مذكراتي العزيزة (كاملة)

الجزء الثالث والخمسون: محتاجة لك

مذكراتي العزيزة

أنا مش قادرة اصدق. الوقت يمر بسرعة قوي. فاضل أسبوعين بس واكون كملت تدريبي. هأبدأ شغلي الرسمي في المستشفى هنا. سنة عدت من يوم ما دخلت هنا كمتدربة. السنة ده فيها اجمل لحظات حياتي وأسواها. بابا مات هنا وفقدت جنيني برضه هنا ورأفت طعن في نفس المكان هنا. لكنني عشت أوقات جميلة هنا برضه. اتعلمت كتير. اكتسبت خبرة وكسبت أصدقاء.

أكتر واحد وأول واحد ساعدني وعلمني وساندني في كل وقت هو رأفت. مش عارفة من غيره كان ممكن ايه يحصل لي في السنة ده. هو انقذ حياتي حرفيا اكتر من مرة. هو افضل مدرس ومدير وزوج أي حد يتمناه.

الحمد لله علاقتنا كويسة دلوقتي زي أي زوجين عاديين. لو حد قالي في اول زواجنا اننا هنكون زوجيين طبيعيين بعد شهور قليلة ما كنتش اصدقه ابدا. شهورنا الأولى كانت اصعب ما يكون علي. أنا جرحته بشدة واخدت نصيبي من الألم انا كمان. دلوقتي كل شيء بخير. مش رائع لكن كويس. وانا راضية بكدة. انا مش عاوزة أي حاجة اكتر من ان زوجي يكون معي ويساندني ويهتم بي. الحاجة الوحيدة اللي نقصانا في علاقتنا هي الأولاد. حاولنا كتير لكن فشلنا. ورأفت قال لي ان دلوقتي مش الوقت المناسب اننا نجيب طفل. هو قال اني في بداية مشواري المهني ومحتاجة اركز في شغلي وبس. انا قلقانة يكون لسة بيفكر في شروطه. علشان كدة مش عاوز نحاول اكتر.

أنا مش بشتكي لكن علاقتنا مش زي ما كنت متخيلة لما كنت احلم بزوجي وبحياتي بعد الزواج. رأفت يحبني بجنون وبدون أي قيود. لكنه انسان عملي جدا. مش رومانسي خالص. عمرنا ما سافرنا نتفسح ولا اخدني في مكان رومانسي ولا حتى نتعشى في مطعم. حتى لما اشتري فستان جديد او اغير تسريحة شعري ولا يلاحظ او يجاملني. وعمره ما يكلمني كلام حب الا لما اطلب منه او لما أكون في ظرف اضطراري. كل واحد ينقصه حاجة ورأفت ينقصه الجانب الرومانسي. مفيش حد كامل انا عارفة. لكني بصفتي زوجته محتاجة اسمع منه كلام حلو من وقت للتاني. محتاجة احس اني محبوبة ومرغوبة من زوجي. هو يعتقد ان الدنيا مش بتقف على أي حد وكلامه صح لكن اتمنيت انه يقول لي انه محتاج لي وانه ما يقدرش يعيش من غيري. انه يثق فيه ثقة عمياء. لكن لا عقله العملي يمنعه من انه يقول الكلام ده لي. أنا بجد أتمنى لو يقول لي كدة.

أنا بجد اتمنيت لو يقول لي كدة حتى لو كان كذب انا محتاجة اسمع كلام حلو من زوجي. يوجعني اني اسمع كل ده من صديق مش زوجي. كبير على طول يقول لي قد ايه انا جميلة. لو اشتريت فستان جديد او غيرت أي حاجة في مظهري يلاحظ ويجاملني. حتى من غير أي حاجة على طول يناديني بالجميلة. حتى لو عارفة ان ده مجرد هزار لكن يا ريته كان من زوجي مش صديقي. كل ما اسمع حاجة زي كدة بفرح ويديني ثقة بنفسي لكن في نفس الوقت بزعل ان مش رأفت اللي قالها. هو ليه ما يبقاش كدة؟

مذكراتي العزيزة

النهاردة اول مرة ارفض طلب لنورهان. لأول مرة النهاردة تطلب مني حاجة بصفتها زوجتي وارفضها. انا مضايق قوي من نفسي. لكنني مجبور. بقالها سنة دلوقتي تدرب في المستشفى. عمرها ما حاولت تستغل انها زوجتي. كانت على طول حريصة انها تتعامل زي أي متدرب تاني في المستشفى. لكن النهاردة طلبت مني بصفتي مدير المستشفى اني اعين صديقها كبير في المستشفى بعد نهاية تدريبه. أنا قولت لها انه طبيب عادي مش متميز والمستشفى ده بس للأطباء المتميزين والممتازين وهو مش منهم.