اتحركنا ركبنا مواصلات المركزي سألتها يا بت مودياني وين .. قالت لي اصبر وحتعرف .. المهم قلت اصبر… الحافلة ماشة لحدي ما وصلنا شارع المطار نزلنا ودخلنا علي العمارات ..وهي ماشة وانا ماشي معاها زي الاطرش قلت نشوف البت دي اخرها شنو.… اها وقفنا جنب مبنى ومحل كدا ..
مها: تعال ادخل ..
انا: ادخل وين وبيت منو دا ؟؟…
مها : دا ما بيت ياخ ادخل وشوف بي عينك..
وجرتني من يدي . ولزت الباب ودخلنا جوة قابلتنا حبشية كدا قالت لينا اتفدلو…واتفدلنا… انا لمن دخلت جوة انبهرت طبعا المحل انوارو حمر وصفر اضاءة خافتة .. لقيت بنات واولاد قاعدين خالطين كيمان كيمان وبيشربو في الشيشة ويضحكو ويتونسو… .قلت لي مها دا شنو ؟؟… قالت لي دا مقهى مالك مستغرب كدا تعال نشوف لينا مكان نقعد فيهو…
المهم قعدنا في كراسي جلوس في ركن بعييد عشان اكشف كويس… طبعا الشغالات في المحل حبشيات اشكال واحجام وانواع… اللبس دا خلو ساكت .. شي بناطلين وبرمودات واسكيرتيات شطفني.. والجسم نصو بدون ملابس… وانا فاتح خشمي وقاعد اكشف بس مخلوع خلعة شديدة .... والشباب والشابات قاعدين ومبسوطين ..الناس ديل شكلهم ناس الطبقة الراقية ديلك لانو مافيهم زول من ناس قريعتي راحت .... بنات واولاد كلهم شبه بعض .. ما بتفرزهم... ناس مملسين ..
انا شفت الوضع كدا مااا ياهو ولو قعدت فاتح خشمي و اعاين ليهم كدا بعرفو اني فارة ساي وجديد في المحل وممكن يضحكو فيني ، قلت احسن اثبت واعيش الوضع طالما الواحد جا هنارمع اني ما شبهم لكن اكرب قاشي بس …
مها بتتكلم بي تلفون قالت لي دقيقة بس في واحدة صحبتي جاية برا ماشة اجيبها واجي… . قلت ليها تمام جيبيها وتعالي ..
وانا قاعد اتلفت اشوف ليك من الشغالات في المحل في واحدة صغيرة حلوة كدا شكلها سودانية… بقيت اعاين ليها مسافة لمن شافتني انا بعاين ليها قامت دنقرت واتكسفت .... قلت غريبة دي البتتكسف ولا دي طريقة عشان يغشو بيها الزباين ....
المهم في حبشية لابسه قصير وضيق لاحظت لي اني بعاين للسودانية جات تتجدع وقعدت في كراع الكرسي جنبي وقالت لي تشرب شنوو؟؟… اول انا اتخلعت تاني ثبت..قلت ليها جيبي جبنة وحجر جراك … قالت كويس ومشت وقفت مع البت السودانية وسوست ليها في اضانها…
بعد شوية جات السودانية شايلة الشيشة وختتها قدامي ورفعت النار وشالت اللي وبقت تجر في الشيشة عشان تولعها وتديني ليها… والبت تجر وتكح كح كحك كح... عاينت ليها كدا.... قلت ليها يا اخت انتي بتشربي شيشة؟…
_ لا لا… .
_ طيب ليه عايزة تضري نفسك؟؟…..
_ اعمل شنو لازم اسوي كدا عشان آكل عيش واكل العيش حااار…..
_ والجابرك شنو علي الشغل دا ما تشوفي ليك شغل تاني اذا انتي ما عايزاهو….
_ ما لاقية والله وكل ما القى شغل صاحب الشغل بتحرش بي ويطلب مني طلبات وسخة….
انا ضحكت وقلت ليها _ لا هنا طبعا الناس شريفين ومافي زول بيسألك يعني ؟؟؟...
_ ما عارفة لكن انا جيت لي يومين بس وما شفت حاجة من زول ..
_ الجابك منو هنا؟؟
_ صحبتي معانا في الداخلية…
المهم الونسة جرت وعرفت انو البت دي بريئة ساي وماخدة الشغلة بي بساطة وصحبتها فهمتها انو الشغل هنا بس تقعدي من الزبون تتونسي معاهو وتجيبي ليهو الشيشة وتولعيها وتجيبي ليهو المشروبات وتقعدي معاهو لحدي ما يمشي ولمن يمشي بدفع ليكي قروش الطلبات وبديك بكشيش… تدي المحل قروش الطلبات كلها .. بس قروش البكشيش المحل بشيل نصها وتشيلي النص التاني وما عندك اي مرتب من المحل .... يعني هي مفتكرة الشغلة ونسة و مراسيل يعني امشي جيبي وامشي ودي .. ما كانت عارفة انو الشغل دا وراهو تبعات تانية يعني الزبون لو ارتاح ليها ممكن يسوقها معاهو…
قمت سالتها _وينا صحبتك الجابتك هنا ..
_طلعت مشوار وجاية ..
_ طلعت براها يعني ..
_ لا لا كانت قاعدة مع زبون وبعديها الزبون مرق وهي مرقت وراهو…
_ ايواااااا…يعني ما قالت ليك ماشة وين؟؟
_لا بس قالت ماشة قريب وجاية..
_ والله انتي شكلك بت ناس و زولة علي نياتك ساي .. هسي داير اسألك في اليومين ديل مافي زول قاليكي حاجة .؟
_لا والله ومفلسة كمان كل ما اجيب طلبات لي زبون بكون منتظر ليهو واحدة وتاني ما بشتغل بي بس بدفع قروش الطلبات و ما بديني بكشيش…
_كويس انك ما وقعتي في زول كعب كان وراكي كتاب ...
المهم اتونست معاها واتعرفت عليها وقالت اهلها برا الخرطوم و هي كبيرة البيت وابوها قال بتو لازم تكمل دراستها ودخلها الجامعة… ابوها برسل ليها مصاريف بسيطة وهو مفتكر انو المصاريف دي بتكفيها لكن مع الغلا دا القروش البرسلها ابوها بتكمل في اسبوع وبعداك ما بتقدر تقول ليهو القروش كملت رسل لي تاني ..يلا بتتدين من صحباتها .. بس لمن الدين كتر عليها قالت تشتغل اي حاجة بي تقدر تمسك نفسها ..
يلا وريتها وجهة نظري عن المحل وعن البنات الشغالات فيهو وانتي شايفة الاشكال دي كيف ولابسين كيف وشايفاهم بعملو في شنو وانتي بت حلال امك داعية ليك ومحل زي دا المفروض ما تقعدي فيهو…
اها اخدت رقمها وقلت ليها لو لقيت ليك شغل بتصل عليك بس خلي بالك من نفسك وصحبتك دي حقو تبعدي منها ....
مها جات داخله ومعاها واحدة كدا قالت صحبتها وعرفتنا علي بعض… .. جو قعدو جنبي والبت الشغالة مشت و مها شالت مني الشيشة وبقت تجر في الحجر… خوفتني عدييل… بتطلع دخان قطر بس…بقيت اعاين ليها هي وصحبتها بيجرو غايتو شكلهن قديمات في الشيشة ..
مها: مالك بتعاين لينا كدا ..اول مرة تشوف ليك بنات بشربن شيشة ولا شنو؟؟
انا: ااي والله . صاح كنت بسمع انو في بنات بشربو شيشة بس ما شفتبي عيني…
مها: انت عشان بتمشي محلات الشيشة ال كلها اولاد لكن لو مشيت علي الجنبات والمقاهي تلقاها مليانه بنات ..
انا : عشنا ويا ما ح نشوف ..
تلفوني ضرب طلعتو لقيتها دي نون متصلة علي .. عملتو صامت.. قلت لي مها دقيقة بس جاييكم هسي ..وقمت مشيت عشان ارد علي نون لمحت لي شاب واقف مع الحبشية ..شبهتو بي واحد كان صاحبي شديد ايام الثانوي .. مشيت عليهو ولمن قربت منو عرفتو طبعا هو اسمو حسن..قلت ليهو : حسووووون..
هو شكلو اتخلع لمن شافني و قلت ليهو حسون ... وجيت عليهو سلمت عليهو بالاحضان…
حسن عضه سنونو وبراحة قال لي في اضاني : اسمي معتزززز يا بشر ما تفضحنا..
قلت في سري (حسن ال ما بغباني ال قاعدين نقوليهو حسن والطير غير اسمو لي معتز ولا شنوو؟؟ ولا يمكن في حاجة )طوالي انا اتداركت الموقف: ابو العز كيف حالك ياخ والله ليك وحشة يا مان..
حسن : تمام الحمد لله يا عدوول كيف امورك انت وكيف صحتك…
الحبشية لما شافتنا مندمجين مع بعض قامت مشت .. طوالي حسن قالي : ما تقولي حسن انا هنا اسمي معتز ..
انا : كدا شنو قصة معتز دي ومالك متخفي من الناس كدا احكي لي قصتك شنو يا مان ..
حسن: اول حاجة انا ملازم اول تابع للمكافحة وعندي مهمة في المقهي دا عشان ما تفشلني…
انا : يا زول من متين خشيت الحكومة؟؟
حسن : من امتحنت الشهادة الثانوية قدمت كلية الشرطة وعندي خالي لواء بقى لي واسطة وشالوني..
انا : ااي انتو ناس الواسطات ونحن ما بناكل معاكم عيش بس لينا الله ..
المهم اتكلمنا شوية وعرفنا اخبار بعض…
حسن : صحي انت الجابك هنا شنو اول مرة اشوفك في الكافيه دا ؟؟
انا : اااي والله اول مرة اجي الكافيه دا اصلو نحن ما شبه الحتات دي يا فردة بس جيت مع واحدة زميلتي في الشغل ..
حسن : يا زول دي منو زميلتك في الشغل ال قاعدة تجي الكافيه دا؟؟
انا: تعال طيب اعرفك بيها هي وصحبتها...
المهم سقتو وماشين علي الركن القاعدين فيهو مها وصحبتها ولمن قربنا عليهم ، حسن مسكني من يدي ..
حسن : ماشي وين انت؟؟
انا : هنا للبتين ال في الركن ديل ..
ووصفت ليهو علي مها وصحبتها ..
حسن بذهول : ديل ال انت جاي معاهن؟؟
انا : اااي مالك انت مخلوع كدا ؟؟
حسن : انت جيت مع مها وشيري ؟؟
انا : ااي في شنو انت بتتخلع فيني كدا مالك؟؟.
حسن خته يدينو في راسو وقال لي : ياخ البتين ديل… ..
.
.
.
#يتبــــــــع
