رميت الكياس من يدي وجريت علي بت ميكي قعدت جمبها وبقيت امسح في وشها وقلت ليها مالك يا بت الحصل عليكي شنو .
قالت لي كلام كدا ما مفهوم زي القاعدة تهضرب لانو خشمها وارم ،
قمت كوركت لي اختي اسمها (سلمى) بي هناك جات جارية قالت مالك بتكورك ،
قلت ليها نون دي مالها الحصل ليها شنو
سلمى : دا البعوض عضاها ورم ليها جسمها عاد البت دي ما بتتحمل عضة البعوض ونحن عضة الدبيب ما بتعمل لينا حاجة .
انا : هسي انتي وهي واحد ؟ انتي جسمك زي الورل ياخ البت دي الشمس الحارة ما بتتحملها تقولي بعوض وطيب ليه ما اتصلتي علي من قبيل
سلمى : لمن انت طلعت الصباح وهي بعد ساعة ما صحت جيت عليها دايرة اصحيها لقيت جسمها وارم وعندها حمى وملابسها كلها دم عرفت انو دا البعوض عضاها .
(عندنا بعوض قدر الضبان تقول مهجن ولا مستورد ، لو متغطي بي بطانية بجو اتنين برفعو البطانية وواحدة تدخل تعضيك وبعدين بتبادلو الادوار ولو متغطي بي ملاية ساي كدا بعضوك انت والملاية ويمصو دمك )
لكن نحن جلدنا تخين واتعودنا علي البعوض .
انا : طيب عملتي ليها شنو؟؟
سلمي : عملت ليها مكمدات ولطخت ليها جسمها بي عجين مر ، الورم خفه والحرارة راحت وانت كان شفتها قبيل ما بتعرفها جسمها بقى زي الفشفاش .
انا : خلاص اتخارجي يلا امشي شوفي لينا طريقة غداء .
سلمى : كويس لكن البت دي احسن توديها بيتهم لو خليتها هنا بتموت ليك ساي .
انا : ما عندك شغلة بينا يلا قدي .
سلمي مشت وانا بقيت اعاين لي نون ،
قلت في نفسي🙄 ( اوديها بيتهم ، بس امها وابوها لو شافوها في الحالة دي تاني ما حيخلوها تجي معاي هنا واحتمال يطلقوها مني لانو هي بتهم الوحيدة ، طيب اجيب ليها ناموسية 🤔 يعني تدخل تحت الناموسية من بعد العصر تاني ما تطلع منها ولا كيف 🤔 نحن ناسنا هنا عشاان الباعوض ما يعضيهم بتمسحو بي جاز هسي دي بتتمسح لي بي جاز 🤔 كدا خليها تبقى كويسة اول وبعدين يحلها ربنا ).
المهم مشيت قعدت جنبها قلت ليها اوديك المستشفى ولا اوديك بيت امك ، هزت راسها وقالت لا ، قلت ليها طيب انتي كويسة قالت ايوا ، قلت ليها طيب لحظة بس انا مارق برا الدكان وجاي ،
طلعت مشيت السوق الجنبنا عندنا بتاع ترزي بشتغل اي حاجة ، يلا قلت ليهو تعمل لي ناموسية دايرها في اسرع وقت ، الترزي طلع ليهو ناموسية من الصندوق وقالي خلاص شيل دي جاهزة انا خيطتها لي واحد وليهو اسبوع ما جاني وانا بخيط ليهو واحدة تانية ، دفعت ليهو قروشو وشلت الناموسية ومشيت البيت طلعت سرير في الحوش لانو الكهرباء قطعت وجبت اربعة قنايات ربطتهن في كرعين السرير وعلقت الناموسية وشلت بت ميكي جيت رقدتها تحتها ،
قعدت اعاين ليها مسافة والله شكلها يحنن و العجين شال الورم ، قلت ليها معليش حبيبتي انا اعفي لي عارفك ما بتقدري تستحملي عيشتنا دي و .. قاطعتني وقالت لي : لا لا ولا يهمك الموضوع عادي بس عشان انا جسمي حساس لكن مع الايام بتعود وما تشيل همي ،
اتونسنا شوية لحدي ما هي نامت وانا قمت جبت لي فرشة انبطحت فيها ورقدت نمت .
صحيت الصباح بدري فتحت الناموسية واطمنت علي بت ميكي والحمد لله مافي بعوضة دخلت عليها ، ومشيت البيت بهناك شربت لي شاي وطلعت الشغل.
في الطريق مريت علي المكتب الاتعاقدت معاهم عشان يركبو لينا الكاميرات واخدت الفنيين معاي ومشينا المصنع .
بعد وصلنا ، العمال والمهندسين كلهم قعدو يعاينو واستغربو فيني انا العامل الجديد دا شغلو شنو من امبارح عامل لينا قومة وقعدة .
المهم وريت الفنيين يركبو الكاميرات وين ومشيت علي مكتب المدير دخلت سلمت عليهو وقعدت معاهو شوية وريتو الحاصل شنو من امبارح بالنسبة لي شغل الكاميرات ، قال لي تعال معاي داير اوريك حاجة ، مشيت معاهو دخلنا مكتب جديد كدا قال لي دا المكتب حقك وركب فيهو شاشة المراقبة واشتغل بي راحتك ، قلت ليهو خير وان شاء الله اكون عند حسن ظنك .
المدير طلع وخلاني براي كدا طوااالي قعدت في الكرسي النوع البلف داك عشان فرحان اصلا الكراسي دي بنشوفها الا في المسلسلات ، المهم اخدت لي بيهو كم لفة كدا لحدي ما راسي لفه و بب وقعت في الواطة وقمت سريع لاني سمعت زول دق باب المكتب ، قلت ليهو اتفضل ، جات داخلة مها وشايلة معاها موية وشاي ،
مها: السلام عليكم
انا : وعليكم السلام ورحمة الله وبركاته.
بقت تتبسم وجات ختت الموية والشاي قدامي وقالت لي
مها: معليش بس ما اتعرفنا وانت جيت دخلت علينا ولا عرفتنا بي نفسك ، انا مها الامين ساكنة الصحافة وشغالة مراقبة .
انا : ااي عارفك من مقابلتك لي اول يوم
مها : بس ما تكون زعلان مني في حاجة.
انا: لا لا ما زعلان منك .
مها: طيب عرفني بي نفسك ،
انا : اسمي عادل عبدالسلام عامل جديد معاكم في المصنع،
مها : والله انت حركاتك وشكلك دا لا شكل عامل ولا اي شي بس داير تخمني ساكت.
انا : لا ما داير اخمك وبالجد انا عامل جديد ولو ما مصدقة امشي اسألي المدير ،
مها : خلاص تمام طيب كدا اشرب الشاي دا عملتو ليك انا بي يدي .
انا : شكرا ليك وتسلم ايدك ما كان تتعبي نفسك.
مها : لا لا مافي اي تعب وتعبك راحة .
انا استغربت من كلامها لانو امبارح كانت معاي بي وش والليلة بي وش تاني وظرافة ورشاقة و خفة و و و .
المهم انا لمن حسيت انها لايوقة وما دايرة تطلع وقاعدة تجرجرني في الكلام عشان تعرف انا علاقتي شنو بالسيد المدير . قلت ليها عن اذنك انا طالع اشوف الفنيين ركبو الكاميرات ولا لسه . وطوالي طلعت وخليتها في المكتب ،
مشيت علي الفيين بهناك لقيتهم لسه شغالين وقالو الشغل بخلص بكرة قلت ليهم خلاص تمام انا ماشي وموعدنا بكرة ان شاء الله تخلصو شغلكم وتستلمو باقي قروشكم.
اها قلت الليلة امشي البيت بدري اطمن علي بت ميكي وغشيت الصيديلة اخدت لي مرهم بتاع باعوض ومشيت البيت .
وصلت البيت دخلت الغرفة لقيت بت ميكي قاعدة وماسكة دفتر زي القاعدة تزاكر ، سلمت عليها وبستها في يدها (اميرتي الجميلة) الحمد لله بقت كويسة والورم كلو راح .
انا : كيف اخبارك وصحتك
نون: تمام الحمد لله مالك ما اتصلت عشان تطمن علي ولا انا مافي بالك.
انا : انتي في بالي 24 ساعة والله لكن مشغوليات بس يا ستي .
نون: يعني شغلك اهم مني ولا كيف
انا: لا بس عشان عندنا ترتيبات جديدة في المصنع ، كدا خلينا من الشغل ، هسي انتي بتزاكري في شنو دايرة تحضري ماجستير ؟
ابتسمت وسماحة الدنيا كلها في وججها المشرق وقالت
نون : هاك شوف انا قاعدة اقرا في شنو!!
شلت الدفتر لقيت مكتوب فيهو
ملاح ويكة: هو عبارة عن بامية جافة مسحونة و و و ريقة التضحير… .
ملاح ام شعيفة : هو عبارة عن…
طريقة عمل الكسرة :…
طريقة عمل العصيدة :…
مكونات الكسرة : صاج ،تملة ، دوكة ، عجين حامض ،…
انا : دا شنو يا بت ومالك كاتبة الكلام دا.
نون: دايرة ابقى ست بيت ناجحة وامك قالت انت بتحب الاكل عشان كدا دايرة اتعلم الطبيخ .
بنتكلم كدا جات رسالة في التلفون ، طلعتو وقريت الرسالة ( وين مشيت انا عملت ليك جبنة وجبتها ليك المكتب ). طوااالي اتصلت بالرقم جاني صوت حنييييييين : الووووو
انا : مرحب معاي منو؟؟
… . : معاك مها يعني ما عرفتني من صوتي حرااام عليك .
انا : مها!!!
ولعت عيوني كباار عاينت لي نون لقيتها قاعدة تحدر لي…
.
.
#يتبــــــــع
