قامت ملصت التوب .. ولابسه روب نوم ..وظهر اللي كان مستخبي…وجات مسكت يدي .. وقالت لي : انا عارفة انك من زمان نفسك فيني وهسي انا بقوليك شيل الانت دايرو و دي الحاجة الوحيدة ال بقدر اقدمها ليك عشان اشكرك بيها…
طبعا هي بتتكلم ومدنقرة مكسوفة… رغم انو الشيطان شاطر وفرصة زي دي كنت زمان متمنيها… لكن حسيت بانها بس عايزة ترضيني عشان ال عملتو لي زوجها والحاجات ال جبتها ليهم...وانا ما من النوع البستغل ضعف الناس وبحاول يحقق رغباتو او يفرغ شهوتو.... ف شنو ..قمت شلت توبها وغتيت بيهو جسمها….وختيت يدي في حنكها رفعت راسها وقلت ليها...ما انا البستغل ضعف الناس يا سعاد واصلا ما كنت منتظر مقابل منك او من عثمان راجلك رغم انو ما بيدخل علي الناس ولا بخلي الناس يدخلو بيتو لكن نحن جيران والرسول وصانا علي الجار… و لو انا ما وقفت معاك منو ال حيقيف معاك؟؟ وانتي ما عندك اهل هنا…
سعاد بقت تبكي… قلت ليها امسحي دموعك وما تبكي .. واعتبريني اخوكي ولو دايرة اي حاجة ممكن تتصلي في اي وكت ورقمي عندك وخلي بالك من نفسك وراجلك وبناتك ... وطلعت مشيت...
دخلت بيتنا وانا مهموم وبفكر في الدنيا والظروف ال خلت سعاد تفكر تديني اغلى ما عندها عشان جميل عملتو ليهم رغم انو دي حاجات عادية واي زول في مكاني كان قام بالواجب…
في عز سرحتي جات نون ضربتني بالمفراكة وقالت لي : هيي بتفكر في منو ؟
انا : انا عندي منو غيرك عشان افكر فيهو ؟؟؟
نون : لا لا شكلك في حاجة في بالك خلتك سرحان وراقد فوق السرير بي جزمتك…
عاينت لي نفسي لقيت فعلا راقد فوق السرير بي جزمتي .. قمت حكيت راسي وقلت ليها : بفكر في الشغل بس يا ستي… وعشان اتخارج من الاسئلة الكتيرة قلت ليها : صحي مالك شايلة المفراكة ..
نون : كنت بسوط ليك في العصيدة والليلة عاملة ليك عصيدة بي ملاح روب كااااااارب تاكل صوابعك وراهو ..
انا : يا سلااااام يا نونتي ربنا يحفظك لي يا ست البنات ..
نون : يلا قوم استحم وانا بجهز ليك الغداء ..
انا : حااااضر يا عسل بستحم سريع وبجيك لاني مشتاق ليك ..
قمت استحميت ونون جابت الغداء .. وفعلا طلع ملاح روب كاارب غايتو شكلها تعبت فيهو اتغدينا ودلعتها شوية واليوم كان يوم الاتنين و عدا....
الثلاثاء فو .. الاربعاء فو فو .. الخميس طلعت الصباح مشيت بالشارع التاني داير امر علي بتاع الدكان اوصيهو علي سعاد مرت عثمان وبتها ناهد… لقيت حليمة كالعادة قاعدة جنب بابها وصاج اللقيمات قدامها بس شايفها خاتة يدها في خدها وسرحااانة لانو الزيت حرق وهي ما جايبة خبر… . جيت ضربتها في راسها وقلت ليها بي نهرة : حلوم راسك الكبير دا سرحانة وين لحدي ما الزيت حرق؟؟…
اتخلعت وعاينت للزيت لقتو قرب يولع نار شالت الصاج سريع ونزلتو من الكانون… جرت نفس طويييل وقالت : احيييييي يا ود امي خليني ساي بس..
انا : مالك يا حلوم خير يا ست الناس مالك مهمومة؟؟
حليمة : والله من الدنيا بس ومشاغلها…
انا : ومن متين انتي كمان بتهمي للدنيا ؟؟
حليمة : والله ناس المحلية كرهوني زاتو كل يوم دفار الكشة جايني واقوم الملم حاجاتي بسرعة ويوم الزيت ينكشح فيني ويوم النار تحرقني غايتو تعبت معاهم ...
انا : الكلام دا من زمان يعني الجديد شنو هسي ؟؟
حليمة : في عسكري كدا متلحني ويومي بقول داير يكشني ويشيل عدتي…
انا : حلوووووم كدا عينك في عيني… من متين بقيتي تخافي من العساكر ما كنتي بتسمعيهم كلام زي السم ؟؟
حليمة : كدا جر ليك بنبر وتعال اقعد جنبي…
جريت لي بنبر وجيت قعدت جنبها وقلت ليها : اها يا ستي يلا طلعي ال في جواكي ..
حليمة عاينت لي كدا وقالت : انا دايرة اتطلق ..
انا : طيب زماااان قلت ليكي الكلام دا طالما راجلك ليهو سنين ما ظهر ولا اتصل عليك ولا معروف حي ولا ميت وانتي لسه في عز شبابك و اب جيقة بتاع الخضار كان دايرك بالحلال وهو زول سترة وقاليك بشيل عيالك في عيونو بس انتي رفضتي وقعدتي تتدلعي…
حليمة : والله ما كنت بفكر في العرس نهائي عشان خاطر اولادي ..
انا : اها وهسي الجديد شنو ؟؟
حليمة : في عسكري كدا كان متلحني وبغازلني طواالي وهسي قال داير يعرسني…
انا : ايواااا قولي كدا طيب من البداية ..
حليمة : انت يا عادل ايام كنت عاطل كنت دايما بتقيف معاي وما بتقصر مني لكن بعد عرست بقيت ما بتجيني ولو جيت ما بتقعد زاتو .انا بقيت وحيدة ومافي زول اشكي ليهو…
انا : طيب هنداك ليهو البيت مالك تعالي بتلقيني قاعد وانتي كنتي عايشة معانا يعني ما غريبة…
حليمة : والله بعمل حساب لي مرتك بخاف تزعل وتعمل ليك مشكلة ..
انا : لا لا عادي يا ستي تعالي ساي ولا اضربي لي تلفون انا بجيك..
حليمة : اها رايك شنو اتطلق واتزوج العسكري دا ؟؟
انا : والله يا حلوم لو دايرة راي انا ما بأيد فكرة انو تتزوجي العسكري دا لانو اغلبيتهم بقولو ستات الشاي ديل ساهلات وبتاعين فارغة ولو حاولو معاك ما قدرو ليك بفكرو بي طريقة تانية كيف يصلو ليك حتى ولو يتزوجك ويقعد معاكي فترة ويمشي يخليك…
حليمة : انا زاني فكرت كدا لكن ما عارفة اعمل شنو ..
انا : والله يا شيخة انتي عقلك في راسك وما معروف ممكن يكون زول كويس لكن انتي اصبري شوية وما تستعجلي والفيهو الخير يقدمو ربنا…
حليمة : خلاص خير ..
انا : يلا انا بمشي عشان اتأخرت علي الشغل ..
حليمة : اقعد اشرب ليك شاي ..
انا : شربت في البيت والله لكن مرة تانية يلا مع السلامة…
المهم مشيت الشغل طوالي ونسيت ما كلمت بتاع الدكان .. وصلت الشغل قعدت في مكتبي.. بعد شوية جات مها ..
مها : ثباحو..
انا : صباح النور..
مها : مالك اليومين ديل رافع القزاز ؟؟..
انا : الغبار كتير وانا عندي حساسية وجيوب انفية…
مها : سلااامتك ان شاا الله ..
انا : الله يسلمك..
مها : بالمناسبة شيري اتصلت علي وقالت لي اذكرك انو الليلة عيد ميلادها…
حاولت اختصرها اصلا انا ما حأمشي ف قلت ليها : خلاص تمام لي بعدين كدا ....
مها : ماتنسو تجيبو ليها معاكم هدايا..
انا : حاضر..
مها لمن شافتني عامل مشغول بي ورق قدام المكتب قامت طلعت ومشت.. انا قلت الحمد لله اصلا ما داير اقابلها…
اليوم انتهى وانا اصلو ما طلعت من مكتبي لحدي ما العمال كلهم طلعو بعدين طلعت…
مشيت علي البيت وقبل ما اوصل مريت علي سوق الرواكيب قلت اشيل لي فواكه للبيت واتذكرت اني نسيت ما وصيت بتاع الدكان لي ناس سعاد لكن هسي هو قافل…يلا شلت ليهم كيس فواكه وخضار ومشيت دقيت الباب جاتني ناهد فتحت الباب…قلت ليها ابوكي كيف ..قالت كويس الحمد لله بس نايم… قلت ليها خلاص شيلي الاكياس دي واديها لي امك.. ومشيت طواالي..
وصلت البيت واتغديت وشربت الشاي والجبنة ..بعد شوية حسن ضرب لي تلفون…
انا : الوو حسون كيف حالك..
حسن : تمام الحمد لله اها جاهز لعيد الميلاد؟؟..
انا : ياخ والله ما داير امشي .. المهم لو مشيت وصل ليهم اعتذاري بالله ..
حسن : لا لا يا مان لازم نمشي وانا خلاص ربطت مع شيري وامورنا بقت ظااابطة يا عمك وهسي بقت تحبني عديل ..
انا : خلاص انت امشي وانا ما عندي دخل بيك..
حسن : بالعكس كمان لازم تمشي وخلاص قربت اتم الشغل بس عليك الله ارح معاي يا فردة..
المهم حسن بقى لي في رقبتي واصر اني امشي معاهو قلت خلاص بعد العشاء نتقابل…
بعد المغرب قلت لي نون : صحبي ال كلمتك عنو داك الليلة عازمني عشاء ..بمشي بتعشى معاهو وبرجع سريع… قالت لي تمام بس ما تتأخر….
طلعت واتقابلنا مع حسن وكويس لقيتو شايل هدية… قال لي اسمع يا مان ما تعمل فيها الشريف الرضي وتعمل نفسك شيخ ... ما تنسى الليلة ح يكون مولد واللحم النضيف والراحات كلها... وعشان الشغل يتم لازم تنداح وتخش معانا لانو الليلة ح يجيبو الخام وممكن المعلم يكون معزوم في الحفلة دي و اي حاجة كعبة تخطر في بالك حتلقاها جوة الحفلة ..عشان كدا اي حاجة جابوها ليك...ما ترفض خش طوالي واعمل نفسك خبير لانو نحن جديدين في الشلة لذلك ح نكون مراقبين…
انا : يا زول انت مجنون دايرني اسكر وابلع حبوب؟؟...
حسن : يا مان .. تعمل اكتر من كدا وتقابض عديل لانو الناس كلهم ح يكونو خارج التغطية ( سكرانين لط ومخدرين)وعشان يثقو فينا لااازم نخش في النضيف….
انا : عليك الله يا حسن اعفيني عشان انا راسي خفيف وممكن اعمل اي حاجة وانا زول متزوج ياخ ..
حسن : ما تبقى زول جبان .. ياخ عادي مرتك حتعرف من وين ؟؟ .. نحن نعيش دنيتنا ولو خايف ترجع البيت.. الليلة زاتو تبيت معاي يا خوة..
المهم حسن غشاني و اقنعني وشيطاني ما قصر كمان ظبط لي الفهم…
قلت ليهو : ارح يا زول خلينا نعز نفسنا ونعيش دنيتنا ونفرفش شوية ..
واتجهنا الى الحفل …
.
.
والحفلة بالجد كانت غير…
.
.
#يتبــــع
