(كوليا)
في منتصف الليل كان لؤي وأصحابة مجتمعين في دكان العم عبدالرزاق الي هو ابو لؤي وكان كل واحدفيهم يحكي قصص وكانت الجلسة حلوه ومبسوطين شباب الحاره
ابولؤي:يلا يا شباب انابروح للبيت الان الوقت تأخر تصبحوا ع خير الشباب:وانت من اهل الخير ياعم ابو لؤي : يا لؤي لا تتأخر وغلق الدكان بدري وادي للشباب عصير وكيك
لؤي:حاضر يا ابي ولا عليك ...... والشباب ما بدي لهم شي كل مره يخسرونا ومامنهم غير الخساره علي:والله غصب عنك عمي قالي ادي وانت ما عليك الا تنفذ كلامه الكل:ايوه والله انك عتدي ابولؤي:هههههههه.... الله معكم لا تتأخر يا لؤي
روح ابو لؤي للبيت الي يبعد عن البقالة دقائق بس
ام لؤي:وين ابنك؟
ابو لؤي:الناس يقولوا اهلآ وسهلآ نورت بيتك تعشيت
ام لؤي:انا اسفه بس انا قلقت ع ابني وحيدي الساعة وحده وانت روحت وحدك وابنك في البقالة ابولؤي:مالش صلي ع النبي الي يسمع عيقول ان ابنش عمره10 سنين لا تخافي هكذا
ابنش قده رجال وما يحصله الا كل خير ولو في شي ولا شي اصحابه معه والمسدس في الدرج ام لؤي:يالله .... نفسي افهم كيف انت هكذا ابنك وحيدك كل مره تخليه في الشارع للفجر وانت تروح تنام ولا همك شي وعادك تقولي ع المسدس وبعدها صح ان ابني عمره 20 بس في نظري عاده ابن سنه
ابو لؤي: استغفرالله العظيم كل يوم ونحنافي هذا الخبر ابنش ما رضي يروح واصحابه عنده ايش افعل اطردهم من البقالة ؟
ام لؤي :ايوا لو جلوسهم با يضر ابني امنعهم يجلسوا الولد مابينام خالص وكيف اهاليهم ما يسألوا عن اولادهم لهذي الساع
ابولؤي :والله ما باقي لش الا هذا تتحكمي في اولاد الناس كمان خلي ابنش ع راحته ولا تضغطي عليه ولا تضغطي عليا لو سمحتي
ام لؤي سكتت ماعرفت ايش ترد بس هي كانت تخاف ع ابنها قوي لأنه وحيدهاومالها غيره بس كانت تضغط ع لؤي قوي بتصرفاتها وتمنعه من كل شي هو يحبه وكانت تنزعج من تعلق لؤي باصحابه وكانت تضغط عليه بأشياء كثيرة لدرجة ان لؤي يحب يقضي معضم اوقاته في الشارع او في غرفته عشان يهرب من امه وتصرفها الي يزعجه معضم الأوقات
ام لؤي: والله لو يحصل لأبني شي ما أسامحك عمري
ابو لؤي:انتي من زمان وانتي تحسي ان ابنش با يحصله شي ومارضيتي تدخليه المدرسه الا بعدما وقع عمره9 وبالغصب من خوفش هذا الي ماله معنى استودعيه الله وان شاءالله ما يحصله شي بس انتي اصلآ بلا إيمان
ام لؤي:طبيعي اخاف ع ابني وحيدي
ابولؤي:ووحيدي انا كمان بس يا مره غلقي هذا الموضوع لانه ليل ما اشتي اتعصب وارفع صوتي قررت ام لؤي تسكت لأنها حست فعلآ بأن زوجها تعصب
في البقالة علي:يلا يا شباب كل واحديحكي لنا قصة مرعبة حصلت معه او مع غيره خالد:انا ما حصل معي اي موقف مرعب او سمعت عنه
هيثم:لا تصدقوا خالد هو يشتيي يغلق الموضوع لانه يخاف من هذي القصص
لؤي:انا عن نفسي ما اصدق هذي القصص
علي:إي نوع من القصص ما تصدقها؟
لؤي:قصص الجن وما جن
علي:بس الجن مذكورين في كتاب الله
لؤي:ونعم بالله انا اعرف انهم موجودين بس كل الي يقولك ان الجن ظهروا لهم كذابين الله عمل بيننا وبينهم عشاء وما نقدرنشوفهم وما يقدروا يعملوا فينا شي خالد:بس يقدروا يتلبسوا في اي شي ويظهروا لك مش شرط انهم يظهروا بهيئتهم الحقيقية..... اعوذبالله من الشيطان الرجيم هيثم:هههههههه قد قلتلكم انه جبان الكل :هههههههههههههههه علي:يلا احكوا لي قصص عنهم
خالد:انا با روح تأخر الوقت وابي بيتصل من أول والتلفون صامت الكل :هههههههههههه
هيثم:روح روح من غير اعذار خالد:تصبحوا ع خير
الكل:وانت من اهل الخير
علي:يلا احكوا
هيثم:انا بحكي لكم قصه حقيقية حصلت في قريتنا
لؤي:يلا ايش ورانا نسمع
هيثم:كان يماكان في قديم الزمان .. علي:بطل خباله واقطب مش وقت اسبيستون
الكل:ههههه
هيثم :كان في موكب زفاف جاي لقرينا في الليل واغاني ورقص وجنان تقريبآ كانوا حوالي 8 سيارات ووقفوا في مكان معروف انه مكان الجن ما اتذكر ليش وقفوا في ذيك المنطقة ولكن حصل شي محد قدر يفسرة للأن
علي:ايش حصل؟
هيثم:في 3 رجال اختفوا
لؤي:كيف اختفوا؟
هيثم:تذكرت الان ليش وقفوا في هذي المطقة كانوا محصورين والثلاثه الي نزلوا اختفوا بعد ما سمعوا الباقين اصوات تخوووووووف ما قدروا ينزلوا من السيارة من كثر الخوف الي كان فيهم بسبب الأصوات الي سمعوها فقرروا يهربوا من المكان بس وهم يشغلوا السيارات كان في شي معلق خلف كل سيارة وكانوا اشكال غريبة محد قدر يركز ع الاشكال بس قالوا كان في احسام تطير
علي :اعوذبالله من الشيطان الرجيم ... وقفت شعر جسمي لؤي :كمل كمل خلينا نسمع الخرط هيثم:طيب ..... وبعدها حاولوا يشغلوا السيارات وتحركوا بسرعه بس للأسف انقلبت السيارات بسبب السرعة والظلام وما عاشوا الا بعضهم وتقريبآ ماتوا 21شخص نسوان ورجال لؤي:طيب لو كان الطريق ظلام كيف شافوا الجن الطائر؟
هيثم:اساسآفي هذي المنطقة لو تمر اي سيارة مضويه تطفي وما تشتغل الا بعد ما تخرج منها وما اظن ان الي نجوا من الموت بايكذبوا وهذي مش اول حادثه تحصل هناك لؤي:من الطبيعي تحصل حوادث بسبب الظلام وانا عن نفسي ما اصدق هذي الخزعبلات
علي:طيب و3 المفقودين فسرلي وين راحوا
لؤي: ايش دراك انهم مفقودين لوكانوا صبروا وانتظروهم كانوا لقوهم بس اول ما سمعوا الأصوات هربوا والله واعلم ايش هي الأصوات الي سمعوها يمكن صوت كلب او ذئب او صرصور الليل ههههههههههه
علي:انا با قولك قصة با تصدقها اكيد لؤي:ما اظن اني ممكن اصدق هذي الاشياء
هيثم:انت لازم نأخذك للبيت المسكون الي في الحارة الي ورانا محد يقدر يقرب من هذيك الحارة بسبب الي يحصل هناك اكيد بعدها با تصدق
لؤي:هيا قوموا الان نسير.............
