روايــة #أصحاب_ونسايب
الحَــلْــقــة الثــآلـــثــة 🌸
خالد واقف و حاط يديه ف جيوبه : ياهلا
فرح ماتبيش تشوفله ولا ترد عليه
خالد وقف قدامها و سكر عليها الطريق : والله آسف
فرح : حول من قدامي
خالد : مانيش محول لين تسامحيني
فرح : انى اليوم قريب متت ف جرتك و تقولي سامحيني !! توقعت حتى جاني السكر
خالد : بعيد السو عليك ، فيا ولا فيك
فرح كل مابتمشي يجي قدامها و يسكر عليها ف الطريق
فرح تتأفأف : خالد بلا تفاهة و حول من طريقي
آمل جاية و جايبة الكواشيك : معليشي خلودا عطلتك
( فرح فرحت ان أمل جت باش خالد يلهى معاها و تهرب منه ) ... و خشت تجري
خالد عيونه ف فرح و هي خاشة : لالا عادي ماعطلتيش .. خدي الكواشيك و طلع
فرح وقفت ع مرآية المدخل حطت يدها على قلبها داهشة : ياربي فكني شره
جتها إلهام ( بنت خالة خالد ) : اهلا فرح
فرح ابتسمت : اهلين شن الجو ؟
إلهام : مليح هلبا ، الزمزامات كيف وصلو من بكري نراجو فيهم عطلو هلبا .. هي تعالي معانا
فرح تفتح ف عبايتها : هي نساوي روحي و لاحقتكم
إلهام : اوك
________________
ساعة 11:00 م
طلعوا العروسة بيحنوها و البنات لايدين بيها و يزغرطولها
الزمزامة تغني :-
مدي ايدك نحنيها .. نطرفها .. صغيرة و باش تعرفها
مدي ايدك نحنيها .. نواسيها .. صغيرة و تفرح بيها
مزين الحنة الحمرا .. في اليدية .. و اجعل السعد ايجيها
مزين الحنة الحمرا .. في الصوابع .. و الخواتم بالطابع
مزين الحنة الحمرا .. في اليدية .. و الخواتم ذهبية
واجعلك يا عروسة .. كيف نبيك .. والعدو مايشمت فيك
و مزين الحنة الحمرا .. و قباله و بوك عز الرجااااالة
و مزين الحنة الحمرا .. و قباله و بوك عز الرجااااالة
واجعلك يا عروسة .. بالقبالي .. والشبوب الجلواااالي
وزي من عطي عشرة و زاد عشرة .. فيك ياسمحة البشرة
وزي من عطي مية و زاد مية .. فيك يا كحل عينية
وتهنا يا سلطان . بمنانه .. واللي عطاه الله سبحانه
وتهنا يا سلطان بالغريبة .. و خبرها الناس تجيبة
زغرووووطة ياهوووو
روروروروروروروروروروررري
( العروسة تبكي و هي تحني 😢 متأثرة بكلام الأغنية و واجعتها طلعتها من حوش بوها )
البنات يزغرطو و فرحانيلها .. و فرح تضحكلها و تصور فيها سناب
__________
( وليد وصل للعرس و قعمز مع الشباب )
عمر : وينك لتوا فاتك العشي
وليد : عادي واكل .. كان عندي موضوع هذا وين تميته
عمر : موضوع شني ؟
وليد : بعدين نهدرزو فيه
خالد جي يسلم : اهلين ويلا .. شن الأمور؟
وليد : الحمد لله تمام .. مبارك عليكم ماتعولو
خالد كر كرسي و قعمز : الله يبارك فيك عقبال عندكم ان شاء الله ..
وليد مبتسم : ان شاء الله
خالد : وينك ف الفاتحة ماريناكش ! بعتنالك العزومة مع عمر
وليد : ايه وصلت ، بارك الله فيك ..
خالد : توقعته فاتك عارفه معكوك و يديرها
عمر يضحك : أبرا 😂
وليد ضحك : لالا ظلمته المان .. الحق كنت لاهي اليوم و ماقدرتش نجي
خالد : آنستنا يا سي
وليد : الله يآنسك
