اتحركنا واتجهنا الى الحفل..
الحفلة كانت نظام دي جيه (D J) وعاملنو في صاله مغلقة لمن فيها حرس في الباب.....
المهم وصلنا وحسن اتصل علي شيري جات دخلتنا وقالت لينا شوفو ليكم محل اقعدو وانا شوية و بجيكم ..
دخلنا طبعا الاضاءة انوار بترقش لمن عيوني زغللت والبنات لابسات وما لابسات .. ملابس بدون كم وفوق للركبة و و و… اسكتو ساي بس.... انا قعدت اعاين قلت املى بطاطيري من المناظر الجميلة واللحمة البزار دي … حسن طبعا جاي عشان شغل وقاعد يتلفت يمين وشمال… بعد شوية لكزني ليك..
حسن : عدول ..عدول..
انا : مالك يا بني ادم خليني امتع نظري ياخ…
حسن : عاين للسان دا (الزول دا)…
انا : سان شنو واللحمة دي قدامي ...
حسن : كشف يا بشر دا شكلو الكنج المعلم الكبير…
اها قلت اشوف وينو المعلم دا… وفعلا عاينت شفت ليك زول جاي داخل من الباب ولابس طقم ابيض في ابيض ( قميص شفاف وبنطلون وجزمة ) ... ولابس 3 خواتم كعكول وسلاسل في رقبتو زي كلب البوليس… ومعاهو اتنين حرس لابسين اسود في اسود ...والزول من دخل طوااالي اي زول في الحفلة مشى عليهو...الا انا وحسن وبتين قاعدات بعيد كدا شكلهم ضهب زينا كدا… يلا الجماعة مشو سلمو عليهو وهو بسلم عليهم بتعالي كدا….
حسن : قوم يا مان ارح نسلم للمعلم ..
انا : وانا دخلي بيهو شنو ولا بعرفو من وين عشان اسلم عليهو؟؟..
حسن : عشان مافي زول يشك فينا ياخ قوم لانو الناس كلها بتسلم عليهو..
انا : يا زول اقوليك شي اصلو ما قايم كمان انا مالي ومالو ..امشي انت سلم عليهو…
المهم حسن اتضايق مني وانا ولا شغلتي بيهو بس قاعد اتفرج في المناظر الجميلة ..
بعد شوية قفلو الصالة قالو الجوة جوة والبرة برة .. يلا نبدأ الحفل…
جابو تورته كبيرة وفيها شموع وخاتنها في طربيزة متحركة وجابوها في نص الصالة…يلا جات شيري في ابهى حلتها ..لابسة فستان سهرة قصييير فوق الركبة زي لبس الممثلين ال بكونو في جوائز الاوسكار وفاكة شكرها... وماشة جنبها مها ولابسة فستان شفاف ....
شيري طفت الشموع والشباب قدمو ليها الهدايا…
حسن : قوم ارح علي شيري..نسلم عليها .
انا : امشي سلم عليها براك انت شايل هدية لكن انا ما شايل ..
حسن : يا زول ارح مع الجوطة دي هي ما بتعرف منو الجاب ليها هدية ومنو ال ما جاب..
المهم قمنا مشينا عليها ... حسن طوااالي اداها الهدية ..شالتها ختتها في الطربيزة وحسن مسك يدينها وقاليها : كل سنة وانتي طيبة وعيد ميلاد سعيد وعقبال مليون شمعة… وكل سنة وانتي حبي… وكل سنة وانتي معاي.. وربنا ما يفرقنا من بعض…
شيري : ياااااه يا معتز اول مرة القي زول يحبني بصدق بدون ما يكون عندو معاي مصلحة .. وانا كمان حبيتك يا معتز وبتمني اكمل حياتي معاك..
حسن : انتي معاي في كل لحظة… في كل خاطرة… وما ح اسيبك في يوم من يا روح الروح….
غايتو انا قاعد اتجسس عليهم ..رقدت دكوة وجسمي برد تقول الكلام دا لي انا ...
في عز الرقاد دا (كلام الحب) .. ال دي جيه اشتغل ..بدأ بالاغاني الاجنبية ( اغاني الشواطين زي ما بقول جدي )...وانا اندمجت معاها واتذكرت ايام العطالة زمان كان جني حفلات بهاجر ليها عدييل….يلا بقيت اتهوزز ساي ولمن شفت الناس برقصو انا كمان بقيت ارقص معاهم...شوية كدا وشغلو اغنية بتاعت راب...انا بقيت اتسحب واتلولو زي الدبيب ..الجماعه اتلفو حوالي وبقو يصفقو ويصفرو ...وانا اتشجعت رقصت رقيص ..ما خليك حركة الا وعملتها…
وقفنا فاصل قصير ..مها جاتني وقالت لي : اللية عاد وريتنا الراب والحركات.. لكن يا عادل لقيتك بتاع حفلات ..
انا : اسكتي ساي انتي لسه ما شفتي حاجة ..التقيل ورا..
قاعد اتونس مع مها كدا ..جات واحدة شغالة في السيرفس ( الخدمة) ..شايلة صينية مليانة كاسات وفيها جميع انواع الشراب...مدت لي انا ابيت اشيل ..حسن جا بي وراي قال لي براحة : شيل يا مان الجماعة مراقبنك..ومتكيفين منك وقالو الزول دا شكلو بخش في التقيل..
المهم شلت لي كباية.. و مها ابت تشيل ...بس انا ما شربتها واقف ماسكها في يدي وبتونس مع مها ..
شوية كدا الفاصل التاني بدأ ..أغاني طرب وزنق ...عملت نفسي داير اشرب الكباية وبحركة ظريفة كدا كشحتها ومديتها للسيرفس ..وبقيت ارقص غايتو حتيتو حت ما عادي ..انا من يوم الحنة بتاعتي ما رقصت تاني ..ال بشوفني بقول الزول دا سكران جد جد ...
غايتو رقصت ليهم رقيص جد لمن اتدردقت في البلاط..عشان كنت شماسي بتاع حفلات والرقيص كلو بعرفو…..
اها تاني فاصل.. .
في الفاصل ..جات الحبشية بتاعت المقهي لو متذكرنها..وبقت لافة في الصالة وجات بي جنبي عصرت لي حاجة في يدي ..عاينت في يدي لقيت فيها حبة لونها احمر… داير ارميها حسن غمز لي ... انا حمرت ليهو شديد ..جا جنبي وهمس لي : اوع ترميها دي تراما…
انا: تراما دي شنو يا خوة..
حسن : ترامادول دي حبوب مخدرة ..والناس ديل بمتحنونا ..حاول ابلعها يا مان…
انا : حسون انا ما قاعد ابلع مخدرات ولحدي هنا وكفاية يا صاحبي…
حسن : خلاص اعمل نفسك بلعتها وختها تحت لسانك..
انا : انت ادوك واحدة ؟؟
حسن : ااي وبلعتها كمان…
انا : يعني عادي كدا مافيها حاجة ؟؟
حسن : يا مان نحن شغلنا دا اتعلمنا فيهو اي حاجة وبقينا نعمل اي شي…
انا : دا شغلك انت وانا ما لي دخل بيهو ..امسك حبتك دي ابلعها انت..
حسن : لا لا ختها تحت لسانك شوية وطلعها .. بس هم لازم يشوفوك بلعتها...ياخ عادي ما تخاف ما بتعمل ليك حاجة…
المهم سمعت كلام حسن وختيتها تحت لساني كدا الفاصل بدأ وشغلو اغاني اسلو (slow)...
مها جات مسكتني من يدي وجرتني عليها ..انا في الحظة دي رميت الحبة ..لكن حقيقة كان في باقي روايش لانو عيوني بقت تزغلل وبقيت اشوف طشاش طشاش..
مها شالت يديني ختتها في خصرها وختت يدينها في كتفي.. والمشكلة بتاع الدي جيه شغل اغنية لي سيلين ديون good bye وانا الغنية دي بتاكل معاي جنبه .. ورقصنا اسلو ومها تشيل وتقرب مني لحدي ما بقيت اشم انفاسها .. قالت لي بصوت هاااامس : تعرف يا عادل انا…
جات شيري وقاطعتها وزحتها مني وقالت ليها :ادينا فرقة معاك يا بت ماسكة عدولي دا من قبيل.. ومسكتني وبقت ترقص معاي اسلو.. قالت لي : الليلة لكن ابدعت يا دوله ..
انا : دا كلو عشانك يا شيري انتي تستاهلي كل خير .بس معليش ما جبت ليكي هدية…
شيري : جيتك دي براها هدية يا دوله ....
المهم الاغنية انتهت والحفل انتهى.. شيري قامت غمزت لي و قرصتني وقالت : بالمناسبة معتز حيوريك ...
مسكت حسن وجريتو بعيد قلت ليهو : اها حتوريني شنو يا عمك.. يلا وريني عشان انا بعد دا بمشي ..
حسن ابتسم ابتسامة خبيثة وقال لي : تمشي وييين يا مان حنمشي نبيت في شقة ..
انا : وين يا فردة انا بمشي عشان المرة بتكون منتظراني ..
حسن : مرتك اتصل عليها وقوليها صاحبي عيان .. مات ..ولا اي حاجة.. عشان الليلة اتفقت مع شيري وحنمشي نبيت في شقة وانت ومها معانا…
انا : حسون عليك الله ما تجيب لي المشاكل وانا عيوني قاعدة تزغلل داير امشي البيت ياخ…
حسن : يعني ح تبخل علي صديق عمرك بي ليلة واحدة بس ..ما تبقى زول اناني انا خلاص ربطت مع شيري وكانت دايرة تتكلم وتوريني قاعدة تجيب المخدرات ( الحبوب والبدرة ) من وين لكن مع الجوطة ما عرفت تتكلم واتفقنا نمشي الشقة وهناك حتحكي لي كل شي لانو حنكون شايلين معانا راحات..بس عليك الله الليلة دي بس وتاني والله ما داير منك اي شي…
المهم حسن غشاني ومع الروايش القبيل بتاعت الحبة ديك قلت ليهو يا زول ارح اصلا ليلة واحدة ما بتفرق يا مان ...
يلا نعيش البهجة….
حسن قال لي مها وشيري : خلاص حيمشي معانا ..
مها ابتسمت وغمزت لي وقالت : يس (yes 👍)… ..
.
.
.
والليلة والليلة 🙊..
.
.
#يتبـــــــع
