انا : قولي بسم يا بت مالك ..
نون : ليه يا عادل تعمل فيني كدا انا سويت ليك شنو ؟؟؟
انا : في شنو كدا وريني ؟؟
وبقت تبكي وقفلت الخط… .
طوالي قمت من مكاني ومشيت البيت .. لقيتها قاعدة تلم في حاجاتها وبتبكي …
انا : نون مالك الحاصل شنو و دا شنو الكلام البتقولي فيهو دا ؟؟
نون : ماكنت مفتكراك تخوني في يوم من الايام ..انا ضحيت وعملت عشانك كتير يا عادل بس وريني انا ناقصة شنو عشان تمشي تخوني !!!
ختيت يدي في كتفها قامت نفضت يدي ..
انا : يا بت الناس كدا اهدي.. خيانة شنو والكلام الفارغ دا جبتي من وين ؟؟
نون مدت لي تلفونها وقالت لي امسك اقرا..
شلت تلفونها لقيت رسالة مرسلة من رقم عرفتو دا رقم مها ( عادل بخونك معاي وقبل كدا نام معاي في شقة ومعاهو واحد صاحبو )...
انا : يعني انتي صدقتي الكلام دا واي زول بقول ليك كلام بتصدقي ؟؟
نون : انا اتصلت عليها وحكت لي اي حاجة وانك كنت معاها في مقهى ومشيت معاها عيد ميلاد صحبتها وبيتو في شقة و دا اليوم الوديتني فيهو عند نااس امي…
انا : اولا البت دي شغالة معانا ..وانا كنت مع صاحبي وصاح كنا في مقهى وعيد ميلاد صحبتها لكن اصلو ما نمت معاها ولا خنتك ولا بفكر اخونك في يوم من الايام ..
نون : عادل لو سمحت .. ما دايرة معاك كلام تاني بس وديني بيت امي وجيب لي ورقتي…
قدر ما حاولت معاها اصلو ما سمعت الكلام بس راكبه راسها وطالبة الطلاق .. المهم سقتها وديتها عند امها قلت ترتاح شوية ..واصلا هي تقيلة باقي ليها حكاية شهر كدا وتكمل التسعة…ورجعت البيت وانا حيران وقافلة معاي ما عارف اسوي شنو واتصلت في تلفون مها لقيتو مقفول..
تاني يوم مشيت الشغل الصباح بدري .. وقفت منتظر مها ..لحدي ما جات..
انا : مها تعالي المكتب دايرك ..
ودخلت معاي المكتب ..
مها : اخيرا رضيت عني يا سي السيد ؟؟
انا : يسد نيتك… دا شنو السويتيهو دا… ما قلتي انتي زوله كويسة وطيبانة .. يعني دايرة تخربي لي بيتي ؟؟
مها : قلت بجيبك لو بي شيخ ابكر .!!.
انا : بطلي الفارغ البتقوليهو دا ..احسن ليك تضربي لي نون وتفهميها الحاصل كلو وتقولي ليها الحقيقة…
مها : لا ما بتصل عليها ..
ومرقت مشت ..
بقيت محتار اسوي شنو في مها دي ياخ مصيبة… طلعت لحقتها قلت اتكلم معاها شديد واحذرها يمكن تخاف.. لقيتها بتتكلم بي تلفون ...
مها بتوتر : امي مالا الحصل عليها شنو ... طيب هسي انتو في ياتو مستشفى… خلاص جاياكم..
شفتها متوترة كدا وقامت جارية قمت سالتها ..
انا : مالك يا مها خير في شنو ؟؟
مها : امي يا عادل وقعت وودوها المستشفى…
انا : طيب ارحكي انا بمشي معاكي يلا ..
وطلعنا سرعة مشينا المستشفى لقينا امها مرقدة في السرير ومركبين ليها الاجهزة ....مها وقعت في امها.. تبكي ..امي مالك ..امي مالك…اميييي…
الدكتور قاليها : عملنا ليها التحاليل والفحوصات ولمن تظهر بوريكم النتيجة…
قعدنا انتظرنا مسااافة حتي الدكتور جا قال لينا : للاسف امك عندها فايروس c ) فايروس التهاب الكبد الوبائي) .. ..
مها حضنت امها وبقت تبكي شدييد ..وانا اقول ليها استغفري يا بت قولي ربنا يشفيها ويعافيها ..
المهم.. قعدت معاهم فترة وبعداك قلت ليها انا برجع البيت لانو نون شوية تقيلة ما بقدر اخليها براها.. وامك ربنازيكتب ليها الشفاء العاجل…
مها : يا عادل انا اسفة والله حاولت اضرك واضر مرتك واخرب بيتك عشان بس كنت دايراك والله بس اعفي لي عليك الله..
انا: كدا الكلام دا هسي ما وقتو وربنا يشفي امك ويقومها بالسلامة.. وربنا يعمل الفيهو الخير ..
وطلعت مشيت… واتصلت علي نون بس ما ردت علي…
وانا ماشي علي البيت مريت بالشارع التاني ..بي بيت حليمة ..شايف الدخان طالع من بيتها… قلت يمكن في حريقة دقيت الباب ..جات حليمة طالعة وهي تتبسم ..
انا : الحريقة دي شنو يا حلوم وانتي بتضحكي كدا مالك؟؟
حليمة تتبسم : راجلي جا..
انا : راجلك منو؟؟
حليمة : ابو اولادي جا امبارح وقال كان ماشي ليبيا وبهناك داير يقطع المحيط بس قبضوهم الليبين وسجنوهم وعذبوهم .. بس هسي فكوهم..
انا : اهااا قولي كدا .. المهم. حمدلله علي سلامتو ..يلا انا بمشي وبجيكم. مرة تانية ..
ماشي علي البيت كدا طلعت سعاد من بيتهم ووقفت قدامي ..
سعاد : تعال خش كويس اللميت فيك ..
انا : طيب دقيقة بجيب حاجة من الدكان وبجيك ..
سعاد : سريع انا راجياك برا هنا ..
اها مشيت السوق سريع جبت لي كيس فيهو حاجات وجيت.. فعلا لقيت سعاد واقفة جنب الباب ..وجرتني ودخلتني جوا .. طبعا ريحتها خمرة بس….دايرة تقابضني قلت ليها دقيقة بس داير اقوليك حاجة ..
سعاد : اها مالك تاني ؟؟
انا : يا سعاد ياخ الكلام دا ما صاح وانتي زولة بي راجلك ما مفروض تعملي كدا..
سعاد : اسوي شنو طيب اذا كان راجلي كبير في العمر و ليهو شهور ما لمسني وانا انسانة لسه شابه و عندي رغبات ..
انا : راجلك ما كبير ولا اي شي هو لسه في الخمسينات ..ياخ انا عندي جدي عمرو سبعين سنة وعرس واحدة عمرها 20 جاب منها ولد ولمن اتوفى مرتو بكت عليهو بكى شديد ورفضت تتزوج تاني..سبحان الله.. يعني راجلك لسه فيهو باقي روح..لو دفرتي شوية بببقى كويس..
سعاد : يعني اسوي شنو ..
انا : الكيس دا فيهو فواكه وعسل ودخن وباسطة وزبيب ..دي اسمها مواد الطاقة. ..يلا دي تغذي بيها راجلك وان شاء الله تشوفي نتائج كويسة… بس الخيانة دي والله احساس مؤلم جدا اوع تخوني راجلك مهما كان وفي نسوان زيك بس صابرات عشان عيالهن..
سعاد : خلاص خير نجرب ونشوف ..
طلعت ومشيت خليتها .. لكن بعد ثلاتة يوم كدا جات المصنع تتبسم براها وريحتها دخان دخان....وقالت مية مية ..قلت ليها الحمد لله بس انتي تاني ما تقصري معاهو ....قالت كويس ...ومشت ..
عدت الايام ..
شيري حاولت تنتحر لانو كانت بتحب حسن شديد وحبتو بي صدق ..وحسن من يوم الشقة اختفى… عشان كدا شيري جاتها نفسيات وحاولت تقطع شرايينها و تنتحر بس لحقوها ..انا كلمتني مها ..طوااالي مشيت لي حسن في وحدتو ومحل شغلو ..لانو رقمو مقفول ..لقيتو وحكيت ليهو الحاصل علي شيري ..
حسن بالجد رغما عن انو زول سيء بس فيهو نخوة ورجولة ..
ف مشيت معاهو لي شيري .. وحكى ليها واعترف ليها بكل شيء وشيري بقت كويسة.. ورجعو لي بعض وبعديها بفترة اتزوجو ..وشيري ربنا هداها واتنقبت ..وهسي عايشين في امان الله....
وبالنسبة للعصابة قبضو المعلم وجماعتو ومعاهو الحبشية بتاعت المقهى هي البتجيب الزباين وبتوزع في المقهى ..وطلع وراهم زول رتبة كبيرة في البلد ..الزول الرتبة طلع منها عادي بس ديلك كتمت فيهم...
عصام طبعا ايام مها امها رقدة في المستشفي كنت بمشي معاهو وبنقنق ليهو في اضانو وكلمتو انو مها زولة طيبة.. وهي ما عندها علاقة بي امها ...وامها بعض المرض طبعا تابت وخلت شغلها السيء وبعد ما صحصحت شوية حجت بيت الله.. ومها وعصام اتزوجو ومبسوطين مع بعض ..
اها تاني في زول نسيناهو ..
طبعا راجل سلمى اختي وابو حمودي مغترب ف رسل ليهم مشو ليهو زيارة وقعدو معاهو ستة شهور ورجعو... عشان هو كمان قرر يرجع السودان نهائي ....وحمودي المعفن اب ريالة.. بعد قعد في السعودية ستة شهور ورجع طبعا غير لهجتو وبقى عامل فيها سعودي و يقول.. هلا حياك… ايش علومك… ترا مالي خلق لك… وش الهرجة…ما ابغى.. عندكم سيارة…ما ادري والله… الحين….. يلا حبوبتو بتقول الولد دا قاعد يرطن يقول شنو ..انا اتضايقت منو وشلت لي سوط اديتو ليك محطتين ..قال لي ..مالك يا بشر طلعت ميتينا زاتو.... قلت ليهو ..كلب خسيس ما عامل فيها سعودي…
نجي لي نون حبيبة قلبي وست ريدي وتوأم روحي ..طبعا مها اتصلت عليها وورتها الحاصل وانو هي كذبت عليها ...المهم الموية رجعت لي مجاريها واحسن من الاول ..وقلت ليها ..اصلا ما تفكري اني في يوم من الايام ح اخونك ..قالت لي ..انا واثقة فيك ..
يلا ولدت جابت تيمان ولد وبت الولد انا سميتو محمود والبت هي سمتها شذروان ..لكن المشكلة وين انو حبوبتها اللي هي امي ما بتقدر تنطق الاسم دا وتقول ..شكرطون ..شوان.. اها امي سمتها ام حقين.. قالت الاسم خفيف عليها وبتقدر تنطقو..
وحمودي الكلب مجرد ما نون تمت الاربعين ورجعت الكركور حقنا ..بقي طوالي يشيل شذروان ويقول ام حقين دي حقتي ..قلت ليهو .اول حاجة ام حقين دا تقولو حبوبتك بس وتانيا لمن تعرف تنطق اسمها بديك ليها ...قال لي ..يا خال اسمها صعب مروان ولا خزان ..ياخال ياخ ام مقين.. قلت ليهو ..وهسي بقيت تقول لي ياخال بعد كنت بتناديني بي اب زنقلة وتختف مني صحن الأكل وتجري بيهو . ....
اها الحمد لله عايشين في امان الله وشذروان (ام حقين) بتسلم عليكم ..
#النهاية..
اها مع الاستعجال ان شاء الله ما اكون نسيت حاجة..
#الخلاصة ..
_البريدك ممكن يعمل المستحيل عشان يسعدك .بس انت ما تخذلو..
_الاختيار اهم شي عشان الزول البتختارو هو البتعيش معاهو باقي حياتك بحلوها ومرها..
_ ما اي تعامل ظريف ولطيف نعتبرو حب لانو الزول التاني ظروفو ما معروفة يمكن مرتبط او يمكن ما عايز يرتبط ..فمشاعرنا ما نبذرها ساي ..بس ننتظر ونديها للزول البستاهلها..
_نحاول بقدر الامكان انو المشاكل الاسرية ما تأثر علي شخصيتنا وتخلينا نعمل حاجات غلط او نعمل حاجات نندم عليها فيما بعد ..
_صديق السوء بقودك الي فعل المعاصي الا اذا كنت عندك عزيمة قوية..
_ما تخون شريكك لانو لو حصل العكس اكيد ما حترضى بالكلام دا ..واصلا دا حرااااام..
_الطاقة مهمة جدا في الحياة الزوجية ..
_لو نسيت حاجة لخصوها براكم..
_وربنا يصلح حالنا واحوالنا جميعا ..ويحفظ بلادنا الحبيبة..
اقعدو عافية و اهم شي رايكم في الرواية
#يلا_تحياتي_ليكم_عدووول…
