#من_حقي_نعيش
لي #ابتسام_حمزة_المصراتي
الحلقة السادسة (6)
احمد وصل للمستشفي .. مريم مشغولة تبكي وترعش وتدعي خايفة علي احمد تتصل برقمه ما حدش يرد وبعدين يعطي مقفل ركبت فيها نار تحسابه مات ..!!
بو احمد يجري في الطريق ميشوفش في شي قدامه يرعش وخايف علي احمد ويدعي في سره ان ربي ينجيه .. وصل للمستشفي في وقت قياسي من السرعة .. خش يجري للاسعاف مخلوع يسأل علي احمد ..
الدكتور قاله ان احمد في العناية الفائقة و وضعه حرج .. ضربة الحادث جاية علي راسه و رجليه اكثر شي .. وفي خطر علي حياته .. ادعوله .. لان حتي لو عاش في احتمال كبير حيعيش معاق ..!!
بو احمد طلب من الدكتور يشوفه ..
الدكتور .. رفض قال لين يستقر وضعه ممنوعة الزيارة .. ادعوله ماليكم الا الدعاء وخلاص ..
بو احمد اتصل ب ام احمد وقلها شن قاله الدكتور علي احمد ..
سكت شوية فكر وقالها :-
شفتي نية البنت شن دارت فيك ..!! ارتحتي توا اهو ولدك يا بيموت يا بيولي معاق هادي نية البنت اللي متبيهاش غلباتك بنيتها ..
ام احمد تبكي ومازال قاعدة بجبروتها : -
توا هذا وقته يا راجل !! هذا وقته !! اني محروقة علي ولدي وانت تقولي نية البنت !!؟؟
المهم عندي ولدي ينوض لاباس توا .. يا حليلي ياربي علي وليدي .. وتعيط ..
قتله تعالالى توا ارفعني نبي نشوفه ..!
بو احمد :- مانعين عليه الزيارة توا ما عندك لاش جاية ادعيله وخلاص ..
ام احمد مطاقهاش الصبر كلمت خوها طلبت منه يجي يرفعها للمستشفي ..
جي خوها رفعها ومرت خوها قعدت مع البنات
رفعها وهي ترعش وتبكي وخوها يصبر فيها .. وطول الطريق وهي تدعي ياربي نجيلي ولدي يارب طولي في عمره .. يارب خود روحي وخليه معنديش غيره .. تدعي طول الطريق ..
وصلت للمستشفي .. تلاقت هي وراجلها مصدومين يبكوا تقوله وليدنا يا بو احمد وليدنا بيضيع من بين يدينا . وليدنا بيموت !!.
وهو يقولها استهدي بالله يا مرا استهدي بالله ادعيله بدل الكلام هذا اللي تقولي فيه .. ادعيله !!
وهي تقول :- يارب يا ربي يشفيه يا ربي يشفيه ..
وقعدوا في حجرة الانتظار يستنوا علي نار ان حد يطمنهم علي وضع احمد !! مافيش حد طمنهم كلهم يقولو ادعوله وخلاص !!
مريم بتهبل تبي تتطمن علي احمد مقدرتش تمشي للمستشفي هداك اليوم لانه الوقت متأخر .. وتحاول علي رقم احمد مقفل .. مقفل .. !! تدعي طول الوقت ..
قسم الامانات في المستشفي عطوا لبو احمد حاجات احمد اللي لقوهم معاه في السيارة ومن ضمنهم تليفونه ..
أنت تقرأ
#من_حقي_نعيش
Short Storyمقدمة وتعريف بالرواية #من_حقي_نعيش هي رواية باللهجة الليبية الدارجة مضمونها سامي وهي مقتبسة من رواية قصيرة من ستة حلقات اسمها #جروح_العشق كاتبتها صديقتي Do Ja رواية دوجة عطتني الفكرة والإلهام ان تكون هالرواية بنفس المضمون وبنفس الهدف لكن بسيناريو ج...
