طلعت من الشغل وانا ما فاهم شي بس جريت لحقتهم في المستشفى لقيتهم دوبي وصلو ..شايف نون وشها شاحب وشكلها فاقدة الوعي ..بسرعة دخلناها للدكتور .. ..
الدكتور فحص عليها ..واداها دربات .. وقال اطلعو برا خلوها ترتاح ... المهم امها طلعت لكن انا نهائي ما طلعت.. قعدت في البلاط وقلت لو ما فاقت انا ما بقوم من هنا… طبعا كنت متوتر وحالتي صعبة شديد ....
المهم عدت ساعة ونون ما فاقت والاجهزة شغالة ..تيت ..تيت… تيت.. تيت.. بعد شوية الدكتور جا داخل وجا شايل معاهو اوراق… . قال لي انت بتقرب ليها ؟؟..
انا بتوتر: زوجها يا دكتور..
الدكتور : ومالك متوتر كدا ؟؟
انا : دي زوجتي يا دكتور والايام الفاتت دي كنا متخاصمين شوية عشان كدا ضميري معذبني…
الدكتور : لا حولاااا.. ليه مزعلها يعني انت ما خايف علي ال في بطنها ؟؟
انا : خايف عليها والله يا دكتور..
الدكتور : لا قصدي ال في بطنها ..
انا : ال في بطنها شنو يا دكتور طمني ؟؟
الدكتور : زوجتك حااامل يا سيد في الشهر التالت وبي توأم كمان…
طرت فوووووق ودقيت الواطة….طبعا غبيت وراسي لف وعيوني بقو بييييض و اتقلبو بقيت زي السحااار ...بعد 5 دقايق حتى بقيت اتذكر انا منو وشوية شوية بقيت استوعب كلام الدكتور ..
انا : عليك الله بطل هظار يا دكتور ..
الدكتور : والله جادي معاك ..مرتك حامل بي توأم واهظر معاك لشنو.!!
ما تتخيلو انا فرحت قدر كيف ...يااااااه ..لمن يبلغوك انو مرتك حامل المرة الاولي دي فرحتها براااها ....
قمت طلعت برا ..لقيت امي جات ومعاها سلمى وعيالها .. دايرين يتكلمو معاي ما اشتغلت بيهم جريت فووووو البقالة جبت صندوقين بارد واكياس حلاوة .... قابلوني امي وامها مالك يا ولد في شنو .. وانا مدمع : يمة نون حامل وبي توأم ؟؟؟
ايوي يوي يوي يووووووووووي والزغاريت دورت والمستشفي كلها جات عندنا وتعالو شوفو ..طبعا كانو مفتكرين انو في مرة ولدت لكن لمن عرفو انها حاامل بس ونحن فرحانين كدا.. قالو طيب لو ولدت حتعملو حفلة بي ود اللمين ولا شنو !!!
يلا وزعت للمتستشفي كلو بارد وحلاوة ... وجيت دخلت غرفة نون لقيتها صحت وامها وناس بيتنا كلهم معاها في الغرفة بس عاينت ليها بس ما قدرت اتكلم معاها .. لقيت حمودي واخوانو اي واحد شايل كيس حلاوة وقزازتين بارد وقاعدين ياكلو ...قلت ليهم دا شنو كملتو الحلاوة كلها ..حمودي قال لي : انت ما قاعد تجيب لينا ونحن البارد دا بنشربو بس لمن يجي ضيف في البيت ويخلي باقي نحن بنشربو عشان كدا هنا لقيناهو راااقد .... ياخ الولد دا فضيحة خلاص… مشيت قرصتو من اضانو جرا قعد جنب نون وخت يدو في بطنها وقال ليها يا نون انتي حتولدي كيف وبطنك ما منفوخة ؟؟؟… الغرفة كلها بقت تضحك ..انا مسكتو وسقتو معاي برا وجضمتو…
اها خرجونا من المستشفى… الدكتور قال لي مرتك دي عندها مضاعفات وما قاعدة تاكل حاول اعتني بيها يا زول ..قلت ليهو كويس من اليوم تاني بعتني بيها شديد…
طلعنا كلنا مشينا بيت ناس نون .... بعد وصلنا ضيفونا وناس امي قالو ماشين .. انا قلت ليهم بقعد يومين كدا بطمن علي نون وبجيكم… حمودي قعد يتبسم و قال لي : بس يا عادل انا قاعد لصقة معاك…
قلت ليهو لا امشي مع حبوبة… قال لي : وانت داير تقعد في الترطيبة دي براااااااااااك كدا يا عمك… ياخ تعبني شديد الولد دا ..بعد عزاب حتى مشى مع ناس امي…
بعد الجماعة طلعو ..قعدت مع نون ومسكت يدها .. قلت ليها..
انا : اولا معليش يا روحي علي التصرف العملتو معاك .. وثانيا الف مبروك وربنا يحلك بالسلامة ويحفظك لي ان شاء الله ..
نون : الله يبارك فيك حبيبي.. وانا كمان آسفة اعذرني اني ما راعيت لي غيرتك علي ..
انا قاطعتها :هسسسسس… خلينا في المهم من اليوم اكلك علي انا يا ستي ولازم تهتمي بي نفسك عشان خاطر التوأم ديل ..
نون : هيهيهيهي تعرف يا دولي انا لي كم يوم بشوف حاجات غريبة وبالليل بتجينا هلوسات و ما قاعدة انوم…
طبعا انا افتكرت كلامها دا عادي وما ختيت فيهو شي ف قلت ليها : من اليوم تاني اكلك ونومك علي يا ستي… .
يلا عدت الايام وفعلا نون بالليل ما بتنوم وتقوم تصرخ كتير وتكون عرقااانة .. الا اقوم اقرأ ليها قرآن في راسها حتى تنوم .. وبقيت يوميا اشغل القرآن ..بقت مرتاحة لكن مجرد ما القرآن يقيف هي بتتوتر ..المهم فترة كدا وارتاحت .. اها قلت ليها خلاص انا برجع البيت ب هناك وانتي خليكي مع امك ولمن ترتاحي شوية بجي بسوقك…هي رفضت وقال بتمشي معاي البيت…
يلا شلنا حاجاننا وجينا الكركور حقي… بس هي بقت تتدلع دلع شديد وتتوحم لي ( غايتو الوحم دا سمعنا عند السودانيات بس ..ما شفنا خواجية اتوحمت) .. اها كل يوم بقت تشغلا لي.. بعد ارجع من الشغل ..دايرة شية من اولاد امدرمان…بمشي بوووووو بجيبها وبجي وهي تاكل لقمة وتقول شبعت ..دايرة سمك من عوضية… بمشي بوووو بجيبو وبجي وتاكل لقة وتقول خلاص… دايرة دوم… .. بجيبو ليها تعاين للدومة وترميها… . دايرة طين من البحر الاحمر…لكن انا نقشت الحنك .. بمشي بجيب ليها طين من الشجرة الجنب الباب....وبقوليها دا جابوهو بالبص ليهو يومين .. دايرة موية من الزير حق اب جيقة بتاع الخضار لانو مويتو باردة… والمشكلة اب جيقة عندو كلب سعران… ف كيف امشي ..اها بشيل ليها موية من المزيرة حقت الجيران وبجيها ..…ومشكلتها كل يوم تخرشني بي اضافرها وتشرط ملابسي ولو لقتني نايم بتخنقني ..غايتو تعبت معاها تعب شديد لكن نعمل شنو عشان اول وحم ليها...
في يوم جاي ماري بالشارع لقيت.. سعاد واقفة جنب بابها وشكلها منتظراني لانو من شافتني قالت لي تعال خش ..دايراك ضروري.. لازم تدخل لانك قاعد تتهرب مني ولي فترة بقيف ليك جنب الباب بس ما عارفة انت بتجي بي وين…
انا : خير يا سعاد في شنو ؟؟
سعاد : الراجل طلع والبنات مشو الجيران ومافي زول في البيت تعال خاشي ...
انا : ما بخش لاني مستعجل قولي دايرة شنو يا سعاد؟؟؟؟
سعاد : انت عارف الراجل بقي كبير وصحتو تعبانة وما بقدر علي الشغل ...وهسي هو مشى يستلف لينا قروش .. ف دايرك تكلمو يخليني اشتغل لانو بيسمع كلامك....
انا : بس كدا خلاص بكلمو ليك مافي مشكلة.. تاني دايرة حاجة ؟؟
سعاد اتبسمت وقعدت تعمل حركات : الحاجة التانية خليها بعدين ...
يلا مشيت منها ورجعت. ليهم بعد المغرب لقيت عثمان جا ..قعدت اتكلمت معاهو . وشرحت ليهو انو سعاد لازم تشتغل عشان تقدرو تعيشو وانت زول كبرت خلاص وجسمك ما بيقوي علي الشغل وما عندك زول تتكل عليهو…
عثمان : والله يا عادل انا ما من انصار انو المرأة تشتغل لانو النسوان ديل ما مضمونات والواحدة تمشي تحتك بالرجال وتخرب ..
انا : ما كلهم كدا يا عثمان في نسوان ملتزمات والمرأة لو دايرة تخونك في بيتك ممكن تخونك بس انت اديها الامان واديها فرصة وخليك واثق فيها ودايما ما تحرمها من حاجة عشان ما تمشي تفتشها عند غيرك ... وما تخاف انا بشغلها معانا في المصنع ..والمصنع فيهو قسم خاص بالنساء فقط وعندهم ترحيل يعني من البيت للمصنع وبالعكس ..
المهم بعد تعب وتحنيس عثمان اقنع بالفكرة لانو محتاج انو سعاد تشتغل عشان تقدر توفر ليهم لقمة العيش ...
يلا اصلا المصنع شغلو بقى في زيادة يعني لازم زيادة الانتاج واشتغلنا ورديتين…اها سعاد اشتغلت في وردية الصباح وبرضو اتصلت علي .. البت السودانية الطالبة .. الكانت في المقهى وجات اشتغلت معانا ..والامور مشت تمام الحمد لله…
في يوم قاعد في المكتب سعاد جاتني ....
سعاد : يا عادل انا انسانة وعندي مشاعر واحاسيس ما ممكن انت تتجاهلني كدا ..
انا : في شنو يا سعاد ؟؟؟
سعاد : ياخ الراجل ليهو فترة ما اداني حقوقي وانا ما قادرة اتحمل ..وسيد الدكان كل يوم بعاكسني ..خلااااااص فاض بي...
انا : يا سعاد راجلك لسه قوي وخليهو يشفى من المرض شوية..
انا : ما هو يا اما انت او سيد الدكان لانو الراجل خلاص قطع وما بقدر يسوي شي…
المهم فكرت في الموضوع دا مسااااافة وقلت ليها : خلاص تمام انتي امشي البيت وانا بجيك بعدين…
هي طلعت وتتبسم ساي… انا قمت مشيت لي عصام في المكتب ...
انا : عصام كيف ؟؟
عصام : الحمد لله ..
انا : لسه زعلان مني يا عصام ؟؟
عصام : لا لا ازعل منك في شنو ..البت الكنت دايرها وطلعت زولة ماضيها سيء ..يعني مافي سبب يزعلني منك تاني…
انا : انت عرفت كي….. تررررررررن تلفوني ضرب ..
طلعتو لقيتها نون ..
انا : هلا حبيبتي ..
نون : عادل طلقني ..
.
.
.
#يتبــــــع
