روايــة #أصحاب_ونسايب
الحَـــلْـــقـــة الــثــامــنـة 🌸
فرح متوترة من خالد و خالد جوه مليح مرة مرة يناشب فيها من رجلها
فرح وشوشاته : حركة تانية نقلب عليك الطاولة
خالد شبحلها و قام حاجبه : قده الكلام هذا ؟!
فرح سكتت
قيس يناشب ف فرح و يغطي ف وجهه : ألاااح
فرح ضحكتله : حلاته العسل اللي يناشب
قيس يضحكلها
فرح مدتله ايديها : هي تعالى عندي كيكو
قيس قام ايديه و خالد مدهولها
فرح تبوس فيه : تو مش كنت تبكي تبي تنزل
خالد وشوشلها : ماقدرش يقاومك
فرح فنصت فيه : مافيش فايدة فيك ؟
خالد ضحك : مافيش
أمل : ولدي يحب الحلوات راه ههههه
أماني : يعرف يوازي 😂
خالد ضحك : طالع لخاله
عمر فنص فيه : هيا أبرا خيرلك
ضحكو كلهم : هههههههه
سمية تشوف لفرح و خالد و مبتسمة : عقبال نفرح بيكم و نشوف صغاركم
فرح سكتت و شبحو لبعضهم هي و عمر
خالد ضحك : امين
علي : هي سمو بالله و كولوا
________
ساعة 06:00 م
وليد خش للمطبخ لابس عربي
فتحية شبحتله : عليا خشة ولدي الزين ، تزيد ف عمري عشرة سنين 😍 ، و جت تبوس فيه
وليد ضحك و باس راسها : امي الحنونة يالعزيزة عليا ، ماترخصي مادام عيني حية
زينوبة : ماشاء الله ع العربي الصلاة ع النبي عليك
وصال خشت للمطبخ : اوووه 😍 حبي بالبدلة العربية جلطني جلطة مش عادية
وليد يضحك
وصال : خليك واقف بنصورك و بنزلك ع الفيس
وليد : فكيني من وجيج الفيس مش لازم
وصال فتحت تليفونها : اشبحلي هيا
وليد شبحلها و ابتسم 😊
وصال صوراته 📷
جاته عمته نوارة تخمس و تقرا عليه ف المعوذات
وليد ضحك : راهو مش عريس ، مش للدرجة هادي
نوارة : احلى من السلطان مش عريس
فتحية خدت الوشق توشق فيه
وليد : تعرفيني مانحباش يام يغملي ف قلبي
زينوبة : العين حق و حني خايفين عليك
وليد : الحافظ ربي
اسراء تستف ف العبمبر و ساكته
وليد شبحلها : خيرك مهبية ؟!
وصال : خناق العرايس 😂
اسراء : مبردك 😒
زينوبة تبوخ ف الرشتة : جو رجالة العيلة ؟
وليد : كيف باديين يجو و مقعمزين ف الصالون المهم ؛ شوية و يوصلو التريس جاي بنقوللكم مانبيش نسمع صوت زغاريط ولا غني ، فهمتي يا وصال ؟!!
وصال : تمام ياافندي 😌👍
شبح لإسراء : و ضحكة المصريات فكيني منها يا اسراء
اسراء شبحتله و سكتت
وصال : مش ف بالها الضحك اليوم
______
فرح ناضت من ع الطاولة
سمية : خيرك وقفتي ؟ كملي ماكلتك
فرح : لا الحمد لله شبعت
سمية : باهي براحتك
فرح خاشة الداخل بتغسل ايديها
أماني : فوفا بالله على طريقك تليفوني و انتي جاية
فرح : باهي حاضر
خالد ناض و بيلحقها
عمر : كمل ماكلتك حتى انت
خالد : الحمد لله هو هداكا
عمر مايبيشي يلحقها ، حطله طرف شواية قدامه و قاله : و راص الغوالي تاكلها
خالد ضحك : مانبيش نردها عليك هي
سمية : المطر شكلها بتصب
أمل : اني بنخش صقع على قيس
علي وقف : حتى اني خاش
________
