#من_حقي_نعيش

الحلقة الثالتة

#من_حقي_نعيش

لي #ابتسام_حمزة_المصراتي

الحلقة التالتة (3)

علاقة مريم واحمد يوم بعد يوم تزيد تقوى .. لكن ماحد صارح التاني بمشاعره .. لان احمد خايف علي مريم .. ومريم متحفظة خايفة يصير معاها زي ما صار من قبل وينكسر قلبها ..

هما مش مرتبطين بعلاقة لكن مشاعرهم كانت مرتبطة ..

لين في يوم من الايام كانوا يهدرزو عادي زي اي يوم ..

احمد قال :-
مريم نبي نقولك شي !!

مريم :- قول احمد ان شاء الله خير !!

احمد تردد وسكت ..

مريم :- خيرك سكتت شن في شغلتني !!

احمد :- متنشغليش !!
مافيش الا كل خير ..

بنقولك ان اني ...اااا ..!

بنقولك ان اني يا مريم معجب بيك ..!!

مريم تلخبطت وتحشمت وخافت ..  سكتت قعدت تفكر .. و ف نفس الوقت ارتسمت علي ملامحها ابتسامة صغيرة .. سببها فرحة غمرت قلبها لانها حتي هي معجبة بشخصية احمد الشهم و الطيب و الحنين واللي يخاف علاها هلبا واللي محاولش بأي شكل من الأشكال انه يستغل وضعها او يطلب شي يضرها ..

وهي ساكتة للحظات كان في داخلها يدور حوار طفولي و برئ بينها وبين نفسها يقول ..

الله !! حتى هوا طلع معجب بيا  الحمدلله .. زعما حس بشعوري !! زعما اهتميت بيه هلبا لدرجة لاحظ عليا ..! زعما نقوله حتي اني ؟؟ او يقول  هذي خيرها خفيفة !! ياحليلي ياارب !!! شن ندير !! شن نرد !!

وفجاة وبدون تفكير قررت تصارحه وتكون صادقة مع نفسها ومعاه ...

ردت مريم :- حتى اني معجبة بيك يا احمد .. لكن .... !!

احمد قري اول الكلام وتجاهل كلمة لكن ... وطار طار من الفرحة ... وقعد يضحك وخلاص بروحه ويشوف لكلامها لدرجة معاش كتب شي بعدها .. مش مصدق ان حتي هي تبادل فيه في نفس الشعور ..

مريم :- ها احمد وينك ؟؟

احمد :- معااااااك ..

فجأة احمد.رجعله شاهد العقل وسألها لكن شني يا مريم ؟؟؟؟

مريم .. لكن اني خايفة من الارتباط !!!

أحمد قالها .. مريم اني حاس بيك .. و ما عندي ما نقولك يا مريم الا شي واحد بس خليه ديما في بالك عن ثقة .. يشهد عليا ربي اني فرحان طاير من الفرحة بيك .. وربي يقدرني ونسعدك ونخاف ربي فيك لاني نبيك بالحلال لو قبلتيني نكون زوجك 😉...

مريم من فرحتها ساكتة وخايفة لكن في داخلها مصدقة احمد و واتقة فيه واللي مخليها واتقة في احمد إيمانها بربي وان ربي اكيد حيعوض صبرها خير ..