" الدنيا مسرح كبير، وكل الرجال والنساء ما هم إلّا ممثلون على هذا المسرح " وليم شكسبير
جالسه باستقامة تشرب قهوتها وهي تشاهد برنامج يتحدث عن فيلمها الجديد وتبتسم بفخر، لقد اصبحت مشهورة بسبب فيلم اخير صورته لينقلها لاعلى درجات الشهرة، كما وان اعمالها الخيرية بكل مكان انهم ينظرون لها وكأنها قديسة تستطيع وضع قناع جيدا لتظهر لهم بشخصية اخرى!
اخذت تتحدث المذيعة عن بطلة الفيلم فجعدت حاجبيها بغضب واتصلت بمدير اعمالها
" ايه ياعم الزفت دا على الصبح! امريكا ايه الي جيت منها واهلي ايه الي ماتوا وانا صغيرة دا لو ابويا سمع الهباب دا هييجي يغسل عاره "
" استني بس اسمعيني هفهمك "
وضعت قهوتها على الطاوله بانفعال " بلا استني بلا مش استني بقى الله يخربيتك قعدت تقولي هتصرف هتصرف بدل ما تكحلها عميتها ياخويا دانت مدير الهنا، وديني لما اشوفك لاعورك "
عدل نظارته بتوتر وهي يسير بسيارته " عايزاني اقولهم ايه يعني ان اسمك تهاني، ولا ان اهلك في الصعيد ولو عرفو انك بتطلعي في التليفزيون هييجو يدبحوكي دانتي حتى مفهماهم انك في طب ياجاحده "
" وماله اسم تهاني يا عنيا؟ ولا اكمن اسمك هيثم يعني، ولا انا مش مرتحالك اصلا من الاول، انت حد مسلطك عليا!! جايباك تحللي مشاكلي ولا تزودها يعني مش فاهمة "
" ما هو عشان انا جاي احلها انتي مش راضية تديني فرصة والله مش راضية! الناس بتحب الحكايات لما يعرفو انك يتيمة وبقيتي نجمة كبيرة اكيد معجبينك هيزيدوا، صح ولا لا قولي صح "
" بقولك ايه متعصبنيش، دا الناس واقفة قدام بيتي زي الرز دا مش بعيد اتسجن ويفكروني بعمل مظاهرة ضد النظام "
ضحك هيثم ليردف " شوفتي بقى حوار امريكا جاب نتيجة ازاي "
نظرت للحشد من الشباك بتهكم لتردف " امريكا اه، دانا ساقطة انجليزي يابني، مبعرفش اتكلم كلمتين على بعض تقولي امريكا، والله ما حد جايبني ورا الا انت عمال تجيبلي مصايب، اتفضل تعالى خرجني بقى من الحشد دا عشان اروح الزفت اللقاء "
اوقف السيارة وهو يمسح عرقه بمنديل " انا تحت اهو انزلي يلا وفرصة تعملي حركتين كده من بتوعك قدام الناس "
" انا مش عارفة ازاي مطردتكش لحد دلوقتي! "
نزلت تهاني او كما يعرفها المعجبون بإسم نور وهي توقع مع هذا وتتصور مع هذه وانتهت بعد ساعة وركبت السيارة واخيرا !
