رواية عاهرة العباسية كاملة

الحلقة الثامنة

#عاهرة_العباسية

#noosa

الحلقة الثامنة

نزلوا العنقريب وطلعوا وتربسوا الباب بي قوة ، فجأة في يد لمست راسي وكشفت الغطاء مني ، كانت المرا الجميلة الكانت شايلة السبحة بس المرة دي لابسة فستان طويل وجميل ..

كنت خلاص اقتنعت اني مت ، قلت لي نفسي احتمال الزول لمن يموت بكون كدي ، حاسي بالناس وهم ما حاسين بيه ..

المرا مشت جابت جردل فيه موية وكشحتو فيني ، فجأة التحكم رجع لي وصنقرت علي حيلي ..

المرا الجميلة جات وقعدت جمبي ومسحت راسي ..

- لازم تصحي يا مهيرة !

عاينت ليها وانا مستغربة ..

- يعني أنا ما مت ؟!

- لو ما صحيتي من نومك ده حا تتمني الموت !

- كيفن يعني ؟!

- من هنا أمرقي وامشي بيتكم ما بعيد من هنا ، ولو في زول حاول يوقفك ما تشتغلي بيه ولا تعايني ليه ، أتجاهلي أي شي ... (قاطعتها)

- (بديت أرجف) ما بقدر ما بقدر !

- ده حلمك يا مهيرة ، انتي البتقدري تطلعي منو ، كل حاجة هنا وهم ما حقيقة ، انتي الصنعتي الوهم ده وبتقدري تتحكمي فيو !

- وفي بيتنا أعمل شنو ؟!

- هناك بتلقي الجواب !

المرا قامت وفتحت الباب وطلعت ، انا قمت وطلعت وراها لقيتها اختفت ..

مشيت براي وفتحت باب الحوش عشان أمرق لقيت كمية من الرجال فيهم البعرفهم والما بعرفهم ..

الناس لمن شافتني خافت ورجعوا لي ورا كلهم ، ركزت فيهم واتمنيت انهم يختفوا ، فعلا بدوا يختفوا واحد واحد زي الحرقتهم نار ..

اتحركت ومشيت لحدي ما وصلت بيتنا لقيت جمب الباب واقفين أبوي وعمي وكمال وشادي وماهر ..

أبوي نهرني ..

- انتي مصرة ما تنستري ؟!

وفجأة كلهم بدوا يكوركوا فيني ...

أنستري أنستري انستري أنستري ..

في البداية خفت شديد ، لكن اتمالكت نفسي واتماسكت !

عاينت لي يدي واتمنيت يظهر فيها سيف ، السيف ظهر .. مشيت ناحيتهم ، كلهم اتراجعوا الا كمال ثبت مكانوا وطلع ليه عصاية كان في طرفها دم !

خفت شديد لأني عرفت انو هو الضربني ..

- (بي صوت عالي) عاوز مني شنو يا كمال ؟!

- أرمي السيف أحسن ليك !

- انت ما كمال ، انت منو وعاوز شنو ؟!

فجأة كمال اتحول لي صورة هدى ، وبدت تمشي في اتجاهي ..

- (بي صوت راجل) أسمعي الكلام وانستري يا بت الكلب ههههها (ضحكة شريرة) ..

عاينت لي نفسي وفعلا كنت زي ما الله خلقني ، اتمنيت اني البس ..

فجأة بقيت لابسة عباية وطرحة ..

طول حياتي ما لبست عباية وطرحة وانا صاحية ألقى نفسي لابساهم وانا حلمانة !

عاينت لي هدى لقيت وشها اتغير لي وش مرا قبيحة و بدت تذوب ، كانت بتصرخ بي صوت عالي ..

ما بخليك ما بخليك !!

مشيت دخلت بيتنا ، لقيت باب الصالون والبيت مربط ، التفت علي الحمام وفتحتو لقيت الماسورة سليمة وما بتنقط ..

مشيت علي الأبواب وحاولت أفك الربطات علي الأبواب ابت تتحل معاي ..

فجأة عمي محمد جا ودخل البيت ..

- ده شنو البتعملي فيه يا مهيرة ؟!

- عاوزة أفك العقدة دي !

- أقري سورة الفلق وفكيها ..

بديت أقرا سورة الفلق ..

لمن قلت (ومن شر النفاثات في العقد) الحبل اتفك ، بديت أحس بي راحة كبيرة عاينت للباب التاني لقيت عمي فكاه ..

وفجأة الألوان الشايفاها بدت تذوب وبقيت شايفة لون أبيض بس حولي زي الاتقفلت في غرفة بيضاء ..

فجأة بديت أسمع آية الكرسي ...

" من ذا الذي يشفع عنده الا بإذنه " ..

فتحت عيني لقيت عمي واقف جمبي وهدى برضو ..

- صباح الخير ، خوفتينا عليك يا مهيرة ..

- ليه حصل لي شنو يا هدى ؟!

- ما شفتي نفسك كنتي بتهلوسي كيف أمس بليل حميتيني النوم ..

عمي ابتسم وقال لي أمشي صلي وتعالي ألحقيني في الصالون ..

مشيت صليت العشاء بتاع أمس والصبح بتاع الليلة ومشيت الصالون لقيت عمي قاعد في الكنبة ومولع ليه سيجارة ..

- أها المرا ان شاء الله وصفت ليك بيت العاهرة !

- (بي خوفة) عرفت الحاجة دي من وين ؟! ..

- أنا كمان جاتني مرا في النوم وقالت اسمها عاتكة ، قالت لي ح توريني بيت العاهرة الجابت المصائب كلها ، بعد اتكلمت معاي كتير سألتها من الوصف قالت لي أسأل مهيرة واختفت ! .. كان حلم فيه حاجة اسمها الاستيقاظ الكاذب وهو انك بتكون قايل روحك صحيت في حين انك لسه نائم وبتتكرر الحاجة ده كم مرة لحدي ما تصحى في الحقيقة ..

- طيب الحاجة دي تفسيرها شنو لكن !!

- شوفي يا بتي ، ربنا سبحانه وتعالى خلق الجن ، ودي مخلوقات ليها حياتها الخاصة وعالمها براو ، القوة العند الجن بتخليه يخلي البني آدم في وهم عجيب ، الجن لمن يقصد البني آدم لازم يستهدف نقطة الوهم دي ، بخليك تعيش في وهم وخيال ووسواس لمن يضعفك بينقض عليك ويتلبسك وببقى بتغذى على اوهامك ومخاوفك ..

فجأة أثناء ما عمي بيحكي لي يدخل علينا كمال ..

يتبع