بما أن اليوم شفت منشورات تشجع العزوبية وتحارب الزواج ، فخلي أسولف باعتباري متزوج .. ومن نسولف عالبنات يعني وخرّ .. يعني القوارير ، يعني الكيك ، يعني الجلي .. يعني الكائنات الهلامية الي المفروض تخليهن بالثلاجة حتى لا يموعن وتباوع عليهن .. بشرفي
انت الي دتشجع عالعزوبية : بحياتك كلها نايم بالبرد مطئمن ما راح تتمرض ؟ لأن أكو كائن لطيف كلما تشمر الغطة يكعد من النوم يغطيك ؟ .. حاسس بهذا الشعور ؟ أكيد لا .. لأن بعدك تنام عالقنفة ولو تتمرغل برة البيت محد يدري بيك
زين شايف من تروح لمكان بعيد وهناك ببيتكم أكو بنية لطيفة كلبها ينبض عليك كل شوية تخابر تطمئن عليك ؟ لا أكيد مشايف لأن جبت عمرك عايش مثل أي قلم زايد ولو تصير بداعش محد يكلك وين رايح
زين بحياتك كلها طاب للبيت مقهور وتلزم ايدك فد ايد ناعمة أظافرها من الأدلة على وجود الله .. وتكلك لتشيل هم آني وياك ؟ .. صايرة وياك هاللقطة ؟ أكيد لا ، لان أنعم ايد لازمتك هي ايد سعد الفيتر .. وأكثر واحد يواسيك هو صاحبك الي يكلك بحكم الميانة : يلا طبك مرض هسة انت اول واحد تصير عنده مشاكل ؟
زين بشرفك سولفلي : رايح فديوم لغير محافظة وأكو بنية كاعدة بصفك الي هي زوجتك تنعس بالطريق وتنام على جتفك ؟ شايف شلون تحس روحك سند مهم عبالك لازم سد الموصل حتى لا يوكع ؟ .. اكيد لا ، لأن اقوة شي مسويه بحياتك تنتجي عالحياطين
لعد انت شايف عيون زوجتك من تشوفك تعبان شلون اذا هي بقمة السعادة تتحول الى قمة الحزن وتقطب حواجبها مو لشي بس علمودك انت .. شايف ؟ شايف ؟ لا .. لأن خلصت حياتك من تضوج تكعد وحدك بالغرفة مثل اليتيم ..
زين شايفها من هي ضايجة وتضحك وتفرح علمودك لأن تشوفك فرحان ؟
وين شايف .. هو انت من تفرح منو يدري بيك
شايف المنطقة العاطفية الي تنترس عندك وتبدي تشيل خشمك على اي بنية تشوفها غير زوجتك بدل ما انت هسة اي وحدة تشوفها تحبها من طرف واحد ؟
اهو بعد شكد سوالف .. واذا عالالتزام فأنت أول وتالي لازم تشتغل وتتعب وتذب الزبالة حتى لو عايش وحدك .. واذا على طلعة الكهوة وهالسوالف ترة ضحكة وحدة من زوجتك ( اذا تحبها ) تعادل الكهوة وداسين دمبلة هم
عمي العزاب .. ماطول جايكم محرم ، بحجة النعي على يتامة الغاضرية وابجوا على روحكم حيل ، لأن انتوا اكبر يتامة عالكرة الارضية
طبعاً اكيد دا اسولف ضمن الظروف الطبيعية المؤهلة للزواج.
عمر ال دليم
