بعد كلام بت ميكي وقفلت فيني الخط ما قدرت انوم والليل كلو بتدردق في السرير لحدي ما اقع واقوم تاني من الزعل ومن التفكير الكتير ليه البت دي تقفل فيني الخط وانا راجلها ولا عشان دلعتها اكتر من اللازم لا خلاص تاني بركب ليها وش حديد واوريها ليك العمل كوارع نمل منو 😡😡😡
الصباح طلعت مشيت الشغل وانا عيوني حمر تقول سكران وبتنفس دخان دخان تقول محروق من جوة ، وصلت المصنع وقلت الزعل اخلي بعدين ولبست لي لاب كوت ودخلت قسم الانتاج لفيت شوية واتعرفت علي الشباب (بنات واولاد ) المهندسين والعمال الشغالين فيهو ولقيت في عمك كبير كدا مهندس مسؤول منهم وبشرف علي الانتاج وهو زول صارم شكلو ما بيتفاهم وهم بخافو منو لانو لمن يكون موجود معاهم في القسم هم بكونو منتبهين للعمل ومافي كلام ولا ونسة الا في مجال العمل فقط ، لكن شغلهم كويس بس عايزين شوية ضبط لانو عمك المهندس لمن يكون ما موجود او يمشي المكتب بتاعو ف هم بيتكاسلو واي واحد يطلع تلفونو وهاك يا فيس ويا ونسة وضحك ، ومرات العجنة ما بتكون بالقدر المطلوب وبكون في عجنات تالفه كتيره لانو شفتها في برميل النفايات .
بعد الدوام انتهى كتبت الملاحظات في النوتة حقتي وطلعت .
مشيت مكتب ابو النسب لقيت عندو اجتماع طوااالي طلعت وركبت المواصلات مشيت بيت ناس بت ميكي .
دقيت الجرس جات فتحت لي الشغالة ، سلمت عليها وخشيت طوالي جوة لقيت بت ميكي قاعدة في الصالة بتحضر في التلفزيون (ياخ عندهم شاشة كبيرة زي السينما ما زينا نحن تلفزيونا 14 بوصة الا تقعد جنبو عشان تشوف كويس وتفرز الممثلين) .
وهي ما شافتني طبعا مدياني ضهرها
وانا قلت اقوم اكبسها ليك من ورا و اخنقها ليك لمن تفرفر عشان تاني تعرف قيمتي وما تقفل في وشي التلفون .
اها ماشي عليها والشرر يتطاير من عيوني وبتنفس شرار شرار وكفكفت يديني عشان اخنقها ليك الا اسمع ليك صوت امها وهي جاية من المطبخ وبتقول لي : هلا والله والف مليون مرحب هلت علينا البركة وبيتنا نور .
انا : النور نورك يا خالتي كيف اخباركم ان شاء الله كويسين.
نسيبتي : بخير الحمد لله لكن زعلانين منك ، اخص عليك يعني ما داير تجينا .
انا : لا والله ما كدا لكن زحمة الشغل وبرجع متأخر عشان كدا ما بقدر بجيكم .
نسيبتي جات علي ومديت يدي عشان اسلم عليها ، الا القى زول اتشعبط فيني من ورا ، ياخ دي شنو المصيبة دي .
نسيبتي : يا بت بطلي هبالة وفكي الولد كدا بتخنقيهو
بت ميكي : مشتاقة ليهو يا ماما
انا عضيت سنوني واتكلمت براحة عشان امها ما تسمعني قلت ليها : امك يا عويرة فكيني ياخ والله ارميك .
حتى قامت فكتني وخلتني اسلم علي امها ، اتونسنا شوية كدا نسيبتي قالت لي كدا امشي اجيب ليك حاجة تشربها ، ومشت خلتنا انا وبتها برانا.
انا : اول حاجة حسابي معاك بعدين لمن نرجع بيتنا
بت ميكي جات قعدت جنبي وقالت لي : مالك انا اتشعبطت في رقبتك عشان مشتاقة ليك ياخي .
انا : لا لا دا موضوع براهو وثم ثانيا ليه امبارح تقفلي التلفون في وشي واضرب ليك تاني ترفضي المكالمة .
بت ميكي : هههه انا قاصدة كدا لانك ما داير تجينا وعارفاك كان زعلت بتجي عشان تشاكلني وانا قصدت انك تجي لاني مشتاقة ليك شديد حبيبي انا .
ولعت عيوني كبااار 👀بلعت ريقي وقلت ليها : اوعك تعملي كدا تاني لاني لو زعلت زعلي كعب .
بت ميكي ختت راسها في كتفي وقالت بي دلع : حااااضر يا زوجي وسيد ريدي وحياتي وانا ما بقدر ازعلك ولا اعمل حاجة تزعلك .
بعد قالت كلامها دا كتلت قلبي و جسمي نمل وبقى بااااااارد ورقدت دكوة ، داير احضنها كدا امها جات.
نسيبتي : هاك اشرب العصير دا وهدي اعصابك شوية من تعب الشغل.
انا : تسلمي يا خالتي وربنا ما يحرمنا منك
طبعا جابت لي عصير اناناس فرش قمت مسكت الجك وجووووتك كرطعتو كرطيع لحدي ما الجك كمل .
قعدنا اتونسنا شوية كدا ابوهم جا داخل سلم علينا ومشى اخد ليهو دش وجاني راجع سألني من الشغل ، قلت ليهو في بعض الملاحظات في قسم الانتاج بس لو ممكن نركب كاميرات مراقبة يكون افضل ، قال لي ليه يعني مافي اخلاص في العمل ولا شنو والمهندسين والمهندسات ديل ناس كويسين ومنضبطين ،قلت ليهو لا ما في حاجة وهم كويسين بس للضمان ولو حصل اي عطل في اي جهاز او اي آلة كدا بعرفو من بدري (طبعا ما داير اقوليهو المهندسين بتماطلو في الشغل لما عمو المشرف يكون ما موجود معاهم ) ، المهم قال لي خلاص تمام بكرة الصباح تمر علي في مكتبي وانا بكتب ليك اذن صرف وتمشي للمحاسب يديك القروش . قلت ليهو تمام .
جابو الغداء اتغدينا وحلينا وشربنا الشاي وقلت ليهم يلا انا بسوق مرتي وبنمشي بيتنا ، قال لي اقعد بيت معانا يا زول ، قلت ليهو والله مافي طريقة يا ابو النسب وخليها مرة تانية .
المهم اتخارجت منو بي حجج كدا وبت ميكي لملمت حاجاتها ومرقنا ركبنا امجاد لانو بت ميكي ما بتتحمل المواصلات بتاعتنا دي واصلا حافلات حلتنا كلها مكركبة ولمن توصل بيتكم بتوصل معسم وعندك فلايت تقول داقنك بي عكاز.
وصلنا البيت دخلنا سلمنا علي ناس بيتنا ومشينا كركورنا (غرفتنا)...
بعد دخلنا غرفتنا مسكتها من كتفها وقلت ليها داير منك طلب يا نونتي (اسمها نون وانا بدلعها ب نونتي) .
نون خجلت ودنقرت راسها وقالت لي : اتفضل طلباتك اوامر يا قلب😍😍😍…..
……
.
.
#يتبـــــــع
