حسن قال لي مها وشيري : خلاص ح يمشي معانا ..
مها : ابتسمت وغمزت لي وقالت : يس (yes 👍 )…
مها جات مسكتني من يدي وقالت لي اقعد شوية انت الليلة حتيتو حت شديد وشكلك تعبان من الرقيص الكتير… اها قعدتني ومشت جابت لي موية شربتها…
مها : تعرف يا عادل عندي كلام كتييير دايره اقولو ليك بس دايراك تسمعني كويس…
انا : والله انا هسي راسي تقيل وما ح افهم منك شي…
مها : خلاص لازم نقعد مع بض ونتكلم ..واحسن مكان في الشقة ..
انا : تمام يا ستي… .
حسن كان واقف بتكلم مع شيري مسااافة .وبعد شوية جاني وقال لي : ارح اوصلك البيت والبرنامج بكرة… يعني بيبيتو عديييل خليك عارف الكلام دا وجهز نفسك…
طلعت مع حسن ووصلت البيت بالليل ..لكن المرة دي عادي ما خايف من نون لاني كلمتها .. يعني داخل البيت بي ثقة....وعشان ما اصحيها قمت شلت الفرشة وفرشتها جنب سريرها ورقدت نمت بي هدومي…
طبعا من زمااان انا لمن اكون نايم مافي زول من ناس البيت بصحيني الا ايام الشغل بس ..لكن لو غير ايام الشغل مافي زول بقرب مني لاني بكون تعبان وما بنوم بالساهل وكان نمت الا اصحى براي… يلا نون عارفة اليوم جمعة ما صحتني من النوم وخلتني راقد في الحوش ..
اها الشمس ضربت فيني قمت صحيت….لميت الفرشة وماشي علي الغرفة… سامع ليك نون قاعدة تتكلم في التلفون وبتضحك…يلا داير افتح الباب سمعتها ليك بتقول..والله مشتاقين يا سامي اخص عليك مالك ما بتتصل علي..… قمت وقفت اتصنت عليها.... وسامعها ليك بتقول...عليك الله متين جيت… لازم تجيني والله مشتاقه ليك يا سمسم... في الحظة دي انا خلاص اعصابي باظت ولزيت الباب ودخلت والشرر يتطاير من عيوني ..
طبعا ( اذا ساء فعل المرء ساءت ظنونه ) ..يعني الزول لمن يكون بعمل حاجة غلط بفتكر انو كل الناس بيغلطو زيو ...
اها دخلت عليها الغرفة وانا زول مشاكل بس….قمت بعصبية مسكت التلفون شلتو منها ..وقلت ليها..
انا : بتتكلمي وتتضاحكي مع الرجال كمان اااااء ؟؟؟
نون باستغراب : في شنو يا عادل ؟؟
انا : في شنو كيف وانا سامعك بتتكلمي مع سامي ولا عفن دا ..
نون : طيب اهدأ عشان اوريك ..
انا : كمان دايراني اهدأ وانا سامعك بتتكلمي مع راجل وتقولي ليهو مشتاقين ودايرة اقابلك وتتدلعيهو كمان يا سمسم ..السم اليكتلك..
نون : سامي دا ود عمي واتربينا سوا لانو لمن كنا برا السودان ..ابوي وعمي كانو مؤجرين فيلا واحدة ونحن عايشين في جزء وعمي عايش في جزء..بس بناكل ونشرب مع بعض وعايشين مع بعض يعني هو زي اخوي ..
انا : دا ما بديكي الحق انك تتكلمي وتتضاحكي معاهو بالطريقة دي وتقولي ليهو مشتاقين وبتاع..
نون : لكن دا ود عمي و زي اخوي وانا ما عندي ليهو حاجة ..ولو كان عندي ليهو حاجة ما كان قبلت بيك يا عادل ..
انا : يا استاذة انا ما بعرف ود عمك ولا ود خالك ولا ود حبوبتك ..انا بعرف محارمك بس يعني اخوك و ابوك وعمك وخالك وجدك ديل تتكلمي معاهم عادي لكن اي زول غيرهم تتعاملي معاهم في حدود وراعي لي انا كمان..
نون : انا مراعية ليك وما غلطت في حقك وهو جا من السفر امبارح وكنت اصلا ح أكلمك ...
انا : تكلميني متين ؟؟ بعد ما الطير اكل العيش ..المهم لازم تتعاملي معاهو في حدود ..وما تقولي لي سامي ولا جن احمر ..
نون : طيب انت ليه بتكورك فيني كدا... يعني ما واثق فيني ؟؟
انا : انا ما قلت ليكي ما واثق فيك ولا قلت ليكي انا بشك فيك ..يعني انتي عايزاني اشوفك بتتكلمي مع سامي ولا فرعون دا واقعد اطبطب عليك ؟؟
نون بقت تبكي وقالت : انا ما كنت قايلاك بتعاملني بالطريقة دي .. ارح وديني بيت ابوي ..
انا : ها ها وكمان بتهدديني ..يلا ارح اوديك بيت ابوكي ....
اها هي لبست توبها وانا اتشطفت ولبست وطلعنا ركبنا امجاد فوووووووو مشينا بيتهم...
في الطريق مافي زول اتكلم مع التاني ..وصلنا بيتهم دقينا الجرس جات الشغالة فتحت الباب دخلنا ..لقيت امها في الصالة سلمت عليها .. وابوها كان نايم .. امها قالت لي اقعد شوية… قلت ليها لا طالع عندي مشوار مهم… واتخارجت…
طلعت من بيتهم ركبت مواصلات راجع علي البيت… جاتني رساله في التلفون .. طلعت التلفون لقيت الرسالة من عثمان ..مكتوب فيها ..(سلام ..ليه ما بتجينا ..دي الجيرة القلت عليها ..تعال سلم علينا بس وامشي ) .. طبعا استغربت عثمان من متين بسأل من الجار كمان .. لكن شنو قلت امر عليه في البيت… وصلت دقيت الباب .. جات ناهد فتحت لي الباب .. قلت ليها ابوكي موجود… قالت ااي اتفضل .. قمت دخلت ماشي معاها علي غرفة ابوها شايف سعاد في المطبخ اشرت لي بيدها وتتبسم ..المهم اشرت لي بيدي ودخلت علي عثمان سلمت عليهو ..
انا : بقيت كيف يا عثمان ان شاء الله كويس..
عثمان : الحمد لله ماشي في تحسن ..
انا : اها محتاج لي قروش ولا حاجة. ؟؟
عثمان : لا والله ناس الشركة نزلوني معاش وادوني حقوقي وهسي قاعدين نتصرف منها.. وشكرا ليك وانت ماقصرت معاي ..
انا : طيب انا بمشي ولو محتاج لي شي كلمني بالله ..
طلعت من غرفة عثمان ماشي علي الباب جات سعاد لاحقاني وتتبسم ..
سعاد : حراااام عليك ..يعني الا ارسل ليك رسالة حتي تجي عشان نشوفك..
عرفت انها الرسلت الرسالة من تلفون عثمان..
انا : معليش بس والله مشغول شوية عشان كدا ما بلقى طريقة اجيكم..
سعاد : خلاص يبقى تطل علينا كل يوم وتخلينا نشوفك عليك الله ..
انا : خير يا سعاد يلا سلام…
طلعت منهم وسعاد قدمتني لحد الباب وتعاين لي ساااي لحدي ما دخلت بيتنا ..
في البيت راقد في السرير كدا زهجااان وقرفان.. حسن اتصل علي ...
حسن : اها جاهز يا مان؟؟..
انا : جاهز في شنو يا حسن ؟؟
حسن : الليلة العزة و البرنامج بيبيتو يا خوة... اجهز انا جاي عليك ..
انا اصلا زهجان وقافلة معاي ومتشاكل مع نون قلت خلينا نمشي ونفرفش وننسى المشاكل…
قلت ليهو تعال يا زول تلقاني جاهز ومنتظرك..
المهم استحميت ولبست سريع..شوية كدا حسن جاني وطلعنا...وقبل ما نصل الشقة شلنا معانا طقة شواشو (شية) وحلويات وعصاير وشيشة ومعسل…
وصلنا الشقة ..لقينا ناس مها وشيري لسه ما جو.... حسن قال لي : مالك انت الليلة زهجان وسرحان كدا؟؟
انا : مشاكل في البيت بس يا عمك..
حسن : يا مان عيش البهجة وانسى همومك وخلينا نتم الشغل ..
انا : تمام يا زول ..
حسن : اسمع بعد ناكل انا بسوق شيري بخش بيها غرفة وانت ومها في غرفة وعليك الله ما داير ازعاج…
يلا شيري ومها جو داخلين الاتنين لابسات عبايات ... سلمنا عليهم وقالو جعانين ..قعدنا اكلنا طواالي وشربنا البارد .. حسن غمز لي شيري ..
شيري : مالك مستعجل يا معتز خلينا نتونس شوية…
حسن : كدا خلينا نتونس برانا لاني مشتاق ليك وبعدين نكمل ونستنا الجماعية ..
شيري : هيهي هيهي غايتو عليك جنس حركات..
وقامو دخلو الغرفة ..
مها عاينت لي كدا لقتني وشي حزين قامت جات قعدت جنبي ..
مها : مالك حزين ومهموم ووشك مخطوف كدا ؟؟
انا : من سهر امبارح وتعبان ومصدع ..
مها : طيب قوم ارح الغرفة وانا انسيك همومك واخلي الصداع يروح منك هههههه...
وقامت جرتني وساقتني بالرجالة ودخلنا الغرفة وقفلت الباب ..كرج كجك كرجك…
وملصت عبايتها وجاتني…
.
.
.
( كتير من الاحيان بنغلط او نعمل حاجات بدون قصد ونعلقها في شماعة المشاكل والظروف)..
يلا نتابع ونشوف الحصل شنو..
.
.
#يتبـــــع
