ياسمين : لو اتزوج كلب ماتزوجتك
فيصل : طيب خلينا نتفق ، انتي باقي صغيره ، ووراك جامعه ومستقبل ، لاتحطمين نفسك ، العمر قدامك ، كل شي له حل
ياسمين : حل ؟ جاي تستهبل على راسي
فيصل جلس قدامها ومسك كفوفها بهدوء : مااستهبل ، الحل اني اتزوجك ، على سنة الله ورسوله
ياسمين سحبت ايدينها بقوه ورجعت وراء : قوم عني
انتبه على نفسه وابعد عنها ابتسمت له بحقد : لو يخلصون الرجال ماتزوجتك ، لو فضيحتي توصل للعالم كله ماتزوجتك ، لو ضاعت حياتي ومستقبلي وتدمرت ماتزوجتك.
فيصل لملم اشتاته وطلع من عندها لأنه يدري من اول ان الكلام معاها هالفتره مايجيب نتيجه لكنه حاول .. طلع وكانت جود بوجهه ثايره ، طنشها وركب سيارته وراح ، بالوقت اللي وقف فهد وهو مستغرب ويناظر لجود وفوق راسه علامات استفهام.
وقف قدامها بتساؤل : فيصل وش يسوي هنا ؟
جود : ماادري
فهد بحده : تكلمي !
جود : جاي ياخذ الإيجار ، يقول ماتسكنون بلاش في بيت عمي
فهد : قولي الحقيقه
جود : هذي الحقيقه
فهد : انا الله وهبني اميّز الصادق من الكذاب !
جود : ياخي هذا الصدق لاتتفلسف
من بعيد وصلهم صوت بنت : جود ، وش هالإزعاج اللي صاير عندكم ؟ بعدين من هذا الرجال كثرانه زياراته ، هو واللي قبل شوي راح
جود : مالك شغل
فهد عصب : جود ، بتقولين لي وش يبي فيصل والا مايحصل لك خير !
جود : نعم ؟ عفواً وش دخلك فيني ؟
فهد انتبه على نفسه : مالي دخل فيك ، انا ابي فيصل ، وش يسوي عندكم ؟
جود : مثل ماقلت لك يبي ايجار
فهد : وكل يوم يجي ياخذ ايجار ؟
جود : هو يقول لك
فهد : جود !
جود : نعم ؟ خير ؟ ياخي مو غصب
كانت بتدخل ومسك ايدها بقوه : لاتعطيني ظهرك مره ثانيه عشان مااكسره
جود فلتت منه وبصوت حاد : تراكم صرتوا هم على قلوبنا ، مايكفي الناس صارت تتكلم علينا بسببكم ، كله عشان هذا بيت عمكم ! طيب ابشرك مالنا قعده فيه ، بنمشي الحين ، ياكثر قلايع وادرين.
فهد بصدمه : لحظه جود ماقصدت اللي فهمتيه ، البيت ومن بناه ومن جابكم له فدا راسك
جود : طيّب شكراً ، بغيت شي ؟
فهد تلفت يمين ويسار وهو يحاول يتذكر " انا وش ابي صدق ؟ وش اقول لها؟ جاي اشوفك "
جود تلوح بكفها : هيه يالأخو ، مضيع شي جاي تاخذه ؟
فهد : لا
جود : طيب وش بغيت ؟
فهد : جاي اخذ الإيجار
جود ضحكت لأنها كذبت بسالفة الإيجار و تدري انه كذاب : توك تقول فدا راسي ، المهم كم الإيجار ؟
فهد : سبع الاف ريال
جود دخلت يدها بعباتها وطلعت سكين ومدته في وجهه : ارجع لأهلك قبل ماارجعك لهم ميت !
فهد : محظوظ هالسكين ، تضمينه وين ماتروحين
ركب سيارته وراح وتركها بصدمتها ، طردت افكارها ودخلت : وش ذا العائله النشبه !
أنت تقرأ
رواية حتى عيوبك ماتليق الاعليك لو هي بغيرك كان ماحبيته
عاطفيةعندما يحين الصباح تتجلى جميع افكار الليل الحزينه ، نعيد ترتيب انفسنا لنبدأ من جديد ، نلملم اشتاتنا لنتعامل مع اشخاص مجهولين وغير مجهولين ، لكي لايشعر احد بحجم الفراغ الذي خلفته الليالي المتعبه ، ونحن نُدرك انّ بعد مرور الزمن ، سنحب ما كنا نكره ، ونك...
