#من_حقي_نعيش

الحلقة السابعة

#من_حقي_نعيش

لي #ابتسام_حمزة_المصراتي

الحلقة السابعة (7)

احمد طلع من المستشفي وحاله بدي باهي لكن معاش يمشي علي رجليه ومعاش يحس بيهم .. يستعمل في كروسة وقعد علي تواصل مع مريم .. ومريم مسيباتاش..

بعد فترة احمد في يوم عشية يشرب في قهوة امه .. يهدرز إستغل الفرصة للكلام .. و قلها :-

عاد يمة توا خلاص معاش عندك سبلة ترفضي .. انتي قلتي مريم معاقة ياخدها معاق زيها واهو توا اني بديت معاق . معناها خلاص يمة نبيك تمشي تخطبيهالي توا ..!!

ام احمد انخلعت وقالته :- نخطبهالك !! وعلاش نخطبهالك ؟!! ومن بيعول عليك ترا قولي ؟؟ واني لامتي بنعيشلك لا ..

انت لازم تاخد وحدة صحيحة تقيمك ..مش هادي غير تقيم روحها !!
لا يا وليدي هادي لا !!!

احمد طبعا .. عيونه انفتحوا انصدم من رد فعل امه وكلامها القاسي اللي مافيشي رحمة .. تأثر وتأسف علي حال امه .. توقع انها خلاص بتوافق بعد ما بدي معاق .. سكت شوية و رد علاها :-

بنقولك حاجة يمة اني حلفت واني صحيح واهو بنحلفلك تاني واني معاق ..
وحق الله غير مريم ماني واخد .. وموضوع الزواج انسيه نهائي ..!!
انتي يمة امتي بتفهمي ان ربي يعاقب فيك بيا من قسوتك علي مريم .. يمة حرام عليك !!

ام احمد :- لا يعاقب فيا لا شي هذا قضاء الله وقدره .. وانت متعرفش مصلحتك اني نعرفها كويس ..

أحمد خش لداره متغشش .. واتصل بمريم يهدرز علاها ..♥️

بعد أيام ام احمد ومن غير ما يعرف احمد او تاخد شور راجلها .. مشت لحوش اختها ام تسنيم ..

خشت وهدرزت شوية وتسنيم تهدرز هي وأمها علي خالتها عادي ..

تسنيم تسال في خالتها قتلها :-
كيف حال احمد والله يسخف حاله .. كان زي الوردة ياناري .. وجعني الحق كيف داير توا يا خالتي وهو معاق !!؟؟

ام احمد مايوجعك غالي يا بنيتي الحمدلله وقضاء الله وقدره .. واحمد قاعد زي الوردة حتي وهو معاق مرضي والدين وليدي وبحوشه وبخدمته مناقصه شي و ربي يسعده ويهنيه ..

تسنيم شبحت لامها شبحة هزوة معناها كيف زي الوردة وهو
معاق !!

ام احمد كملت كلامها و قالت لاختها اصلا اني جاياتك يا وخيتي بخصوص احمد ..

ام تسنيم :- خيره ان شاء الله خير !!

خير خير .. اني جاية نبي نخطب تسنيم لولدي احمد .. !!

تسنيم وأمها شبحوا لبعض شبحة تعجب مصدومين ..

ام تسنيم وهي متلخبطة قالت :-
اااء ااء باهي باهي يا وخيتي توا نشاور بوها ونرد عليك غدوة وغيرت الموضوع طول ..