رواية عاهرة العباسية كاملة

الحلقة السابعة

#عاهرة_العباسية

#noosa

الحلقة السابعة

فتحت عيوني علي صوت كركبة ، البيت كان مضلم طلعت بره الحوش لقيت الباب مفتوح ، مشيت عليه قفلتو وقبلت عشان أرجع لقيت مرا زي ما الله خلقها ماشة ناحيتي براحة وشايلة في يدها سبحة كارة بالواطة ..

طق طق طق ..

صوت الطقطقة بتاعت السبحة كان عالي ، ارتجفت من الخوف واتسمرت في مكاني ..

قربت مني ظهرت ملامح وشها ، كانت جميلة شديد .. بديت اطمن شوية لأنها كانت مسالمة شديد ..

- انتي منو وجيتي هنا لي شنو ؟!

- جيت هنا أساعدك..

- تساعديني بي شنو ؟

- حا أوريك بيت العاهرة الجابت ليكم المصائب دي !

- عاهرة شنو ومصائب شنو ؟!

المرا الجميلة مدت يدها علي الباب وفتحتو و أثناء ما هي طالعة وصفت لي بيت العاهرة ..

- ما قلتي لي انتي منو ؟!

- أسألي عمك !

اتأملت فيها وهي ماشة في الشارع ، بعديها دخلت البيت وقفلت الباب وعاينت في نفسي لقيت روحي بقيت زي ما ربنا خلقني لمن قبلت لقيت كمال واقف وراي وبضحك وبصفق ..

صحيت مخلوعة من الحلم ده ، وأنا بستغفر ..

هدى جات هدأتني كانت بتذاكر ..

- مالك يامهيرة ان شاء الله ما شفتي شر في نومك !

- (بحاول اتماسك) ما عارفة لو كان خير أو شر ما عارفة !

- جاتك انتي برضك ؟! (بي تركيز شديد)

سكت مسافة وعاينت لي هدى في عيونها ..

- قاصدة منو انتي ؟!

- البريود !

- اوفففف ، لالا .. انتي جاتك والا شنو ؟!

- أااي قبلي شوية ، خلاص قومي صلي وادعي لي أبوك !

..

قمت من السرير مشيت علي الحمام لمن جيت أدخل علي الحمام عاينت تحت لقيت الدم نازل تحت القميص وبنقط في كرعي ..

البريود بتاعتي خلصت قبلي عشرة يوم الجابها هسع شنو ! خفت شديد ، جريت بي سرعة علي غرفة هدى لقيتها زي ما الله خلقها والدم كابي منها ، كان منظر ما عادي كلو كلو ..

- بسم الله مالك جيتي جارية كده خلعتيني !

- يا هدى أنستري أول ! (بي صراخ)

- (صوتها انقلب صوت راجل وكوركت) أنستري انتي يا بت الكلب !

انهجمت منها وعاينت في نفسي لقيت هدومي الكنت لابساهن اختفن ، عاينت لي هدى لقيتها هي كمان اختفت ..