قلت ليها اول حاجة قبل ما تغيري ملابسك وتنومي داير اقوليك كلمتين نحن يا دوب حياتنا بتبدأ من الليلة ولي قدام وانتي ليكي حقوق وعليكي واجبات وانا كمان ، واي واحد فينا لازم يقوم بي واجباتو علي اكمل وجه عشان نعيش في سلام وحياتنا تستمر ، والشي الدايرو منك تفكري وتتخذي قرارك لانك حتعيشي معاي هنا في بيتي وتنومي في الحوش والمرتبة بتاعت القطن الكلها كراضيم ما زي لحافاتكم الكلها اسفنج وهواء ومخدات الريش ، وهنا مافي مكيف بس عندنا مروحة و بالليل بننوم في السهلة في الحوش برة وعندنا سخانة تلحم و شمس ☀حاارة وغبار واجواء متقلبة واكلنا ما زي اكلكم يعني ما عندنا بيتزا وهوت دوق وبروست و و و .. لا يا بت نحن بناكل كسرة وعصيدة وملاح ام تكشو و لوبة وام شعيفة وويكة وتقلية وقاورمة ووو ، ولو ما بتقدري علي العيشة دي وما بتقدري تستحمليها خليني ارجعك بيتكم لانو شايفك طولتي عند امك وما دايرة تجي تقعدي معاي هنا .
نون رفعت راسها وعيونها رقرقو وقالت لي : انا يا عادل قبل ما اتزوجك عرفت حالتك وجيت بيتكم كذا مرة وعرفت وضعكم كيف وعايشين كيف وبعد دا كلو قبلت انك تتزوجني لاني شبعانة من بيت ابوي وما دايرة المال وما دايرة الجاه انا دايراك انت وبس وعارفة انكم ناس بسيطين وانا لمن اخترتك ما عشان اغامر ولا عشان اجرب الزواج لانو الزواج دا ما هظار ، بس اخترتك عشان شفت فيك فارس احلامي وشفت فيك الراجل البيحترمني ويصوني والراجل البقدر اكون مبسوطة معاهو ويبقى لي سند وانا حبيتك يا عادل وحاربت الدنيا كلها عشانك انت ، بس ارجوك ما تخذلني في يوم من الأيام .
ياخ نون لمن قالت لي الكلام دا انا اتجمدت في مكاني وجسمي قام شوك شوك وبقيت اعاين ليها مساااافة ( في اللحظة ديك لو زول ولع فيني نار ما كان حسيت بيها ، اصلو الكلام السمح بخلي الزول يكون عايش في عالم تاني) .
قمت قشيت ليها دموعها و حضنتها وقلت ليها : ربنا يقدرني اني اسعدك واهنيك واكون ليك الزوج الصالح والسند وان شاء الله ما اخذلك يا نونتي .
قامت ابتسمت وهي عندها وجنات عجيبة تقول حافرنها بي دربكين ، قلت ليها خلاص انتي غيري ملابسك وانا بخش استحم ونجي ننوم يا نونتي عسولتي …
المهم 🙊🙉🙈… .
الصباح قمت بدري وخليتها نايمة ومشيت بهناك لقيت اختي جهزت الشاي شربتو وقلت ليها نون دي نايمة بعد تصحى ما اوصيك عليها بالله ، قالت لي تمام .
طلعت علي الشغل مشيت لقيت ابو النسب لسه ما جاء ، المهم دخلت قسم التعبئة والتغليف لقيت معظمهم بنات والاولاد بسيطين وفي واحدة شابة كدة اسمها (مها) شغالة مراقبة و مسؤولة منهم ومجرد ما خشيت نادتني قالت لي تعال عندك شنو هنا ؟
قلت ليها انا عامل جديد معاكم في القسم دا ،
قالت لي خلاص خش اشتغل مع الناس وبطل تعاين للبنات ،
قلت ليها تمام.
مشيت خشيت في نصهم وقلت اشوفهم بعملو في شنو عشان اشتغل معاهم ، لقيتهم شغالين بس بيتونسو وبهظرو مع بعض وضرب في الكتف وضحك وحركات .
المهم اتعرفت عليهم واشتغلت معاهم شوية ، بعد ساعة كدا اتلفت ورا وقدام ما لقيت المراقبة (مها) ، قمت طلعت ومشيت مكتب المدير (ابوالنسب) عشان اشيل منو اذن السحب وامشي اجيب الكاميرات ،
وصلت مكتبو و دخلت سلمت عليهو وقلت ليهو اديني اذن السحب عشان نمشي نجيب الكاميرات ونكسب زمنا ونشوف بعديها حنعمل شنو .
بعد اخدت منو اذن السحب طواالي مشيت علي مكتب المحاسب ( عصام) ودفرت الباب طوالي من غير ما ادقو وخشيت لقيت ليك معاهو المراقبة (مها) في وضع كدا ماااا تمام ( عصام قاعد في الكرسي ومها قاعدة في الطربيزة بتاعت المكتب وقريبين لي بعض ) قلت ليهم احم احم ،
مها ارتبكت وقامت علي حيلها وقالت لي انت الطلعك من شغلك شنو وحالتك جديد ولافي في المكاتب .
قلت ليها اولا دا ما محل شغلك انتي وتانيا خلي بالك من شغلك اول وبعدين تعالي حاسبيني انا ،
عصام قاطعني وقالي لو سمحت يا ابو الشباب عندك حاجة هنا ولا اقدر اخدمك بي شي؟؟؟ ( داير يخارجني المعفن ) .
طوالي قمت مديت ليهو اذن السحب ، شاف المبلغ كبير قالي القروش دي حقت شنو بالضبط ؟؟؟.
قلت ليهو : والله الموضوع ما بخصك وطالما الاذن موقع من السيد المدير انت ما من حقك تحقق معاي يعني عليك تديني القروش وبسس .
طبعا استغربو في طريقة كلامي معاهم ، عصام قام فتح الخزينة وحسب القروش واداني ليها.
اسلمت القروش وطلعت من مكتبو وقفلت الباب وراي شديد لاني زعلان من حركاتهم دي هم جايين عشان يشتغلو ولا جايين عشان يتصعلقو ، (ياخ معقولة المكاتب بحصل فيها كدا ) لكن قلت تمام بس اصبرو لي لحدي ما افضى ليكم عشان اوريكم الطفا النور منو يا حيوانين .
مشيت السوق العربي هناك في محلات بتاعت كاميرات يلا اتفقت لي مع محل عشان بكرة يجو يركبو لينا الكاميرات واكتبت معاهم عقد واديتهم عربون وقلت خلاص بعد دا ارجع البيت عشان امشي اشوف بت ميكي كيف .
ركبت المواصلات وصلت سوق حلتنا الكلو رواكيب واشتريت لي دردقو (تبش) وشلت لي بطيخة معاي لانو ديل التحلية بالنسة لينا ومشيت علي البيت وشايل اكياس عامل نفسي مسؤول وانا بصفر واغني واتبسم براااي زي المشوطن ( المجنون) .
وصلت البيت دفرت باب الحوش براااحة عشان مافي زول من ناس بيتنا يشوفني واتدبيت زي حرامي الجداد لحدي ما وصلت غرفتنا وكويس لقيت الباب متاكة متاكا (ما مقفول لو لزيتو بفتح معاك) قمت لزيتو براحة وخشيت ، الا اشوف ليك بت ميكي راقدة في السرير وجسمها وارم ووشها منفوخ لمن عيونها غطسو جوة وجسمها كلو ملطخ بي حاجة بيضاء زي الوقعت في برميل بوهية .
رميت الاكياس من يدي وجريت عليها..
بس الله يستر … ..
.
.
.
#يتبـــــــــــع
