عاينت لقيت نون قاعدة تحدر لي قوي طوالي قفلت التلفون .
نون: مها دي منو؟
انا : مها دي شغالة مراقبة في المصنع وسألتني وين مشيت ،
نون : وليه تسألك ، هي شغالة مراقبة للعمال ولا مراقباك انت ؟!!
انا: لا لا بس عشان كان جبت لي عمال شغالين يركبو كاميرات ومشيت خليتهم يمكن سالوها مني ، وبعدين تعالي هنا انتي بتحققي معاي كدا مالك دي غيرة منك ولا بتشكي فيني.
نون : ولا واحد بس حبيت اعرف مها دي منو وبتسأل منك ليه ولو زعلان عشان انا سالتك معليش انا آسفة.
انا: لا لا ما زعلان لكن دايرك تتأكدي من حاجة واحدة لو بنات الدنيا ديل كلهن اترصن قدامي ما بعاين ليهن ولا عندي ليهن حاجة لاني عيني مليانة بيك يا عسلي ( دي قنبلة 💣 لكن صدقتها) .
ابتسمت بخجل لمن وجناتها ظهرو ، 😍 وجع ياخ دا الشي المكسرني فيها ،
اها الحمد لله اتخارجت من الموقف دا برااحة وما عارف زاتو مها دي جابت رقمي من وين وهي شكلها سابت عصام المحاسب و دايرة تتلحني .
المهم قلت لي نون ماشي اسلم علي ناس البيت بهناك وبرجع ليك قالت خلاص امشي وتعال لاني دايراك في موضوع كدا . قلت ليها تمام .
مشيت علي نبع الحنان بهناك سلمت عليها وقلت ليها.
انا : شنو يا حجة بت الناس دي دايرين تشغلوها معاكم ولا شنو هي ماااا بتقدر علي شغلكم دا ولا متربية عليهو.
نبع الحنان: هييي والله زول داير يشغلها مافي براها جاتني وجابت معاها دفتر وقالت دايرة تتعلم وبتسألني وانا برد ليها وبتكتب في دفترها.
انا: عليك الله براحة عليها يا حجة دي بت راحات وما بتقدر علي عيشتنا دي بس نحاول نعودها شوية شوية.
نبع الحنان: والله يا ولدي مرتك دي هنية ورضية كونها قبلت بيك انت يا اب زنقلة غايتو انت المفروض غنماية ما تقبل بيك راسك زي حجر المحراكة .
انا : خلاص يا امي عليك الله ما تجرحي احاسيسي انا بقيت راجل مرة .
نبع الحنان: هههه راجل مرة قال ، حقيقة نون دي مرة لكن انت اكرب بطنك وامسك بت الناس دي وانا ما عايشة ليكم العمر كلو كويس انها براها فكرت تتعلم .
انا: ربنا يطول لينا عمرك يمة ويديكي الصحة والعافية .
نبع الحنان: ااامين
انا: اها عاملين غداء شنو؟؟
نبع الحنان: عصيدة بي ملاح لوبة.
انا : عصيدة ولوبة يا حجة انتو دايرين تسممو بت الناس دي ولا شنو؟
نبع الحنان: والله قبيل قلت لي اختك تعمل ليها محشي وقيمة ، البت براها حلفت قالت الا نعمل ليها عصيدة .
انا: عصيدة بي لوبة غايتو الله يستر عليها بس ،
انا طالع ماشي الدكان دايرة حاجة .
نبع الحنان: لا سلامتك يا جناي.
انا : تسلمي .
طلعت مشيت الجنبة راسي ضارب داير اشرب لي حجر شيشة وكباية جبنة من حليمة ست الشاي .
*فلاش_باك*
نرجع ورا شوية نشوف قصة حليمة ست الشاي ( حليمة إمرأة في منتصف العشرينات عندها طفلين بت عمرها 4 سنة وولد عمره 2 سنة جاية من الولايات عشان تفتش راجلها بعد شرد وخلاها حامل بي طفلها التاني وجا الخرطوم وما قاعد يرسل ليها مصاريف وما بتصل عليهم بس هي عرفت انو قاعد في الخرطوم وقررت تجي تفتشو بعد ابوها اتوفى وما عندها زول تاني تقعد معاهو لانو اخوانها نساوينهم كعبات وطردوها من البيت ، باعت عدت البيت والعناقريب وباقي الهتش وشالت قروشها وركبت وصلت الخرطوم ، هي كانت مفتكرة انو الخرطوم دي صغيرة زي القرية بتاعتهم لو سالت من راجلها اي زول حيوريها مكانو ، لكن جات وعرفت انو الخرطوم دي كرش فيل ما عندها حد ، المهم لفت لف شديد مع عيالها لحدي ما جو تعبانين وحالتهم بالبلا قعدو تحت حيطة قصاد جنبة الشيشة حقتنا وكنا الوقت داك عاملين لينا فتة في الحوض البحممو فيهو الشفع داك وقاعدين ناكل ، يلا طفلها الصغير قاعد يعاين لينا ساي ، انا لاحظت ليهو عرفت انو جعان قمت قسمت شوية في صحن وشلت معاي جك موية ووديتو ليهم ، عيالها اكلو وكملو الفتة كلها لكن هي ما اكلت (حنان الام بتحب لي ابنائها اكتر من نفسها ) ، شكلهم كان يحنن شديد بعد اكلو قمت مشيت عليهم وسالتها انتي جاية من وين ؟؟ واهلك وين؟؟ وماشين وين؟؟، اصلو ما ردت لي بس حاضنة اطفالها عليها وبتعاين في الارض بانكسار ، "طبعا اصعب احساس لمن تكون مقطوع وما عندك البسندك في الدنيا الصعبة دي وخاصة لو كانت امرأة وعندها اطفال" انا حسيت بانو هي ما حتتكلم معاي قمت مشيت بيتنا ودخلت لقيت امي واختي سلمى قاعدين يشربو جبنة .
انا: سلمى عليك الله ارحكي معاي في مرة حالتها صعبة ومعاها اطفالها قاعدين في الشارع وما رضت تتكلم معاي تعالي دخليها البيت
نبع الحنان: هيي يمكن وراها مصيبة انت داير تجيب لينا المشاكل ولا شنو؟
(نبع الحنان كلامها منطقي من باب الحيطة والحذر والزمن بقى صعب ما بتقدر تعرف الصادق من الكاذب والمجرم من البريء)
انا: يمة دي شكلها ما شكل مصايب والله دي شكلها مسكينة ومقطوعة وجديدة في الخرطوم ما بتعرف حاجة بس خلي سلمى تمشي معاي تستفر منها لانها ابت ترد لي .
سلمى لبست توبها وقالت لي يلا ارح كدا نشوفها.
طلعت مع سلمى وقلت ليها هديك ليها امشي ليها وسوقيها معاكي البيت شكلهم جعانين ما اكلو ، وخليت سلمى تمشي ليها براها ، اها وقفت فترة اتكلمت معاها وبعديها ساقتها البيت ودخلتهم جوة الحجة رحبت بيها وعرفو قصتها ، الحجة حلفت علي حليمة وقالت ليها الا تقعدي معانا وما تطلعي من البيت لو ما لقيتي ليك زول قريبك وعوجة ما بتجيك يا بتي الخرطوم دي صعبة ما زي بلدكم ، المهم بعد تحنيس حليمة قعدت مع ناس امي في البيت واصلا انا عاطل ولافي من جنبة لي جنبة وبرجع البيت زول نوم بس وبعد حليمة سكنت معانا في البيت ، سلمى بقت تطلع لي سرير برا الشارع جنب الباب بنوم فيهو والصباح بفتح الباب بدخلو وبمشي بشوف العطالة وين . حليمة قعدت معانا فترة وكانت بتشتغل اسكريم وتبيعو برا في الشارع لحدي ما عملت ليها راس مال اشترت عدت شاي وقالت الا تشوف ليها بيت ترحل فيهو لكن امي رفضت ليها وقالت ليها انتي مرة ومعاكي اطفال كيف تقعدي في بيت براك . حليمة اصرت وقالت لي امي انو ربنا معاها وما خايفة من حاجة ،
المهم البيوت اجارها غالي لكن شباب النادي لقو ليها بيت مهجور سنين وحيطتو واقعة جنب النادي ف قمنا نضفناهو وبنينا الحيطة وركبنا باب وظبطناهو وحليمة اشترت ليها سرير وفرشة وسكنت فيهو .
حليمة بتطلع من الفجر بتخلي اطفالها نايمين وبتعمل زلابية وشاي قدام الباب وبعد العصر بتعمل شاي وجبنة جنب باب النادي لحدي بالليل وبترجع بيتها ( اكل العيش حار).
في يوم كنا قاعدين بعد المغرب نلعب كتشينة في النادي نسمع ليك صوت شكلة وحليمة قاعدة تكورك كلنا رمينا الكشتينة وجرينا برا لقيناها ماسكة الكفتيرة وفكتها في واحد شاب كدا ، قمنا مسكنا حليمة وسألناها مالك قالت الشاب دا حاول يعاكسها و يغريها بقروش واي حاجة عشان تمش معاهو وهي بتقوليهو يا شاب احترم نفسك انا ما بتاعت حاجات زي دي ، يلا لمن كتر معاها قامت شرطت ليهو هدومو وكشحت فيهو موية حارة ، ونحن كمان ما قصرنا دقيناهو ليك دق العيش وقلنا ليهو لو شفناك في الشارع دا تاني الا تسبقنا جري بس.... ، حليمة طول الفترة القعدتها معانا كانت محترمة ومؤدبة جدا وما في زول بقدر يقول فيها كلمة ).....
دي قصة حليمة المرأة القوية الصنديدة الاتعلمنا منها دروس عظيمة انو ما اي امرأة شغالة شاي او طالعة لي شغل معناها انها إمرأة ما كويسة او شغالة عشان عندها فهم تاني ، بل يمكن تكون هي ما عندها زول تتسند عليهو او هي محتاجة وطالعة عشان تفتش الرزق الحلال ، ف بالجد شباب النادي كلهم بعتبروها زي اختهم لانو مافي واحد فيهم قدر يلمسها او يشوف او يسمع منها او عنها حاجة سيئة .( يبقى اذا احترمت نفسك الناس غصبا عنها بتحترمك )....
.
.
يلا قبل ما نرجع لي قصتنا ، نقول التحية لي حليمة (حلوم ) و اي امرأة خرجت من بيتها من اجل الرزق الحلال…
.
.
#يتبــــــع
