﻚ ﻭﺗﺨﺪﻡ ﺻﻐﺎﺭﻙ ﺑﻌﺪﻳﻦ ﺧﻠﻲ ﺍﺧﺘﻚ ﺗﺸﻮﻑ ﻧﺼﻴﺒﻬﺎ
ﺣﺴﻦ : ﻣﺶ ﻫﻜﻲ ﻳﺎﺑﻮﻱ ﺑﺲ ﺷﻮﻑ ﺷﻨﻮ ﺻﺎﺭ ﻓﻴﻬﺎ ﺍﻟﻤﺮﺓ ﺍﻻﻭﻟﻰ .... ﺑﻌﺪﻳﻦ ﻳﺎﺳﻤﻴﻦ ﻣﺴﺘﺤﻴﻞ ﺡ ﺗﻮﺍﻓﻖ
ﻋﻤﺮ : ﻭﺍﻓﻘﺖ ﻭﺍﻧﺘﻬﻲ ﺍﻟﻤﻮﺿﻮﻉ
ﺣﺴﻦ : ﺷﻨﻮﻭﻭﻭ ﻭﺍﻓﻘﺖ .. ﻭﻳﻨﻬﺎ ﻫﻲ
ﻋﻤﺮ : ﺍﻱ ﻭﺍﻓﻘﺖ ﻭﺭﻳﺢ ﺭﺍﺳﻚ ﻣﻦ ﺍﻟﻤﻮﺍﺿﻴﻊ ﺍﻟﺰﺍﻳﺪﻩ ﻭﺍﻟﻮﺳﻮﺳﻪ
ﺣﺴﻦ ﺧﺶ ﻳﺪﻭﺭ ﻋﻠﻲ ﻳﺎﺳﻤﻴﻦ ﻭﻫﻮ ﺩﻣﻌﺘﻪ ﻓﻲ ﻋﻴﻨﻪ
ﺣﺴﻦ : ﻳﺎﺳﻤﻴﻦ ﺻﺢ ﻳﻠﻲ ﺳﻤﻌﺘﻪ
ﻳﺎﺳﻤﻴﻦ : ﻗﺼﺪﻙ ﻋﻠﻲ ﺧﻄﻮﺑﺘﻲ ﺍﻟﺘﺎﻧﻴﺔ
ﺣﺴﻦ : ﺍﻱ
ﻳﺎﺳﻤﻴﻦ : ﺍﻱ ﺑﻨﺘﺰﻭﺝ ﻭﺑﺘﺮﺗﺎﺡ ﻣﻦ ﺍﻟﻘﺮﺩﻩ
ﺣﺴﻦ : ﻧﺤﻜﻲ ﺟﺪ ﺍﻧﺎ ... ﻟﻴﺶ ﻭﺍﻓﻘﺘﻲ
ﻳﺎﺳﻤﻴﻦ : ﻭﺍﻟﻠﻪ ﻗﺮﺍﻳﺘﻲ ﻭﻛﻤﻠﺘﻬﺎ ﻧﺴﺘﻨﻰ ﺑﺲ ﻓﻲ ﺍﻟﻨﺘﻴﺠﺔ ﻭﻋﻤﺮﻱ 23 ﻗﺮﻳﺐ ﻳﻔﻮﺗﻨﻲ ﺍﻟﻘﻄﺎﺭ
ﺣﺴﻦ : ﻳﺎﺍﺧﺘﻲ ﻣﺎﺗﻬﺮﺑﻴﺶ ﻣﻦ ﺍﻟﻮﺍﻗﻊ ﺍﻟﻤﺮ ﻭﺗﻮﺭﻃﻲ ﺭﻭﺣﻚ ﻓﻲ ﻭﺍﻗﻊ ﺍﻣﺮ ... ﺧﻮﺩﻱ ﻭﻗﺘﻚ ﻟﻴﺶ ﺗﺪﻓﻨﻲ ﻓﻲ ﺭﻭﺣﻚ ﻓﻲ ﺍﻟﺤﻴﺎﺀ
ﻳﺎﺳﻤﻴﻦ : ﺍﻫﻮ ﻓﺮﺡ ﻭﻣﺮﺡ ﺑﻴﺘﺰﻭﺟﻮﺍ ﺷﻨﻮ ﻣﻌﻨﺎﻫﺎ ﺑﻴﺪﻓﻨﻮ ﺭﻭﺣﻬﻢ
ﺣﺴﻦ : ﺧﻮﺍﺗﻚ ﻳﻔﺮﻗﻮﺍ ﻋﻠﻲ ﻭﺿﻌﻚ
ﻳﺎﺳﻤﻴﻦ : ﻭﺍﻧﺖ ﻗﻠﺘﻬﺎ ﻳﻔﺮﻗﻮﺍ ﻋﻠﻲ ﻭﺿﻌﻲ ﻫﻤﺎ ﻳﻘﺪﺭﻭﺍ ﻳﺠﻴﺒﻮﺍ ﺻﻐﺎﺭ ﺑﺲ ﺍﻧﺎ ﻻ ﻫﻤﺎ ﻣﺎﺗﺒﻠﻮﺵ ﻋﻠﻴﻬﻢ ﻭﻧﺰﻟﻮﺍ ﺻﻮﺭﻫﻢ ﻫﻤﺎ ﺣﺒﻮﺍ ﺭﺟﺎﻟﻪ ﻭﺻﺒﺮﻭ ﻣﻌﺎﻫﻢ ﺭﻏﻢ ﻋﺮﺳﻬﻢ ﺗﺄﺟﻞ ﺍﻛﺜﺮ ﻣﻦ ﻣﺮﺓ ﻫﻤﺎ ﻣﺶ ﻣﻨﺤﻮﺳﻴﻦ ﺯﻱ ﺍﻧﺎ
ﻭﻧﻬﺎﺭﺕ ﻳﺎﺳﻤﻴﻦ ﺑﺎﻟﺒﻜﻲ
ﺣﺴﻦ ﻗﺮﻳﺐ ﻣﺎﺕ ﻟﻤﺎ ﺷﺎﻑ ﺩﻣﻮﻉ ﺍﺧﺘﻪ ﺿﻤﻬﺎ ﻭﻳﺒﻜﻲ
: ﻳﺎﻗﺮﺩﺗﻲ ﻭﺍﻟﻠﻪ ﺍﻧﺘﻲ ﺗﺴﺘﺎﻫﻠﻲ ﻛﻞ ﺧﻴﺮ ﻭﺍﻧﺎ ﻣﺎﻧﺒﻴﻜﺶ ﻓﻲ ﻟﺤﻈﺔ ﺿﻌﻒ ﺍﺿﻴﻌﻲ ﺣﻴﺎﺗﻚ ﻭﺍﻟﻠﻪ ﻣﺴﺘﻌﺪ ﻧﺪﻓﻊ ﻋﻤﺮﻱ ﻋﻠﻲ ﺧﺎﻃﺮﻙ
ﻳﺎﺳﻤﻴﻦ : ﺧﻼﺹ ﻳﺎﺣﺴﻦ ﺍﻧﺎ ﻭﺍﻓﻘﺖ ﻭﺍﻣﺮﻱ ﻟﺮﺑﻲ ﻋﻠﻲ ﺍﻻﻗﻞ ﻧﺘﺰﻭﺝ ﻗﺒﻞ ﻣﺎﻳﻜﺒﺮ ﻣﻮﺿﻮﻉ ﺍﻟﺮﺳﺎﺋﻞ ﻭﺗﻨﻔﻀﺢ ﻋﻴﻠﺘﻨﺎ ﻭﺗﺘﻮﺍﻃﻰ ﺭﻭﺳﻜﻢ ﺍﻧﺎ ﻭﺍﻟﻠﻪ ﻳﻬﻮﻥ ﻋﻠﻴﺎ ﻧﻤﻮﺕ ﻭﻻ ﺗﺘﻮﺍﻃﻰ ﺭﻭﺳﻜﻢ ﻳﻠﻲ ﻃﻮﻝ ﻋﻤﺮﻫﺎ ﻣﺮﻓﻮﻋﻪ
ﺣﺴﻦ : ﻭﺍﻟﻠﻪ ﻳﺎﻭﺧﻴﺘﻲ ﻣﺎﻋﺎﺵ ﻣﻦ ﻳﻮﺍﻃﻲ ﺭﻭﺳﻨﺎ ﺍﻧﺘﻲ ﻃﻮﻭﻝ ﻋﻤﺮﻙ ﻭﺍﺟﻪ ﺗﺸﺮﻑ ﻟﻌﻴﻠﺘﻨﺎ ﺍﻧﺖ ﺍﻟﻤﺎﺳﻪ
ﻳﺎﺳﻤﻴﻦ : ﻣﺎﺻﺎﺭﺵ ﻣﻦ ﻗﺮﺩﻩ ﻫﻬﻬﻬﻬﻬﻪ
ﻭﺑﺪﺕ ﺗﻀﺤﻚ ﻭﺗﻤﺴﺢ ﻓﻲ ﺩﻣﻮﻋﻬﺎ ...
ﺣﺴﻦ : ﻻﻻ ﻗﻌﺪﺓ ﻗﺮﺩﻩ ﻣﺎﺗﺼﺪﻗﻴﺶ ﺭﻭﺣﻚ ﻫﻬﻬﻬﻬﻪ
ﻳﺎﺳﻤﻴﻦ : ﻫﻬﻬﻬﻪ
ﺣﺴﻦ : ﺍﻟﻤﻬﻢ ﻳﺎﻭﺧﻴﺘﻲ ﺍﻟﺮﺍﻱ ﺭﺍﻳﻚ ﻭﻧﺘﻤﻨﺎﻟﻚ ﺍﻟﺴﻌﺎﺩﺓ ﻓﻲ ﺣﻴﺎﺗﻚ
ﻳﺎﺳﻤﻴﻦ : ﺗﺴﻠﻤﻠﻲ ﺣﺒﻴﺒﻲ
ﻓﺮﺡ : ﺷﻨﻮ ﻫﺎﻟﺠﻤﻌﻪ ﻫﺪﻱ ﻭﺍﻻﺳﺮﺍﺭ ﺍﺣﻜﻮ ﺷﻨﻮ
ﺣﺴﻦ : ﻳﺎﺣﺸﺮﻳﻪ ﻳﺎ ﺍﻡ ﺯﻛﻲ
ﻓﺮﺡ : ﺍﻡ ﺯﻛﻲ ﻓﻲ ﻋﻴﻨﻚ ﻳﺎﺑﻮ ﺑﺪﺭ
ﺣﺴﻦ : ﺷﻨﻮ ﺣﺴﻚ ﻗﻠﺘﻲ
ﻭﺑﺪﻱ ﻳﺠﺮﻱ ﻭﺭﺍ ﻓﺮﺡ ﻭﻫﻴﺎ ﻫﺎﺭﺑﺔ ﺗﻌﻴﻂ
ﻳﺎﺳﻤﻴﻦ : ﻣﺠﺎﻧﻴﻦ ﻫﻬﻪ
ﻓﺮﺡ : ﻳﺎﺑﺎﺑﺎ ﺗﻌﺎﻟﻰ ﻟﻮﻟﺪﻙ ﻭﻭﻭﻭﺍﻙ
ﻋﺰﻳﺰﻩ : ﺗﻲ ﺍﻋﻘﻠﻮﺍ ﻭﺍﻧﺘﻮﺍ ﻣﺎﺗﻜﺒﺮﻭﺵ ﺑﻜﻞ
ﻋﻤﺮ : ﺧﻴﺮﻛﻢ ﺷﻨﻮ ﻓﻴﻪ
ﺣﺴﻦ : ﺭﺩﺗﻨﻲ ﺍﺑﻮ ﺑﺪﺭ
ﻋﻤﺮ : ﻣﻦ ﺍﺑﻮ ﺑﺪﺭ
ﺣﺴﻦ : ﻫﺬﺍﻙ ﻳﻠﻲ ﻓﻲ ﺑﺎﺏ ﺍﻟﺤﺎﺭﺓ
ﻋﻤﺮ : ﻫﻬﻬﻪ ﺗﻲ ﻋﻴﺐ ﻋﻠﻴﻚ ﻳﺎﻓﺮﺡ ﺧﻮﻙ ﺍﻛﺒﺮ ﻣﻨﻚ
ﻓﺮﺡ : ﻫﻮ ﺍﻻﻭﻝ ﻗﺎﻟﻲ ﺍﻡ ﺯﻛﻲ
ﻋﺰﻳﺰﻩ : ﻭﺍﻟﻠﻪ ﺟﺎﺏ ﻓﻴﻬﺎ ﺭﻭﺣﻚ ﺍﻟﻘﺼﻘﺼﻪ ﻫﻬﻬﻪ
ﻓﺮﺡ : ﻣﺎﻣﺎ
ﺣﺴﻦ :
ﻋﻤﺮ : ﺧﻼﺹ ﺍﻋﻘﻠﻮﺍ ﻭﺷﻮﻓﻲ ﺷﻨﻮ ﻧﺎﻗﺺ ﻏﺪﻭﺍ ﺟﺎﻳﺔ ﺍﻟﻨﺎﺱ ﺑﺘﺨﻄﺐ ﺍﺧﺘﻚ ﻳﺎﺳﻤﻴﻦ
ﻓﺮﺡ : ﺑﺠﺪ
ﻋﺰﻳﺰﻩ : ﺍﻱ
.............
ﺍﺳﺎﻣﻪ : ﺳﻤﻮﺭ ﺑﻜﺮﺍ ﺍﻥ ﺷﺎﺀﺍﻟﻠﻪ ﺏ ﻧﺮﻓﻌﻚ ﺑﻨﺨﻄﺒﻮﺍ ﻟﺨﻮﻙ
ﺳﻤﺮ : ﻣﻦ ﺧﻮﻱ !! ﻗﺼﺪﻙ ﺳﺮﺍﺝ ﻭﻟﻴﺶ ﻣﺎﻗﺎﻟﻴﺶ
ﺍﺳﺎﻣﻪ : ﻻ ﻻ ﺳﺎﻣﺮ
ﺯﻳﻨﺐ :
ﺳﻤﺮ : ﺳﺎﺍﻣﺮ ﻛﻴﻒ ﻭﺍﻣﺘﻰ ﻭﻣﻨﻮ
ﺍﺳﺎﻣﻪ : ﺣﺎﺟﻪ ﻏﺮﻳﺒﻪ ﺻﺢ ! ﺍﻟﺤﻤﺪﻟﻠﻪ ﺭﺑﻲ ﻫﺪﺍﻩ
ﺯﻳﻨﺐ : ﻣﻨﻮ ﺍﻟﺒﻨﺖ
ﺍﺳﺎﻣﻪ : ﺍﺳﻤﻬﺎ ﻳﺎﺳﻤﻴﻦ، ﻧﻔﺲ ﺍﻟﺒﻨﺖ ﻳﻠﻲ ﻣﻌﺎﻩ ﻓﻲ ﺍﻟﺤﺎﺩﺙ
ﺳﻤﺮ : ﻗﺼﺪﻙ ﻳﺎﺳﻤﻴﻦ ﻣﺎﻏﻴﺮﻫﺎ
ﺍﺳﺎﻣﻪ : ﺍﻱ ﻳﺎﺳﻤﻴﻦ ﻣﺎﻏﻴﺮﻫﺎ
ﺯﻳﻨﺐ : ﺭﺑﻲ ﻳﻬﻨﻴﻪ ﻭﻳﺘﻤﻤﻠﻪ ﻋﻠﻲ ﺧﻴﺮ .. ﻧﺒﻲ ﺣﺘﻰ ﺍﻧﺎ ﻧﻤﺸﻲ ﻧﺨﻄﺒﻠﻪ ﻧﺒﻲ ﻧﻌﻮﺿﻪ ﻋﻠﻲ ﺍﻟﺴﻨﻴﻦ ﻳﻠﻲ ﻓﺎﺗﻮﺍ
ﺍﺳﺎﻣﻪ : ﺍﻥ ﺷﺎﺀﺍﻟﻠﻪ ﺣﺘﻰ ﺍﻧﺘﻲ ﺡ ﺗﻤﺸﻲ ﻭﺗﻮ ﺭﻭﺣﻜﻢ ﻏﺪﻭﺍ ﺍﻟﻌﺸﻴﺔ
ﺳﻤﺮ : ﺳﺎﻣﺮ ﺑﻴﺮﺿﻰ !
ﺍﺳﺎﻣﻪ : ﺧﻠﻮﻩ ﺷﻮﺭﻱ ﺗﻤﺎﻡ
ﺯﻳﻨﺐ : ﺗﻤﺎﻡ
..............
ﺍﺣﻤﺪ : ﺗﻤﺎﻡ ﻳﺎﺑﻮﻱ ﺍﻟﻮﻟﺪ ﻛﻮﻳﺲ ﻭﻛﺎﻥ ﻋﻠﻲ ﻣﻮﺿﻮﻉ ﺍﻟﺼﻮﺭ ﺍﻧﺎ ﺗﻮﺍ ﻧﺤﻜﻲ ﻣﻊ ﻫﺬﺍﻙ ﻳﻠﻲ ﻣﺶ ﺭﺍﺟﻞ ﻭﻧﺘﻘﺼﻰ ﻣﻦ ﻭﻳﻦ ﺟﺎﺑﻬﻢ
ﻋﻤﺮ : ﺍﻱ ﺍﺣﺴﻦ ﺷﻲ
ﺍﻳﻤﻦ : ﺗﻲ ﺍﻗﺘﻠﻪ ﻭﻻ ﺧﻠﻴﻨﻲ ﻧﻘﺘﻠﻪ
ﻋﻤﺮ : ﺍﺳﻜﺖ ﻭﺍﻧﺖ ﺗﺘﺼﺮﻑ ﺑﺮﺑﻊ ﺩﻣﺎﻍ ﺍﺳﻜﺖ
ﺍﺣﻤﺪ : ﺍﻳﻤﻦ ﻛﻼﻣﻚ ﻫﺬﺍ ﻣﻌﺶ ﺗﺪﻭﻳﻪ ﺣﺘﻰ ﺗﺼﻴﺮﻟﻪ ﺣﺎﺟﻪ ﻣﻦ ﻏﻴﺮﻙ ﻓﻲ ﺟﺮﺕ ﻛﻼﻣﻚ ﻳﺘﻬﻤﻮﻙ ﺍﻧﺖ
...............
ﻭﺍﻟﻴﻮﻡ ﺍﻟﺘﺎﻧﻲ ﺟﻬﺰﺕ ﻓﺮﺡ ﻭﻣﺮﺡ ﺍﻟﻀﻴﺎﻓﻪ
ﻓﺮﺡ : ﻳﺴﻮﻭ ﺧﺸﻲ ﺟﻬﺰﻱ ﻧﻔﺴﻚ ﻭﺍﺳﺘﺸﻮﺭﻱ ﺷﻌﺮﻙ
ﻣﺮﺡ : ﺷﻌﺮﻫﺎ ﻣﺎﻳﺤﺘﺎﺝ ﺍﺳﺘﺸﻮﺍﺭ ﺑﺲ ﺣﻄﻲ ﻟﻤﺴﺎﺕ ﻭﺍﻟﺒﺴﻲ ﺍﺣﻠﻰ ﺷﻲ
ﻳﺎﺳﻤﻴﻦ : ﻣﺎﻋﻨﺪﻳﺶ ﻧﻴﺔ ﺣﺘﻰ ﻫﻜﻲ ﺑﺎﻫﻲ
ﻓﺮﺡ : ﺷﻨﻮ ﻣﺎﻋﻨﺪﻛﺶ ﻧﻴﻪ ﺧﺸﻲ ﻗﺪﺍﻣﻲ ﻳﻼ
ﻳﺎﺳﻤﻴﻦ : ﺑﺎﻋﺪﻱ ﻣﺎﺩﻓﻴﻨﻴﺶ ﻣﺎﻧﺒﻴﺶ ﻧﻐﻴﺮ
ﻓﺮﺡ : ﻗﻠﺘﻠﻚ ﺧﺸﻲ
ﻭﻃﻠﻌﺖ ﻓﺮﺡ ﻻﺧﺘﻬﺎ ﺳﺮﻭﺍﻝ ﻛﺘﺎﻥ ﺟﻴﺐ ﺷﻮﺭﺕ ﺭﺻﺎﺻﻲ ﻓﺎﺍﺍﺍﺗﺢ ﻭﻃﻠﻌﺘﻠﻬﺎ ﺑﻠﻮﺯﻩ ﺣﻤﺮﺍ ﺭﺑﻊ ﻛﻢ ﻭﺣﻄﺘﻠﻬﺎ ﺭﻭﺝ ﺭﻭﺩﻱ ﻭﻣﺴﻜﺎﺭﺍ ﻭﻗﺎﻣﺘﻠﻬﺎ ﺷﻌﺮﻫﺎ ﺍﻟﺒﻨﻲ ﻳﻠﻲ ﻻﺧﺮ ﻇﻬﺮﻫﺎ ﺩﻳﻞ ﺣﺼﺎﻥ
ﺍﻟﺼﺮﺍﺣﻪ ﻃﺎﻟﻌﻪ ﻗﻨﻴﻨﻪ ﺑﺲ ﻣﺸﺎﻋﺮﻫﺎ ﻣﻴﺘﻪ ﻭﻣﺶ ﻧﻔﺲ ﺍﻟﺮﻫﺒﺔ ﻭﺍﻟﻤﻤﺰﻭﺟﻪ ﺑﺎﻟﻔﺮﺣﻪ ﻳﻠﻲ ﺟﻲ ﻓﻴﻬﺎ ﻋﺒﺪﻭ ﻻﻭﻝ ﻣﺮﺓ
ﻳﺎﺳﻤﻴﻦ ﻛﺎﻧﺖ ﺟﺜﻪ ﺑﺲ ﺑﺪﻭﻥ ﻣﺸﺎﻋﺮ ﻛﺴﺮﺕ ﺍﻟﺨﺎﻃﺮ ﻭﻭﻭﺍﺍﺍﻋﺮﻩ
..........
ﺳﺎﻣﺮ : ﺍﻧﺎ ﻛﻠﻤﻬﺎ ﻭﻗﻠﺘﻬﺎ
ﺍﺳﺎﻣﻪ : ﻣﺎﻗﺴﻰ ﻗﻠﺒﻚ ﻣﻌﻘﻮﻟﻚ ﺣﺘﻰ ﺑﻌﺪ ﻧﺪﻣﺖ ﻗﺎﻋﺪ ﺣﺎﻗﺪ ﻋﻠﻴﻬﺎ ﻣﻌﻘﻮﻟﻪ ﺣﺘﻰ ﺑﻌﺪ ﻭﻟﺔ ﻣﻜﺴﻮﺭﺓ ﺟﻨﺎﺡ ﻗﺎﻋﺪ ﺗﺒﻲ ﺗﻜﺴﺮﻫﺎ
ﺳﺎﻣﺮ : ﺑﺘﻤﺸﻲ ﺍﺭﻓﻌﻬﺎ ﺍﻧﺖ ﺑﺲ ﺍﻧﺎ ﻣﺴﺘﺤﻴﻞ ﻧﺴﺎﻣﺤﻬﺎ
ﻭﻃﻠﻊ ﺍﺳﺎﻣﻪ ﻭﺭﻛﺐ ﻣﻌﺎﻩ ﺳﺮﺍﺝ ﻭ ﺳﻤﺮ ﻭﺯﻳﻨﺐ ﻃﺒﻌﺎ ﻣﺮﻭ 6 ﺷﻬﻮﺭ ﻋﻠﻲ ﺍﻟﺤﺎﺩﺙ ﻭﻋﻠﻲ ﻭﻓﺎﺓ ﺑﻮ ﺳﺎﻣﺮ
ﺳﻤﺮ : ﺍﺳﺎﻣﻪ : ﻛﻴﻒ ﺳﺎﻣﺮ ﻓﺠﺎﻩ ﻗﺮﺭ ﻳﺨﻄﺒﻬﺎ ﻭﻫﻮ ﻣﻦ ﻳﻮﻣﻪ ﻣﺶ ﻃﺎﻳﻖ ﺍﻟﺒﻨﺎﺕ
ﺍﺳﺎﻣﻪ : ﻧﺼﻴﺐ ﻳﺎﻭﺧﻴﺘﻲ
.........
ﺍﻳﻤﻦ : ﻓﻲ ﺳﻴﺎﺭﺓ ﺑﺮﺍ ﺍﻛﻴﺪ ﺍﻟﻨﺎﺱ
ﻋﺰﻳﺰﻩ : ﺑﺴﺮﻋﻪ ﻃﻠﻌﻲ ﺍﻟﺒﺨﻮﺭ ﻗﺒﻞ ﻣﺎﻳﺨﺸﻮ
ﻣﺮﺡ : ﺣﺎﺿﺮ ﻫﻲ
ﻓﺮﺡ : ﻳﺴﻮﻭ ﺍﻫﻞ ﺭﺍﺟﻠﻚ ﺟﻮ
ﻳﺎﺳﻤﻴﻦ : ﺭﺍﺟﻠﻚ ﻭﺍﻟﻠﻪ ﻣﺎﻓﻲ ﺭﺟﺎﻟﻪ
ﻓﺮﺡ : ﺍﻟﻒ ﻣﺮﺓ ﻧﻘﻮﻟﻚ ﻣﺶ ﻛﻠﻪ ﺯﻱ ﻫﺬﺍﻙ ﺍﻟﺤﻘﻴﺮ
ﺍﻳﻤﻦ ؛ : ﺗﻔﻀﻠﻮﺍ ﺗﻔﻀﻠﻮﺍ ﺍﻧﺴﺘﻮﻧﺎ ﺍﻟﻌﻴﻠﺔ ﺩﺍﺧﻞ
ﻭﺟﺖ ﻋﻴﻨﻪ ﻓﻲ ﻋﻴﻦ ﺳﻤﺮ
ﺍﺳﺎﻣﻪ : ﺍﻟﻠﻪ ﻳﺂﻧﺴﻚ
ﺳﺮﺍﺝ : ﺗﺴﻠﻢ
ﻋﺰﻳﺰﻩ : ﻣﺮﺣﺒﺘﻴﻦ ﺑﻴﻜﻢ ﺁﻧﺴﺘﻮﻧﺎ
ﺯﻳﻨﺐ : ﺍﻟﻠﻪ ﻳﺂﻧﺴﻚ ﺳﻠﻤﻚ ﻳﺎﺭﺏ
ﻓﺮﺡ : ﺳﻤﺮﺭ ﺍﺳﺘﺎﺣﺸﻨﺎﻙ ﻳﺎﺑﻨﺖ
ﺳﻤﺮ : ﻭﺍﻧﺎ ﻭﺣﻖ ﺭﺑﻲ ﺗﻘﻮﻝ ﻧﻌﺮﻓﻜﻢ ﻣﻦ ﺳﻨﻴﻦ ﻭﻧﺘﻤﻨﻰ ﺩﻳﻤﺎ ﻧﻘﻌﺪﻭ ﻣﻊ ﺑﻌﺾ
ﻭﻗﺪﻣﻮﺍ ﻓﺮﺡ ﻭﻣﺮﺡ ﺍﻟﻌﺼﻴﺮ ﻭﺍﻟﺴﻜﻼﺗﻪ ﻭﺍﻟﻤﺎﻛﺮﻭﻥ
ﺳﻤﺮ : ﻭﻳﻦ ﻭﺧﻴﺘﻲ ﻣﺮﺕ ﺍﻟﻐﺎﻟﻲ ﺍﻥ ﺷﺎﺀﺍﻟﻠﻪ
ﻟﻴﻦ ﻃﻠﻌﺖ ﻳﺎﺳﻤﻴﻦ .......

ﻳﺘﺒﻊ ....

# ﺃﻣﻴﺮﺓ _ ﺍﺑﻲ