بعد العرس انتهى ومشينا شهر العسل وانبسطنا ، وبالجد قضينا ايام جميلة واتفسحنا وشفنا مناظر جميلة في كسلا وبورتسودان وبت ميكي كانت فرحانة شديد ، قلت في نفسي ربنا يقدرني اسعدها واهنيها لانو البت طيبة وعلي نياتها .
بعد رجعنا من شهر العسل نزلنا في بيتنا يومين وضبحنا لينا عمبلوق ( تيس صغير) عملنا كرامة وبعديها سقتها وديتها لي امها لانو قالت اشتاقت ليها ، مشينا بيتهم وقعدت معاهم يوم وااااحد بس طواالي اليوم التاني قلت ليها انا ماشي بيتي وانتي لمن تشبعي من امك اتصلي علي وانا بجي اسوقك ، امها قالت لي اقعد مالك ماشي ، قلت ليها عيشتكم دي مااااا بتنفع معاي وانا زول ناشف وزول عشوائيات وحياة الترطيبة دي بتخرب طبعي وببقى زول لين والكلام دا ما بنفع معاي .
المهم ودعت بت ميكي وقالت لي بقعد يومين تلاتة كدا مع امي وبعدين بتصل عليك ، وابوها قال لي خلاص المفروض تنزل شغل طالما ما داير تقعد ، قلت ليهو خلاص يومين كدا وبجي المصنع ان شاء الله.
رجعت البيت وخلاص ايام العسل راحت وبعد دا وكت الجد ح نعيش الواقع مع بت ميكي وبقيت افكر هل البت دي ح تقدر تعيش معاي في وضعي دا وهي من اسرة مرطبة وانا زول مسكين ساي وحالتنا تبكي الكافر وناس رزق اليوم باليوم .
قعدت افكر و تكالبت علي الهموم واتخلبطت الافكار في راسي وقلت اخليها علي الله وربنا يسهل بس انا ابذل كل ما بوسعي عشان اسعد البت دي .
عدا اسبوع وانا زهجت من قعاد البيت والقروش العندي خلاص قربت تكمل ف قلت خلاص انزل شغل وامشي اشوف المصنع شغلو كيف .
يلا نزلت شغل طواالي مع ابو النسب في المصنع بتاع الحلويات وقال لي انت اعمل جولة علي الاقسام كلها لمدة شهر وكل فترة اشتغل في قسم وشوف القسم البنفع معاك وتنزل معاهم شغل واجتهد في شغلك وانا ما بقصر معاك ، وحدد لي مرتب كويس وعندي حافز خاص ،
طبعا كلامو دا شجعني شديد وادني دافع اني اي حاجة او فكرة جاتني في راسي الماكن دا ما ابخل عليهو بيها ، بس قلت ليهو ما تقول للناس انا متزوج بتك واعتبرني زي الموظفين و العمال العندك ديل . قال لي خير يا زول ابشر ولا يهمك .
المهم لقيت المصنع مليان بنات اشكال والوان واحجام ، اها الاسبوع الاول لفيت الاقسام كلها و الاقسام بتتكون من قسم ادارة وقسم انتاج وقسم تعبئة وقسم تغليف وقسم شحن وقسم تسويق وتوزيع ، ولقيت المصنع مختلط شغالين فيهو بنات واولاد شغالين سوا في كل الاقسام ما عدا قسم الشحن شغالين اولاد بس بشحنو العربات .
المهم خلال الاسبوع دا اكتشفت ثغرات كتيرة في الشغل في بعض الاقسام وشايف في تواطؤ في الشغل ف قلت انا لازم ابدأ احسم الفوضى ما عشان دا المصنع حق ابو النسب ، بس عشان دا شغلي واكل عيشي والواجب بحتم علي اني اشتغل بضمير ولو شفت اي غلط احاول اصححو ، والرسول (ص) قال من اخذ الاجر حاسبه الله بالعمل .
…… .
بعد رجعت البيت قلت الصباح ان شاء الله اول حاجة ابدا بالاقسام المؤثرة علي الشغل بداية بالانتاج وما حوله .
☪☪☪☪☪
اها بالليل كدا اتصلت علي بت ميكي و قاعد اتونس معاها قلت ليها اها يا روحي ما اشتقتي لي ولا شنو ؟؟
قالت لي : حياتي انا اشتقت ليك والله لكن ماما بتقول ما بتقدر تقعد براها و ما دايرة تخليني وكل مرة بتقول لي اكلمك تجي تقعد معانا في البيت هنا .
قلت ليها : بيتكم انا ما بقعد ولا بستقر فيهو ومن الاول انا قلت ليك الكلام و دا كان شرطي وانتي المفروض انا راجلك و بيتك معاي هنا ما هناك مع امك وابوك .
قالت لي : امي وابوي قاعدين براهم يعني مافيها حاجة لمن نحن نقعد معاهم.
قلت ليها : هوي يا بت ارعي بي قيدك وانا الكلام الكتير ما بينفع معاي وبكرة بجي بسوقك .
قالت لي : ما بمشي معاك ولا خطوة .
وقفلت المكالمة في وشي ، انا عاينت للتلفون لقيتها فعلا قفلت المكالمة قمت اتصلت عليها مرة ومرتين وهي بترفض المكالمة . غضبت غضب لمن شعر راسي قام زي بوخ الحلة ، قلت كويس انا بعد دا يا بت ميكي بوريك العين الحمرة والوش التاني😡😡😡😡😡😡
.
.
.
#ييبــــــــع
