ــــــــــــــ
الحلقة الاولى ..
قصة (ضياع الدر) ..
القصة دي زمنها في النصف الاول من التمانينات .. يعني في الفترة من سنة 80 الى 86 تقريبا ..
في قرية لاعلاقة لها بالمدينة .. شلة بتاعة اصحاب . قاعدين بتونسو.. هم شباب عندهم قوز رملة ..كل يوم بجو بعد صلاة العشاء ..يقعدو ويتونسوا ..ويحكوا قصص ونكات وغلوتيات .. في ضو القمر ,, كهربا زاتو مافي
ماعندهم غيبة ولانميمة.. ولاعندهم شمارات ولابجيبو خبر زول .. مازي مجالس اليومين دي ..مجالس الشلل النتنة .. المليانة بالقيل والقال والاشتغال باعراض الناس . واكل لحومهم ...
بس جماعتنا العايزين نحكي عنهم ديل اكتر حاجة ممكن يعملوها ..بقعدو بكاوو في بعض ويضحكو ويقرقو .. لغاية عشرة حداشر كدا كلو زول بمشي لي اهلو.. وهم اصحاب واصحاب شديد كمان ..
صاحبنا القاعد معاهم ده اسمو الجيلي . زول يستحق الخوة لانه اخو اخوان بالجد .. وعندو مواقف رجولية .. وواحد تاني اسمو قسم . وعكروش ومين ومين بنعرفهم لي قدام . المهم الملاحظ كم يوم فوق الونسة الجيلي ده سااااكت مابتكلم .. مع انو كان زول وناس وضحوك .. هسي كم يوم سارح. وبالو برة الونسة ..وساكت ساااي ..
الجماعة بتونسو ..قام قسم قال للجيلي .. الجيلي لو سمحت دايرك دقيقة .. قام مشى معاهو لي قدام قريب اخر الحلة .. الجيلي قال لي قسم .. انت ماشي وين يازول ؟.. قال ليهو بس خلاص وصلنا .. نقعد فوق الترس ده ..
الجيلي قال ليهو ان شاء الله خير .؟ مالك انت هسي سوقتني من نص الناس ..
وقطعت علي الونسة .. انت ماشايف عبدو بحكي ..
ونحن منسجمين معاهو ؟ موضوعك شنو؟ انا عارفك هسع يكون كلام .المكحله مايملاها..
قال ليهو يا الجيلي انا ماداير اقول كلام .. انا عايز اسألك..
انت ليك يومين ..ما مع الناس .سارح بعيد ..وبالك برة خالص ..عليك الله احكي لي في شنو ؟..
نحن مش اصحاب لو عندك مشكلة افديك بي دمي ..
الجيلي قال ليهو والله يا قسم انت مابتقصر .. لكن الموضوع الهامني انت مابتقدر عليهو .. وانا زاتي والله من التفكير والعجز مخي داير يطرشق ..
قال ليهو ياخي احكي لي احتمال اقدر اساعدك .. محتاج لقروش ؟ انت عيان ؟ في شنو؟ بالضبط كدا .. قال ليهو ابدا الحمد لله من ناحية قروش مستورة تب ..
ومن ناحية مرض انا في كامل الصحة والعافية الحمد لله وباس يدو بطن وضهر ..
((ملحوظة صغيرة الجيلي 26 سنة وقسم 27 سنة واقرب اصدقاء لبعض في الشلة ..الاتنين شغالين في الزراعة .. وخلو الدراسة من الابتدائية الجيلي اهله فقراء وماعندهم اراضي وبشتغل بي ضراعه رزق اليوم باليوم هو واخوه الاكبر ..وابوهوراجل كبير .. لكن قسم عندهم اراضي ..وناس حالتهم المادية فوق الوسط .. ))
لمان قسم اصر اصرار شديد على الجيلي يحكي ليهو .. قال ليهو خلاص بحكي ليك بس توعدني انك ماتجيب سيرة.. لانو كان جبت سيرة بتسوي لي مشكلة كبيرة ..
قال ليهو أفو يا الجيلي انت مابتعرفني ؟؟.. انا اخوك آمزاهر.. (مزاهر دي اخت قسم) قال ليهو الحقيقة انا قلبي مشغول شديد بي بدريه بت أحمد .. طبعا الزوله دي صاحبة صفيه اختي وبتجيها طوالي في البيت والله العظيم ياقسم حامياني النوم ..
قسم قال ليهو انت مجنون؟ انت ماعارف احمد ده منو؟ احمد زول من اعيان البلد وقروشو النار ماتاكلها .. وعضو في مجلس الشعب . (ملحوظة مجلس الشعب كان في زمن نميري بمثابة المجلس الوطني والجمعية التاسيسية وغيرها ) قال ليهو الناس ديل مابشبهوك يا الجيلي ولاهم مستواك .ديل ناس فوق فوق وانت زول فقران وقحطان .. والله تفتح خشمك بي كلام زي ده يكسروه ليك . قاليهو انا عارف ياقسم.. وده الموضوع الموترني وجايب لي الهزة في دماغي واعصابي .. كل يوم احس اني انا وكران اكتر .. البت دي اليوم البشوفا مع صفية .بتجيني حمى للصباح .. وقلبي دة تف تف تف .. والله مانعارف اسوي شنو؟ لكن مابغلب حيلة .. قسم قال ليهو .. بعدين البت دي حسب علمي لسع صغيره يعني يمكن صطاشر سبعطاشر ..انا حقيقة طولت ماشفتها ..
قاليهو ..صح.. لكن ياقسم البت فايرة فوارة ماشاء الله ..والله تفاحة بس .. والله ياقسم فيها قوام لا اله الله ..البت قايمة قومة ماطبيعية .. وبريئة حتى ونستها البسمعها مع صفية . ونسة اطفال بي الاختصار دي لؤلؤة . والعجيب بسمتها . ياخي ماتذكرني انا حاسي بي نفسي انقطع .. قسم ضحك هاهاها .. وقال ليهو لالالالا .. انت وضعك متأزم جدا.. عشان كدا ساكت .. قاليهو ايوة ساكت مالي الحق اسكت؟ بس عارف في حاجة .. قبل يومين انا في البيت بغسل في يدي بعد الفطور ..هي كانت بتعاين لي وتتبسم .. وانا لمن عاينت ليها خجلت وجرت.. وشايفها تتكلم مع صفية مابعرفها قالت ليها شنو؟
قال ليهو طيب انت اسأل صفيه .. شوفا احتمال حتى هي بتريدك كدي برضو .. قال ليهو مابقدر أسال صفيه ..نحن في البيت ماعندنا كلام زي ده .. البت بت ..والولد ولد .. يعني مستحيل اسأل صفية من الموضوع ده ..(طبعا لان الرجل عندنا زمان في البيت هو مصدر الهيبة والوقار . واخته بتعمل ليهو الف حساب .. وبتخاف منه عديل . ففعلا" صعب كونوا يمشي يتكلم في مواضيع زي دي مع اخته الاصغر منو .. )
اها طبعا"الجيلي شايف الحتة دي ماجاية كلو كلو وماقادرة تركب ليهو في راسو يعني يمشي يقولها شنو؟ .. المهم ..
قسم قال ليهو.. انت مغفل يا الجيلي .. غير صفية ماعندك اي طريقة تواصل معاها .. وياشاطر صفية دي بتكون حلقة الوصل .. بس انت من الليلة اعمل فيها صاحب صفية. وخليك قريب منها ..البت دي لو رادتك وقلبها اتعلق بيك .. قصتك بتبقى فيها احتمال نجاح . لكن برضو احتمال ضعيف .. ياخي الناس ديل ما مستواك ..الجيلي قال ليهو ..اسمع يا قسم .. انت بدل تديني الامل ..مالك داير تقنعني .. انا والله واثق في ربنا .. ولو عندي فيها قسمة ،حتى لو ابوها بقى هامان ولافرعون .. ربنا قادر ينزعها منهم ويديني ليها .. ولو كمان ماعندي فيها قسمة ..
معناها مكتوب لي العذاب والمعاناه .. وعمرو ياقسم الغنى والفقر مابوقف القسمة .. وفي النهاية انا أملي في الله .. وربنا ده في يدو تسخير الامور وتبديل الاحوال ..
قال ليهو يازول ربنا يوفقك اها هسي حتعمل شنو؟ قال ليهو ح اعمل كلامك وامشي ابدا صحوبيه مع صفية اختي واشوف البت دي موقفها مني شنو ؟وهل ممكن الامور دي تمشي لي قدام؟
ولا أنا اخير لي ابعد ؟
الى اللقاء ..
