رواية عاهرة العباسية كاملة

الحلقة الخامسة

#عاهرة_العباسية

#noosa

الحلقة الخامسة

قدمت العصير للضيوف ، كنت مدنقرة وأنا بمر عليهم بالعصير ، أسمع صوت الضيف المادة ليه العصير بناديني باسمي ، رفعت عيني لقيتو شيخ عبدالصمد ..

- شكلو العروس قريبتك !

- (ارتباك) ااا أي بت عمي ..

- خلاص واصلي ضيافتك .

- (دنقرة بي خجلة) حاضر .

قدمت العصير للضيوف ومرقت ، أصلا أنا ما متعودة أقعد مع الضيوف ، مشيت غرفة هدى رقدت في السرير وسرحت ، فجأة يدخل علي كمال .. قمت بي سرعة مصنقرة ، وهو ارتبك أظنه كان قايل الغرفة فاضية ..

- م مم معليش ما قايلك في الغرفة ..

- عادي ما مشكلة .

- م مم ممكن أدخل !

- أتفضل البيت بيتك ههههه !

- كلامك صاح ههههه !

كمال مشى قعد في سرير أختو ..

كان جذاب شديد ، بس بي صراحة أنا كنت مغرورة شويتين كده ..

المهم اتونسنا كده عن القراية والعلم ، كان ذكي شديد وفاهم ..

أثناء ما بنتونس جات هدى داخلة علينا وهي بتبكي بي دموع ، لمن شافتني قشت الدموع وقلبتها ليك ضحكة جميلة كده ..

- قرينا الفاتحة يا مهيرة !

- (زغردت) ايووووووي يووويووووي

بعد هنيت هدى بالخطوبة مشينا المطبخ اتغدينا ، هدى كانت الوكت كلو تتبسم من الفرحة ..

بعد الغدا أنا طوالي مشيت الصالون لي عمي لقيتو قاعد في الكنبة قعدت جمبو وباركت ليه خطوبة هدى ..

- أها يا عمو محمد ماف خبر من ناس أبوي ..

أخد ليه تنهيدة كده ..

- بي صراحة يا بتي أنا سعيت وسألت عن أبوك كل البعرفهم ما عرفنا ليه بلد ، لكن أخوك عند ناس حبوبتك هسي ..

- طيب أمي حصل ليها شنو ؟!

- بالمناسبة انتي ظلمتي أمك شديد !

- كيفن ؟!

- أمس أمك جاتا مرة الوزير واختها في البيت وكانت حامل تاامة ح تلد ، يلا أمك عشان الوزير صاحب أبوك دخلتها غرفتها وولدتها ، فأثناء ما مرة الوزير بتصرخ وبتئن انتي جيتي جمب غرفة أمك وسمعتي الكواريك دي وعشان صوت المرة كان قريب لي صوت امك انتي أوهمتي نفسك انو أمك بتخون أبوك ! ..

لمن سمعت الكلام ده بكيت شديد كنت حاسة اني تافهة شديد ، كنت بتمنى الواطة تنشق وتبلعني .. المهم بعد سكت سألت عمي ..