فراغ ملاه بحبه لهجة عراقية وتتوفر فصحى على منتدى روايتي قلوب احلام

الجزء الثاني

#فراغ_ملأه_بحبه

النسخة العامية

كتابة رؤى صباح مهدي

الفصل -2

ظل جدو صافي حاير. من يوم اللي بدت مشاكل عتاب وية رجلها وهو حاير . يعني صارلة 10 سنين ... حاول هواي يحل المشاكل وحجة وية عبد الكريم اكثر من مرة حتى يهتم ببيته اكثر وميظل يومية مسافر مكان وعايف مرته وبنته وحدهم بس عبد الكريم جان ردة الاستهزاء بعتاب وشكوتها منه سماها غيرة نسوان وبرر علاقاته برجولته ... دائما جان جوابة اني رجال اسوي اللي اريده .. لو جان يكول ما اكدر ابقى مسافر شهر بلا مرة .. ومن جان صافي يكله اخذ مرتك وياك يتحجج بنهلة... اخر مرة حجو صافي وعبد الكريم كبت عركة مالها والي بسبب اهمال عبد الكريم لبيته ولمن افتهم صافي ان بنته عايشة وية رجلها مثل الغربة حس بالم وذنب لان هو اللي جبرها ترجع لرجلها واصر ميتطلقون. اخر مرة تعاركوا وعبد الكريم صار عصبي كلش على خاله وطلع من البيت ومن ذاك اليوم لهذا اليوم ميتحاجون .. يمكن هاي الحادثة اللي خلت نهلة تبدي التغيرات اللي وصلتها لهذا اليوم. ذبت صوج بعد ابوها بامها ولان أمها الوحيدة اللي تعاقبها بينما ابوها أصلا مو يمة السالفة . حست بفراغ جبير ناحيته واهماله الها هواي اثر بيها. تشتاقلة بس هو ماكو... ومن يجي تشوفة ساعات ويكون بارد وبيده تليفونه طول الوقت لحد ما عاتبته فاشترالها تليفون حتى يخلص منها.

جان عدنان هستوة راجع من البستان من شاف جده كاعد يضرب اخماس باسداس. سلم كالعادة والجد جاوبة. ورجع للصفنة. مادار لعدنان بال. ساله عدنان:

"خيرك جدو اشو بالك مشغول؟"

جاوب صافي:

"والله ياابني هو اكو غير عمتك عتاب ومشاكلها وية رجلها"

عدنان هو حفيد صافي من ابنه الجبير. ابوه الابن الأكبر لصافي وتوفة من جان عدنان صغير فصافي طلب من ام عدنان تجي هي وأولادها عدنان وجنان ويعيشون وياهم بالبيت الجبير. عزل الها مشتمل وعاشت معززة ومكرمة وياهم لحد ما جهالها كبروا. طبعا من ذاك اليوم لهذا اليوم صارت هواي تغيرات بالبيت وماتو ناس وتزوجو ناس وظلت ام عدنان وية أبو زوجها المتوفي نعم السند وهو ماخلاها تحتاج أي شي لا هي ولا جهالها وهسة ورة ماكبر عدنان هو صار مكان جدة يداري البستان ويشرف على الشغل بيها. بالسادس طلع معدل كلش عالي وجان يريد يصير مهندس معماري بس جدة صافي كعد وحجة ويا... جان يريدة يصير مهندس زراعي حتى يدير باله على الكاع ورغم جان حلم حياة عدنان يصير مهندس معماري بس كدام طلب جدو صافي راسا بدل بطاقة التقديم وقدم على الهندسة الزراعية وانقبل وورة ما تخرج جدو صافي كافأه وخلا مشرف على كل املاكه والمتصرف بكلشي وكلاشي وكتبلة تفويض حتى يكدر يوقع بمكانه . رغم اعترضوا أولاد صافي الولد وازواج البنات وحتى عبد الكريم جاب هذا الموضوع وقت العركة وية صافي وعايرة بالخرف لان خلة ولد صغير بمكانة بس صافي عندة ثقة بعدنان محد يكدر يلومة عليها.. ووقت اللي كل اولادة وبناته تركو عدنان جان خادم بيد جده. وصافي يحب عدنان حب استثنائي رغم هو يحب كل احفادة وأولاده بس عدنان يذكره بالمرحوم .. طويل واسمر وتعابيرة حادة بس روحه سمحه و كلش حنين. والاهم ميسوي شي اذا ما يأخذ راي جده.. ورة ما عدنان كبر وظل صافي وحدة بالبيت طلب من ام عدنان تجهز لابنها غرفة بصف غرفة صافي.. وهي ما قصرت. نقلت غراض ابنها من المشتمل مالتهم لبيت الجد. وهاليوم هم هي وجنان بدت تحضر لغرف عتاب ونهلة.